1 ತಿನಾಹುತಿ ಮಿ ನ್ಹ್ಯಾ ನೈ ರ‍್ಹವಾನೆ ಥಯುತಬಿ ಅಥೆನಿಮ್ಮಾ ಯಕ್ಲೊಜ಼ ರ‍್ಹವಾನು ಚೊ಼ಕು ವ್ಹೈ ಕೈನ ವಿಚಾರ ಕರ‍್ಯೊ. 2 ಅಪೆ ಅಪ್ನಾ ಕ್ರಿಸ್ತನಾ ಬರೊಕ್ಹೊಮ್ಮಾ ವರಿ ಕ್ಹುದಾನಾ ಹುತಿ ಹಮಾರೊ ಭೈ ವ್ಹೈ. ತೆ ಕ್ಹುದಾನಾ ಹುತಿ ಹಮಾರಾ ಕ್ಹಾತೆ ಕಾಮ ಕರಾಡ್ಯೊಸ. ಕ್ರಿಸ್ತನಾ ವಿಷಯನಿ ಸುವಾರ್ತೆ ಮನಕ್ಹೊನೆ ತಿಳ್ಸಾವಾನೆ ಹಮೊನೆ ಮದತ ಕರಾಡ್ಯೊಸ. ತುಮಾರೊ ಬರೊಕ್ಹೊನಾ ಘಟ್ಟ ಕರಾನೆ ವರಿ ತುಮೊನೆ ಖುಶಿ ಕರಾನೆ ತಿಮೊಥೆನೆ ವಳಾಯಾಸ. 3 ಹಮ್ನಾ ಹಮೊನೆ ಆಯಲ ತ್ರಾಸ ತುಮೊಮಾ ಕುನ್ನಜ಼ ಕಳವಳ ಥೌನೈ ಕೈನ ತಿಮೊಥೆನೆ ವಳಾಯಾಸ. ಹಮೊನೆ ಹವಾ ತ್ರಾಸೊ ಕ್ಹುದಾನಿ ಚಿತ್ತಕ್ಹುಜ ಆವಸ ಕೈನ ತುಮೊನೆ ಗ್ವತ್ತ ಛೆ. 4 ಕಾಕದ್ಯಾಮ ಹಮೆ ತುಮಾರಾ ಕ್ಹಾತೆ ರ‍್ಹತಾಮಾ, ಅಪೆ ಕ್ಹಾರಾ ತ್ರಾಸ ಖಯೆಸ ಕೈನ ತುಮೊನೆ ಹಮೆ ಪೈಲಾಜ಼ ಕತ್ತಾ ವ್ಹತ್ತಾ. ಹಮೆ ಕದಲ ತಿಮ್ಮಜ಼ ತೆ ಥಯು ಕವಾನು ತುಮೊನೆ ಗ್ವತ್ತ ಛೆ. 5 ತಿನಾಹುತಿ ಹಜು ತಡ್ದಿಲಿದೆ ವಾಚಿ ಯಕ್ಕ ಟೈಮ್ಮ ಸೈತಾನ ತಮನೊನೆ ಶೊದನೆ ಲಿದೆಲಕ್ಹು ಹಮೆ ಕರಲ ಕ್ಹಾರು ಹಾಳ ಥೈಗಯು ಸುನೈ ಕೈನ ತಮಾರಾ ಬರೊಕ್ಹೊನಾಹುತಿ ಮಿ ತಿಳ್ದಿಲಿವಾನಾಹುತಿ ತೆ ಮಿ ತುಮೊಕನ ವಳೈನ ದಿದ್ಯೊ.

