1 Paul neane Sanhendrin badwa ne haa, yeɛ ɔhane kyɛ: "Nniema mɔ, mafa ahonim pa mabɔ me bra wɔ Nyameɛ nyunu tonn maa waadwu ɛnɛ kyẽa ye." 2 Ɔhane sɔ ne, sɔfo panyi Ananias ha hyirele bɛ bɔ bɛgyi ye nwo berɛ ne kyɛ, bɛbɔ ye noa so. 3 Yeɛ Paul hane kyɛ: "Nyameɛ baabɔ wɔ, wɔ fasue bɔ baha ye nwo fufue hyɛnn. Atena berɛ kyɛ ɛbaafa Mmeraa ne bu me atɛn, nakoso wɔ bɔbɔ ebu Mmeraa naso hyɛ ebie kyɛ ɔbɔ me?" 4 Na bɛ bɔ bɛgyi berɛ ne hane kyɛ: "Nyameɛ sɔfo panyi yeɛ ɛpepɛ ye nzoaa ne?" 5 Yeɛ Paul hane kyɛ: "Menze kyɛ ɔte sɔfo panyi, ofikyɛ bahworɔ ye wɔ mmeraa nanu kyɛ, ‘Nnɛka edwirɛ tɛɛ fa bɔ odi wɔ maen so nanwo.’"
6 Paul nwuni kyɛ mmenia ne bue te Sadukifoɛ, na bɛ bue te Farisifoɛ, yeti ɔteane nu wɔ Sanhendrin ne nyunu kyɛ: "Mmrienzua, nniema mɔ, nde Farisiniɛ, Farisifoɛ awa. Na ewue tingyele bɔ awufo konya ye nanwo anidasoɛ nati yeɛ bɛbu me atɛn ne." 7 Ɔhane ɛhe nala pɛ, edwudwolɛ wale Farisifoɛ ne Sadukifoɛ nemɔ afia, na mmenia nanu hyɛle nyɔ. 8 Né Sadukifoɛ nemɔ ka kyɛ ewue tingyelɛ, abɔfo anaa honhom biala nne berɛ, nakoso Farisifoɛ nemɔ de, né bedɛ bɛdi kyɛ sɔ nningyein namukoraati wɔ berɛ. 9 Yeti, ɛberɛ yɛle gye-gyee-gye, na atwerɛfoɛ ne biemɔ bɔ bɛte Farisifoɛ ne dwɔsole, na bɛteɛteane nu serɛ-serɛ kyɛ: "Yɛnwuni mvomsoɛ biala bɔ biaa he ayɛ ɔ, ebie po a né honhom anaa abɔfo bie adwudwo ahyire ye." 10 Mmerɛ bɔ dwudwolɛ nanu yɛle se ne, né sahene ne suro kyɛ annea a, né batete Paul nu, yeti ɔhyɛle sogyafoɛ nemɔ kyɛ, bɛhɔ aseɛ nwo dɔ bɛɛle ye bɛfi bɛ sa nu, na bɛfa ye bɛbra nekaa bɔ sogyafoɛ nemɔ te ne.
11 Kɔngɔen bɔ oli berɛ ne, Awurade wale ye nwo berɛ, yeɛ ɔha hyirele ye kyɛ: "Nya akukuduro! Na kyɛbɔ ali me nwo adanzeɛ fekɔ-fekɔ wɔ Yerusalem ne, sɔ ala yeɛ odikyɛ ɛdi me nwo adanzeɛ wɔ Roman ɔ." 12 Aleɛ hene ne, Yudafoɛ nemɔ bɔle porɛ, na bɛhane ndaen kyɛ, sɛ bɛhunni Paul a, bɛngɔdidi, na bɛngɔno hwee. 13 Mmrienzua kɔbo 40 yeɛ né baha sɔ ndaen ne ɔ. 14 Sɔ mmrienzua nemɔ hɔle sɔfo mbanyi ne kuro nanu mbanyi nemɔ berɛ, yeɛ bɛha bɛhyirele bɛ kyɛ: "Yali amoen yaha ndaen kyɛ, sɛ yɛhunni Paul a, yɛngɔdidi, na yɛngɔno hwee. 15 Yeti ɛmɔ ne Sanhendrin namukoraati hɔ, na ɛmɔɔbɔ sahene ne amaneɛ kyɛ, ɔfa ye berɛ ɛmɔ; na ɛmɔyɛ ɛmɔ nwo kyɛ ɛmɔpena kyɛ ɛmɔneɛnea ye dwirɛ nanu bɛkɔ siɛ. Na kyɛ dee bɔ odwu wa ne, né yahu ye."
