1 Yɛ ne bɛ tetele nu ne, yɛfale po so yɛwale Kos tee. Na aleɛ hene ne, yɛhɔle Rodo, na ye si ne, yɛhɔle Patara. 2 Yɛnwuni kyɛ hyep bie pɛ nu kɔ Foinike, yeti yɛfole. 3 Yɛdwuli nekaa bie, né yɛ nye ta Kipro supɔ ne, na yɛyakyile ye wɔ bɛen so yɛpɛle nu yɛhɔle Siria, na yɛɛgyinane Tiro. Ɛberɛ yeɛ né hyep ne baaye ye nningyein ne ɔ. 4 Yeti yɛpenane aliemaa mɔ bɔ bɛwɔ berɛ ne, na yɛ tenane berɛ ɛlɛsoo. Ná bɛnate honhom naso bɛha bɛhyirele Paul alaa kyɛ, nnɛmaa ɔkɔ Yerusalem. 5 Yɛ mmerɛ ne sone ne, yɛtoale y'akwanduo naso. Na bɛ mukoraati, bɛne bɛ ye ne bɛ mmaa mɔ somane yɛ atee tonn maa yɛfili kuro nanu. Na yɛ buli ndwerɛ wɔ po ne noa yɛbɔle mbaeɛ. 6 Yɛne bɛ lili ngraa yiele ne, yɛɛfole hyep ne, na bɛ koso bɛhɔle awuro.

7 Yɛtu yɛfili Tiro ne, yɛfale po so yɛwale Ptolemai. Na yɛ hyeale aliemaa mɔ, yeɛ yɛtenane bɛ nwo berɛ ɛlɛho. 8 Aleɛ hene ne, yɛfili berɛ yɛhɔle Kaesarea, na yɛɛtenane Filipo bɔ ɔka nzɛmba n'awuro, né ɔboka mmrienzua nzoo naso. 9 Né ole mmaa mmrasua asigyafoɛ nná, bɔ bɛhyɛ ngɔm. 10 Yɛlili ngyẽa kaa wɔ berɛ ne, diifoɛ bie bɔ bɛfrɛ ye Agabus fili Yudea wale. 11 Ɔwale nekaa bɔ yɛwɔ ne, na ɔfale Paul bɛlɛt* kyekyele ye sa na ye gya, yeɛ ɔhane kyɛ: "Bɔ honhom krongron ne aha ɛhe: ‘Sɔa yeɛ Yudafoɛ bɔ bɛwɔ Yerusalem ne kɔkyekye brienzua bɔ ye bɛlɛt ɛhe ne, na bɛkɔfa ye bɛkɔma maen-maen nanufoɛ ne.’" 12 Yɛtele ye sɔ ne, yɛne mmenia bɔ bɛwɔ berɛ namukoraati srɛle Paul kyɛ, nnɛmaa ɔkɔ Yerusalem. 13 Nakoso Paul hane kyɛ: "Nzuati yeɛ ɛmɔsu maa m'abanu bu ne? Awurade Yesu dumaa ti, mayɛ krado kyɛ bɛkyekye me wɔ Yerusalem. Na sɛ ɔba kyɛ nwu po a, maboaboa me nwo dada." 14 Mmerɛ bɔ yɛnwuni ye kyɛ, bɔ waha ala yeɛ waha ne, yɛyakyile, yeɛ yɛhane kyɛ: "Bɔ Awurade kuro yeɛ ɔyɛ berɛ ɔ."

15 Ngyẽa hemɔ si ne, yɛ boɔboale ye nwo, na yɛsili nu yɛhɔle Yerusalem. 16 Asuafoɛ bɔ bɛwɔ Kaesarea ne bie ne yɛ hɔle, na bɛfale yɛ bɛhɔle Mnason bɔ ofi Kipro ne berɛ. Ɔte asuafoɛ bɔ bɛli moa ne bie, na ye awuro yeɛ yɛɛtenane ɔ.

