1 ತೆಳಾಮಾ ಸ್ವರಗಮಾತು ಯಕ್ಕ ಮ್ಹೊಟು ಅದ್ಭುತ ದಿಕ್ಹ್ಯು. ಸುರ‍್ಯಾನೆಜ಼ ವಣ್ಣಾ ನಿಂಗತ ಘಾಲ್ಲಿನ ಯಕ್ಕ ಬಾಕ್ಡಿ ತ್ಯಾ ವ್ಹತ್ತಿ. ತಿನಾ ಪಗೊನಾ ಹೆಟೊ ಚ಼ಂದಪ್ಪಾ ವ್ಹತ್ತೊ. ತಿನಾ ಮಾತಾಪರ ಬಾರಾ ಚಿಕ್ಕಕಿಯೊನು ಯಕ್ಕ ಕಿರಿಟ ವ್ಹತ್ತು. 2 ತೆ ಪೆಟೆ ವ್ಹತ್ತಿ. ತೆ ಜ಼ನ್ನಾನಾ ತ್ರಾಸಕ್ಹು ಜೊ಼ರ ವದ್ರಿ.

3 ತೆಳಾಮಾಜ಼ ಹಬಾಳಮಾ ಬಿಜೆ಼ಕ ಅದ್ಭುತ ದಿಕ್ಹ್ಯು. ಲಾಲ ರ‍್ಹಯಲ ಯಕ್ಕ ಮ್ಹೊಟೊ ಕ್ಹಾಪ ವ್ಹತ್ತೊ. ತೆ ಕ್ಹಾಪ್ನೆ ಕ್ಹಾತ ಮಾತಾ ವ್ಹತ್ತಾ. ಹರಿ ಯಕ್ಕ ಮಾತಾಪರ ಯಕೆಕೆ ಕಿರಿಟ ವ್ಹತ್ತು. ತೆ ಕ್ಹಾಪ್ನೆ ಕ್ಹಾತ ಸಿಂಗ್ಡಾ ವ್ಹತ್ತಾ. 4 ತೆ ಕ್ಹಾಪ್ನಿ ಪುಚ಼ಡಿ ಹಬಾಳಮಾನಿಯೊ ಚಿಕ್ಕಕಿಯೊಮಾ ತನ್ವಾ ಯಕ್ಕ ಭಾಗ ಜಗ್ಗಿಲಿನ ಜಿಮಿನಪರ ನಾಕಿ ಪಾಡ್ಯು ತೆ ಕ್ಹಾಪ. ಜ಼ನ್ನಾನಿ ತ್ರಾಸಮಾ ರ‍್ಹಯಲ ಬಾಕ್ಡಿನಾ ಕ್ಹಾಮೊ ಹುಬ್ರಯೊ ತೆ ಬಾಕ್ಡಿ ಜ಼ನ್ನಾನಾ ಬಚ್ಚಾ಼ನೆ. ಗಳಾನೆ ತೆ. ಕ್ಹಾಪ ಕೈದಾಡ್ಯೊತು.

5 ತೆ ಬಾಕ್ಡಿ ತೆ ಕ್ಹಾರಿ ಜಾ಼ತೊನೆ ಲ್ಹೊಡಾನಿ ಲಾಕ್ಡಿಕ್ಹು ವರಿ ತಿನಾ ಸಿಂಹಾಸನ ಕನ ಲಿನ ಗಯು. 6 ತೆ ಬಾಕಡಿಕ್ಹು ತಿನಾಹುತಿ ಕ್ಹುದಾ ತಯ್ಯಾರ ಕರಲ ಉಸುಕನಾ ಯಕ್ಕ ಗಾಮಾ ನ್ಹಾಟಿ ಗೈ. ತೆ ಉಸುಕನಾ ಗಾಮ್ಮಾ ತಿನೆ ಬಾರಾಕ್ಹೊನ ಕ್ಹಾಟ ದಿನ್ನ ಜ಼ತ್ತನ ಕರಸ.

7 ಪಾಚ಼ಾತಾ ಸ್ವರ್ಗಮಾ ಯಕ್ಕ ಯುದ್ದ ಥೈ ಮಿಕಾಯೆಲ ವರಿ ತಿನಾ ಕ್ಹಾತೆ‍ ರ‍್ಹಯಲ ದುತೊ ತೆ ಕ್ಹಾಪನಾ ತಿನಾ ದುತೊನಿ ವಿರುದ್ದ ತ್ಯುನೆ ಯುದ್ದ ಕರಾ. 8 ತೆನೈಸೊ ತೆ ಮ್ಹೊಟೊ ಕ್ಹಾಪ ವರಿ ತಿನಾ ದುತೊ ಸೊಲಿನ ಸ್ವರಗಮಾ‍ ರಹೆಲ ತ್ಯುನಿ ಜ಼ಗಾ ಜ಼ವೈಲಿದ್ಯಾ. 9 ತೆ ಮ್ಹೊಟಾ ಕ್ಹಾಪನೆ ಸ್ವರಗತೊ ತೆ ಮ್ಹೊಟಾ ಕ್ಹಾಪನೆ ಸೈತಾನ ಕೈನ. ವರಿ ರಾಕ್ಷೆತ ಕೈನ ನಾಮ ವ್ಹೈ ತೆ. ಜಗತ್ಯೆ ಕೆಟ ಟವಾಟ್ಮಾ ಚ಼ಲಾವಸ) ತಿನಾ ದುತೊನೆ ಲಿಮಿನಪರ ನಾಕ್ಯಾತಾ.

