ಕ್ಹುದಾನೊ ಸೆವಕ
1 ಇನಾಹುತಿ ಮಾರಾ ಭಾಯೊ ಭೆನೊ, ಮಿ ಆತ್ಮಿಕ ಮನಕ್ಹೊನಾ ಕ್ಹಾತೆ ಬೊಲಲ ನಿಂಗತ ಪೈಲಾ ತುಮಾರಾ ಕ್ಹಾತೆ ಬೊಲಾನೆ ಥಯು ನೈ. ದುನಿಯಾನಾ ಮನಕ್ಹೊ ಕ್ರಿಸ್ತಮಾ ನ್ಹಾನಾ ಬಚ಼್ಚಾ ರ‍್ಹಯಲವಾಲಾವೊನಾ ಕ್ಹಾತೆ ಬೊಲಲ ನಿಂಗತ ಮಿ ತುಮಾರಾ ಕ್ಹಾತೆ ಬೊಲು ಲಾಗ್ಯು. 2 ಮಿ ತುಮೊನೆ ಕರಲ ಉಪದೆಶ ಘಟ್ಟ ರ‍್ಹಯಲ ಅನ್ನ ನಿಂಗತ ನೈಸೊ ದುದ್ದ ನಿಂಗತ ವ್ಹತ್ತು; ಕಾಕದ್ಯಾಮ ಮಿ ಆಸಾನ ರ‍್ಹಯಲ ವಾತೊ ಶಿಕ್ಲಾಯೊ ವರಿ ಘನ್ನಿಯೊ ಆಳ ರ‍್ಹಯಲ ವಾತೊ ತುಮೊನೆ ಕದ್ಯೊ ನತ್ತಿ. 3 ತುಮೆ ಹಜು಼ನಬಿ ದುನಿಯಾನಾ ಮನಕ್ಹೊ ನಿಂಗತ ರ‍್ಹವಾಡಾಸ. ತುಮಾರಾ ವಚ್ಮಾ ದ್ವೆಶ, ವಾದ ವಿವಾದ ಛೆ ತುಮೆ ಹಜು಼ನಬಿ ಸಾಧಾರಣ ಮನಕ್ಹೊ ನಿಂಗತ ದೆಕಾಡಾನೆ ದೆತು ನೈಸು? 4 ತುಮೊಮಾ ಯಕ್ಲೊ, ಮಿ ಪೌಲಾ ನಿಂಗತ ಚಾ಼ಲಾಲೊ ವ್ಹೈ; ವರಿಯಕ್ಲೊ ಮಿ ಅಪೊಲೊಸ ನಿಂಗತ ಚಾ಼ಲಾಲೊ ವ್ಹೈ, ಕೈನ ತುಮಾರಾಮಾ ದುನಿಯಾನಾ ಮನಕ್ಹೊ ನಿಂಗತ ದೆಕಾಡಿನ ದೆತಾ ನೈಸು?
5 ತೆನೈಸೊ ಅಪೊಲೊಸ ಕುನ್ನ ವ್ಹೈ? ಪೌಲಾ ಕುನ್ನ ವ್ಹೈ? ತುಮೊನೆ ವಿಸ್ವಾಸಮಾ ಬಲೈ ಲಾಯಲ ಸೆವಕೊ ಹಮೆ ನ್ಹವೈ ಸು? ಹಮೊಮಾ ಹರಯಕ್ಲೊ ಪ್ರಭು ದಿದಲ ಕಾಮೊಜ಼ ಕರೆಸ. 6 ಮಿ ಬಿಯ್ಯಾ ಬಿತ್ಯೊ; ಅಪೊಲೊಸ ಪಾನಿ ಘಾಲ್ಯೊ; ತೆನೈಸೊ ತಿನೆ ಬೆಳಸಾಯಲ ಕ್ಹುದಾಜ಼ ವ್ಹೈ. 7 ತಿನಾಹುತಿ ಬಿಯ್ಯಾ ಬಿತ್ತಾಲೊ ರ‍್ಹವಾದೆ, ಪಾನಿ ಘಾಲಾಲೊ ರ‍್ಹವಾದೆ ಖಾಸ ನ್ಹವೈ; ಬೆಳಸಾವಾಲೊ ಕ್ಹುದಾಜ಼ ಮ್ಹೊಟೊ ವ್ಹೈ. 