Atos 26

1 Agripa ha hyirele Paul kyɛ: "Ɛkɔhora kɔye wɔ nwo noa." Yeti Paul tengyɛle ye sa, na ɔhyɛle yebo dwudwole kyɛ: 2 "Ɔhene Agripa, kwaadu bɔ Yudafoɛ abɔ me namukoraati, ɔyɛ me fɛ paa kyɛ wɔ nyunu yeɛ meye me noa ɔ, 3 ofikyɛ wɔ de, ɛse Yudafoɛ amammerɛ paa, na ɛse nningyein bɔ bɛsu ye nwo aporowaa ne koso. Yeti mesrɛ wɔ, nya aboterɛ tie me. 4 Nahorɛ dwirɛ yeɛ ole kyɛ ofi me ngwalaa nu, bra bɔ mabɔ ye wɔ me maen nu ne Yerusalem namukoraati ne, Yudafoɛ se ye mu. 5 Bɛse me dada, na sɛ bɛkoli me nwo adanzeɛ po a, bɛse kyɛ né nde Farisiniɛ bɔ odi ye som nu amaneɛ so pɛpɛɛpɛ. 6 Nakoso kesaalae de, ɛbɔ bɔ Nyameɛ hyɛle yɛ nana mɔ nanwo anidasoɛ bɔ nne ye nati yeɛ bɛdi me dwirɛ ne, 7 na sɔ bɔhyɛ he ala yeɛ né abusuakue 12 ne nye la so kyɛ ɔkɔwa nu, bɔ yeti, bɛyerele bɛ nwo bɛsõne Nyameɛ eyia ne kɔngɔen ne. Nana, sɔ anidasoɛ he anwo yeɛ Yudafoɛ nemɔ abɔ me kwaadu ne. 8 Nzuati yeɛ ɔyɛ se ma ɛmɔ kyɛ ɛmɔkole bɛkoli kyɛ Nyameɛ tingye awufo ɔ?

9 "Me sɔa, né menwu ye kyɛ odikyɛ meyɛ nningyein pee mefa mekõ metia Nazerɛtniɛ Yesu dumaa ne. 10 Na sɔ ala yeɛ nyɛle ye wɔ Yerusalem ɔ; tumi bɔ sɔfo mbanyi nemɔ fa mane me nati, ngyele akrongronfoɛ pee nguale prizin. Na sɛ́ bɛku bɛ a, né mefoa so. 11 Né metaa metwe bɛ so wɔ sua bɔ beyia nu nanu, na mmɔle mmɔden kyɛ ngɔhyɛ bɛ maa bɛkɔyakyi bɛ gyidie nu. Na ɔnate kyɛ né me nye aboro bɛ so nati, ngɔle nguro foforɛ so ngɔndane bɛ nye wɔ berɛ.

12 "Mmerɛ bɔ ne ngu so meyɛ ɛhe ne, sɔfo mbanyi nemɔ mane me tumi, na bɛhyɛle me kyɛ ngɔ Damasko. Na nnate atee so mekɔ ne, 13 Nana, né ɔte eyia-gyina, ná bɔ nwuni ye ala yeɛ ole kyɛ, kanea bie bɔ tra eyia fi anwuro apɛ mene bɛ bɔ mene bɛ nate nanwo ayia. 14 Na yɛte yɛguale ase ne, ndele kyɛ konviɛ bie ka kyire me wɔ Hebri nu kyɛ: ‘Saul, Saul, nzuati yeɛ ɛtane me sɔ ne? Sɛ ɛfa wɔ gya bɔ pɔmaa noa a, ɔkɔyɛ wɔ yea.’ 15 Yeɛ ngane kyɛ: ‘Me wura, wɔ yeɛ ɛle nwa?’ Na Awurade ha hyirele me kyɛ: ‘Me yeɛ nne Yesu bɔ ɛtane ye nye ne. 16 Nakoso dwɔso gyina wɔ gya so. Ofikyɛ bɔ wamaa maye me nwo ali mahyire wɔ yeɛ ole kyɛ, nningyein bɔ anwu ye, ate, ɔne bɔ ngɔmaa ekonwu ye kɔfa me nwo ne, ɛkɔyɛ ye nwo somvoɛ ne danzeniɛ. 17 Na ngole wɔ ngofi mmenia hemɔ ne maen-maen nanufoɛ ne sa nu. Bɛ yeɛ mesoma wɔ bɛ berɛ 18 maa ɛkɔbukye bɛ nye, na wamaa bafi awosii nu bawa kanea nu, ná bafi Satan tumi bo, bawa Nyameɛ berɛ, kyɛbɔ ɔkɔyɛ a, bekonya bɔne-fakyɛ, ná banya agyapadeɛ wɔ bɛ bɔ gyidie bɔ banya ye wɔ me nu ne amaa bɛ nwo ate nanu.’

