1 Afei, afoɛ buru-ne-nná si ne, mene Barnaba sa hɔle Yerusalem, né Tito boka yɛ so. 2 Nyameɛ yele nikye bie hyirele me, yeti yeɛ ɔmaa ngɔle dɔ ne. Ná mmaa bɛnwuni ye kyɛ, meka nzɛmba ne mekyire maen-maen ne. Nakoso, nga ngyirele mbanyi bɔ bɛbu bɛ ne ngome, ofikyɛ né mesuro kyɛ annea a, né mirika bɔ matu, anaa bɔ metu ne ayɛ mbaen. 3 Né Tito boka me so, ná ye bɔ ɔte Greekniɛ ne po, bannhyɛ ye kyɛ ɔpɛ ye toa. 4 Bɔ waafa edwirɛ namukoraati wawa yeɛ ole kyɛ, aliemaa ngondombofoɛ biemɔ ayɛ kodɛɛ baawura asafo nanu, bafeɛfea bɛ nwo baawura yɛ nu, kyɛ bɛ baasɛkye ahofadie bɔ yɛle ye wɔ Kristo Yesu nu ne, kyɛbɔ ɔkɔyɛ a, bɛkɔfa yɛ bɛkɔyɛ ngoaa koraa. 5 Na yɛ de, yamma bɛ atee kaala po, kyɛbɔ ɔkɔyɛ a, ɛmɔ kɔtena nzɛmba nanwo nahorɛ nanu ɔ.

6 Na bɛ bɔ bɛbu bɛ nwo ne de, kyɛbɔ né bɛte biala ne, ɔmva me nwo, ofikyɛ nná kyɛbɔ ebie te ne yeɛ Nyameɛ nea ɔ; ná sɔ mmenia nemɔ koso, bannyɛ hwee bammoka me. 7 Mmom, bɛnwuni ye kyɛ, bafa bawura me sa kyɛ nga nzɛmba ne ngyire bɛ bɔ bɛpɛlle bɛ toa ne, kyɛbɔ Petro ka kyire bɛ bɔ bapɛ bɛ toa ne. 8 Ofikyɛ bɔ ɔmane Petro tumi kyɛ ɔyɛ somafoɛ ma bɛ bɔ bapɛ bɛ toa ne, ye ala yeɛ ɔmane me tumi kyɛ nyɛ somafoɛ mma maen-maen. 9 Ná mmerɛ bɔ Yakobo, Kefa ne Yohane, bɔ bayɛ kyɛ pila ne nwuni adom bɔ bafa balo me ne, bɛhyeale mene Barnaba sanu bɛfa bɛhyirele kyɛ, balɛ́ bato nu kyɛ yɛhɔ maen-maen nanufoɛ ne berɛ, na bɛ koso, bɛkɔhɔ bɛ bɔ bapɛ bɛ toa ne berɛ. 10 Bɔ bɛha behyirele yɛ ala yeɛ ole kyɛ, "yɛkaye bɛ bɔ wahia bɛ ne," ná ɛhene ala yeɛ ne mepena kyɛ meyɛ ɔ.

11 Nakoso, mmerɛ bɔ Kefa*2:11 Ye ala yeɛ ole Petro wale Antiokia ne, nga ngyirele ye pen kyɛ bɔ ɔyɛ ne ttemaye. 12 Bɔ ɔte yeɛ ole kyɛ, kora bɔ mmenia biemɔ fi Yakobo dɔ ba ne, né ɔne bɛ bɔ bɛwɔ maen-maen nanu ne didi. Nakoso, sɔ mmenia nemɔ wale ne, ɔyakyile, na ɔhwene ye nwo fili bɛ nwo, ofikyɛ né osuro bɛ bɔ bapɛ bɛ toa ne. 13 Yudafoɛ bɔ baha ne koso yɛle sɔ nhwehwɛ-anim ne bie, maa Barnaba po ɔɔbokale bɛ so. 14 Na mmerɛ bɔ nwuni kyɛ bɔ bɛyɛ ne, ɔne nzɛmba nanwo nahorɛ ne nyia ne, nga ngyirele Kefa wɔ bɛ mukoraati nyunu kyɛ: "Sɛ wɔ, bɔ ɛte Yudaniɛ ne yɛ wɔ nikye te kyɛ maen-maen nuniɛ, ná ɔtte kyɛ Yudaniɛ a, ɛkɔyɛ sɛɛ na ahora aha ahyire maen-maen nanufoɛ kyɛ, bɛbɔ bɛ bra te kyɛ Yudafoɛ?"

15 Yɛ de, bɛwole yɛ Yudafoɛ, na yɛtte kyɛ maen-maen nanufoɛ bɔ bayɛ bɔne ne, 16 yɛse kyɛ, nná mmeraa bɔ ebie koli so ne yeɛ ɔmaa bɛbu ye bem, mmom gyidie bɔ okonya ye wɔ Yesu Kristo nu ne. Yeti, yɛ koso, yanya Kristo nu gyidie, kyɛbɔ ɔkɔyɛ a, bɛnate Kristo nu gyidie so bɛkobu yɛ bem, na ɔtte mmeraa bɔ yɛkoli so*2:16 Ngyerɛaseɛ Tee: Mmeraa nyumaa. ne. Ofikyɛ, sɛ ɔhale mmeraa*2:16 Ngyerɛaseɛ Tee: Mmeraa nyumaa. ne ngome a, ahaa ebiala nne berɛ bɔ bɛkobu ye bem ɔ. 17 Ná mmerɛ bɔ yɛbɔ mmɔden kyɛ bɛkobu yɛ bem wɔ Kristo nu ne, sɛ bɛnwu yɛ kyɛ yɛte abɔnefoɛ a, ɛhene kyire kyɛ Kristo te ebie bɔ ɔfoa bɔne so anaa? Nyameɛ pa gua! 18 Yeti, sɛ mesa mesi bɔ mmerɛ bie ndwiri nguale ne a, ye de mato mmeraa. 19 Na me de, mmeraa bɔ nnili so nati, mawu wɔ mmeraa nanu, kyɛbɔ ɔkɔyɛ a ngɔtena ase wɔ Nyameɛ nu. 20 Babɔ mene Kristo mukoraati asɛnnua nu, kesaalae nná me yeɛ nde ase ne, mmom Kristo yeɛ ɔte me nu ne. Ase bɔ nde ye anwoɔnaen nu ne, nde ye wɔ Nyameɛ awa nanu gyidie nu, ye yeɛ ɔlɔle me, na ɔfale ye nwo mane me ɔ. 21 Nyameɛ adom de, mengɔ po, ofikyɛ sɛ tenenee nate mmeraa so a, ye de ahaa mvasoɛ biala nne Kristo wue naso.