1 ತುಮಾರಿ ಸಬೆಮಾ ಮ್ಹೊಟಾ ರ‍್ಹಯಲವಾಲಾವೊನಾ ಮಿ ದಕ್ಹಿಯೊ ವಾತೊ ಕೌ ಕೈನ ಛೆ. ಮಿ ಯಕ್ಲೊ ಮ್ಹೊಟೊ ಥಯೊಸ. ಮಿ ಕ್ರಿಸ್ತನೆ ತ್ರಾಸ ದಿವಾನು ಡೊಳೆ ದೆಕ್ಯೊಸ. ಹಮೊನೆ ದಿಕ್ಹಾನಾ ಟೈಮಮಾ ಮಿ ತಿಮಾ ಭಾಗಿದಾರ ಥಯೊಸ. 2 ತುಮೆ ಸಬೆನಾ ಜವಾಬದಾರಿಲಿದಲವಾಲಾ ಸಬೆನೆ ರಾಕು ಕೈನ ಮಿ ಮಾಂಗಿಲ್ಯುಸ. ತ್ಯುನೆ ಕ್ಹುದಾನಾ ಹಿಂಡ ವ್ಹೈ. ತುಮೆ ತೆ ಹಿಂಡನೆ ಕೈದೊ. ಕಾಕದ್ಯಾಮ ತೆ ತುಮಾರಿ ಆಸ ವ್ಹೈ. ತೆ ವಜ್ಜು಼ ಜ಼ಬರದಸ್ತಿಕ್ಹು ಉಚಾಯಲ ವಜ್ಜು಼ ನ್ಹವೈ. ಕ್ಹುದಾ ತೆಜ಼ ಆಸ ಕರಸ; ತುಮೆ ತೆ ಹಿಂಡನೆ ಕೈದಾನು ದೊಕ್ಡಾನಾಹುತಿ ನ್ಹವೈ, ಕ್ಹುದಾನಿ ಸೆವೆ ಕರಾನು ತುಮೊನೆ ರ‍್ಹಯಲ ಕ್ಹುಶಿನಾಹುತಿ ವ್ಹೈ. 3 ತುಮೆ ಜವಾಬ್ದಾರಿ ರ‍್ಹಯಲವಾಲಾ ತೆ ಹಿಂಡಪರ ಜ಼ಬರದಸ್ತಿ ಕರೊ ನಕೊ. ತುಮೆ ತ್ಯುನೊನೆ ಚೊ಼ಕಿ ಸಾಕ್ಷಿ ಥಾವೊ. 4 ಮ್ಹೊಟೊ ಕುರಬುರ‍್ಯೊ (ಕ್ರಿಸ್ತ) ದಿಕ್ಹತಾಮಾ, ತುಮೊನೆ ಮಾತಾಪರ ಕಿರಿಟ ಮಳಸ. ಮ್ಹೊಟಿ ತಾಕತಮಾ ರ‍್ಹಯಲ ತೆ ಕಿರಿಟ ತಿನಿ ಕಳಾ ಜ಼ವೈಲಿತಿಜ಼ ನೈ.

5 ಜಾಂಜಿಮಾನೊ ಮಿ ತುಮೊನೆ ದಕ್ಹಿಯೊವಾತೊ ಕೌ ಕೈನ ಛೆ. ತುಮೆ ಮ್ಹೊಟಾವೊನೆ ಅಧಿನ ಥೈನ ರ‍್ಹವೊ. ತುಮೆ ಯಕ್ನಾ ಯಕ್ಕ ಮಯಾಕ್ಹು ಚಾ಼ಲಿಲಿವೊ. ಕ್ಹುದಾ ಸ್ವಕ್ಕ ರ‍್ಹಯಲವಾಲಾವೊನಾ ವಿರುದ್ದ ವ್ಹೈ. ತೆ ತಗ್ಗಿನ ರ‍್ಹಯಲ ಮನಕ್ಹೊನೆ ಮರಗಾ ದೆಕಾಡಸ" ಜ್ಞಾನೊಕ್ತಿ 3:34 6 ತಿನಾಹುತಿ ಕ್ಹುದಾನಾ ಹತೊನಾ ತಾಕತನಾ ಹೆಟಾ ರ‍್ಹಯಲವಾಲಾ ತಗ್ಗಿನ ರ‍್ಹವೊ. ಚೊ಼ಕೊ ದಿನ್ನ ಆಯಲಪರ ತುಮೊನೆ ಉಪ್ಪರ ಉಚಾವಸ. 7 ತೆ ತುಮೊನೆ ರಾಕಲಕ್ಹು ತುಮಾರಿ ಚಿಂತಾ ತಿನೆ ವಪ್ಸಿನ ದಿವೊ.

