ಸಭೆನಾ ಮ್ಹೊಟಾ
1 ಮಿ ಕವಾನಿಯೊ ವಾತೊ ಕ್ಹರಿನಿಯೊಜ಼ ವ್ಹೈ. ತೆ ಸು ವ್ಹೈ ಕದ್ಯಾಮ, ಸಬಾಪಾಲಕ ಥೌಸ ಕೈನ ಕೊಶಿಶ ಕರಾಲೊ ಚೊ಼ಕು ಕಾಮಜ಼ ಕರಾಲೊ ವ್ಹೈ. 2 ತೆ ಸಭೆನಾ ಮ್ಹೊಟಾ ಮನಕ್ಹೊನಾ ಕೆಟ್ಟ ವಾತೊಮಾ ಪಡೆನೈಸೊ ಚೊ಼ಕೊ ಥೈನ ರ‍್ಹೌ. ತುನೆ ಯಕ್ಲಿಜ಼ ಬೈಕೊ ರ‍್ಹೌ. ತೆ ಘನ್ನೊ ಗ್ಯಾನಿ ರ‍್ಹೌ; ಮನಕ್ಹೊ ಮರ್ಯಾದಿ ದಿವಾನೆ ಯೊಗ್ಯ ರ‍್ಹೌ 3 ತಿನೆ ಪಿವಾನೆ ಆಸ ರ‍್ಹೌನೈ. ವರಿ ತ್ರಾಸ ಕರಾಲೊ ರ‍್ಹೌನೈ. ತೆ ಶಾಂತಿ ಸಮಾಧಾನವಾಲೊ ರ‍್ಹೌ; ದೊಕ್ಡಾವೊಪರ ಆಸ ರ‍್ಹೌನೈ. 4 ತಿನಾ ಸ್ವಂತ ಖಾಂದಾನವಾಲಾವೊನೆ ಚೊ಼ಕೊ ಚ಼ಲೈ ನಿಂಜಾ಼ವಾಲೊ ರ‍್ಹೌ. ತಿನಾ ಬಚ್ಚಾ಼ ತಿನೆ ಮರ್ಯಾದಿ ದ್ಯು. 5 ತಿನಾ ಸ್ವಂತ ಘರವಾಲಾವೊನೆ ಆಳಾನು ನೈ ಗ್ವತ್ತ ರ‍್ಹಯಲವಾಲೊ ಕ್ಹುದಾನಿ ಸಭೆಮಾ ಆಳಾನೆ ಯೊಗ್ಯ ನತ್ತಿ.
6 ತೆ ನವೊ ವಿಶ್ವಾಸಿ ರ‍್ಹೌ ನೈ. ನವಾ ವಿಶ್ವಾಸಿನೆ ಸಬೆಪರ ಮ್ಹೊಟೊ ಕರ‍್ಯಾಮ, ತಿನೆ ಸ್ವಕ್ಕ ಆವಸ. ಸೈತಾನ ತಿನಾ ಸ್ವಕ್ಕಕ್ಹು ತಿನೆ ಶಿಕ್ಷಾ ಮಳಲ ನಿಂಗತ ಇನೆಬಿ ಶಿಕ್ಷ್ಯಾ ಮಳಸ. 7 ಸಬೆಪರ ಮ್ಹೊಟೊ ರ‍್ಹಯಲವಾಲೊ ಸಭೆಮಾ ರ‍್ಹಯಲ ಮನಕ್ಹೊಕ್ಹು ಮರ್ಯಾದಿ ಲ್ಯು. ತೆಳಾಮಾ ತೆ ಮನಕ್ಹೊನಾ ಕೆಟ್ಟ ವಾತೊಕ್ಹು ವಾಚಿ಼ನ ರ‍್ಹವಸ. ಸೈತಾನ ಘಾಲಲ ಬಲಿಕ್ಹು ವಾಚಿ಼ನ ರ‍್ಹಸ.
ಸಭೆನಾ ಸಹಾಯಕೊ
8 ಇನಾ ನಿಂಗತಜ಼ ಸಭೆಮಾ ಚೊ಼ಕಾ ಸೆವಕೊ ಥಯಲವಾಲಾ ತ್ಯುನಿ ನಡತೆಕ್ಹು ಬಿಜಾ಼ವೊಕ್ಹು ಚೊ಼ಕು ಕವೈಲಿವಾನೆ ಯೊಗ್ಯ ವ್ಹೈ. ಮ್ಹೊಡು ದೆಕಿನ ಬೊಲ್ಯಾವಾಚಿ ರ‍್ಹೌ. ತ್ಯುನೆ ದಾರು ಪಿನ ಟೈಮ ಕಾಡಾಲಾ ರ‍್ಹೌ ನೈ. ವರಿ ಬಿಜಾ಼ವೊನೆ ಮೊಸ ಕರಿನ ಸೌಕಾರ ಥಾವಾನೆ ಕರುನೈ. ದೊಕ್ಡಾನಿ ಆಸ ರ‍್ಹೌ ನೈ. 9 ಘನಿ ರ‍್ಹಯಲ ಕ್ಹರಿನೊ ಬರೊಕ್ಹೊ ದಿಕ್ಹಿನ ಆವಾನಿ ಗ್ಯಾನಕ್ಹು ಧರಲಿದೆಲವಾಲಾ ರ‍್ಹೌ. 10 ತ್ಯುನೊನೆ ತು ಪೈಲಾ ವಳಕ. ತ್ಯುನೆ ಕೆಟ್ಟ ಕಾಮೊಮಾ ನೈ ರ‍್ಹಯಾಮ ಸೆವೆ ಕರಸ ಕವಸ.
