ಪವಿತ್ರಾತ್ಮಾನಾ ವರಾ
1 ಭಾಯೊ ಭೆನೊ, ಪವಿತ್ರ ಆತ್ಮಾನಾ ವರಾನಾ ಕ್ಹರಿನಾ ಹುತಿ ತುಮೆ ಚೊ಼ಕಿ ತರಾ ತಿಳ್ದಿಲಿವಾಲಾ ಥೌ. 2 ತುಮೆ ಬರೊಕ್ಹಾಮಾ ನೈ ರ‍್ಹತಾಮಾ, ತುಮೊನೆ ಮನಸ್ಸೆ ಆಯಲ ತಿಮ್ಮ ಮುಕಿಯೊ ಮುರತಿಯೊ ಕನ ಗೈನ ಆತಾತಾ; ಎ ತುಮೊನೆಜ಼ ಗ್ವತ್ತ ಛೆ. 3 ಅಕ್ಲು ತುಮೊನೆ ಕರೆಟ್ಟ ಗ್ವತ್ತ ರ‍್ಹವಾದೆ; ಪವಿತ್ರ ಆತ್ಮಾನಿ ಪ್ರೆರಣೆಕ್ಹು ಬೊಲಾಲೊ ಕುನ್ನಬಿ "ಯೆಸುನೆ ದಿಕ್ಕಾರ" ಕೆ ನೈ ಸಕ್ತೊ. ತಿನಾ ನಿಂಗತಜ಼, ಪವಿತ್ರ ಆತ್ಮಾನಿ ಪ್ರೆರಣೆ ನೈಸೊ ಕುನ್ನಬಿ"ಯೆಸುಜ಼ ಪ್ರಭು ವ್ಹೈ" ಕೈನ ವಪ್ಪಿ ನೈ ಲೆಸಕ್ತೊ.
4 ಆತ್ಮಿಕ ವರಾ ಬಿಜಾ಼ ಬಿಜಾ಼ ಛೆ; ತೆ ಕ್ಹಾರು ದಿವಾನು ಪವಿತ್ರ ಆತ್ಮಾ ಯಕ್ಲೊಜ಼ ವ್ಹೈ. 5 ಸೆವಾ ಬಿಜಾ಼ ಬಿಜಾ಼ ಛೆ; ತೆನೈಸೊ ತೆ ಸೆವಾನೆ ಯೊಗ್ಯ ಪ್ರಭು ಯಕ್ಲೊಜ಼ ವ್ಹೈ. 6 ಕಾಮ್ನಾ ತರಿಕಾ ಬಿಜಾ಼ ಬಿಜಾ಼ ಛೆ; ತೆ ಕ್ಹಾರು ಕ್ಹಾರಿ ತರಾಮಾ ಕರಾಲೊ ಕ್ಹುದಾ ಯಕ್ಲೊಜ಼ ವ್ಹೈ. 7 ಹರ ಯಕ್ಲಾಮಾ ದಿಕ್ಹಿನ ಆವಾನಾ ಪವಿತ್ರ ಆತ್ಮಾನಾ ವರಾ ಕ್ಹಾರಾ ಜ಼ನಾವೊನಾ ಚೊ಼ಕಾನಾ ಹುತಿಜ಼ ದಿದಲ ವ್ಹೈ.