1 Kɔ so kaye bɛ kyɛ bɛyɛ sotie na bɛbrɛ bɛ nwo ase bɛma awaen ne bɛ bɔ bɛle tumi ne, ná besiesie bɛ nwo bɛma adwuma pa biala. 2 Nnɛmaa bɛka ebiala nwo dwirɛ tɛɛ, nnɛmaa bɛne ebiala kõ,* mmom bɛyɛ mmenia bɔ bɛdwo, na bɛbrɛ bɛ nwo ase bɛma ebiala. 3 Ofikyɛ yɛ koso, mmerɛ bie bɔ wapɛ nu ne, né yɛnze nworɛ, yɛmmu nikye, né yamini, yɛyɛle ngoaa yɛmane akɔnnɔ ahoroɛ, né yɛ nye boro nikye, yɛyɛle nningyein bɔ ɔttemaye, na né yɛtane-tane yɛ nwo.

4 Nakoso mmerɛ bɔ y'Agyenkwa Nyameɛ yele ye anwunvoin ne ye dɔ ali hyirele mmenia ne, 5 ɔlɛle yɛ ngoa; nná yɛ tenenee ti ɔ, mmom ye anwunvoin ti ɔnate ye honhom krongron naso biale yɛ maa yɛyɛle foforɛ. 6 Sɔ honhom he yeɛ ɔnate y'Agyenkwa Yesu Kristo so hwie guale yɛ so maa obuli so ne. 7 Na sɛ ɔnate Ye adom so bu yɛ bem a yayɛ nnehyeɛ, kyɛbɔ daa ngoa nwo anidasoɛ bɔ yele ye ne te ne. 8 Sɔ dwirɛ he te nahorɛ. Ná mepena kyɛ ɛkɔso ka sɔ dwirɛ ne, kyɛbɔ ɔkɔyɛ a, bɛ bɔ banya gyidie wɔ Nyameɛ nu ne kɔhɔ so kɔfa b'adwene kosie nningyein pa bɔ odikyɛ bɛyɛ naso. Sɔ nningyein he te pa, na mvasoɛ wɔ so ma sona biala.

9 Nakoso twe wɔ nwo fi aporowaa bɔ nyanza biala nne nu, abusua sanden nwo dwirɛ, manzoin, ne mmeraa nwo ngondii nwo, ofikyɛ mvasoɛ biala nne so, na ɔmmoka. 10 Na sona bɔ ɔfa mbakye-mbakye-muɛ ba ne, sɛ edwudwo kyire ye kõ anaa nyɔ a, twe wɔ nwo fi ye nwo. 11 Na nwu ye kyɛ sona bɔ ɔte sɔ ne, wamini, wayɛ ye adwene kyɛ ɔkɔyɛ bɔne, na ye bɔbɔ obu ye nwo fɔ.

12 Menya mesoma Artema anaa Tikiko meba wɔ berɛ a, bɔ wɔ nwo mmɔden kyɛ ɛkɔwa me berɛ wɔ Nikopoli, ofikyɛ ayirɛ bɔ ɔba ne, ɛberɛ yeɛ mepena kyɛ metena ɔ. 13 Bɔ mmɔden kyɛ ɛkɔmaa Apolo ne Zena bɔ ɔte lɔya* ne sa kɔha bɔ behia biala, na bɛ nwo angyere bɛ wɔ b'akwanduo nanu. 14 Ná ma yɛ mmenia nemɔ nwu ye kyɛ, odikyɛ bɛkɔ so bɛyɛ adwuma pa kyɛbɔ ɔkɔyɛ a, bɛkɔhora bɛkɔboka bɛ bɔ bɛ nwo ahyere bɛ paa ne, nná bannyɛ foen.

15 Bɛ bɔ bɛwɔ me nwo wa ne nwa bɛkyea wɔ. Kyea bɛ bɔ bɛdɔ yɛ wɔ gyidie nu ne ma yɛ.

Adom ha ɛmɔ mukoraati.