8 ಯಕ್ಕಜ಼ ಮನಸವಾಲಾ ರ‍್ಹವೊ ವರಿ ಹುಶಾರ ಥೈನ ರ‍್ಹವೊ. ಸೈತಾನ ತುಮಾರೊ ದುಶ್ಮನ ವ್ಹೈ. ತೆ ವದ್ರಾನಾ ಶಿಯ್ಯಾ ನಿಂಗತ ಕಿನೆ ಖೌ ಕೈನ ಹುಡಕ್ತೊ ರ‍್ಹವಸ ತೆ ಮನಕ್ಹೊನೆ ಹುಡ್ಕಾಡೊಸ. 9 ತುಮಾರಾ ಬರೊಕ್ಹಾಮಾ ಘಟ್ಟರ‍್ಹೈನ ತಿನೆ ದೆಕೊ. ಕಾಕದ್ಯಾಮ ಜಗತ್ಮಾ ರ‍್ಹಯಲ ತುಮಾರಾ ಭಾಯೊ ಭೆನೊ ತುಮೊನೆ ರ‍್ಹಯಲ ತ್ರಾಸ ಖಾವಾಡಾಸ ತುಮೊನೆ ಗ್ವತ್ತ ಛೆ. 10 ಹೊ, ತುಮೆ ದಕ್ಹಾಜ಼಼ ದಿನ್ನ ತ್ರಾಸ ಖಾವೊಸಿ, ತೆ ಥಯಲಪರ ಕ್ಹುದಾ ಕ್ಹಾರು ಕರೆಟ್ಟ ಕರಸ. ತೆ ತುಮೊನೆ ತಾಕತ ದಿವಸ. ತುಮೆ ಹೆಟಾ ಪಡೆನೈಸೊ ತೆ ತುಮೊನೆ ಆಸ್ರೊ ಥೈನ ರ‍್ಹವಸ. ಕ್ಹಾರಾವೊನೆ ಮರಗಾ ದೆಕಾಡಾಲೊ ಕ್ಹುದಾ ತೆಜ಼ ವ್ಹೈ. ತಿನಾ ತಾಕತಮಾ ಪಾಲ ಲಿವಾನೆ ಕ್ರಿಸ್ತಜ಼ ತುಮೊನೆ ಬಲಾಯೊ. ತೆ ತಾಕತ ಹಮೆಶಾ ರ‍್ಹಯಲ ವ್ಹೈ. 11 ಕ್ಹಾರೊ ಅದಿಕಾರ ತಿನೊಜ಼ ವ್ಹೈ. ಆಮೆನ್.

12 ಮಿ ಆಂ ನ್ಹಾನು ಪತ್ರ ಸಿಲ್ವಾನನಾ ಆಸ್ರಾಕ್ಹು ಬರ್ದ್ಯೊ. ತೆ ಕ್ರಿಸ್ತಮಾ ರ‍್ಹೈನ ಬರೊಕ್ಹಾವಾಲೊ ಭೈ ವ್ಹೈ ಕವಾನು ತುನೆ ಗ್ವತ್ತ ಛೆ. ಮಿ ತುನೆ ಪೊಕ್ಹಾಲಾವಾನೆ ವರಿ ಅಗೊ ಬಡಾನೆ ಎ ಪತ್ರ ಬರ್ದ್ಯೊಸ. ಎಜ಼ ಕ್ಹುದಾನಿ ಕ್ಹರಿನಿ ಮರಗಾ ಕವಾನು ತುಮೊನೆ ಕೌ ಕೈನಜ಼ ಮಾರಿ ಆಸ ವ್ಹತಿ. ತೆ ಮರಗಾಮಾ ಘಟ್ಟ ಥೈ ರ‍್ಹವೊ.

13 ಬಾಬಿಲೊನಮಾ ರ‍್ಹಯಲ ಸಭೆವಾಲಾ ತುಮೊನೆ ನಮಸ್ಕಾರ ಕದ್ಯಾಸ. ತುಮೊನೆ ಇನಿಲಿದಲ ನಿಂಗತಜ಼ ತೆ ಮನಕ್ಹೊನೆ ಇನಿಲಿದ್ಯಾಸ. ಕ್ರಿಸ್ತಮಾ ಮಾರೊ ದಿಕ್ರೊ ಥಯಲ ಮಾರ್ಕ ತುಮೊನೆ ನಮಸ್ಕಾರ ಕದ್ಯೊಸ. 14 ತುಮೆ ಮಳಲ ಟೈಮಮಾ ಯಕ್ನಾ ಯಕ್ಕ ಮಯಾಕ್ಹು ಮಟ್ಟಿ ದಿವೊ. ಕ್ರಿಸ್ತಮಾ ರ‍್ಹಯಲ ತುಮೊನೆ ಕ್ಹಾರಾವೊನೆ ಸಮಾಧಾನ ಥಾವಾದೆ.