8 ಬಿಯ್ಯಾ ಬಿತ್ತಾಲಾನಾ ವರಿ ಪಾನಿ ಘಾಲಾಲಾನು ಉದ್ದೆಶ ಯಕ್ಕಜ಼ ಥಯುಸ. ವರಿ ಹರಯಕ್ಲಾನೆಬಿ ತಿನಾ ತಿನಾ ಕಾಮ ಪ್ರಕಾರ ಪ್ರತಿ ಫಲ ಮಳಸ. 9 ಹಮೆ ಕ್ಹುದಾನಾ ಕ್ಹಾತೆ ಕಾಮ ಕರಾಲಾ ಥಯಾಸ. ತುಮೆ ಕ್ಹುದಾನು ಕ್ಹೆತರ ಥಯಾಸ. ತೆನೈಸೊ
ತುಮೆ ಕ್ಹುದಾನು ಘರ ಥಯಾಸ. 10 ಕ್ಹುದಾ ಮನೆ ದಿದಲ ವರಾ ಉಪಯೊಗ ಕರಿನ ಶಾಣ್ಯೊ ಶಿಲ್ಪಿ ನಿಂಗತ ಮಿ ತೆ ಘರನೆ ಫಾಯಾ ಘಾಲ್ಯೊ. ಬಿಜಾ಼ ಮನಕ್ಹೊ ತೆ ಫಾಯಾನಾ ಉಪ್ಪರ ಭಾಂದಾಡಾಸ. ತೆನೈಸೊ ಹರಯಕ್ಕ ಮನಕ್ಹ ತೆ ಕಿಮ್ಮ ಭಾಂದಾಡೊಸ ಕವಾನು ಹುಶಾರಕ್ಹು ರ‍್ಹೌ. 11 ಫಾಯಾ ಕೆಳಾಮಾಜ಼ ಘಾಲ್ಯಲ ಛೆ. ತೆ ಫಾಯಾ ಯೆಸು ಕ್ರಿಸ್ತಜ಼ ವ್ಹೈ. ತೆ ಫಾಯಾ ನೈಸೊ ಬಿಜಿ಼ ಫಾಯಾ ಬಿಜು಼ ಕುನ್ನಜ಼ ನೈ ಘಾಲಸಕ್ತು. (ಯೆಶಾಯ 28:16) 12 ಯಕ್ಕ ಮನಕ್ಹ ತೆ ಫಾಯಾನಾ ಉಪ್ಪರ ಕ್ಹೊನು, ರುಪ್ಪು, ಲಾಕ್ಡು, ಚಾ಼ರೊ ವರಿ ಧಾಂಡಾಕ್ಹು ಎ ಕ್ಹಾರು ಉಪಯೊಗ ಕರಿನ ಭಾಂದಸ. 13 ತೆನೈಸೊ ಹರ ಯಕ್ಲಾನು ಕಾಮ ಕರೆಟ್ಟ ದಿಕ್ಹಸ; ಕಾಕದ್ಯಾಮ, ಕ್ರಿಸ್ತ ಆವಾನು ಫೈಸ್ಲಾನೊ ದಿನ್ನ ತೆ ದೆಕಾಡಸ. ತೆ ದಿನ್ನ ಆಗನಾ ಕ್ಹಾತೆ ಹುಟ್ಟಸ. ತೆ ಆಗ ಹರಯಕ್ಕ ಮನಕ್ಹನಾ ಕಾಮೊ ಪರಿಕ್ಷಾ ಕರಸ. ವರಿ ಚೊ಼ಕು ಗುಣಮಟ್ಟ ದೆಕಾಡಿನ ದಿವಸ. 14 ಫಾಯಾನಾ ಉಪ್ಪರ ಭಾಂದಲ ಘರ ಘಟ್ಟ ರ‍್ಹಯಮ, ಭಾಂದಲವಾಲೊ ಪ್ರತಿ ಫಲ ವ್ಹಂದಿಲಿವಸ. 15 ತೆನೈಸೊ ಕಾಮ ಬಳಿ ಗಯುಮ, ಭಾಂದಲವಾಲಾನೆ ಲುಕ್ಸಾನ ಥಾವಸ. ತೆ ತುಬಿ ಆಗಕ್ಹು ಚುಕೈಲಿದಲವಾಲಾ ನಿಂಗತ ರಕ್ಷಣೆ ವ್ಹಂದಿಲಿವಸ.
