1 Na kyẽa bɔ ne bɛdi Pentekoste Afahyɛ ne, né bɛ mukoraati bayia nu wɔ neka-horɛ. 2 Komapɛ, dede bie fili anwuro wale, né dede ne te kyɛ mvrama bɔ ye noa yɛ se paa, ná ɔgyegyele awuro berɛ mukoraati. 3 Na bɛnwuni see bɔ wayɛ kyɛ temverema, kyɛ wayeye ngoko-ngoko waagyina bɛ nu biala ti afia. 4 Na honhom krongron ne yili bɛ nu biala tɛkyɛ, na bɛhyɛle yebo kyɛ bɛka dwudwolɛ foforɛ, kyɛbɔ honhom ne fa mane bɛ kyɛ bɛha ne.

5 Sɔ mmerɛ ne, né Yudafoɛ bɔ bɛmva bɛ som benni angorɛ, bɔ bɛfi aseɛ he aso nekaa biala awa Yerusalem. 6 Yeti mmerɛ bɔ dede ne wale ne, mmeni lɔen he amukoraati wale berɛ, na bɔ ne ɔkɔ so ne maa bɛ nwo dwirili bɛ, ofikyɛ bɛ nu biala tele kyɛ bɛka ye kuro dwudwolɛ. 7 Nahorɛ nu, bɛ nwo dwirili bɛ paa, na bɛhane kyɛ: "Bɛ bɔ bɛdwudwo ne, aso bɛ mukoraati bɛtte Galileafoɛ? 8 Ye de, ɔwale ye sɛ, yeɛ yɛ nu biala te ye bɔbɔ ye kuro dwudwolɛ ne?* 9 Partifoɛ, Mediafoɛ, Elamfoɛ ne bɛ bɔ bɛtete Mesopotamia, Yudea, Kapadokia, Ponto, ne Asia, 10 Frigia ne Pamfilia, Egypt ne Libia maen ne nekaa bɔ opingye Kirene, ne ɛwɔfoɛ bɔ bɛfi Roman, 11 Yudafoɛ ne bɛ bɔ basakra baayɛ Yudafoɛ, Kretafoɛ ne Arabfoɛ, yɛte kyɛ bɛfa yɛ bɔbɔ yɛ kuro dwudwolɛ bɛka Nyameɛ nningyein bɔ ɔyɛ nwanwa nanwo dwirɛ." 12 Bɛ nwo dwirili bɛ paa, na né wabɔ bɛ pusa; ná ne bɛ bisa bɛ nwo kyɛ: "Nzu yeɛ ɔkɔ so ne?" 13 Nakoso ebiemɔ gorole bɛ nwo kyɛ: "Nzãa fɛɛ-fɛɛ yeɛ wabo bɛ ne."

14 Ná Petro ne buru-ne-kõ ne dwɔso gyinane, na ɔfale konviɛ bɔ enu la berɛ hane kyɛ: "Yudea mmrienzua ne ɛmɔ bɔ ɛmɔte Yerusalem mukoraati, mepena kyɛ ɛmɔnwu ye, na ɛmɔyɛ asoɛ betie me. 15 Sɔ mmenia hemɔ bolle, kyɛbɔ ɛmɔ adwene yɛ ɛmɔ ne, ofikyɛ bekye bɔ wabɔ ngyerɛmɔ 9:00* ɔ. 16 Mmom, ɛhe yeɛ diifoɛ Yoel hane ye nwo dwirɛ ne, ɔhane kyɛ:

17 ‘Nyameɛ nwa, "Awieɛ mmerɛ nanu ne,

ngohwie me honhom ne bie ngogua mmenia ahoroɛ mukoraati so;

Na ɛmɔ mmaa mmrienzua ne ɛmɔ mmaa mmrasua kɔhyɛ ngɔm,

ɛmɔ mmrandeɛ konya anisoadehu,

ná ɛmɔ mbanyi nemɔ ahe nnaleɛ.

18 Ná me ngoaa ne me mmaawa koso,

ngohwie me honhom ne bie ngogua bɛ so sɔ mmerɛ ne,

na bɛkɔhyɛ ngɔm.

19 Ngɔmaa anwanwadeɛ kɔwa ewienu wɔ anwuro,

ná nzɛngyerɛneɛ awa aseɛ so wɔ ase;

mogya, see, ne nwosina munguu kɔwa.

20 Eyia kɔkakyi awosii,

ná ɛsraen akakyi mogya,

kora né Awurade anuonyam kyẽa pirikua ne awa.

21 Ná ebiala bɔ ɔkɔbɔ Awurade dumaa ne,

okonya ngoa." ’

22 "Israel mmrandeɛ, ɛmɔtie ɛhe: Kyɛbɔ ɛmɔ bɔbɔ ɛmɔse ne, Yesu bɔ ofi Nazerɛt ne te ebie bɔ Nyameɛ bɔbɔ yele ye maa ɔyɛle nningyein mbiri-mbiri, anwanwadeɛ, ne nzɛngyerɛneɛ wɔ ɛmɔ nu. Ná Nyameɛ nate nningyein bɔ ɔyɛle naso yele ye nwo ali hyirele ɛmɔ. 23 Sɔ biaa he yeɛ ɛmɔ yele ye bɛmane ne. Na sɔ ala yeɛ né Nyameɛ abɔ ye ti anu ɔ, na ne ɔse ye dadaada kyɛ sɔ yeɛ okosi ɔ. Na ɛmɔ maa mmeratofoɛ bɔle ye asɛnnua nu bɛhuni ye. 24 Nakoso Nyameɛ tingyele ye, na olɛle ye fili ewue yealɛ nu, ofikyɛ né ewue ngɔhora ngɔkyekye ye. 25 Ye yeɛ David hane ye nwo dwirɛ kyɛ:

‘Awurade wɔ me nyunu daa,

Ɔwɔ me sa famaa so, yeti me nwo ngɔwoso me lle.

