1 Pedro 3

ಮಾಟಿ ಬೈಕೊ

1 ಹೆಣ ಮನಕ್ಹೊ, ಇನಾನಿಂಗತಜ಼ ತುಮಾರಾ ಮಾಟಿಯೊನೆ ಅಧಿನ ಥೈನ ರ‍್ಹವೊ. ತ್ಯುನೊಮಾ ದಕ್ಹಾಜ಼಼ನಾ ಕ್ಹುದಾನಿ ವಾಕ್ಯಾನೆ ಅವಿಧೆಯ ರ‍್ಹಯಾತಬಿ 2 ತುಮೆ ಕ್ಹುದಾನಿ ಭಯ ಭಕ್ತಿಮಾ ರ‍್ಹೈನ ಸುಜ಼ ಕಳಂಕ ನೈಸೊ ಜಿವ್ನಾ ಕರಾನು ತುಮೊನೆ ದೆಕಿನ ಕ್ಹುದಾನಿ ವಾಕ್ಯಾ ನೈ ಗ್ವತ್ತ ರ‍್ಹಯುತಬಿ ಕ್ಹುದಾನಿ ವಾಕ್ಯಾಪರ ತುಮೆ ಬರೊಕ್ಹೊ ಮ್ಹೆಲಲ ದೆಕಿನ ತುಮೆ ರ‍್ಹವಾನು ದೆಕಿನ ತ್ಯುನೆ ಶಿಕ್ಕಸ. 3 ಮಾತಾನಾ ಬಾಲೊ ಚೊ಼ಕಿ ತರಾ ವಳ್ಳಿವಾನು ರ‍್ಹೈನೆಕಾ ಕ್ಹೊನಾನು ಸಾಮನ ಚೊ಼ಕಾ ವಣ್ಣಾ ರ‍್ಹೈನೆಕಾ ತುಮಾರಿ ಸುಂದರ್ತಾನೆ ತೆ ಸಾಮನ ಖಾಸ ಥೈನ ರ‍್ಹೌ

4 ತುಮೆ ರ‍್ಹವಾನೊ ತರಿಕೊ ಶಾಂತಿ ಸಮಾದಾನ ಥಯಲ ತುಮಾರಾ ಮ್ಹೈ ಚೊ಼ಕು ದಿಕ್ಹಾನು ರ‍್ಹೌ. ತೆ ಸುಂದರತಾ ಹಾಳಥಾತಿ ನೈ. ತೆ ಕ್ಹುದಾನೆ ಘನ್ನು ಮೊಗು ವ್ಹೈ. 5 ಘನ್ನಾ ದಿನ್ನಪಾಚಾ಼ ಜಿವ್ತಾ ರ‍್ಹಯಲವಾಲಾ ಕ್ಹುದಾನಿ ವಾಟಮಾ ಚಾ಼ಲಿನ ಪರಿಶುದ್ಧ ಥಯಲ ಹೆಣ ಮನಕ್ಹೊ ಇನಾನಿಂಗತಜ಼ ತಯ್ಯಾರ ಥೈನ ತ್ಯುನೆ ತಿವ್ನಾ ಮಾಟಿಯೊನೆ ಅಧಿನ ಥಯೊತ್ಯೊ. 6 ಮಿ ಸಾರಾಳ ನಿಂಗತ ರ‍್ಹಯಲ ಹೆಣ ಮನಕ್ಹೊನಾಹುತಿ ಕವಾಡೊಸ. ತೆ ತಿನಾ ಮಾಟಿ ರ‍್ಹಯಲ ಅಬ್ರಹಾಮನೆ ವಿಧೆಯ ಥೈನ ವ್ಹತ್ತಿ, ತಿನೆ ತೆ ಮಾರೊ ಮಾಲಕ ಕೈನ ಕತಿತಿ. ಹೆಣ ಮನಕ್ಹೊ ಥಯಲ ತುಮೆ ಭುಚ಼ಕ್ಯಾವಾಚಿ ಕೆಳಾಮಾಬಿ ಚೊ಼ಕು ರ‍್ಹಯಲಜ಼ ಕರಿಯೊಮ, ತುಮೆ ಸಾರಳನಾ ಕ್ಹರಿನಾ ಬಚ್ಚಾ಼ ಥಾವೊಸಿ.