ದೆವದುತ ವರಿ ನ್ಹಾನಿ ಸುರಳಿ
1 ಪಾಚಾ಼ತಾ ಘನ್ನೊ ತಾಕತವರ ರ‍್ಹಯಲ ಬಿಜೆಕ್ಲೊ ದೆವದುತ ಸ್ವರಗತೊ ಉತ್ರಿನ ಆತೊ ರ‍್ಹಯಲ ಮಿ ದೆಕ್ಯೊ. ತೆ ದೆವದುತ ಮೆಘ ಘಾಲ್ಲಿಲಿದ್ಯೊತೊ. ತಿನಾ ಮಾತಾನಾ ಸುತ್ತೆಬಿ ಕಾಮನ ಬಿಲ್ಲು ವ್ಹತ್ತಾ. ತೆ ದೆವದುತನು ಮ್ಹೊಡು ಸುರ‍್ಯಾ ನಿಂಗತ ವ್ಹತ್ತು ತಿನಾ ಬಗೊ ಆಗನಾ ಖಂಬಾವೊ ನಿಂಗತ ವ್ಹತ್ತಾ. 2 ತೆ ದೆವದುತ ನ್ಹಾನಿ ಸುರಳಿ ಧರಿಲಿದ್ಯೊತೊ. ತಿನಾ ಹತ್ಮಾ ರ‍್ಹಯಲ ಸುರಳಿ ಖುಲ್ಲಾ ಥೈ. ತೆ ಬಿನೊ ಜ಼ಮ್ನೊ ಪಗ ಸಮುಂದರಪರ ವರಿ ತಿನು ಡಾವೊ ಪಗ ಜಿಮಿನಪರ ಮ್ಹೆಲಿನ, 3 ವರಿ ಶಿಯ್ಯೊ ಅಡ್ಡಲ ನಿಂಗತ ಜೊ಼ರ ವದರ‍್ಯೊ. ತೆ ಥಯಲಪರ ಕ್ಹಾತ ಡೊಂಗ್ರೊ ಬೊಲ್ಯಾ. 4 ಎ ಕ್ಹಾರು ಮಿ ಬರ್ದು ಕೈನ ಕತಾಮಾ ಸ್ವರಗತೊ ಯಕ್ಕ ಅವಾಜ಼ ಮನೆ"ತೆ ಕ್ಹಾತ ಡೊಂಗ್ರೊ ಬೊಲಲ ತು ಬರ್ದು ನಕೊ. ತೆ ವಾತೊ ಝಾಕಿನ ಮ್ಹೆಲ "ಕೈನ ಕದ್ಯು.
5 ತೆ ಥಯಲಪರ ಜಿಮಿನಪರ ವರಿ ಸಮುಂದರಪರ ಐನ ಹುಬ್ರಯಲ ಯಕ್ಕ ದೆವದುತನೆ ದೆಕ್ಯೊ. ತಿನೊ ಜ಼ಮ್ನೊ ಹತ ಸ್ವರ್ಗ ಬಗಲ ಕರ‍್ಯೊತೊ. 6 ತೆ ದೆವದುತ ಯುಗ ಯುಗಮಾ ರ‍್ಹಯಲವಾಲಾನೆ ವರಿ ಹಬಾಳ ವರಿ ತಿಮಾ ರ‍್ಹಯಲ ಕ್ಹಾರುಜ಼, ಜಿಮಿನಪರ ರ‍್ಹಯಲ ಕ್ಹಾರುಜ಼, ಸಮುಂದರ ವರಿ ತಿಮಾ ರ‍್ಹಯಲ ಕ್ಹಾರುಜ಼ ತಯ್ಯಾರ ಕರಲ ವಾಲಾನಿ ತಾಕತಕ್ಹು ಅಮ್ಮ ಕದ್ಯೊ; "ಹಬ್ದಾ ಕೈದಾನಿ ಜ಼ರುರತ್ತ ನತ್ತಿ. 7 ಕ್ಹಾತ್ವಾ ದೆವದುತ ತಿನೆ ತುತ್ತುರಿ ವಾಜಾ಼ಡಾನಾ ಟೈಮ್ಮಾ ಕ್ಹುದಾನಾ ದಡಿರ‍್ಹಯಲ ವಿಚಾರೊ ಪುರಾ ಥಾವಸ. ಕ್ಹುದಾ ತಿನಾ ಸೆವಕೊ ಥಯಲ ಪ್ರವಾದಿಯೊನೆ ಕದಲ ಸುವಾರ್ತೆಜ಼ ಎ ವಿಚಾರೊ ವ್ಹೈ"
8 ಪಾಚ಼ಲ್ತೊ ಸ್ವರಗತೊ ತೆಜ಼ ಅವಾಜ಼ ಮಿ ಐಕ್ಯೊ. ತೆ ಅವಾಜ಼ ಮನೆ"ಜಾ಼, ದೆವದುತನಾ ಹತ್ಮಾತಿ ಸುರಳಿ ಖುಲ್ಲಾ ಥಯಲ ತು ಲೆ. ತೆ ದೆವದುತ ಸಮುಂದರಪರ ವರಿ ಜಿಮಿನಪರ ಹುಬ್ರಯೊಸ" ಕೈನ ಕದ್ಯು.
9 ತಿನಾ ಹುತಿ ಮಿ ದೆವದುತಕನ ಗೈನ, ತೆ ನ್ಹಾನಿ ಸುರಳಿ ದೆ ಕೈನ ಮಿ ತಿನೆ ಕದ್ಯೊ. ತೆ ದೆವದುತ ಮನೆ"ಸುರಳಿಲಿನ ತು ಖೈಪಾಡ. ತೆ ತಾರಾ ಪೆಟ್ಮಾ ಖಾಟು ರ‍್ಹವಸ, ತೆನೈಸೊ ತಾರಾ ಮ್ಹೊಡಾಮಾ ಜೆನ ನಿಂಗತ ಗಳು ರ‍್ಹವಸ "ಕೈನ ಕದ್ಯೊ.
10 ತೆ ನ್ಹಾನಿ ಸುರಳಿ ದೆವದುತಕಂತೊ ಮಿ ಲಿನ ಮಿ ಖಾದ್ಯೊ. ತೆ ಮಾರಾ ಮ್ಹೊಡಾಮಾ ಜೆನ ನಿಂಗತ ಗಳು ವ್ಹತ್ತು, ತೆನೈಸೊ ತೆ ಗಳಲಪರ, ತೆ ಮಾರಾ ಪೆಟ್ಮಾ ಖಾಟು ವ್ಹತ್ತು. 11 ತೆಳಾಮಾ ತೆ ಮನೆ ವರಿ ಕದ್ಯೊ"ತು ವರಿ ಘನ್ನಿಯೊ ಜ಼ನಾಂಗ್ನೆ, ಪ್ರಜಾವೊನೆ, ಜಾತನೆ ವರಿ ರಾಜಾ಼ವೊನಾಹುತಿ ಪ್ರವಾದನೆ ಕರು "ಕೈನ ಕದ್ಯೊ.