ಸುಳ್ಳ ಭೊದಕ
1 ಪೈಲಾನಾ ಕಾಲ್ಮಾ, ಕ್ಹುದಾನಾ ಮನಕ್ಹೊಮಾ ಸುಳ್ಳ ಪ್ರವಾದಿಯೊ ವ್ಹತ್ತಾ. ಹಮ್ನಾಬಿ ಛೆ ತುಮೊಮಾ ದಕ್ಹಾ ಸುಳ್ಳ ಪ್ರವಾದಿಯೊ ಛೆ. ಮನಕ್ಹೊನೆ ಹಾಳಮಾ ಚ಼ಲಾವಾನಿ ಸುಳ್ಳ ಭೊದನೆ ತ್ಯುನೆ ಕವಸ. ತ್ಯುನೆ ಸುಳ್ಳ ಭೊದನೆ ಕರಾಲಾ ನ್ಹವೈ ಕೈನ ತುಮೊನೆ ತಿಳದ್ಯಾವಾಚಿ ತ್ಯುನೆ ಭೊದನೆ ಕವಸ. ತ್ಯುನೆ, ತ್ಯುನೊನೆ ಬಿಡುಗಡೆ ಲೈನ ದಿದಲವಾಲಾನೆಜ಼ (ಯೆಸುನೆ) ನೈ ವಪ್ಪಿಲೆತಾ. ತಿನಾಹುತಿ ತ್ಯುನಾಕ್ಹು ತ್ಯುನೆಜ಼ ಹಾಳ ಕರಿಲಿವಸ.
2 ತ್ಯುನೆ ಕರಾನಾ ಕೆಟ್ಟ ಕಾಮೊ ಮನಕ್ಹೊಬಿ ಕರಸ. ತೆ ಮನಕ್ಹೊನಾಹುತಿ ಕ್ಹರಿನಿ ವಾಟನಾಹುತಿ ಬಿಜಾ಼ ಮನಕ್ಹೊ ಕೆಟ್ಟ ವಾತೊ ಬೊಲಸ. 3 ಸುಳ್ಳ ಭೊದೊಕೊನೆ ಚಾ಼ಯೆಥಯಲ ಕ್ಹಾಲಿ ತುಮಾರಾ ದೊಕ್ಡಾ ವ್ಹೈ. ತಿನಾಹುತಿ ಕ್ಹರಿ ರ‍್ಹಯಲ ವಾತ ನೈ ಕೈನ ತುಮೊನೆ ಉಪಯೊಗ ಕರಲಿವಸ. ತೆನೈಸೊ ಘನ್ನಾ ದಿನ್ನೊತಿಬಿ ತೆ ಸುಳ್ಳ ಭೊದೊಕೊನಾ ವಿರುದ್ದ ಫೈಸಲೊ ತಯ್ಯಾರ ಥಯೊಸ. ತ್ಯುನೆ ಹಾಳ ಥಾವಾಲಾನಾ ಹತೆ (ಕ್ಹುದಾ) ತ್ಯುನೆ ಚು಼ಕೈಲಿವಾನೆ ಥಾತು ನೈ.
4 ದೆವದುತೊ ಪಾಪೊ ಕರತಾಮಾ, ತ್ಯುನೊನೆ ಶಿಕ್ಷಾದಿದ್ಯಾವಾಚಿ಼ ಛೊಡ್ಯೊನೈ. ತೆ ತ್ಯುನೊನೆ ಬೆಡಿಯೊ ಭಾಂದಿನ ನರಕಮಾ ಢಕಲ್ಯೊ. ಅಂದಾರು ರ‍್ಹಯಲ ಖಾಡಿಮಾ ಘಾಲ್ಯೊ. ತ್ಯುನೊನೆ ಫೈಸಲೊ ಥಾಯೆಲಕ್ಕಾ ತ್ಯಾಜ಼ ರ‍್ಹವಸ.
