ಕ್ಹುದಾನೆ ಪಸಂದ ಆವಾನಿ ಜಿವ್ನಾ
1 ಲಾಸ್ಟಮಾ ಕವಾನು ಸು ವ್ಹೈ ಕದ್ಯಾಮ ಭಾಯೊ ವರಿ ಭೆನೊ, ಹಮ್ನಾ ತುಮೊನೆ ಬಿಜಿ಼ಯೊ ದಕ್ಹಿಯೊ ವಿಚಾರೊ ತಿಳಸುಸ. ಕ್ಹುದಾನೆ ಕಿಮ್ಮ ಮೆಚ಼ಸಾನೆ ಜಿವ್ನಾ ಕರು ಕೈನ ತುಮೊನೆ ಶಿಕ್ಲಾಯಾಸ. ತುಮೆ ತಿನಾನಿಂಗತಜ಼ ಜಿವ್ನಾ ಕರಾಡಾಸ. ತಿನಾನಿಂಗತಜ಼ ಹಜು಼ನ ಹೆಚ್ಕಿ ನಜಿ಼ಕ ರ‍್ಹೈನ ಜಿವ್ನಾ ಕರು ಕೈನ ಹಮೆ ತುಮ್ನೊನೆ ಯೆಸುನಾ ನಾಮಪರ ಮಾಂಗಿಲಿಯೆಸ ವರಿ ಪ್ರೊತ್ಸಾಹ ಕರಿಯೆಸ. 2 ಹಮೆ ತುಮೊನೆ ಕಯಾ ಕಾಮೊ ಕರೊ ಕೈನ ಕದ್ಯಾಸ ತೆ ತುಮೊನೆ ಗ್ವತ್ತ ಛೆ. ಪ್ರಭು ಯೆಸುನಿ ಅದಿಕಾರಕ್ಹು ತೆ ಸಂಗತಿಯೊ ತುಮೊನೆ ಕದ್ಯಾಸ. 3 ಕ್ಹುದಾನಿ ಚಿತ್ತ ಸು ವ್ಹೈ ಕದ್ಯಾಮ ತುಮೆ ಪರಿಶುದ್ಧ ಥೈನ ರ‍್ಹೌ ಕೈನ ಅನೈತಿಕ ಶಾರಿರಿಕ ಸಂಭಂದಕ್ಹು ದುರ ರ‍್ಹವೊ.
4 ತುಮೊಮಾನಾ ಕ್ಹಾರಾ ಜ಼ನಾ ತಿಳದಿಲಿದಲ ರ‍್ಹೌ ತ್ಯುನಿಯೊ ಸ್ವಂತ ಬೈಕೊನಾ ಕ್ಹಾತೆ ಪರಿಶುದ್ಧ ಥೈನ ವರಿ ಮರ್ಯಾದಿಕ್ಹು ರ‍್ಹೌ. 5 ಎ ವಿಷಯಮಾ ತುಮಾರಾ ಭಾಯೊನೆ ಮೊಸ ಕರು ನೈ. 6 ಹಮೆ ಹಮ್ನಾ ಕದಲನಿಂಗತಜ಼ ವರಿ ಹುಶಾರ ಕರಲ ನಿಂಗತ ಎ ಕ್ಹಾರಿ ವಿಷಯಮಾ ಪ್ರಭು ಶಿಕ್ಷಾ ದಿವಸ. 7 ಕ್ಹುದಾ ಅಪೊನೆ ಪರಿಶುದ್ಧ ಥೈನ ಜಿವ್ನಾ ಕರು ಕೈನ ಬಲಾಯೊಸ. ಅಪೆ ಪಾಪೊಮಾ ಜಿವ್ನಾ ಕರು ನೈ ಕೈನ ತಿನಿ ಆಸ ವ್ಹೈ. 8 ತಿನಾಹುತಿ ಎ ಉಪದೆಶ ನಿಂಗತ ನೈ ರ‍್ಹವಾಲೊ ಅವಿಧೆಯ ಥೈನ ರ‍್ಹವಸ ತೆ ಮನಕ್ಹೊನೆ ನ್ಹ ವ್ಹೈ ಪವಿತ್ರ ದಿದಲ ಕ್ಹುದಾನೆ ವ್ಹೈ.
