ಕೆಟ್ಟ ಭೊದಕೊ
1 ತಿನಾಹುತಿ ಅಗಲ್ಯಾ ದಿನೊಮಾ ದಕ್ಹಾ ಮನಕ್ಹೊ ಮೊಸ ಕರಾನು ಆತ್ಮನಾ ವಾತೊಪರ, ಸೈತಾನನಾ ವಾತೊಪರ ಬರೊಕ್ಹೊ ಕರಿನ ಸುಳ್ಳನಾ ಆತ್ಮನಾ ಆಜ್ಞಾ ಐಕಿನ ಪಾಲ್ಸಸ,ವರಿ ಸೈತಾನನಾ ಶಿಕ್ಷಣ ನಿಂಗತ ಚಾ಼ಲಸ. 2 ತೆ ಭೊದನೆ ಸುಳ್ಳ ಬೊಲಾಲಾ ವರಿ ಮೊಸ ಕರಾಲಾ ಮನಕ್ಹೊ ಕಂತು ಆವಸ. ತ್ಯುನೆ ಕ್ಹರಿ ಸುವ್ಹೈ ವರಿ ಕೆಟ್ಟ ಸುವ್ಹೈ ವಳಕ್ಕತಾನೈ. ಉನ್ನು ಥಯಲ ಲ್ಹೊಡಾಕ್ಹು ಬಳಿನ ರಾಕ ಥಯಲ ನಿಂಗತ ತ್ಯುನು ಗ್ಯಾನಬಿ ಹಾಳ ಥೈ ಜಾ಼ವಸ.
3 ತೆವಾ ಮನಕ್ಹೊ ಹಿವಾ ಕರಲ್ಯುನೈ ಕೈನ ವರಿ ದಕ್ಹು ಅನಾಜ಼ ಖೌನೈ ಕೈನ ತ್ಯುನೆ ಕವಸ. ತೆನೈಸೊ ಬರೊಕ್ಹೊ ರ‍್ಹಯಲವಾಲಾ ವರಿ ಕ್ಹರಿ ತಿಳದಿಲಿದಲವಾಲಾ ಸ್ತುತಿ ಕರಿನ ತೆ ಅನಾಜ಼ ಖಾವಾದೆ ಕಾಕದ್ಯಾಮ ತೆ ತಯ್ಯಾರ ಕರಲವಾಲೊ ಕ್ಹುದಾಜ಼ ವ್ಹೈ. 4 ಕಾ ಕದ್ಯಾಮ ಕ್ಹುದಾ ತೆ ತಯ್ಯಾರ ಕರಲ ಹರಿಯಕ್ಕ ಚೊ಼ಕು ರ‍್ಹವಸ ತಿನೆ ಸ್ತುತಿ ಕರಿನ ಲಿವಾನು ಸುಬಿ ರ‍್ಹೈನೆಕಾ ತಿರಸ್ಕಾರ ಕರುನೈ. 5 ಕಾಕದ್ಯಾಮ ಕ್ಹುದಾನಿ ವಾಕ್ಯಾಕ್ಹು ವರಿ ಪ್ರಾಥನಾ ಕ್ಹು ತೆ ಅನ್ನ ಪವಿತ್ರ ಥಾವಸ.
ಯೆಸುನೊ ಚೊ಼ಕೊ ಸೆವಕ
6 ತ್ಯಾ ರ‍್ಹಯಲ ಭಾಯೊ ಭೆನೊ ಎ ಕ್ಹಾರು ಕದ್ಯಾಮ, ತು ಕ್ರಿಸ್ತ ಯೆಸುನೊ ಚೊ಼ಕೊ ಸೆವಕ ಥಾಸಿ ಕವಾನು ಬರೊಕ್ಹಾನಿಯೊ ವಾತೊ ವರಿ ಚೊ಼ಕು ಉಪದೆಶ ಕರಿನ ಚಾ಼ಲಲ ಹುತಿ ತಾಕತವಾಲೊ ವ್ಹೈ ಕೈನ ದೆಕಾಡಿನ ದೆಶಿ. 7 ಕ್ಹುದಾ ಕ್ಹರಿಕ್ಹು ಮಳಾನಿ ಕಾನಿಯೊ ಮನಕ್ಹೊ ಕವಸ. ತೆ ಕಾನಿಯೊ ಲಿಂಗತ ಚ಼ಾಲು ನಕೊ. ಕ್ಹುದಾನೆ ಕ್ಹರಿಕ್ಹು ಸೆವೆ ಕರಾನು ತುಮಾರಾಕ್ಹು ತುಮೆ ತಿಳ್ದಿಲಿವೊ.
