1 Afei asikafoɛ, ɛmɔtie; amaneɛ bɔ ɔba ɛmɔ so nati, ɛmɔsu na ɛmɔpɛ awuye. 2 Ɛmɔ ahonyadeɛ ne aporɔ, na mvrɔlɔ ali ɛmɔ ndadeɛ nemɔ. 3 Ɛmɔ sikaa kɔkorɛ ne ɛmɔ kɔɔbere nemɔ awe naakye, na sɔ naakye ne kɔyɛ adanzeɛ kotia ɛmɔ, na okoli ɛmɔ naen. Bɔ ɛmɔ aboɔboa ye noa ne kɔyɛ kyɛ see wɔ awieɛ mmerɛ nanu. 4 Nea, apaafoɛ bɔ bɛyɛle ɛmɔ boo nanu adwuma ne, b'akatua bɔ ɛmmɔ amva amma bɛ ne, osu frɛ ɛmɔ, na apaafoɛ nemɔ sue ne adwu asafo Awurade so anu. 5 Ɛmɔ nyane asetena pa wɔ aseɛ he aso, na ɛmɔ buli ahohwibra. Ɛmɔ adidi bayɛ twɔtwɔfee te kyɛ ngaka bɔ bɛkwaahu bɛ ne. 6 Ɛmɔ abu teneneeniɛ fɔ bahu ye; aso Ɔne* ɛmɔ ngoli anaa?

7 Nniema mɔ, ɛmɔnya aboterɛ bɛnwondɛ Awurade kyẽa ne. Ɛmɔnea kyɛbɔ kuaniɛ nwondɛ ma aseɛ kye aleɛ bɔ ɔsom bo ne; onya aboterɛ nwondɛ kyɛ nzue bɔ oli moa, ne nzue bɔ ɔpɛ yebo kɔtɔ. 8 Ɛmɔ koso, ɛmɔnya aboterɛ na ɛmɔmia ɛmɔ nye, ofikyɛ Awurade kyẽa ne apingye. 9 Nniema mɔ, nnɛmaa ɛmɔ nwiinwii betia ɛmɔ nwo, na bammu ɛmɔ atɛn. Ofikyɛ bɔ okobu atɛn ne gyi anoa ne si berɛ. 10 Aliemaa mɔ, adiifoɛ bɔ bɛ dwudwole wɔ Awurade dumaa nu ne, ɛmɔsua nikye bie bɛfi b'amanehunu ne b'aboterɛ nanu. 11 Ɛmɔtie, bɛ bɔ bɛmiane bɛ nye bɛfale amaneɛ nu ne, yɛbu bɛ kyɛ bɛle anigye. Nnaa ɛmɔ ate Job animia nanwo dwirɛ, ná ɛmɔ nwuni bɔ Awurade maa ofili nu wale ne. Ɛhe amaa ɛmɔ anwu kyɛ Awurade le ahunu-ndetelɛ, na onwu anwunvoin.

12 Aliemaa mɔ, ɛhe mukoraati si ne, nnɛmɔ ta ndaen! Nnɛmɔfa anwuro, aseɛ, anaa nikye foforɛ biala bɛta ndaen. Ɛmɔ de, sɛ ɛmɔka "Yoo" a, ɛmɔma ɔyɛ yoo, na sɛ "Daabi" koso a, ɛmɔma ɔyɛ daabi, ná bammu ɛmɔ atɛn.

13 Ɛmɔ nu bie nwu amaneɛ? Ma ɔbɔ mbaeɛ. Ebie nye agye? Ma ɔto ayɛyie dwein. 14 Ɛmɔ nu bie nde apɔ? Ma ɔfrɛ asafo nanu mbanyi ma bɛbɔ mbaeɛ bɛma ye, ná bɛfa ngoo bɛgua ye so wɔ Awurade dumaa nu. 15 Gyidie mbaeɛ ne kole bɔ ɔnde apɔ ne ngoa, na Awurade kɔpagya ye; na sɛ wayɛ bɔne bie a, ɔkɔfa kɔhyɛ ye. 16 Yeti, ɛmɔkeka ɛmɔ bɔne behyire ɛmɔ nwo, na ɛmɔbɔ mbaeɛ bɛma ɛmɔ nwo, kyɛbɔ ɔkɔyɛ a ɛmɔ nwo kɔtɔ ɛmɔ ɔ. Sɛ teneneeniɛ mbaeɛ yɛ adwuma a, tumi wɔ nu paa. 17 Né Elia te sona te kyɛ yɛ ala, nakoso ɔbɔle mbaeɛ kyɛ nnɛmaa nzue tɔ, na nzue andɔ aseɛ naso afoɛ nza ne bosome nzia. 18 Afei, osa bɔle mbaeɛ, na nzue tɔle maa aseɛ ne bɔle ye aleɛ. 19 Nniema mɔ, sɛ ɛmɔ nu bie twe ye nwo fi nahorɛ nanwo, na ebie sa fa ye ba a, 20 ɛmɔkaye kyɛ, ebiala bɔ ɔkɔhwe ɔbɔnefoɛ kofi atee bɔ ɔttemaye so ne, okole ye kofi ewue nu, na ɔkɔkata bɔne pee so.