1 Me Paul, bɔ Kristo Yesu ti nna prizin, mene Timoteo,

yɛfa krataa he yɛbrɛ yɛ dɔfo Filemon, bɔ ɔte yɛ mmango bɔ yɛne ye yɛ adwuma ne, 2 ɔne yɛliema brasua Apia, ne yɛ mmango sogyaniɛ Arkipo, yeɛ asafo bɔ beyia nu wɔ w'awuro berɛ ne:

3 Adom ne asomdwie bɔ ofi yɛ Baba Nyameɛ, ne y'Awurade Yesu Kristo berɛ ha ɛmɔ.

4 Mmerɛ biala bɔ ngɔbɔ mbaeɛ ngɔma wɔ ne, meda Nyameɛ ase, 5 ofikyɛ gyidie bɔ ele ye wɔ Awurade Yesu nu, ɔne ɔdɔ bɔ ele ye ma akrongronfoɛ ne, daa mete ye nwo dwirɛ. 6 Me mbaeɛ yeɛ ole kyɛ gyidie bɔ ɛne afoforɛ le ye nati, ekole nikye pa biala bɔ Kristo ti yɛle ye ne kɔto nu. 7 Nniema, wɔ dɔ bɔ ndele ye nwo dwirɛ ne maa me nye gyele na m'ahone tɔle me kunu, ofikyɛ amaa akrongronfoɛ ne nwo adwo bɛ.

8 Yeti ɔwɔ nu, Kristo ti ahaa ngɔhora ngɔha ye pen kyɛ ɛyɛ nikye pa, 9 nakoso, ɔdɔ ti, mepena kyɛ mesrɛ wɔ. Ofikyɛ me Paul, kesaalae mayɛ aworowaa, na Kristo Yesu ti, nna prizin. 10 Mesrɛ mema m'akwalaa Onesimus bɔ maayɛ ye baba wɔ prizin wa ne. 11 Mmerɛ bie bɔ wapɛ nu ne de, né mvasoɛ biala nne ye so mma wɔ, nakoso kesaalae de, ye nwo awa mvasoɛ ama me ne wɔ. 12 Na mema osa ba wɔ berɛ, ɔte sona bɔ ɔla m'ahone so.

13 Ɔhale me ngome a, ahaa ɔkɔtena me nwo wa na wasi wɔ gya nu wasõ me mmerɛ bɔ nzɛmba nati nna prizin ne. 14 Nakoso menguro kyɛ mefa wɔ si meyɛ nikye fee, né wɔanyɛ kyɛ mehyɛ wɔ maa ɛyɛ nikye pa; na mmom mepena kyɛ ofi w'ahone nu. 15 Ebia, ɛhe ati yeɛ ofili wɔ nwo kaa ne, na wamaa wɔ sa aha ye koraa, 16 sɔ mmerɛ he de, ɔtte akoaa mbaen, mmom ɔtra akoaa, eliema bɔ ɛdɔ ye. Ɔte ebie bɔ medɔ ye paa, nakoso wɔ de, ɔtra sɔ koraa wɔ anwoɔnaen nu ne Awurade nu.

17 Yeti, sɛ nde wɔ damvo de a, ye de, dɛ́ ye kama, kyɛbɔ ahaa ekole me nala. 18 Sɛ wayɛ wɔ bɔne, anaa ɔma wɔ kerɛ bie a, bu kerɛ ne ma me. 19 Me Paul yeɛ mefa me sa metworɔ ɛhe ne: Ngotua ngɔma wɔ. Wɔ po, nnaa ɛkaye kyɛ kerɛ bɔ ɛma me, sana ɛfa wɔ nipadua namu ma me. 20 Nniema, ma nya wɔ so mvasoɛ bie wɔ Awurade nu, kyekye me wora wɔ Kristo nu.

21 Medɛ́ medi kyɛ ekotie me, yeti yeɛ metworɔ krataa he mebrɛ wɔ ne, na mese kyɛ bɔ mesrɛ ne, ɛkɔyɛ maa ɔkɔbo sɔ koraa. 22 Afei koso, pena sua ma me, na medɛ́ medi kyɛ ɛmɔ mbaeɛ ti, bɛkɔyakyi me maa ngɔwa ɛmɔ berɛ.

23 Epafra, me damvo bɔ Kristo Yesu ti ye koso ɔla prizin ne nwa ɔkyea wɔ, 24 na sɔ ala yeɛ Marko, Aristarko, Dema, ne Luka bɔ mene bɛ yɛ adwuma ne nwa bɛkyea wɔ.

25 Awurade Yesu Kristo adom boka ɛmɔ so, mmerɛ bɔ ɛmɔda suban pa ali ne.