1 Ɛhe si ne, ofili Atene hɔle Korinto. 2 Na onwuni Yudaniɛ bie bɔ bɛfrɛ Akwila wɔ berɛ, né ɔte Pontoniɛ. Bekye bɔ ne ɔne ɔye Prisila afi Italy awa berɛ ɔ, ofikyɛ ne Klaudio ahyɛ mmeraa kyɛ, Yudafoɛ namukoraati fí Roman. Yeti Paul hɔle bɛ berɛ, 3 na ɔnate kyɛ ɔne bɛ yɛ adwuma kõ nati, ɔtenane b'awuro ne bɛ yɛle adwuma, ofikyɛ bɛ koso, ne bɛyɛ tɛnt nwo adwuma. 4 Na homeda biala, né ɔka edwirɛ ne wɔ sua bɔ beyia nu nanu, na ɔhane edwirɛ ne maa Yudafoɛ ne Greekfoɛ lɛ lili. 5 Mmerɛ bɔ Silas ne Timoteo fili Makedonia wale ne, Paul fale ye mmerɛ pee hane edwirɛ ne, na olili adanzeɛ hyirele Yudafoɛ nemɔ kyɛ, Yesu yeɛ ole Kristo ne. 6 Na mmerɛ bɔ bɛdwɔso betiale ye, na bɛpepɛle ye nzoaa ne, ɔporo-porole ye atadeɛ nu ha hyirele bɛ kyɛ: "Ɛmɔ mogya bɔ ɛmɔ ti so. Me de, menni ye nwo fɔ. Na ofi ɛnɛ bɔ ɔkɔ ne, mekɔ maen-maen nanufoɛ ne berɛ." 7 Yeti ofili berɛ hɔle biaa bie bɔ ɔsõ Nyameɛ bɔ bɛfrɛ ye Titio* Yusto awuro; né ye awuro ne wɔ sua bɔ beyia nu nanwo berɛ pɛɛ. 8 Na Krispo bɔ ɔte panyi wɔ sua bɔ beyia nu nanu ne, ɔne ye awurofoɛ mukoraati lɛle Awurade lili. Na Korintofoɛ bɔ bɛtele edwirɛ ne koso, bɛ nu pee lɛ lili, na bɛbɔle bɛ asu. 9 Kɔngɔen ne, Awurade ha hyirele Paul wɔ anisoadehu nu kyɛ: "Nnɛsuro, kɔ so dwudwo, nnɛka wɔ noa to nu, 10 ofikyɛ mmoka wɔ so, na ebiala ngɔhora ngɔyɛ wɔ hwee; na nne mmeni pee wɔ kuro he anu." 11 Yeti ɔtenane berɛ afoɛ kõ ne bosome nzia, na ɔhane Nyameɛ dwirɛ ne hyirele bɛ.

12 Mmerɛ bɔ né Galio te amrado wɔ Akaia ne, Yudafoɛ nemɔ yɛle kõ, na bɛhwene Paul bɛhɔle nekaa bɔ bɛdi dwirɛ ne, 13 yeɛ bɛhane kyɛ: "Sɔ biaa he laka-laka mmenia maa bɛfa atee bɔ otia mmeraa so bɛsõ Nyameɛ." 14 Na Paul yɛle kyɛ ɔye ye nwo noa ne, Galio ha hyirele Yudafoɛ nemɔ kyɛ: "Yudafoɛ, sɛ ɔte nzɛmmɔne anaa bɔne pirikua bie de a, ahaa ngotie ɛmɔ. 15 Nakoso ɔnate kyɛ ɔte edwirɛ, dumaa, ɔne ɛmɔ mmeraa nanwo aporowaa nati, ɛmɔ bɔbɔ ɛmɔha ye nwo dwirɛ. Menguro kyɛ ngobu sɔ nningyein nemɔ nwo atɛn." 16 Yeti, ɔfoane bɛ fili nekaa bɔ odi dwirɛ ne. 17 Na ɛlɔen namukoraati tuli bɛ nwo guale Sostene bɔ ɔte panyi wɔ sua bɔ beyia nu naso, na bɛbole ye wɔ nekaa bɔ bɛdi dwirɛ ne, nakoso Galio anyɛ ye nwo hwee.

18 Yeti Paul tenane berɛ kaa ne, ɔne aliemaa nemɔ lili ngraa, na ɔfale hyep hɔle Siria. Né Akwila ne Prisila boka ye so. Odwuli Kenkrea ne, ɔtetele ye ti ne maa ɔhɔle ase, ofikyɛ ne waha ndaen. 19 Bɛdwuli Efeso ne, ɔyakyile bɛ berɛ. Na ye de, ɔhɔle sua bɔ beyia nu nanu, na ɔne Yudafoɛ ne susuli nningyein nwo. 20 Ɔwɔ nu, bɛsrɛle ye kyɛ ɔne bɛ tena berɛ kaa, nakoso wambene, 21 mmom ɔne bɛ lili ngraa, na ɔha hyirele bɛ kyɛ: "Sɛ ɔte Awurade pɛ a, ngosa ngɔwa ɛmɔ wa bieku." Na ɔfale hyep wɔ Efeso hɔle.

22 Odwuli Kaesarea ne, ɔhɔle Yerusalem ɔɔhyeale asafo bɔ ɔwɔ berɛ ne, yeɛ osa hɔle Antiokia. 23 Ɔtenane berɛ kaa, afei ohyinini Galatia ne Frigia mandam nanu hyɛle asuafoɛ namukoraati nguraen.

24 Ná Yudaniɛ bie bɔ bɛfrɛ ye Apolo, bɔ ofi Alɛzandria wale Efeso. Né ye noa ate paa, na ne ɔse tworɔnzɛm nanu koso. 25 Né batete sɔ brienzua he wɔ Awurade atee so, na ɔnate kyɛ né honhom krongron wɔ ye so nati, ɔhane Yesu nwo dwirɛ hyirehyirele nu pɛpɛɛpɛ. Nakoso Yohane asubɔ ne ngome yeɛ ne ɔse ɔ. 26 Ɔhyɛle yebo fale akukuduro dwudwole wɔ sua bɔ beyia nu nanu, na mmerɛ bɔ Prisila ne Akwila tele bɔ ɔka ne, bɛmaa ɔɔbokale bɛ so, na bɛhyirehyirele Nyameɛ atee nanu yé bɛhyirele ye. 27 Né Apolo pena kyɛ ɔkɔ Akaia, yeti aliemaa nemɔ hworɔle krataa bɛɛmane asuafoɛ nemɔ kyɛ, bɛle ye kama. Mmerɛ bɔ odwuli dɔ ne, ɔbokale bɛ bɔ bɛnate Nyameɛ adom so baayɛ gyidifoɛ ne paa. 28 Ofikyɛ ɔfale akukuduro lale ye ali wɔ badwanu kyɛ Yudafoɛ nemɔ amini, na ɔmaa bɛnwuni ye wɔ Tworɔnzɛm nanu kyɛ, Yesu yeɛ ole Kristo ne.