ಮೊರ್ತಿಯೊನೆ ಚ಼ಡಾಯಲ ಅನ್ನನಾ ಹುತಿ ಚರ್ಚೆ ಕರಲ
1 ಮುರತಿಯೊನೆ ಚ಼ಡಾಯಲ ಅನ್ನನಾ ಹುತಿ ಮಿ ಸು ಕೌಸ ಕದ್ಯಾಮ;
"ತುಮೊನೆ ಕ್ಹಾರಾವೊನೆ ಗ್ಯಾನ ಆಯುಸ" ಕೈನ ಕೈಲಿವೊಶಿ. ಗ್ಯಾನ ತುಮೊನೆ ಅಹಂಕಾರಿ ಕರಸ. ಮಯಾ ತುಬಿ ಭಕ್ತಿನೆ ಘಟ್ಟ ಕರಸ. 2 ಕುನ್ ತಬಿ ತಿನೆ ಗ್ವತ್ತ ಛೆ ಕೈನ ಹೆಮ್ಮೆ ಪಡ್ದಿಲಿವಾಲೊ ರ‍್ಹಯಮ ತೆ ತಿಳ್ದಿಲಿವಾನು ತೆ ಚೊ಼ಕಿ ತರಾ ತಿಳ್ದಿಲಿದಲ ನೈ ರ‍್ಹತೊ. 3 ತೆನೈಸೊ ಕ್ಹುದಾನೆ ಮಯಾ ಕರಾಲಾವೊನೆ ಕ್ಹುದಾ ವಳಕಸ.
4 ಮುರತಿಯೊನೆ ಚ಼ಡಾಯಲ ಅನ್ನ ಖಾವಾನಾ ಹುತಿ ಮಾರು ವಿಚಾರ ಅಮ್ಮ ಛೆ; "ಮುರತಿಯೊನೆ ಕ್ಹರಿನು ಅಸ್ತಿತ್ವ ನತ್ತಿ. ಕ್ಹುದಾ ಯಕ್ಲೊಜ಼ ವ್ಹೈ ಬಿಜಾ಼ ಕ್ಹುದಾಜ಼ ನತ್ತಿ" ಎ ತುಮೊನೆ ಗ್ವತ್ತ ರ‍್ಹಯಲ ವಿಷಯ ವ್ಹೈ. 5 "ಕ್ಹುದಾವೊ" ಕವೈಲಿವಾಲಾ ದುನಿಯಾಮಾ ವಸೆ; ತ್ಯವಾ ಘನ್ನಾ "ಕ್ಹುದಾ" ವೊನೆ "ಪ್ರಭು" ವೊನೆ ಪುಜಾ ಕರಾನು ಛೆ. 6 ತಿಮ ರ‍್ಹಯುತಬಿ, ಅಪೊನೆ ಯಕ್ಲೊಜ಼ ಕ್ಹುದಾ ವ್ಹೈ. ತೆ ಅಪ್ನೊ ಹಮೆಶಾನೊ ಬಾ ವ್ಹೈ; ಕ್ಹಾರಿ ಸೃಷ್ಟಿನೆ ಖಾಸ ಕರಲವಾಲೊ ವ್ಹೈ ಅಪೆ ರ‍್ಹವಾನು ತಿನಾ ಹುತಿಜ಼ ವ್ಹೈ ಅಪೊನೆ ಯಕ್ಲೊಜ಼ ಪ್ರಭು ವ್ಹೈ ತೆಜ಼ ಯೆಸು ಕ್ರಿಸ್ತ ವ್ಹೈ ತಿನಾಕ್ಹುಜ಼ ಎ ಕ್ಹಾರು ತಯ್ಯಾರ ಥಯುಸ. ತಿನಾ ಮುಕಾಂತರ ಅಪೆ ಅಸ್ತಿತ್ವಮಾ ಛೆ.