26 Ɛhene ati m'ahone nye gye, na me temverema di ahurusi;

na ngɔtena anidasoɛ nu,

27 ofikyɛ, ɛngɔyakyi me kra wɔ kumaa nu,

na bɔ odi nahorɛ ma wɔ ne, ɛngɔma ɔngɔporɔ.

28 Amaa manwu ngoa atee ne;

Na ɛkɔmaa ngonya anigye paa wɔ wɔ nyunu.’

29 "Aliemaa mɔ, ngɔhora ngɔha ye pen ngohyire ɛmɔ kyɛ David wuli maa besiele ye, na ɔbaadwu ɛnɛ, ye asieleɛ tɛ́ wɔ yɛ nwo wa. 30 Ɔnate kyɛ ne ɔte diifoɛ, na né ɔse kyɛ Nyameɛ aha ye ndaen kyɛ ɔkɔfa ye bosoniɛ bie kosie ye bia so nati, 31 oli moa nwuni Kristo bɔ ne bɛkotingye ye bɛkofi ewue nu ne, na ɔhane ye nwo dwirɛ kyɛ, banyakyi ye wɔ kumaa nu, na ye nwonaen koso amborɔ. 32 Yesu he yeɛ Nyameɛ tingyele ye ne, na yɛ mukoraati yɛdi ɛhe anwo adanzeɛ. 33 Ná ɔnate kyɛ bama ye so bafa ye batena Nyameɛ sa famaa so, ná ye sa aha honhom krongron bɔ Baba ne fa hyɛle ye bɔ nati, wahwie bɔ ɛmɔnwu ye, ná ɛmɔte ne wagua yɛ so. 34 David de, wangɔ anwuro, nakoso ɔhane kyɛ,

‘Awurade ha hyirele me wura kyɛ:

"Tena me sa famaa so

35 kodwu kyɛ ngɔfa w'atamfo

ngogua wɔ gya bo."’

36 Yeti, odikyɛ Israel awuro mukoraati nwu ye pefee kyɛ, Yesu bɔ ɛmɔ bɔle ye asɛnnua nu ne, Nyameɛ ayɛ ye Awurade ne Kristo."

37 Mmerɛ bɔ bɛtele ɛhe ne, bɛyɛle basaa, na bɛbisale Petro ne asomafoɛ bɔ baha ne kyɛ: "Aliemaa mɔ, nzu yeɛ yɛyɛ ɔ?" 38 Petro ha hyirele bɛ kyɛ: "Ɛmɔsakra, na ɛmɔma bɛbɔ ɛmɔ nu biala asu wɔ Yesu Kristo dumaa nu, na wamaa ɛmɔ anya bɔne fakyɛ. Ná ɛmɔ konya honhom krongron bɔ bɛfa bɛkyɛ mbaen ne bie. 39 Ofikyɛ bɔhyɛ ne wɔ berɛ ma ɛmɔ, ɛmɔ mmaa mɔ, ne bɛ bɔ bɛwɔ dede namu, ɔne ebiala bɔ Awurade yɛ Nyameɛ kɔfrɛ ye kɔwa ye berɛ ne." 40 Na ɔhane edwirɛ foforɛ fa lili bɛ adanzeɛ, na otuli bɛ fo kyɛ: "Ɛmɔma bɛle ɛmɔ bɛfi aworɛ ndoɔtoasoɛ bɔ wahyea he anu." 41 Yeti bɛ bɔ bɛfale anigye bɛlɛle ye dwirɛ ne, bɛbɔle bɛ asu. Na sɔ kyẽa ne, mmenia kɔyɛ 3,000 yeɛ bɛɛbokale bɛ so ɔ. 42 Na bɛhɔle so betiele asomafoɛ ne ngyerɛkyerɛ ne, bɛfale nnamvoa, bɛdidili, na bɛbɔle mbaeɛ. 43 Esuronyi hane ebiala, ná asomafoɛ ne hyɛle yebo yɛle anwanwadeɛ ne nzɛngyerɛneɛ pee.

44 Né bɛ bɔ baayɛ gyidifoɛ namukoraati wɔ neka-horɛ, na bɛfale bɛ nningyein mukoraati bɛbɔle nu, 45 na bɛtɔnene b'ahodeɛ ne b'agyapadeɛ, na bɔ benyane ye ne, bɛhyɛle maa ebiala nyane bɔ ohia ɔ. 46 Daa biala, né bɛfa adwene kõ bɛkɔ asɔre awuro berɛ, bɛbɔnu bɛdidi wɔ b'awuro, bɛfa anigye ne ahone bɔ enu te bɛbɔnu bɛdidi, 47 bɛye Nyameɛ ayɛ, na benyane mmenia namukoraati nyunu adom. Na daa biala, né Awurade kɔ so fa bɛ bɔ odɛ bɛ ngoa ne bie baboka so.