5 ಘನ್ನಾ ದಿನ್ನ ಪಾಚಾ಼ ರ‍್ಹಯಲ ಮನಕ್ಹೊನೆ ಕ್ಹುದಾ ಶಿಕ್ಷಾ ದಿದ್ಯೊ. ತೆ ಕಾಲಮಾ ತಿನಾ ವಿರುದ್ದ ಮನಕ್ಹೊ ಭರಿಗಯಲ ಟೈಮಮಾ ತೆ ಘನ್ನು ಪಾನಿ ಲಾಯೊ. ತೆನೈಸೊ ನೊಹಾನೆ ವರಿ ಕ್ಹಾತ ಜ಼ನಾವೊನೆ ವಚಾ಼ಡ್ಯೊ. ಕ್ಹರಿಕ್ಹು ರ‍್ಹಯಲವಾಲಾ ವಾಚು಼ಕೈನ ನೊಹಾಜ಼ ಮನಕ್ಹೊನೆ ಕದಲ ವ್ಹೈ. 6 ಕ್ಹುದಾ ಸೊದೊಮ, ಗೊಮೊರ ಕವಾನಾ ಕೆಟ್ಟ ಗಾಮನೆ ಶಿಕ್ಷಾ ದಿದ್ಯೊ. ತೆ ಗಾಮಮಾ ಸುಜ಼ ಉಗ್ರೆ ನೈಸೊ, ಬಾಳಿನೆ ರಾಕ ಕರಿಪಾಡ್ಯೊ. ತಿನಾ ವಿರುದ್ದ ಥಯಲ ಮನಕ್ಹೊನೆ ಸು ಥಾವಸಕೈನ ಕವಾನು ತೆ ಗಾಮನೆ ದೆಕೊ ಕೈನ ಮುಕ್ಯೊಸ.
7 ತೆನೈಸೊ ಕ್ಹುದಾ ತೆ ಗಾಮಮಾತೊ ಲೊಟಾನೆ ವಚಾ಼ಡ್ಯೊ. ಲೊಟಾ ಕ್ಹರಿಕ್ಹು ವ್ಹತ್ತೊ. ಕೆಟ್ಟ ಮನಕ್ಹೊನೆ ದೆಕಿನ ದುಕಿ ಥಯೊತೊ. 8 ಲೊಟಾ ಕ್ಹರಿಕ್ಹು ವ್ಹತ್ತೊ. ವರಿ ತೆ ದಿನ್ನೆ ತೆ ಮನಕ್ಹೊನಾ ಕ್ಹಾತೆ ಜಿವ್ನಾ ಕರಾಡೊತೊ. ವರಿ ತ್ಯುನೆ ಕರಾನಾ ಕೆಟ್ಟ ಕಾಮೊ ವರಿ ಐಕಿನ ಘನ್ನೊ ದುಕಿ ಥಾತೊತೊ. 9 ಹೊ, ಪ್ರಭು ಥಯಲ ಕ್ಹುದಾ ತಿನಾ ಭಕ್ತೊನೆ ತ್ರಾಸಮಾತೊ ಹಮೆಶಾಬಿ ವಚಾ಼ಡಸ . ತೆ ಕೆಟ್ಟ ಮನಕ್ಹೊನೆ ಫೈಸ್ಲಾನೊ ದಿನ್ನ ಆಯೆಲಕ್ಕಾ ಶಿಕ್ಷಾ ದಿವಸ.