10 ತೆಳಾಮಾ ಜಗತ್ಮಾ ಯಕ್ಕ ಮ್ಹೊಟು ಅವಾಜ಼ ಮಿ ಐಕ್ಯೊ; ಹಮಾರಾ ಕ್ಹುದಾನೆ ಜ಼ಯ ಮಳಿ, ತಾಕತ ವರಿ ಆದಿಕಾರ ಕ್ರಿಸ್ತನೊ ವ್ಹೈ. ಅಪ್ನಾ ಭಾಯೊನೆ ವರಿ ಭೆನೊನೆ ತಪ್ಪ ಘಾಲಾಲಾನೆ ಭಾರಾ ನಾಕಲ ಹುತಿ ಎ ಕ್ಹಾರು ಆಯೊಸ. ಅದ್ಯಾ ಕ್ಹುದಾನ ಕ್ಹಾಮಾ ದಿನ್ನರಾತ ಅಪ್ನಾ ಭಾಯೊನಾ ಹುತಿ ತೆ. ದುರ ಕದ್ಯೊ

11 ತ್ಯುನೆ ಜ಼ಲಂಪರಲಿ ಮಯಾ ಛೊಡಿನ ಬಕ್ರಾನು ಬಚ್ಚು಼ ಥಯಲವಾಲಾನಾ ರಗತಕ್ಹು ತ್ಯುನು ಕ್ಹರಿನು ಭೊದನೆ ಕ್ಹು ವರಿ ಸಾಕ್ಕಷಿಕ್ಹು ಝಿತ್ತ್ಯಾ. 12 ತಿನಾಹುತಿ ವರಿ ಸ್ವರ್ಗ ತಿಮಾ ರ‍್ಹವಾಲಾ ಖುಶಿ ಥಾವಾದೆ! ತೆನೈಸೊ ಜಿಮಿನ, ಸಮುಂದರ, ಸೈತಾನ ತುಮೊಕನ ಆಯಲ ಹುತಿ ಕೆಟ್ಟ ಪರಿಸ್ಥಿತಿ ಆವಸ! ಸಿಟ್ಟ ಕವಾನು ಸೈತಾನ್ಮಾ ಭರಿ ಗೈಯುಸ. ತಿನೆ ರ‍್ಹಯಲ ದಕ್ಹೊಜ಼ ಟೈಮ ವ್ಹೈ ಕವಾನು ತಿನೆ ಗ್ವತ್ತ ಛೆ.

13 ತೆ ಮ್ಹೊಟಾ ಕ್ಹಾಪ್ನೆ ಜಿಮಿನಪರ ಡಕ್ಕಲಲ ತಿನೆ ಗ್ವತ್ತ ಛೆ. ತಿನಾಹುತಿ ತೆ ಕ್ಹಾಪ ಪಟ್ಟೊ ಜ಼ನ್ನಲಿ ಬಾಕ್ಡಿನೆ ತ್ರಾಸ ದಿವಾನಾ ಹುತಿ ಪಿಟ್ಟಲಾಗ್ಯೊ. 14 ತೆನೈಸೊ ತೆ ಬಾಕ್ಡಿನೆ ಬೆ ಮ್ಹೊಟಿ ಹದ್ದೊನಾ ರಕ್ಕಯಾ ದಿದಲ ಹುತಿ, ತೆ ಬಾಕ್ಡಿನೆ ಉಸುಕನಾ ಗಾಮ್ಮಾ ತಯ್ಯಾರ ಕರಲ ಜ಼ಗಾ ಉಡಿನೆ ಜಾ಼ವಾನೆ ಥಯೊ. ತ್ಯಾ ತೆ ಬಾಕ್ಡಿ ಕ್ಹಡಾ ತನ್ನ ವರಕ್ಹ ಖತರ್ನಾಕ ಕ್ಹಾಪ್ನೆ ದಿಕ್ಹ್ಯಾವಾಚಿ ಜ಼ತ್ತನ ಥೈ. 15 ತೆಳಾಮಾ ಕ್ಹಾಪ ತಿನಾ ಮ್ಹೊಡಾಮಾತು ನದಿನಾ ನಿಂಗತ ಪಾನಿ ಭಾರು ಕಾಡ್ಯು. ತೆ ಪಾನಿನಿ ತಾಕತಕ್ಹು ತೆ ಬಾಕ್ಡಿನೆ ವೈನ ಜಾ಼ವಾದೆ ಕೈನ ತೆ ಕ್ಹಾಪ್ನು ಮನಸ ವ್ಹತ್ತು. 16 ತೆನೈಸೊ ಜಿಮಿನ ತೆ ಬಾಕ್ಡಿನೆ ಮದದ ಕರು ಕೈನ ತಿನು ಮ್ಹೊಡು ಖುಲ್ಲಾ ಕರಿನ, ತೆ ಕ್ಹಾಪ್ನಾ ಮ್ಹೊಡಾಮಾತು ಭಾರು ಆಯಲ ಪಾನಿನೆ ಪಿಪಾಡಿ. 17 ತೆಳಾಮಾ ಕ್ಹಾಪ ತೆ ಬಾಕ್ಕಡಿಪರ ಘನ್ನೊ ಶಿಟ್ಟ ಥೈನ ತಿನಾ ತಿನಾ ಬಚ್ಚಾ಼ವೊನೆ ಕದ್ಯಾಮ ಕ್ಹುದಾನಿ ಆಗನ್ಯಾನಿಂಗತ ಚಾಲ್ಲಿನ ಜಾ಼ವಾಲಾವೊನೆ ವರಿ ಯೆಸುನಾಹುತಿ ಸಾಕ್ಷಿ ಕವಾಲಾವೊಪರ ಯುದ್ದ ಕರಾನೆ ಶುರು ಕರ‍್ಯೊ. 18 ತೆ ಮ್ಹೊಟೊ ಕ್ಹಾಪ ಸಮುಂದರನಿ ದಂಡಿಪರ ಹುಬ್ರಯೊತೊ.