Annabi Sofoni 2

Alatala xa xɔnɛ Yudaya nun si gbɛtɛe ma

1 «Si yaagitare, wo xa wo yɛtɛ mato,

2 beenu waxati xa kamali,

beenu Alatala xa xɔnɛ xa wo li,

beenu Alatala xa lɔxɔɛ xɔrɔxɔɛ xa fa wo ma.

Na lɔxɔɛ dangima nɛ alɔ maale lagi foye naxan tutunma.

3 Wo tan mixi magoroxi naxee na Isirayila,

wo xa Alatala fen, wo xa a xa sɛriyɛ rabatu,

wo xa tinxinyi, nun yɛtɛ magore fen.

Tɛmunde na kui wo nɔma nɛ ratangade

Alatala xa xɔnɛ lɔxɔɛ ma.»

4 «Gasa rabɛɲinma nɛ, Asikalɔn kana,

Asidodi keri ɲama ya xɔri, Ekiron tala.

5 Ɲaxankatɛ na wo bɛ,

wo tan naxee sabatixi baa dɛ ra,

wo tan naxee kelixi Kirɛti.

Alatala bara natɛ tongo wo xa fe ra,

Kanaanka naxee na Filisita bɔxi ma,

n wo xun nakanama nɛ han mixi birin ɲɔn wo yi.

6 Xurusee fama nɛ lude wo xa bɔxi ma,

wo xɔnyi findi gɔɔrɛ ra xuruse dɛmadonyie bɛ.

7 Na bɔxi findima Yudayaka mixi dɔnxɔɛe nan gbe ra,

e fa e xa xurusee dɛ madonde naa.

Nunmare tɛmui e e malabuma nɛ Asikalɔn xa banxie kui,

barima e Marigi Alatala fama nɛ e malide,

a e xa mixi suxuxie ragbilen e xɔnyi.»

8 «N bara Mowabakae xa konbie mɛ,

Amonikae xa wɔyɛn bɛxuxie bara n li.

E bara n ma ɲama rayaagi,

e bara dangi naaninyi ra.»

9 «N tan Isirayila Marigi Alatala, Xili Xungbe Kanyi,

n bara n kali Mowaba luma nɛ alɔ Sodoma,

Amonikae lu alɔ Gomorakae,

e xa bɔxi kana, ɲooge ɲaaxi nun fɔxɛ lu naa.

10 E na sɔtɔma e xa yɛtɛ igboɲa nan ma.

E bara Alatala Xili Xungbe Kanyi xa ɲama rayaagi,

e bara te a xa ɲama xili ma.

11 Alatala magaaxu, a e ɲaxankatama nɛ a ɲaaxi ra.

A kuye birin kanama nɛ duniɲa ma,

si birin fa Alatala batu e xɔnyi.»

12 «Wo tan Kusikae,

wo fan sɔxɔma nɛ n ma santidɛgɛma ra.»

13 «Ala a sɛnbɛ raminima nɛ kɔɔla ma,

a fa Asiriya sɔntɔ.

A Ninewe xun nakanama nɛ, a na findi gbengberen yire ra.

14 Xurusee luma nɛ e dɛ madon na na taa kui,

a nun wulai sube mɔɔli birin.

Yubɛ nun xundi kɔɛ radangima nɛ na banxi kanaxie fari.

Naadɛ nun wundɛri birin kanaxi, e xa wuri bara bɔrɔ.

15 Yi taa xungbe naxan nu luma ɲɛlɛxin na,

naxan bɔɲɛ nu saxi,

naxan nu bara a fala a yɛtɛ bɛ,

‹N keren nan tide gbo,›

a xun bara rakana han a bara findi wulai subee xɔnyi ra.

Dangi mixi birin yoma nɛ a ma sɔnɔn,

a findi dɛi sigi ra e bɛ.»