1 Nakoso wɔ de, ka edwirɛ bɔ ɔne ngyerɛkyerɛ pa ne yia. 2 Mmrienzua bɔ bɛ nye afi ne, bɛyɛ nikye bie a bɛnea yé, bɛma bɛ nye la ase, bɛhyɛ bɛ nwo so, bɛyɛ mmenia bɔ bɛyɛ se wɔ gyidie ne ɔdɔ nu, na bemia bɛ nye begyina amaneɛ nu. 3 Mmrasua bɔ bɛ nye afi ne koso, bɛbɔ bra pa; nnɛmaa bɛsɛkye mmenia dumaa, nnɛmaa bɛyɛ akɔwenzafoɛ, mmom behyire nikye pa. 4 Kyɛbɔ ɔkɔyɛ a bɛkɔtu ndaluwa fo maa bɛkɔlɔ bɛ humɔ ne bɛ mmaa mɔ, 5 bɛkɔmaa b’adwene nu kɔla berɛ, bɛkɔbɔ bra bɔ ye nwo te, bɛkɔyɛ awuro adwuma, bɛkɔyɛ pa, bɛkɔbrɛ bɛ nwo ase bɛkɔma bɛ humɔ, ná mmenia anga edwirɛ tɛɛ biala amva Nyameɛ dwirɛ nanwo.

6 Mmrandeɛ koso, tu bɛ fo kyɛ bɛhyɛ bɛ nwo so. 7 Nikye biala nu ne, yɛ nikye pa maa bɛsuesua. Sɛ ekyirekyire a, ka nahorɛ, nnɛfa wɔ ngyerɛkyerɛ di angorɛ, 8 ka edwirɛ bɔ ye nwo te, kyɛbɔ ɔkɔyɛ a bɛ bɔ bɛdwɔso betia yɛ ne nyunu kogua ase, ofikyɛ bɛngonya edwirɛ tɛɛ biala bɛngɔha bɛngɔfa yɛ nwo. 9 Odikyɛ ngoaa brɛ bɛ nwo ase ma bɛ wuramɔ wɔ nikye biala nu, bɛyɛ nikye bɔ ɔkɔmaa bɛ wuramɔ nye kɔgye bɛ nwo, nnɛmaa bɛyɛ nyenyewa, 10 nnɛmaa bɛwia bɛ, mmom bɛma benya bɛ nu gyidie, kyɛbɔ ɔkɔyɛ a anuonyam kɔwa y’Agyenkwa Nyameɛ ngyerɛkyerɛ nanwo wɔ nikye biala nu.

11 Ofikyɛ Nyameɛ adom bɔ ɔkɔmaa sona biala konya ngoa ne, bala ye ali. 12 Ɔtete yɛ maa yɛkyi bɔne ne wiase akɔnnɔ, na yɛfa adwene bɔ enu la berɛ, tenenee ne nyamesom pa yɛtena ase wɔ wiase he anu, 13 mmerɛ bɔ yɛnwondɛ kyɛ anidasoɛ bɔ ɔyɛ anigye ne kɔwa nu, na yɛnwondɛ mmerɛ bɔ Nyameɛ piri ne y’Agyenkwa Yesu Kristo kɔye bɛ nwo ali wɔ anuonyam nu ne. 14 Kristo yeɛ ɔfale ye nwo bɔle afɔleɛ mane yɛ, kyɛbɔ ɔkɔyɛ a okole yɛ kofi yɛ amumuyɛɛ mukoraati nu, na wate mmenia biemɔ nwo wafa bɛ wayɛ ye bɔbɔ ye agyapadeɛ; bɛ bɔ bɛ nye gye ye nwo kyɛ bɛkɔyɛ nningyein pa ne.

15 Tumi bɔ bafa bama wɔ ne, fa ka ɛhemɔ nwo dwirɛ, na tu bɛ fo. Nnɛmaa ebiala bu wɔ animtia.