Atos 16

25 ಅರದಿ ರಾತೆ ಪೌಲ ವರಿ ಸಿಲಾ ಪ್ರಾರ್ಥನಾ ಕರ್ತಾಮಾ ಕ್ಹುದಾನೆ ಸ್ತುತಿನಾ ಗಿದ್ದೊ ಕವಾಡ್ಯಾತಾ; ಜೆಲಮಾ ರ‍್ಹಹೆಲವಾಲಾ ಕ್ಹಾರಾ ಲಕ್ಷ ದಿನ ಐಕಾಡಾತ್ತಾ. 26 ಯಕ್ಕದುಮ್ಮ ಮ್ಹೊಟು ಭುಕಂಪ ಥೈಯು; ಜೆಲನಾ ಗೊಡಿಯೊ ಹಲ್ಲಿಯೊ. ತೆಳಾಮಾಜ಼ ಬಾಕಲೊ ಕ್ಹುಲಿ ಗಯಾ, ಕ್ಹಾರಾವೊನಾ ಬೆಡಿಯೊ ಚ್ಹುಟಿ ಗಯಾ. 27 ಜೆಲನೊ ಮಾಲಿಕ ನಿಂದರಕ್ಹು ಹುಶಾರ ಥೈನ ಜೆಲನಾ ಬಾಕಲೊ ಕ್ಹುಲಾನು ದೆಕಿ ಜೆಲಮಾ ರ‍್ಹಹೆಲವಾಲಾ ಕ್ಹಾರಾ ನ್ಹಾಟಿ ಗಯಾಸ ಕೈನ ಕೈಲಿನ ತಲವಾರಕ್ಹು ಆತ್ಮಹತ್ಯೆ ಕರಲಿವಾಡೊತ್ತೊ. 28 ತಿನಾಹುತಿ ಪೌಲಾ ಮ್ಹೊಟಿ ಆವಾಜಕ್ಹು ಅಡ್ಡಿನ ತಿನೆ ತು ಸುಜ಼ ಕರಲ್ಯು ನಕೊ,ಹಮೆ ಕ್ಹಾರಾ ಯ್ಹಾಜ ಛೆ ಕೈನ ಕದ್ಯಾ. 29 ತೆಳಾಮಾ ತೆ; ದಿವೊ ಲೌವು ಕೈನ ಅಡ್ಡಿನ ಮ್ಹೈ ಉಡಿನ ಬುಚುಕ್ಹು ಕಾಪತ್ತೊ ಪೌಲ ವರಿ ಸಿಲನಾ ಕ್ಹಾಮೊ ಅಡ್ಡ ಪಾಡ್ಯೊ. 30 ವರಿ ತ್ಯುನೊನೆ ಭಾರೊ ಬಲೈನ ಸ್ವಾಮಿಯೊ, ಹಮೆ ರಕ್ಷಣೆನಾ ಹುತಿ ಸು ಕರು ಕೈನ? ಪುಚ್ಚಾ಼ನೆ, 31 ತ್ಯುನೆ ಕರ್ತಾ ಥಯಲ ಯೆಸುನಾ ಉಪ್ಪರ ಬರೊಕ್ಹೊ ಮ್ಹೆಲ,ತೆಳಾಮಾ ತು ರಕ್ಷಣೆ ಹೊಂದಶಿ, ತಾರಾ ಘರನಾ ಕ್ಹರಾ ರಕ್ಷಣೆ ಥಾವಸ ಕೈನ,

32 ತಿನೆಬಿ, ತ್ಯುನಾ ಘರಮಾ ರ‍್ಹಹೆಲವಾಲಾ ಕ್ಹಾರಾವೊನೆ ಕ್ಹುದಾನಿ ವಾಕ್ಯಾ ತಿಳಸೈನ ದಿದ್ಯಾ. 33 ತೆಳಾಮಾ ತೆ ರಾತ್ತನಾ ತೆಜ಼ ಟೈಮ್ಮಾ ತ್ಯುನೊನೆ ಬಲೈಲಿನ ಗೈನ ತ್ಯುನಾ ದುಕೊ ಕ್ಹಾರಾ ನುಚಿನ ತೆಳಾಮಾ ತೆ ತ್ಯುನಾ ಕ್ಹಾರಾವೊನಾ ಕ್ಹಾತೆ ಮಳಿನ ಬಾಪ್ತಿಸ್ಮ ಲಿದ್ಯೊ. 34 ತೆಳಾಮಾ ತ್ಯುನೊನೆ ತಿನಾ ಘರೆ ಬಲೈಲಿನ ಗೈನ ಅನ್ನ ಕ್ಹಲಾಯೊ ತೆ ವರಿ ತಿನಾ ಘರವಾಲಾವೊನಾ ಕ್ಹಾತೆ ಕ್ಹುದಾನೆ ನಂಬಿನ ಕ್ಹುಶಿ ಥಯಾ.