6 ತೆನೈಸೊ ತಿಮೊಥೆ ತುಮೊಕಂತೊ ಹಮೊಕನ ಫರಿನ ಆಯಲಪರ, ತುಮಾರೊ ಬರೊಕ್ಹೊ ವರಿ ಮಯಾನಾ ಹುತಿ ಚೊ಼ಕಿಯೊ ವಾತೊ ಹಮೊನೆ ಕದ್ಯೊ. ತುಮೆ ಕೆಳಾಮಾಬಿ ಹಮೊನೆ ಶೆ ಕರೊಶಿ ಕೈನ ವರಿ ದೆಕಾನಿ ಆಸಕ್ಹು ಛೆ ಕೈನ ತೆ ಹಮೊನೆ ಕದ್ಯೊ. ತಿನಾನಿಂಗತಜ಼ ಹಮೆ ತುಮೊನೆ ದೆಕಾನೆ ಘನ್ನಿ ಆಸಕ್ಹು ಛೆ. 7 ಭಾಯೊ ಭೆನೊ, ಹಮಾರಾ ಕ್ಹಾರಿ ತರಾನಾ ತ್ರಾಸಮಾ ವರಿ ಸಂಕಟಮಾ ತುಮಾರಾ ಹುತಿ ಹಮೊನೆ ಪ್ರೊತ್ಸಾಹ ಮಳ್ಯು. 8 ಪ್ರಭು ಮಾ ತುಮೆ ಘಟ್ಟ ಥೈನ ಹುಬ್ರಯಾಸ, ಇನಾಹುತಿ ಹಮೆ ಜಿವ್ನಾ ಕರಾಡಾಸ. 9 ತುಮಾರಾ ಹುತಿ ಹಮ್ನಾ ಕ್ಹುದಾನಾ ಹುತಿ ಧನೈವಾದ ಕೈಯೆಸ. ತುಮಾರಾ ಹುತಿ ತಿನಾ ಕ್ಹಾಮಾ ಹಮೊನೆ ರ‍್ಹಯಲ ಖುಶಿನಾ ಹುತಿ ಧನೈ ಕೈಯೆಸ. 10 ದಿನ್ನ ರಾತ ತುಮಾರಾ ಹುತಿ ಘನ್ನಾ ಹಮೆ ಪ್ರಾಥನಾ ಕರಾಡಾಸ. ತುಮೊನೆ ಡೊಳೆ ದೆಕಿನ ತುಮಾರಾ ಬರೊಕ್ಹಾಮಾ ರ‍್ಹಯಲ ಕಮಿ ಪುರಾ ಕರಾನಾ ಹುತಿ

11 ಹಮೆ ತುಮೊಕನ ಆವಾನಿ ವಾಟ ಸಿದಾ ಕರಾಹುತಿ ಹಮಾರೊ ಬಾ ಥಯಲ ಕ್ಹುದಾಕನ ವರಿ ಪ್ರಭು ಥಯಲ ಯೆಸುನೆ ಪ್ರಾಥನಾ ಕರಾಡಾಸ. 12 ಹಮೆ ತುಮೊನೆ ಮಯಾಕರಲ ನಿಂಗತ ತುಮಾರಿ ಮಯಾ ಘಟ್ಟ ಥಯಲ ನಿಂಗತ ಯಕ್ಲಾನೆ ಯಕ್ಲಾಪರ ವರಿ ಬಿಜಾ಼ ಮನಕ್ಹೊಪರ ಮಯಾ ಹೆಚ್ಕಿ ಥಾವಾದೆ ಕರಿನ ಪ್ರಭುನೆ ಪ್ರಾಥನಾ ಕರಿಯೆಸ. 13 ತುಮಾರಾ ಮನಸೊಮಾ ಘಟ್ಟ ರ‍್ಹವಾದೆ ಕರಿನ ಇಮ್ಮ ಪ್ರಾಥನಾ ಕರಿಯೆಸ. ಅಪ್ನೊ ಪ್ರಭು ಥಯಲ ಯೆಸು ತಿನಾ ಪವಿತ್ರ ಮನಕ್ಹೊನಾ ಕ್ಹಾತೆ ದಿಕ್ಹತಾಮಾ ತುಮೆ ಬಾ ಥಯಲ ಕ್ಹುದಾನಿ ಸನ್ನಿದಿಮಾ ಪರಿಶುದ್ಧ ವರಿ ತಪ್ಪ ನೈಸೊವಾಲಾಥೈನ ರ‍್ಹವೊಸಿ.