ASOMAFOƐ NYUMAA 11

1 Afei asomafoɛ ne aliemaa mɔ bɔ bɛwɔ Yudea ne tele kyɛ, maen-maen nanufoɛ ne koso alɛ́ Nyameɛ dwirɛ ne. 2 Petro sa wale Yerusalem ne, bɛ bɔ basɔ toa pɛlɛ nu twann ne né ye nyane dwudwolɛ, 3 na bɛbisale ye kyɛ: "Nzuati yeɛ ɛhɔle bɛ bɔ bɛpɛlle bɛ toa ne awuro, ná ɛne bɛdidili ɔ?" 4 Yeti, Petro hyɛle yebo hane bɔ ɔhɔle so namukoraati hyirele bɛ kyɛ: 5 "Né nwɔ Yopa kuro nanu mebɔ mbaeɛ, yeɛ nyane anisoadehu ɔ; ná nwuni nikye bie wɔ me nye so te kyɛ ɛtena kandinga bɔ basosɔ ye noa nná nanu bɛyakyi nu maa ofi anwuro ba ase, na ɔwale me nwo berɛ. 6 Mmerɛ bɔ nneane ye yé ne, nwuni aseɛ he aso ngaka bɔ bɛ gya nná, ngaka bɔ bɛ nwo yɛ suro, ngaka bɔ bɛkõngõ, ɔne ewienu nnomaa wɔ nu. 7 Yeɛ ndele kyɛ konviɛ bie ka kyire me kyɛ: ‘Petro, dwɔso, na ku bie di!’ 8 Nakoso ngane kyɛ: ‘Awurade, ɛhe de ongosi lle; ofikyɛ akyiwadeɛ ne nikye bɔ ye nwo nde de, ebie hɔlle me noa nu lle.’ 9 Yeɛ konviɛ ne fili anwuro ha hyirele me pɛn nyɔ so kyɛ: ‘Nningyein bɔ Nyameɛ ate ye nwo ne, nnɛka kyɛ ye nwo nde.’ 10 Ɛhe sili pɛn nza, na bɛfale nikye biala bɛhɔle anwuro. 11 Sɔ mmerɛ nala, né mmrienzua nza bie gyi awuro bɔ nde nu ne nyunu, na né basoma bɛ bafi Kaesarea kyɛ bɛbra me berɛ. 12 Yeɛ honhom ne ha hyirele me kyɛ, mene bɛ hɔ, na nnɛmaa me maa m’adwene nu yɛ me nnaa. Ná aliemaa nzia hemɔ koso ne me hɔle, na yɛhɔle biaa ne awuro berɛ. 13 Ye koso, ɔhane kyɛbɔ onwuni abɔfo wɔ ye awuro berɛ, ná abɔfo ne ha hyirele ye kyɛ: ‘Soma mmenia ma bɛhɔ Yopa, na bɛɛfrɛ Simon bɔ bɛfrɛ ye Petro ne bɛbra, 14 na ɔkɔmaa ɛne w’awurofoɛ mukoraati konwu bɔ ɛmɔyɛ a, ɛmɔ konya ngoa ɔ.’ 15 Nhyɛle yebo kyɛ me dwudwo nala, honhom krongron ne wale bɛ so, kyɛbɔ ahyɛaseɛ ne, ɔwale yɛ so nala. 16 Ɛberɛ ala, ngayele edwirɛ bɔ ne Awurade taa ka ne, né ɔtaa ka kyɛ: ‘Nzue yeɛ Yohane fa bɔle asu ɔ, na ɛmɔ de, honhom krongron yeɛ bɛkɔfa bɛkɔbɔ ɛmɔ asu ɔ.’ 17 Ná honhom krongron bɔ Nyameɛ fa kyɛ mbaen, bɔ ɔmane yɛ bie mmerɛ bɔ yɛnyane gyidie wɔ Awurade Yesu Kristo nu ne, sɛ wama bɛ sɔ akyɛdeɛ ne bie a, me yeɛ nne nwa, bɔ ngɔhora ngosi Nyameɛ atee ɔ?" 18 Mmerɛ bɔ bɛtele ɛhe ne, ebiala andwudwo kõ, na bɛhyɛle Nyameɛ anuonyam kyɛ: "Ye de, Nyameɛ ama maen-maen nanufoɛ atee kyɛ, bɛkɔhora bɛkɔsakra b’adwene, ná banya daa ngoa."

19 Afei bɛ bɔ bɛnwatili, ɔnate amaneɛ bɔ ɔwale asuafoɛ nemɔ so wɔ Steven wue si ne, bɛhɔle alaa bɛɛfitele Foinike, Kipro ne Antiokia. Nakoso Yudafoɛ ngome yeɛ né bɛka edwirɛ ne bɛkyire bɛ ɔ. 20 Nakoso, Kipro ne Kirenfoɛ bɔ ne bɛboka bɛ so nanu biemɔ wale Antiokia, na bɛhyɛle yebo bɛne bɛ bɔ bɛka Greek né dwudwole, na bɛhane Awurade Yesu nwo nzɛmba ne bie bɛhyirele bɛ. 21 Né Awurade sa wɔ bɛ so, yeti bɛ nu pee nala yɛle gyidifoɛ, na bɛsakra bɛwale Awurade berɛ. 22 Asafo bɔ ɔwɔ Yerusalem ne tele bɛ nwo dwirɛ, yeti bɛsomane Barnaba maa ɔhɔle Antiokia. 23 Mmerɛ bɔ odwuli berɛ, na onwuni Nyameɛ adom ne, ye nye gyele paa, na ɔhyɛle bɛ mukoraati nguraen kyɛ bɛsi b’adwene pi, na bɛbata Awurade nwo. 24 Né Barnaba te sona pa, né honhom krongron wɔ ye so, afei né ole gyidie. Yeti mmeni pee nyane gyidie wɔ Awurade nu. 25 Ná ɔhɔle Tarsus ɔɔpenane Saul paa, 26 mmerɛ bɔ onwuni ye ne, ɔne ye wale Antiokia. Yeti afoɛ kõ mua yeɛ bɛne bɛ yiale nu wɔ asafo nanu ɔ. Ná Antiokia yeɛ ole nekaa bɔ oli moa bɔ (Nyameɛ maa) bɛfrɛle asuafoɛ nemɔ Kristofoɛ ɔ.

27 Sɔ mmerɛ ne, adiifoɛ biemɔ fili Yerusalem wale Antiokia. 28 Ná bɛ nu kõ bɔ bɛfrɛ ye Agabus dwɔso gyinane, na ɔnate honhom naso hyɛle ngɔm kyɛ, ɛhɔen kandinga bie baawa wiase mukoraati, na amba, sɔ dwirɛ ne wale nu wɔ Klaudio aberɛ so. 29 Yeti, asuafoɛ nemɔ yɛle b’adwene kyɛ, bɔ ebiala konya ye biala, ɔfa bra ná bɛfa bɛɛboka aliemaa mɔ bɔ bɛwɔ Yudea ne. 30 Ná bɛyɛle sɔ, yeti bɛfa bɛsomane Barnaba ne Saul maa bɛfa bɛɛmane mbanyi nemɔ.