8 ಶಾರಿರಿಕ ವ್ಯಾಯಾಮಕ್ಹು ಅಪ್ನೊನೆ ದಕ್ಹಿ ರಿತಿಮಾ ತುಮೊನೆ ಆಸ್ರೊ ಥಾವಸ. ತೆನೈಸೊ ಕ್ಹುದಾನಿ ಸೆವೆ ಕರಾನು ತುಮೊನೆ ಕ್ಹಾರಿ ತರಾ ಆಸ್ರೊ ಥಾವಸ. ಕ್ಹುದಾನಿ ಸೆವೆ ಕ್ಹಾರಾ ಲೊಕಮಾ ಆಶಿರ್ವಾದ ಥೈನ ರ‍್ಹವಸ. ಕಾಕದ್ಯಾಮ ಹಮ್ನಾನೊ ಟೈಮ್ಮ ವರಿ ಆವಾನೊ ಕಾಲಮ್ಮಾ ದಿದೆಲ ವಾಗ್ದಾನ ಮಳೈ ಲಿದ್ಯುಸ. 9 ಎ ಸಂಗತಿಯೊಪರ ಬರೊಕ್ಹೊ ಕರಾನು ಕ್ಹಾರಾಕ್ಹು ಯೊಗ್ಯ ವ್ಹೈ. 10 ತಿನಾಹುತಿ ಅಪೆ ಕಷ್ಟಕ್ಹಾವಾಡಾಸ,ಪ್ರಯಾಸ ಕರಾಡಾಸ,ಕಾಕದ್ಯಾಮ್ಮ ಕ್ಹಾರಾ ಮನಕ್ಹೊನೆ, ವಿಶೆಷ ಕರಿನ ಬರೊಕ್ಹೊ ಕರಾವಾಲಾವೊನೆ, ರಕ್ಷಕ ಥಯಲ ಜ಼ಲಮ ರ‍್ಹಯಲ ಕ್ಹುದಾನಾ ಉಪ್ಪರ ಹಮೆ ಬರೊಕ್ಹೊ ಮ್ಹೆಲಾಲಾ ಥಯಾಸ.
11 ಎ ಕ್ಹಾರಿ ಸಂಗತಿಯೊನೆ ಆಗನ್ಯಾ ಕೈನ ವರಿ ತಿಳಸಾ, 12 ತು ಜಾಂಜಿಮಾನ ರ‍್ಹಯಲ ಹುತಿ ತುಜ಼಼ ಮ್ಹೊಟೊ ವ್ಹೈ ಕೈನ ಕವೈಲಿದ್ಯಾವಾಚಿ ತುನೆ ಹಿನಾವಾನೆ ಕಿನೆಜ಼ ಮೌಕೊ ದ್ಯು ನಕೊ. ವಿಸ್ವಾಶಿಯೊ ಕಿಮ್ಮ ರ‍್ಹೌ ಕೈನ ತುಜ಼಼ ತ್ಯುನೊನೆ ದೆಕಾಡಿನ ದ್ಯು. ತು ಬೊಲಾನು ಚಾ಼ಲಾನು ಮಯಾಮಾ ವರಿ ಬರೊಕ್ಹಾಮಾ ವರಿ ಪರಿಶುದ್ಧ ಜಿವಿತ್ಮಾ ತು ತ್ಯುನೊನೆ ದೆಕಾಡಿನ ದ್ಯು. 13 ಕ್ಹುದಾನಿ ವಾಕ್ಯಾ ಮನಕ್ಹೊನೆ ಒದಿನ ಕೈನ ತ್ಯುನೊನೆ ಘಟ್ಟ ಕರಿನ ವರಿ ತ್ಯುನೊನೆ ಭೊದನೆ ಕರಿನ. ಮಿ ಆಯೆಲಕ್ಕಾ ಎ ಕ್ಹಾರು ತು ಕರತೊಜ಼ ರ‍್ಹೌ.
14 ತುಕನ ರ‍್ಹಯಲ ಮರಗಾನಿ ವರಾನೆ ತಿನೆ ಅಲಕ್ಷ ಕರೊ ನಕೊ ತೆ ವರಾ ತುಮಾರಾ ಪ್ರವಾದಿ ಕರಲ ಹತ್ತ ವ್ಹೈ. ವರಿ ಮ್ಹೊಟಾ ಮನಕ್ಹೊಕ್ಹು ತಾರಾ ಉಪ್ಪರ ಹತ್ತ ಮ್ಹೆಲ್ಯಾಸ. 15 ಎ ಕಾಮೊ ಕರತೊಜ಼ ರ‍್ಹೆ. ಎ ಕಾಮೊ ಕರಾನೆಜ಼ ತುಮಾರಿ ಜಿವಿತ ವಪ್ಸಿನ ದ್ಯು. ತೆಳಾಮಾ ತಾರು ಕಾಮ ಅಭಿವೃದ್ದಿ ಥಾವಾನು ಕ್ಹಾರಾ ಮನಕ್ಹೊ ದೆಕಸ. 16 ತಾರಿ ಜಿವಿತ್ಮಾ ತಾರಿ ಬೊಧನೆಮಾ ಹುಷಾರಕಿಮಾ ರ‍್ಹೆ. ಚೊ಼ಕಿ ತರಾನಿ ಜಿವ್ನಾ ಕರತೊ ಬೊಧನೆ ಕರತೊ ತೆಳಾಮಾ ತು. ತುನೆ ತಾರಿ ಬೊದನೆ ಐಕಾಲಾವೊನೆ ವಚಾ಼ಡುಸ.