7 ತೆನೈಸೊ ಕ್ಹಾರಾವೊನೆ ಇನು ಅರು ನತ್ತಿ. ದಕ್ಹಾ ಜ಼ನಾ ಪೈಲಾನಿ ಪದ್ದತ ನಿಂಗತ ಆಯಲ ಮುರತಿಯೊನೆ ಆರಾಧನಾ ಕರ‍್ತಾ, ಮುರತಿಯೊನೆ ಚ಼ಡಾಯಲ ಅನ್ನ ಖಾವಸ. ತೆನೈಸೊ ತ್ಯುನಿ ಮನಸಾಕ್ಷಿ ಘಟ್ಟ ನೈ ರ‍್ಹಯಲಕ್ಹು ತ್ಯುನೆ ಅಶುದ್ಧ ಥಯಾಸ ಕೈನ ತಿಳ್ದಿಲಿವಸ. 8 ಅಪೆ ಖಾವಾನು ಅನ್ನ ಅಪೊನೆ ಕ್ಹುದಾನೆ ನೈ ಮಳಾಸಕತು. ತೆ ನೈ ಖಾವಾಕ್ಹು ಅಪೊನೆ ನಷ್ಟ ಸು ನತ್ತಿ. ಖಾವಾಕ್ಹು ಕಯು ಫೈದೊ ನತ್ತಿ.
9 ತೆನೈಸೊ ತುಮಾರಿ ಆಜಾ಼ದಿ ಉಪಯೊಗ ಕರ‍್ತಾಮಾ ಮನಸ್ಸ ನೈ ಘಟ್ಟ ರ‍್ಹಯಲ ಭೈನಾ ಬರೊಕ್ಹಾನೆ ಅಡ್ಡ ಥೌನೈ ಹುಶಾರಕ್ಹು ದೆಕಿಲಿವೊ. 10 ಗ್ಯಾನ ರ‍್ಹಯಲವಾಲೊ ವ್ಹೈ ಕೈನ ಕೈಲಿವಾಲೊ ತು ಮುರತಿಯೊನಾ ಗುಡಿಮಾ ಖಾವಾನೆ ಬೈಟಲ ಮನಸಾಕ್ಷಿ ಕಮ್ಮ ರ‍್ಹಯಲವಾಲೊ ದೆಕ್ಯಮ, ತೆಬಿ ಮುರತಿಯೊನೆ ಚ಼ಡಾಯಲ ಅನ್ನ ಖಾವಾನೆ ಹಿಮ್ಮತ ನೈ ಕರ‍್ತೊ ಸು? 11 ಎ ತಾರಾ ಗ್ಯಾನಕ್ಹು ಕಮಜೊ಼ರ ರ‍್ಹಯಲ ಭೈ ನಾಶನೆ ಗುರಿ ಥಾವಸ. ಯೆಸು ಕ್ರಿಸ್ತ ತಿನಾಹುತಿಬಿ ಜ಼ಲಮ ದಿದ್ಯೊ ನೈ ಸು? 12 ಇಮ್ಮ ತುಮೆ ತುಮಾರಾ ಮನಸಾಕ್ಷಿ ಕಮ್ಮ ರ‍್ಹಯಲ ಭಾಯೊ ವರಿ ಭೆನೊನೆ ದುಖ ಕರಿನ, ತ್ಯುನಾ ವಿರುದ್ಧ ಪಾಪ ಭಾಂದಿಲಿವಾಕ್ಹು ಯೆಸು ಕ್ರಿಸ್ತನಾ ವಿರುದ್ಧ ಪಾಪ ಕರೊಶಿ. 13 ಮಿ ಖಾವಾನು ಅನ್ನ ಮಾರಾ ಭೈನೆ ಅಡ್ಡ ಥಯುಮ ಮಿ ಕೆಳಾಮಾಜ಼ ತೆ ಅನ್ನ ನೈ ಖಾತೊ, ತಿನಾ ಬರೊಕ್ಹಾನೆ ಅಡ್ಡ ನೈ ಲಾತೊ.