11 ಇನಾನಿಂಗತಜ಼ ಸಭೆಮಾ ಸೆವೆ ಕರಾಲ್ಯೊ ಹೆಣ ಮನಕ್ಹೊನೆ ಮನಕ್ಹೊ ಮರ್ಯಾದಿ ಲಿವಾನೆ ಯೊಗ್ಯ ರ‍್ಹೌ. ತ್ಯುನೆ ಬಿಜಾ಼ ಮನಕ್ಹೊನಾ ಹುತಿ ಕೆಟ್ಟ ಕವಾಲ್ಯೊ ರ‍್ಹೌನೈ. ತ್ಯುನಾಕ್ಹು ತ್ಯುನೆ ಹತೊಟಿಮಾ ರ‍್ಹೌ. ಕ್ಹಾರಾ ವಿಷಯನಾ ಹುತಿ ಸಮಾಧಾನಕ್ಹು ವರಿ ಬರೊಕ್ಹಾವಾಲಾ ರ‍್ಹೌ.
12 ಸಭೆಮಾ ಸೆವೆಕರಾಲಾ ಯಕ್ಲಿನೆಜ಼ ಹಿವಾ ಕರಲಿದಲ ರ‍್ಹೌ. ತ್ಯುನೆ ತ್ಯುನಾ ಬಚ್ಚಾ಼ವೊನೆ ವರಿ ಘರವಾಲಾವೊನಾ ಮ್ಹೊಡೆ ಚೊ಼ಕು ಕವೈಲಿವಾಲಾ ರ‍್ಹೌ. 13 ಚೊ಼ಕಿ ವಾಟಮಾ ಸೆವೆ ಕರಾಲಾ ಮನಕ್ಹೊ ತ್ಯುನೊನೆ ಚಾ಼ಯೆ ಥಯಲ ಮರ್ಯಾದಿನಿ ಜ಼ಗಾ ಲಿವಸ. ಯೆಸು ಕ್ರಿಸ್ತನಿ ತ್ಯುನೊ ಬರೊಕ್ಹಾನಾ ಹುತಿ ತ್ಯುನೆ ಬರೊಕ್ಹಾ ವಾಲಾ ಘಟ್ಟ ಥೈನ ರ‍್ಹವಸ.
ಮ್ಹೊಟು ರಹಶ್ಯ
14 ಮಿ ತುಕನ ಭೆಗಿನ ಔಸ ಕೈನ ಬರೊಕ್ಹೊ ಮನೆ ಛೆ. ವರಿಬಿ ಆ ಕ್ಹಾರು ಬರ್ದಾಡ್ಯೊಸ. 15 ಪಾಚ಼ಲ್ತೊ ಮಿ ತುಕನ ಭೆಗಿನ ನೈ ಆಯೊತಬಿ ಕ್ಹುದಾನಾ ಘರಮಾ ಕರಾನಾ ಕಾಮೊ ತುನೆ ಗ್ವತ್ತ ಛೆ. ತೆ ಘರ ಜಿವ್ತೊ ರ‍್ಹಯಲ ಕ್ಹುದಾನು ಸಬೆ ವ್ಹೈ. ತೆ ಕ್ಹರಿನಿ ಫಾಯಾ ವರಿ ಆಸ್ರೊ ವ್ಹೈ. 16 ಕ್ಹುದಾನಿ ಭಕ್ತಿನೆ ಆದಾರ ಥಯಲ ಕ್ಹರಿ ವರಿ ಸಂಶೊವಾಚಿ ಅಪ್ನಿ ಆರಾಧನಾನಿ ಜಿವಿತ ದಡಿರ‍್ಹಯಲ ಮ್ಹೊಟಿ ವ್ಹೈ
ಕ್ರಿಸ್ತ ಮನಕ್ಹನಾ ರುಪಮಾ ಅಪೊನೆ ದಿಕ್ಯೊ.
ತೆಜ಼ ಕ್ರಿಸ್ತ ವ್ಹೈಕೈನ ಪವಿತ್ರ ಆತ್ಮಾ ದೆಕಾಡಿನ ದಿದಿ.
ಕ್ಹುದಾನಾ ದುತೊನೆ ತೆ ದಿಕ್ಹ್ಯೊ.
ತಿನಾ ಹುತಿ ಸುವಾರ್ತೆ ಕ್ಹಾರಾ ಮನಕ್ಹೊನೆ ಪ್ರಚಾರ ಕರ‍್ಯೊ.
ಜಗತ್ಮಾ ರ‍್ಹಯಲ ಮನಕ್ಹೊ ತಿಪರ ಬರೊಕ್ಹೊ ಮ್ಹೆಲ್ಯಾ.
ತೆ ಮಹಿಮಾನಾ ಕ್ಹಾತೆ ಸ್ವರಗಾಮಾ ಗಯೊ.