9 ಕ್ರಿಸ್ತಮಾ ರ‍್ಹಯಲ ಭಾಯೊ ವರಿ ಭೆನೊನೆ ಕಿಮ್ಮ ಮಯಾ ಕರು ಕವಾನಾ ಹುತಿ ಹಮೆ ತುಮ್ನೊನೆ ಬರ್ದು ಕೈನಜ಼ ನತ್ತಿ. ಯಕ್ಲಾನೆ ಯಕ್ಲೊ ಕಿಮ್ಮ ಮಯಾ ಕರು ಕೈನ ಕ್ಹುದಾ ತುಮ್ನೊನೆ ಶಿಕ್ಲಾಯೊಸ. 10 ಮಕೆದೊನಿಯಮಾ ರ‍್ಹಯಲ ಭಾಯೊ ವರಿ ಭೆನೊನೆ ತುಮೆ ಕ್ಹರಿಮಾಜ಼ ಮಯಾ ಕರಾಡಾಸ. ತೆ ಹಜು಼ನ ಹೆಚ್ಕಿ ಮಯಾ ಕರು ಕೈನ ಹಮೆ ತುಮ್ನೊನೆ ಕೈಯೆಸ. 11 ಶಾಂತಿಕ್ಹು ಜಿವ್ನಾ ಕರಾನೆ ತುಮೊಕನ ಥಯಲ ತೆಕ್ಲು ಕೊಶಿಶ ಕರೊ. ತುಮಾರಾ ಕಾಮಕ್ಹು ಕಾಮ ಮ್ಹೆಲೊ ತುಮಾರಾ ಸ್ವಂತಾನಾ ಹುತಿ ಕಮಾವೊ ಇನಾಹುತಿ ಹಮೆ ತುಮೊನೆ ಪೈಲಾಜ ಕದ್ಯೊಸ. 12 ತುಮೆ ಇಮ್ಮ ಕರ‍್ಯಾಮ, ವಿಸ್ವಾಶಿಯೊ ನೈ ರ‍್ಹಯಲವಾಲಾ ತುಮೆ ಜಿವ್ನಾ ಕರಾನೊ ತರಿಕೊ ದೆಕಿನ ತುಮೊನೆ ಮರ್ಯಾದಿ ದಿವಸ. ಕಿಪರಜ಼ ತುಮೆ ವಜ್ಜು ಥೈನ ರ‍್ಹತಾ ನೈ.
ಯೆಸುಸ್ವಾಮಿ ವರಿ ಆವಾನು
13 ಹಮಾರಾ ಭಾಯೊ ಭೆನೊ, ಮರಿಗಯಲ ಮನಕ್ಹೊನಾ ಹುತಿರ‍್ಹಯ ಕ್ಹರಿ ಮಿ ತುಮೊನೆ ತಿಳಸಾವಾನೆ ಆಸ ಕರಿಯೆಸ. ಆಸ ನೈಸೊ ಮನಕ್ಹೊ ನಿಂಗತ ತುಮೆ ದುಖಮಾ ರ‍್ಹವಾನು ನಕೊ. 14 ತೆನೈಸೊ ವರಿ ಯೆಸು ಮರಿನ ಜಿವ್ತೊ ಥೈನ ಆಯೊಸ ಕೈನ ಅಪೆ ಬರೊಕ್ಹೊ ಕರಿಯೆಸ. ತಿನಾನಿಂಗತಜ಼ ತಿಪರ ಬರೊಕ್ಹೊ ಮ್ಹೆಲಿನ ಮರಲವಾಲಾವೊನೆ ಕ್ಹುದಾ ಕ್ರಿಸ್ತಾನಾ ಕ್ಹಾತೆ ಉಟಾಡಸ.
15 ಹಮ್ನಾ ಹಮೆ ತುಮೊನೆ ಕವಾನು ಪ್ರಭುನು ಸಂದೆಶಜ಼ ವ್ಹೈ. ಪ್ರಭು ವರಿ ಆತಾಮಾ ಹಮ್ನಾ ಜಿವ್ತಾ ರ‍್ಹಯಲವಾಲಾ ಅಪೆ ಹಜು಼ನಬಿ ಜಿವ್ತಾ ರ‍್ಹಯಾಮ ಅಪೆ ಪ್ರಭುನಾ ಕ್ಹಾತೆ ರ‍್ಹಯೆಸ. ವರಿಬಿ ಪೈಲಾ ಮರಲವಾಲಾವೊತಿಬಿ ಅಪೆ ಪಾಚಾ಼ ರ‍್ಹಯೆಸ. 16 ಕ್ಹುದಾ ಸ್ವರಗತೊ ಉತ್ರಿನ ಆವಸ. ಖಾಸ ದೆವದುತ ಕ್ಹುದಾನಿ ತುತ್ತುರಿನಾ ಕ್ಹಾತೆ ಆಗನ್ಯಾ ಕರಸ. ತೆಳಾಮಾಜ಼ ಕ್ರಿಸ್ತಮಾ ರ‍್ಹೈನ ಮರಲವಾಲಾ ಪೈಲಾ ಉಟಿನ ಆವಸ. 17 ಪಾಚಾ಼ತಾ, ಜಿವ್ತಾ ರ‍್ಹಯಲವಾಲಾ ಅಪೆ ಮರಲ ವಾಲಾವೊನಾ ಕ್ಹಾತೆ ಯಕ್ಕ ಥೈನ ರ‍್ಹಯೆಸ. ಪ್ರಭುನೆ ಮ್ಹಾಡಮಾ ತಿನಾ ಕ್ಹಾಮಾ ರ‍್ಹವಾನೆ ಅಪೊನೆ ಮೆಘಮಾ ಉಚೈಲಿಂಜಾ಼ವಸ. ಇಮ್ಮ ಅಪೆ ಹಮೆಶಾಬಿ ಪ್ರಭುನಾ ಕ್ಹಾತೆ ರ‍್ಹಯೆಸ. 18 ತಿನಾಹುತಿ ಎ ವಾತೊಕ್ಹು ಯಕ್ಲಾನೆ ಯಕ್ಲೊ ಪ್ರೊತ್ಸಾಹ ಕರೊ.