16 ತುಮೆಜ಼ ಕ್ಹುದಾನಿ ಆಲಯ ಥಯಾಸ. ಎ ತುಮೊನೆ ಕ್ಹರಿಮಾಜ಼ ಗ್ವತ್ತ ಛೆ. ಕ್ಹುದಾನಿ ಆತ್ಮಾ ತುಮಾರಾಮಾ ಛೆ. 17 ಕುನ ತುಬಿ ಕ್ಹುದಾನಿ ಆಯಲ ಹಾಳ ಕರ‍್ಯಾಮ, ಕ್ಹುದಾ ತಿನೆ ಹಾಳ ಕರಸ. ಕಾಕದ್ಯಾಮ ಕ್ಹುದಾನಿ ಆಲಯ ಪರಿಶುದ್ಧ ಥಯಲ ವ್ಹೈ. ತುಮೆಜ಼ ಕ್ಹುದಾನಿ ಆಯಲ ಥಯಾಸ.
18 ತುಮೊನೆ ತುಮೆಜ಼ ಮೊಸ ಕರಿಲಿವೊ ನಕೊ. ತುಮೊಮಾ ರ‍್ಹಯಲವಾಲೊ ಕುನ್ ತುಬಿ ತೆ ಎ ದುನಿಯಾಮಾ ಗ್ಯಾನಿ ವ್ಹೈ ಕವಾಲೊ ತೆ ಪಿಸಾಳೊ ಥೌಜ಼. ತೆಳಾಮಾ ತೆ ಮನಕ್ಹ ಕ್ಹರಿಮಾಜ಼ ಗ್ಯಾನಿ ಥಾವಸ. 19 ಕಾಕದ್ಯಾಮ, ಎ ದುನಿಯಾನಿ ಗ್ಯಾನ ಕ್ಹುದಾನಿ ನಜ಼ರಮಾ ಪಿಸಾಳು ಪನ್ನ ಥಯುಸ" ಕ್ಹುದಾ ಗ್ಯಾನಿಯೊನೆ ತ್ಯುನಾ ಚಾಲಕತನಾಮಾ ತ್ಯುನೊನೆಜ಼ ಧರಸ" ಕೈನ ಪವಿತ್ರ ಗ್ರಂಥಮಾ ಬರ್ದಲ ಛೆ. (ಯೊಬ 5:13) 20 ಪ್ರಭು ಗ್ಯಾನಿಯೊನಾ ವಿಚಾರೊ ತಿಳ್ದಿಲಿದ್ಯೊಸ. ತ್ಯುನಾ ವಿಚಾರೊ ಕಾಮ ನೈಸೊ ವ್ಹೈ ಕೈನ ತಿನೆ ಗ್ವತ್ತ ಛೆ ಕೈನ ಪವಿತ್ರ ಗ್ರಂಥಮಾ ಬರ್ದಲ ಛೆ. 21 ತಿನಾಹುತಿ ತುಮೆ ಮನಕ್ಹೊನಾ ಹುತಿ ಹೆಮ್ಮೆ ಥೌ ನೈ. ಕ್ಹಾರುಜ಼ ತುಮಾರು ವ್ಹೈ. 22 ಪೌಲಾ, ಅಪೊಲೊಸ ವರಿ ಪೆತ್ರಾ ತುಮಾರಾ ಥಯಾಸ. ದುನಿಯಾ, ಜ಼ಲಮ, ಮೌತ ವರಿ ವರ್ತಮಾನ ವರಿ ಭವಿಷ್ಯತ ಕಾಲನಾ ಸಂಗತಿಯೊ ತುಮಾರಾಜ಼ ವ್ಹೈ. 23 ತುಮೆ ಕ್ರಿಸ್ತನೆ ಮಳಲವಾಲಾ ಥಯಾಸ. ಕ್ರಿಸ್ತ ಕ್ಹುದಾನೆ ಮಳಲವಾಲೊ ಥಯೊಸ.