16 Nakoso Paul awosea tele kyɛ, babɔ porɛ kyɛ bɛkɔtetɛ ye, yeti ɔhɔle nekaa bɔ sogyafoɛ nemɔ te ne, ná ɔɔbɔle Paul amaneɛ. 17 Na Paul koso frɛle sogyafoɛ mbanyi nanu kõ, yeɛ ɔha hyirele ye kyɛ: "Fa sɔ abrandeɛ he kɔ sahene ne berɛ, ofikyɛ ɔpena kyɛ ɔka edwirɛ bie kyire ye." 18 Yeti, ɔfale ye hɔle sahene ne berɛ, yeɛ ɔhane kyɛ: "Paul bɔ ɔla prizin ne frɛle me, na yenwa mva abrandeɛ he mmerɛ wɔ, ofikyɛ ɔpena kyɛ ɔka edwirɛ bie kyire wɔ." 19 Sahene ne sɔle abrandeɛ ne sa, na ɔne ye hɔle ahameɛ, yeɛ obisale ye kyɛ: "Nzu yeɛ ɛpena kyɛ ɛka kyire me ne?" 20 Yeɛ ɔhane kyɛ: "Yudafoɛ ne abɔ porɛ kyɛ, ɛhema, bɛkɔmaa ɛkɔfa Paul kɔwa Sanhendrin ne nyunu, te kyɛ enwa bɛpena kyɛ bɛneɛnea ye dwirɛ nu yé ne. 21 Nakoso nnɛmaa bɛlaka-laka wɔ, ofikyɛ bɛ nu kɔyɛ 40 kɔtetɛ atee nu, na baha ndaen kyɛ, sɛ bɛhunni Paul a, bɛngɔdidi na bɛngɔno hwee. Na bɔ bɛnwondɛ ala yeɛ ole kyɛ ɛkɔ pene so." 22 Yeti sahene ne hyɛle abrandeɛ ne kyɛ: "Nnɛka kyire ebiala kyɛ, aha sɔ dwirɛ he ahyire me," yeɛ ɔmaa ɔhɔle ɔ.
23 Na ɔfrɛle sogyafoɛ mbanyi nyɔ ha hyirele bɛ kyɛ: "Ɛmɔ boɔboa sogyafoɛ 200 noa, na ɛmɔsa bɛboɔboa 70 bɔ bɛte pɔngɔ so ne 200 bɔ bɛtire-tira pea noa, sɛ ɔbɔ kɔngɔen 9:0023:23 9:00 dɔnhwere bɔ ɔtɔ so nza. a, ɛmɔ kosi nu bɛkɔhɔ Kaesarea. 24 Afei, ɛmɔpena mbɔngɔ bɔ Paul kɔtena so, na ɛmɔfa ye bɛhɔ amrado Felix berɛ asomdwie nu." 25 Na ɔhworɔle sɔ krataa he bokale so kyɛ:
26 Klaudio Lisia yeɛ metworɔ krataa he ɔ.
Na metworɔ mebrɛ Onuoyamfoɛ Amrado Felix.
Me kyẽa wɔ.
27 Yudafoɛ nemɔ hyele sɔ biaa he, na né bɛpena kyɛ bɛku ye, nakoso mene sogyafoɛ nemɔ hɔle berɛ ndɛ, yeɛ yɛɛlɛle ye ɔ; ofikyɛ nwuni kyɛ né ɔte Romaniɛ. 28 Né mepena kyɛ menwu bɔ yeti yeɛ bɛbɔ ye sommoɛ ne, yeti mvale ye ngɔle Sanhendrin ne nyunu. 29 Nakoso mma nwuni kyɛ, sãa bɛ mmeraa nanwo dwirɛ biemɔ ti yeɛ babɔ ye kwaadu ne, ná ɔyɛlle nikye biala bɔ yeti odikyɛ bɛku ye anaa ɔda prizin ɔ. 30 Na ebiemɔ abɔ me amaneɛ kyɛ babɔ ye nwo porɛ kyɛ bɛkɔhu ye, yeti yeɛ me maa ɔba wɔ berɛ ndɛ ne. Na bɛ bɔ bɛne ye le edwirɛ ne koso, meka mekyire bɛ kyɛ, bɛbra wɔ dɔ, na bɛɛbɔ ye kwaadu.
31 Yeti kɔngɔen nala, sogyafoɛ nemɔ fale Paul, na bɛne ye hɔle Antipatris, kyɛbɔ bahyɛ nala. 32 Aleɛ hene ne, bɛmaa sogyafoɛ bɔ bɛte mbɔngɔ so ne fale ye hɔle, na bɛ ngaa ne sa wale nekaa bɔ sogyafoɛ nemɔ te ne. 33 Sogyafoɛ bɔ bɛte pɔngɔ so ne hɔle Kaesarea, na bɛfale krataa ne bɛmane amrado ne, yeɛ bɛfale Paul bɛwurale ye sa ɔ. 34 Yeti ɔkengale krataa ne, na obisale Paul mandam bɔ ofi nu ɔ, na onwuni kyɛ ofi Kilikia. 35 Yeɛ ɔha hyirele ye kyɛ: "Sɛ bɛ bɔ babɔ wɔ kwaadu ne ba a, ngɔto me bo ase ngotie wɔ dwirɛ namukoraati." Na ɔhyɛle kyɛ, bɛnea ye so wɔ Herode ahemvie berɛ.
/images/a/WG5FS9VaSWVnVmV3VI8yP)
/images/a/Tcg2NiV7ce24OT6kCIQGR)