1 Bɔ mekyire yeɛ ole kyɛ, ɔnate kyɛ bɔ okoli bia ne te akwalaa nati, ɔte kyɛ akoaa, ɔmva ye nwo kyɛ nikye biala te ye deɛ ne. 2 Ole bɛ bɔ bɛnea ye so, ná bɛnea ye agyapadeɛ naso kosi mmerɛ bɔ ye baba ahyɛ ne. 3 Sɔ ala yeɛ yɛ koso, mmerɛ bɔ né yɛte ngwalaa ne, ne yayɛ ngoaa yama nningyein bɔ ɔwɔ wiase ne. 4 Nakoso mmerɛ ne sone ne, Nyameɛ somane ɔwa ne maa brasua wole ye wɔ mmeraa nabo, 5 kyɛ ɔɔye bɛ bɔ bɛwura mmeraa nabo ne, ná wamaa yayɛ Nyameɛ mmaa. 6 Na ɔnate kyɛ ɛmɔte Nyameɛ mmaa nati, wasoma ɔwa né honhom ne maa wawa y'ahone nu, na ɔteanu kyɛ "Abba," kyire kyɛ "Baba!" 7 Yeti, ɛtte akoaa kõ, ɛte baa, na ɔnate kyɛ ɛte baa nati, ɔnate Nyameɛ so ne, edi bia a ɔyɛ yé.

8 Mmerɛ bɔ né ɛmɔnze Nyameɛ ne, né ɛmɔ ayɛ ngoaa bama nningyein biemɔ bɔ ɔtte nyameɛ. 9 Nakoso, kesaalae bɔ ɛmɔ anwu Nyameɛ, anaa kesaalae bɔ Nyameɛ anwu ɛmɔ ne, nzuati yeɛ ɛmɔpena kyɛ ɛmɔsa bɛkɔ sɔ nningyein bɔ mvasoɛ nne so nanwo, ná ɛmɔ kɔyɛ ngoaa bɛma ye bieku ne? 10 Nningyein bɔ ɛmɔ asɔ nu twann yeɛ ole ngyẽa, bosome, mmerɛ, ne afoɛ! 11 Mesuro mema ɛmɔ, ofikyɛ annea a, né ɛmɔ amaa mafɛ magua.

12 Aliemaa mɔ, mesrɛ ɛmɔ, ɛmɔyɛ kyɛ me, ofikyɛ me koso, né nde kyɛ ɛmɔ. Ɛmɔ anyɛ me bɔne biala. 13 Ɛmɔse kyɛ anwonyerɛ bɔ ɔbɔle me ne, yeɛ ɔmaa nni moa ngane nzɛmba ne ngyirele ɛmɔ ne. 14 Ɔwɔ nu, m'anwonyerɛ ne yɛle nzɔhwɛ mane ɛmɔ, nakoso ɛmɔ ammu me kyɛ meyɛ tɛ, ná ɛmɔ ambo me. Mmom ɛmɔlɛle me kyɛ Nyameɛ bɔfo, ɛnwa nzɛ me yeɛ né nde Kristo Yesu ne. 15 Ye de, ɛmɔ anigye ne afa ni? Ofikyɛ né medɛ́ medi kyɛ, sɛ né ɔkɔyɛ yé a, ahaa ɛmɔ tuli ɛmɔ nye po bɛmane me. 16 Nahorɛ bɔ meka mekyire ɛmɔ nati, mayɛ ɛmɔ tamfo anaa? 17 Sɔ mmenia nemɔ nye aboro kyɛ bekonya ɛmɔ, nakoso bɛlle adwene pa. Bɛpena kyɛ bɛsɛkye mene ɛmɔ afia, ná wamaa ɛmɔ ali bɛ si. 18 Sɛ ebie le adwene pa, na ɔpena kyɛ ɔne ɛmɔ yɛ kõ a, ɔte pa, nakoso odikyɛ ɔyɛ ye daa, mmom nná mmerɛ bɔ mene ɛmɔ wɔ berɛ ne ngome. 19 Me mmaa mɔ, mesa medi ɛmɔ nwo yealɛ kyɛ brasua bɔ aworɛ aha ye, kodwu kyɛ ɛmɔ konya Kristo suban ne bie. 20 Ɔhale me ngome a, ahaa nwɔ ɛmɔ nwo berɛ, na wamaa manwu kyɛbɔ ngɔ dwudwo ɔ, ofikyɛ ɛmɔ ti, menwu bɔ nyɛ ɔ.

21 Ɛmɔ bɔ ɛmɔpena kyɛ ɛmɔwura mmeraa nabo ne, ɛmɔha behyire me, bɔ mmeraa ne ka ne, ɛmɔnde yebo hɔ? 22 Ofikyɛ bahworɔ kyɛ né Abraham le mmaa nyɔ, ne kõ te abaawa ne awa, yeɛ né kõ te brasua bɔ ole ye nwo ne awa. 23 Abaawa ne awa ne de, bɛwole ye anwoɔnaen nu, nakoso brasua bɔ ole ye nwo ne awa ne de, bɛnate bɔhyɛ so yeɛ bɛwole ye ɔ. 24 Ɛhemɔ gyi berɛ ma nikye bie, mmrasua nyɔ ne gyi berɛ ma apam nyɔ. Apam ne kõ fi Sinai bokaa so, na ye mmaa te ngoaa, ɛhene yeɛ ole Hagar. 25 Yeti, Hagar gyi berɛ ma Sinai Bokaa bɔ ɔwɔ Arabia ne, na ye yeɛ ole Yerusalem bɔ ɔwɔ berɛ ne, ofikyɛ ɔne ye mmaa te ngoaa. 26 Nakoso, Yerusalem bɔ ɔwɔ anwuro ne de, ole ye nwo, na ye yeɛ ole yɛ maame. 27 Ofikyɛ bahworɔ kyɛ:

"Brasua bɔ ɛnwo, wɔ bɔ elle ba ne,

ma wɔ nye gye.

Wɔ bɔ ɛnde aworɛ nu yealɛ,

di ahurusi ná tea nu.

Ofikyɛ brasua bɔ bapo ye ne,

ye mmaa sone tra bɔ ogya biaa ne deɛ ne."

28 Afei aliemaa mɔ, ɛmɔte kyɛ Isaac, bɔ né ɔte bɔhyɛ ba ne. 29 Ná kyɛbɔ akwalaa bɔ bɛwole ye anwoɔnaen nu ne tanene bɔ bɛnate bɔhyɛ so bɛwole ye ne nye ne, sɔ ala yeɛ ɔkɔso ɛnɛ ɔ. 30 Nakoso, nzu yeɛ tworɔnzɛm ne ka ɔ? "Foa abaawa ne né ɔwa ne, ofikyɛ abaawa ne awa ne, ɔne brasua bɔ ole ye nwo ne awa ne ngɔbonu nngoli bia." 31 Yeti aliemaa mɔ, yɛtte abaawa ne mmaa, yɛte brasua bɔ ole ye nwo ne mmaa.