19 "Yeti Ɔhene Agripa, anisoadehu bɔ ofi anwuro ne, mannyɛ ye nwo asoserɛ, 20 mmon nni moa ngane ye nwo dwirɛ ngyirele bɛ bɔ bɛwɔ Damasko ne, afei nga ngyirele bɛ bɔ bɛwɔ Yerusalem ne, ɔne bɛ bɔ bɛwɔ Yudea mandam namukoraati nu, yeɛ maen-maen nanufoɛ ne koso. Nga ngyirele bɛ kyɛ bɛsakra b’adwene, na bɛyɛ nningyein bɔ okyire adwene-sakra, ná wamaa bawa Nyameɛ berɛ. 21 Ɛhe ati yeɛ Yudafoɛ ne hyele me wɔ asɔre awuro berɛ bɔ ahaa bɛku me ne. 22 Nakoso mmokalɛ bɔ Nyameɛ aboka me nati yeɛ ɛnɛ, ndɛ́ te ase bɔ medi adanzeɛ mekyire atitire ne ngoaa ne. Nakoso bɔ adiifoɛ nemɔ ne Mose hane kyɛ okosi ne, ɛhene ala yeɛ meka ɔ. 23 Na yeɛ ole kyɛ, né odikyɛ Kristo ne nwu amaneɛ, na ɔnate kyɛ ye yeɛ bɛkɔ limoa bɛkotingye ye bɛkofi ewue nu nati, né ɔkɔbɔ kanea ne dawure kohyire mmenia hemɔ ne maen-maen nanufoɛ ne."

24 Ná Paul gu so ɔka ɛhemɔ fa ye ye noa ne, Festo teane nu kyɛ: "Paul, ɛpena bɔ laen! Adesua pee ne pena fa wɔ ti anu!" 25 Nakoso Paul hane kyɛ: "Onuoyamfoɛ Festo, nná ɛlaen yeɛ mebɔ ɔ, m’adwene nu la berɛ paa, na nahorɛ paa yeɛ meka ne. 26 Na bɔ ɔte yeɛ ole kyɛ, Ɔhene bɔ mefa ahotɔsoɛ meka edwirɛ he mekyire ye ne koso se bɔ meka ne yé paa; na medɛ́ medi kyɛ ɛhemɔ nu biala nne berɛ bɔ ɔnze ɔ, ofikyɛ enu biala nne berɛ bɔ bɛyɛle ye wɔ kokoanu ɔ. 27 Ɔhene Agripa, nnaa edɛ adiifoɛ nemɔ di? Mese kyɛ edɛ bɛ di." 28 Nakoso Agripa ha hyirele Paul kyɛ: "Waha kaa bie, ahaa ɛma meyɛ Kristoniɛ." 29 Na Paul koso hane kyɛ: "Sɛ waha kaa oo, sɛɛ ɔkɔhyɛ oo, me de, ɔhale me ngome a, ahaa Nyameɛ amaa ɛne bɛ bɔ betie me namukoraati ayɛ kyɛ me, bɔ kyenyi he bokka so ɔ."

30 Afei ɔhene ne dwɔsole, na amrado ne né Bɛnis ne bɛ bɔ bɛne ye tete berɛ ne koso dwɔsole. 31 Na bɛkɔ ne, edwirɛ bɔ ne bɛka yeɛ ole kyɛ: "Sɔ biaa he yɛlle nikye fee bɔ odikyɛ bɛku ye anaa bɛfa ye bɛto prizin ɔ." 32 Yeɛ Agripa ha hyirele Festo kyɛ: "Sɛ nná edwirɛ bɔ wafa wama Kaesare ne a, ahaa yɛkɔhora yɛkɔyakyi ye."