10 ಕ್ಹುದಾನಾ ಅದಿಕಾರನೆ ವಿರುದ್ದ ಕರಾಲಾ ಮನಕ್ಹೊನೆ ವರಿ ತ್ಯುನಾ ಪಾಪನೆ ವರಿ ತ್ಯುನಾ ಮನಸೆ ಆಯಲ ತಿಮ್ಮ ಕಾಮೊ ಕರಾಲಾ ಮನಕ್ಹೊನೆ ಕ್ಹುದಾ ಅಮ್ಮ ಶಿಕ್ಷಾ ದಿವಸ. 11 ದೆವದುತೊ ಸುಳ್ಳ ಭೊದನೆ ಕರಾಲಾವೊತಿಬಿ ಘನ್ನಾ ತಾಕತವಾಲಾ ವ್ಹೈ ವರಿ ಘನ್ನಾ ಘಟ್ಟ ರ‍್ಹವಸ. ವರಿಬಿ ದೆವದುತೊ ಸುಳ್ಳ ಬೊದಕೊನೆ ಕ್ಹುದಾನಿ ಸನ್ನಿದಿಮಾ ದೊಶದೆತಾ ನೈ. 12 ತೆನೈಸೊ ಎ ಸುಳ್ಳ ಬೊದಕೊ ತ್ಯುನೊನೆ ನೈ ಗ್ವತ್ತ ಥಯಲ ಸಂಗಿತಿಯೊನಾ ವಿರುದ್ದ ಕೆಟ್ಟಬೊಲಸ. ತ್ಯುನೆ ವಿಚಾರ ಕರ‍್ಯಾವಾಚಿ ಕಾಮೊ ಕರಾಲಾ ಜಾನವರೊ ನಿಂಗತ ರ‍್ಹವಸ. ಧರೈಲಿನ ಖಲಾಸ ಥಾವಾನಾಹುತಿ ಹುಟ್ಟಲ ಕೆಟ್ಟ ಪಶುವೊ ಹಾಳಥಾವಾಲಾ ನಿಂಗತ ರ‍್ಹವಸ. 13 ತ್ಯುನೊಕ್ಹು ಘನ್ನಾ ಮನಕ್ಹೊ ತ್ರಾಸಮಾ ಪಡಸ. ತ್ಯುನೆ ಕರಲ ತೆಜ಼ ಪ್ರತಿಫಲ ರ‍್ಹವಸ. ಎ ಸುಳ್ಳ ಬೊದಕೊ ಮನಕ್ಹೊನಾ ಕ್ಹಾಮಾ ಕೆಟ್ಟ ಕಾಮೊಮಾ ಖುಶಿಕ್ಹು ರ‍್ಹವಸ. ತ್ಯುನೊನೆ ಖುಶಿ ಕರಾನು ಕೆಟ್ಟ ಕಾಮೊಕ್ಹು ತ್ಯುನೆ ಖುಶಿ ಥಾವಸ.
14 ತ್ಯುನೆ ಜಾರತ್ವಕ್ಹು ಭರಲ ವರಿ ಡೊಳಾ ಕರಾನಾ ಪಾಪೊ ನೈ ಛೊಡಲಹುತಿ 15 ಎ ಸುಳ್ಳ ಬೊದಕೊ ಚೊ಼ಕಿವಾಟ ಛೊಡಿನ, ಕೆಟ್ಟ ವಾಟ ಧರ‍್ಯಾಸ. ಬಿಳಾಮ ಬೆಯೊರನನೊ ದಿಕ್ರೊ ತಿನಾ ಧರಮನೆ ಛೊಡಿನ ಅಧರಮಕ್ಹು ಆಯಲ ಫೈದಾನೆ ಮಯಾ ಕರ‍್ಯೊ. 16 ವರಿ ತೆ ಕರಾನು ತಪ್ಪ ವ್ಹೈ ಕೈನ ಯಕ್ಕ ಗದ್ಡು ತಿನೆ ಕದ್ಯು. ತೆ ಯಕ್ಕ ಮುಕ ಪಶು ವ್ಹೈ. ತೆನೈಸೊ ತೆ ಮನಕ್ಹ ನಿಂಗತ ಬೊಲಿನ ತೆ ಪ್ರವಾದಿನಾ ಪಿಸಾಳಾನೆ ಅಡ್ಡಿ ಕರ‍್ಯು.
17 ತೆ ಸುಳ್ಳಬೊದಕೊ ಪಾನಿ ನೈಸೊ ಖಾಲಿ ರ‍್ಹಯಲ ಇರೊ ನಿಂಗತ ರ‍್ಹವಸ. ತ್ಯುನೆ ಮ್ಹೊಟೊ ವಾರೊ ಐನ ಮ್ಹಾಡನೆ ಉರಾಡ್ಲಿನಿಂಜಾ಼ವಾನಿಂಗತ ರ‍್ಹವಸ. ತ್ಯುನಾಹುತಿ ಅಂದಾರಾನಿ ಜ಼ಗಾ ಕೈದಿನ ಮ್ಹೆಲ್ಯಾಸ. 18 ತ್ಯುನೆ ಮತಲ್ಬನೈಸೊ ವಾತೊ ಬೊಲಿನ ಗ್ವತ್ತ ಛೆ ಕೈನ ಕೈಲಿವಸ. ಕೆಟ್ಟ ವಾಟಮಾ ಚಾ಼ಲಾಲಾ ಮನಕ್ಹೊನಾ ಕ್ಹಾತೆ ನವಾಕ್ಹು ಚು಼ಕೈಲಿನ ಆಯಲ ಮನಕ್ಹೊನೆ ವಾಟ ಚು಼ಕಾವಸ. ತ್ಯುನಾ ಪಾಪೊಕ್ಹು ಕರಾನೆ ಆಸ ರ‍್ಹಯಲ ಕೆಟ್ಟ ಕಾಮೊ ಕರಿನ ಎ ಸುಳ್ಳ ಬೊದಕೊ ತ್ಯುನೊನೆ ವಾಟ ಚು಼ಕಾವಸ.
19 ಎ ಸುಳ್ಳ ಭೊದಕೊ ತೆ ಮನಕ್ಹೊನೆ ಬಂದನಮಾತಾ ಛೊಡೈಯೆಸ ಕೈನ ವಾತ ದಿವಸ ತೆನೈಸೊ ಎ ಸುಳ್ಳಭೊದಕೊಜ಼ ಬಂದನಮಾ ರ‍್ಹೈನ ಹಾಳ ಥಾವಾನಾ ಸಂಗತಿಯೊನಾ ಗುಲಾಮೊ ಥೈನ ರ‍್ಹವಸ. ಯಕ್ಲೊ ಕಿಕ್ಹು ಹಾರ‍್ಯೊಸ ತಿನೆ ತೆ ಗುಲಾಮ ಥಯೊಸ. 20 ಎ ಜಗತ್ಮಾನಾ ಕೆಟ್ಟ ಕಾಮೊಕ್ಹು ತೆ ಮನಕ್ಹೊನೆ ವಚಾ಼ಡ್ಯಾ. ಅಪ್ನೊ ಪ್ರಭು ಥಯಲ ವರಿ ರಕ್ಷಕ ಥಯಲ ಯೆಸು ಕ್ರಿಸ್ತನೆ ತಿಳದಿಲಿವಾನಾಹುತಿ ತ್ಯುನೊನೆ ಬಿಡುಗಡೆ ಥೈ. ತೆನೈಸೊ ತೆ ಮನಕ್ಹೊ ತ್ಯುನಾ ಪಾಚ಼ಲ್ಯಾ ಸಂಗತಿಯೊನೆ ಪಾಚಾ಼ ಫರಿನ ಗಯಾಮ ವರಿ ತೆ ತ್ಯುನೊನೆ ಹತೊಟಿಮಾ ಮ್ಹೆಲ್ಲಿದಲ ರ‍್ಹಯಾಮ ತ್ಯುನೆ ಪೈಲಾತಿಬಿ ಘನ್ನಾ ಕೆಟ್ಟ ಥೈ ಜಾ಼ವಸ.
21 ಹೊ, ತೆ ಮನಕ್ಹೊ ಚೊ಼ಕಿವಾಟ ಗ್ವತ್ತ ವಾಚಿ಼ ಗಯಲ ರ‍್ಹಯಾಮ ಚೊ಼ಕು ಥಾತುತು. ಚೊ಼ಕಿ ವಾಟಮಾ ತಿಳ್ದಿಲಿನ ಚೊ಼ಕಿ ವಾತೊನೆ ಪಾಚಾ಼ಪ್ಹರಾತಿ ತೆ ನೈ ತಿಳ್ದಿಲಿದ್ಯಾಮ ಚೊ಼ಕು ವ್ಹತ್ತು. 22 ಕ್ಹರಿಮಾಜ಼ ಎ ವಾತೊ ನಿಂಗತ ತ್ಯುನೆ ಕರ‍್ಯಾ; "ಕುತ್ರು ತೆ ವಕ್ಯಲಜ಼ ಚಾ಼ಟಾನೆ ಫ್ಹರಿನ ಗಯು. ವರಿ ಧ್ವಯಲ ಢುಕ್ಕುರ ರಾಡಿಮಾ ಉಳ್ಯಾಡಾನೆ ಗಯು"