8 ತೆನೈಸೊ ಮಯಾನಾ ಭಾಯೊ, ಆಂ ಯಕ್ಕ ತುಮೆ ಇಕ್ಹರೊ ನಕೊ. ಪ್ರಭುನೆ ಯಕ್ಕ ದಿನ್ನಬಿ ಹಜಾ಼ರ ವರಕ್ಹ ರ‍್ಹಯಲನಿಂಗತ ವ್ಹೈ ವರಿ ಹಜಾ಼ರ ವರಕ್ಹು ಯಕ್ಕದಿನ್ನ ರ‍್ಹಯಲ ನಿಂಗತ ವ್ಹೈ. 9 ದಕ್ಹಾ ಮನಕ್ಹೊ ತಿಳ್ದಲ ತಿಮ್ಮ, ಪ್ರಭು ತೆ ವಾತ ದಿದಲ ತಿಮ್ಮ ಕರಾನು ತಡಾಕರಿನ ಪುರಾ ಕರತೊ ನೈ. ಕ್ಹುದಾ ತುಮಾರಾಹುತಿ ತಡ್ದಿಲಿನೆ ಛೆ ಕಯುಜ಼ ಮನಕ್ಹ ಜ಼ವೈಜೌನೈ ಕೈನ ಕ್ಹುದಾನು ಮನಸ ಛೆ. ಹರಿ ಯಕ್ಲೊ ತಿನು ಮನಸ ಬದ್ಲಿಕರಲಿನ, ಪಾಪ ಕರಾನು ಹುಬ್ರಾಡಿಪಾಡು ಕೈನ ಕ್ಹುದಾನಿ ಆಸ ಛೆ.

10 ತೆನೈಸೊ ಕ್ಹುದಾ ದಿಕ್ಹಾನೊ ಟೈಮ ಚ್ವಟ್ಟೊ ಕಿಮ್ಮ ಆವಸ ತಿಮ್ಮ ಆವಸ. ಹಬಾಳಮಾ ಮ್ಹೊಟಿ ಅವಾಜ಼ಕ್ಹು ಮಾಯಾ ಥಯಲನಿಂಗತ ಹಬಾಳಮಾ ರ‍್ಹಯಲ ಕ್ಹಾರಿ ಸೃಶ್ಟಿಯೊ ಆಗಕ್ಹು ಹಾಳ ಥೈ ಜಾ಼ವಸ. ಆಂ ಜಗತ ವರಿ ತಿಮಾ ರ‍್ಹಯಲ ಕ್ಹಾರುಜ಼ ಆಗಕ್ಹು ಹಾಳ ಥೈಜಾ಼ವಸ. 11 ಮಿ ತುಮೊನೆ ಕದಲ ತಿಮ್ಮ ತರಿಕಾಕ್ಹು ಕ್ಹಾರು ಹಾಳ ಥೈಜಾ಼ವಸ. ತಿನಾಹುತಿ ತುಮೆ ಕೆವಾ ಮನಕ್ಹೊ ಥೌ? ತುಮೆ ಪರಿಶುದ್ಧ ಥೈನ ರ‍್ಹೌ ವರಿ ಭಕ್ತಿವಾಲಾ ರ‍್ಹೌ. 12 ತುಮೆ ಕ್ಹುದಾ ಆವಾನೊ ದಿನ್ನ ದೆಕ್ತಾ ರ‍್ಹೌ. ತೆ ದಿನ್ನ ಆತಾಮಾ, ಹಬಾಳ ಆಗಕ್ಹು ಹಾಳ ಥೈ ಜಾ಼ವಸ. ವರಿ ಹಬಾಳಮಾ ರ‍್ಹಯಲ ಕ್ಹಾರುಜ಼ ಆಗಕ್ಹು ಬಳಿನ ಕರಗೈ ಜಾ಼ವಸ. 13 ಅಪೆತೊ ಕ್ಹುದಾ ವಾತದಿದಲ ಹಬಾಳ ವರಿ ಜಿಮಿನ ದೆಕಾಡಾಸ. ಕ್ಹರಿಬಿ ನಿತಿ ತಿಮಾ ಛೆ.