17 Yɛdwuli Yerusalem ne, aliemaa nemɔ lɛle yɛ kama. 18 Aleɛ hene ne, Paul ne yɛ hɔle Yakobo berɛ, né mbanyi namukoraati wɔ berɛ. 19 Ɔhyeale bɛ yiele ne, ɔhane nningyein bɔ Nyameɛ nate ye som adwuma naso ayɛ ye wɔ maen-maen nanu ne ngoko-ngoko hyirele bɛ. 20 Bɛtele ne, bɛhyɛle Nyameɛ anuonyam. Nakoso bɛha bɛhyirele ye kyɛ: "Aliemaa, nnaa wɔ nye tua Yudafoɛ apee pee bɔ baayɛ gyidifoɛ ne, na bɛ mukoraati koso, mmeraa ne nwo hia bɛ paa. 21 Na batete kyɛ, ɛka kyire Yudafoɛ bɔ bɛwɔ maen-maen nanu ne kyɛ bɛyakyi Mose mmeraa ne, ná esa ka kyire bɛ kyɛ nnɛmaa bɛpɛ bɛ mmaa mɔ toa, na nnɛmaa bɛdi amammerɛ nemɔ so. 22 Ye de, nzu yeɛ yɛkɔyɛ ɔ? Ofikyɛ kyɛbɔ ɔte biala ne, bɛkɔte kyɛ awa. 23 Yeti, yɛ bɔ yɛka yɛkyire wɔ ne. Yɛle mmrienzua nná bie wɔ wa bɔ baha ndaen. 24 Ɛne sɔ mmrienzua nemɔ hɔ, na ɛmɔɔte ɛmɔ nwo, na tua bɛ nwo kerɛ ma bɛtete bɛ ti. Ɛhene kɔmaa ebiala konwu kyɛ, bɔ bɛkeka bɛfa wɔ nwo ne, ɔtte nahorɛ, na wɔ koso ɛfa mmeraa nanu dwirɛ yɛ adwuma. 25 Ná maen-maen nanufoɛ bɔ baayɛ gyidifoɛ ne de, gyinayɛ bɔ yasi ne, yahworɔ yaama bɛ kyɛ, bɛhwe bɛ nwo bɛfi aleɛ bɔ bafa babɔ afɔleɛ bama bosoen, mogya, ngaka bɔ bahu bɔ bambɛ bɛ ti, ɔne adwamammɔ nwo." 26 Yeti aleɛ hene ne, Paul fale sɔ mmrienzua nemɔ, na ɔne bɛ tele bɛ nwo, yeɛ ɔhɔle asɔre awuro berɛ, na ɔmaa bɛnwuni kyẽa bɔ bɛkɔte bɛ nwo bɛkoyie, ná bɛ nu biala abɔ ye afɔleɛ ne.

27 Ɔka kaa maa ɛlɛsoo ne so ne, Yudafoɛ bɔ bɛfi Asia ne nwuni ye wɔ asɔre awuro berɛ, bɛnwuni ye ne, bɛmaa mmenia ne yɛle bagya-bagya, na bɛhyele Paul, 28 yeɛ bɛteɛteane nu kyɛ: "Israel mmrienzua, ɛmɔbra! Sɔ biaa he yeɛ okyirekyire ebiala wɔ nekaa biala kyɛ, bɛdwɔso betia yɛ mmenia, yɛ mmeraa, ɔne ɛwa ne. Na afei de, wafa Greekfoɛ wawa asɔre awuro wa waagua nekaa krongron nanwo fiɛ." 29 Né bali moa banwu Efesoniɛ Trofimo wɔ kuro nanu, na né b'adwene yɛ bɛ kyɛ Paul afa ye ahɔ asɔre awuro berɛ. 30 Kuro nanu mukoraati yɛle bagya-bagya, na mmenia namukoraati tuli mirika bɛɛsɔle Paul nu, na bɛhwene ye bɛfili asɔre awuro berɛ, yeɛ bɛtole anoa nanu ɔ. 31 Ahaa bɛku ye, nakoso né sahene ne ate ye dada kyɛ, Yerusalem ayɛ bagya-bagya. 32 Na ɛberɛ ala, ɔfale sogyafoɛ mbanyi ne sogyafoɛ wale bɛ so. Bɛnwuni sahene ne né sogyafoɛ nemɔ ne, bɛyakyile Paul bolɛ. 33 Yeɛ sahene ne hɔle berɛ ɔɔhyele ye, na ɔhyɛle kyɛ bɛfa kyenyi nyɔ bɛkyekye ye. Na obisale bɛ sona-horɛ bɔ ɔte, ɔne bɔ wayɛ ɔ. 34 Na mmenia bɔ bɛwɔ berɛ ne hyɛle yebo teɛteane nu, ebie ka ɛhe a, né sona foforɛ aha ɛhe. Basabasa nati, wannwu edwirɛ nanu yé, yeti ɔhyɛle kyɛ bɛfa ye bɛhɔ nekaa bɔ sogyafoɛ ne te ne. 35 Mmerɛ bɔ odwuli stɛps naso ne, basabasa bɔ ne mmenia ne yɛ nati, né odikyɛ sogyafoɛ nemɔ soa Paul, 36 ofikyɛ né ɛlɔen ne li ye si bɛteɛtea nu kyɛ: "Ɛmɔhu ye!"

37 Mmerɛ bɔ sogyafoɛ ne yɛle kyɛ bɛfa ye bɛkɔ nekaa bɔ bɛte ne, Paul ha hyirele sahene ne kyɛ: "Ngɔhora ngɔha edwirɛ bie ngohyire wɔ?" Yeɛ ɔhane kyɛ: "Ɛte Greek? 38 Nná wɔ yeɛ ɛle Egyptniɛ bɔ mmerɛ bie ɛmaa mmenia tele atua, na ɛlili atuturafoɛ 4,000 nyunu maa bɛhɔle ɛserɛ naso ne?" 39 Paul yele ye noa kyɛ: "Nahorɛ dwirɛ yeɛ ole kyɛ, nde Yudaniɛ, na mvi Tarsus bɔ ɔwɔ Kilikia ne, kuro bɔ wale dumaa paa nanu. Yeti mesrɛ wɔ, ma mene mmenia ne dwudwo." 40 Mmerɛ bɔ ɔmane ye nwo atee ne, Paul gyinane stɛps naso, na ɔmane ye sa so hyirele mmenia ne. Na ɛberɛ yɛle dinn, yeɛ ɔfale Hebri dwudwolɛ ha hyirele bɛ kyɛ: