ಅಪೊಸ್ತಲೊ 25

ಪೌಲ ಚಕ್ರವರ್ತಿಕನ ಮಾಂಗಿಲಿದಲ

1 ಫೆಸ್ತಾ ಅದಿಕಾರ ಹೊಂದೆಲ ಪರ ತನ ದಿನ್ನ ಥಯಲಪರ ಕೈಸರೈತೊ ಯೆರುಸಲೆಮ್ಮೆ ಗಯೊ. 2 ತ್ಯಾ ಖಾಸ ಯಾಜಕವೊ, ಯೆಹುದಿಯೊನಾ ಮ್ಹೊಟಾ ತಿನೆ ಪೌಲಾನಾ ಉಪ್ಪರ ತಪ್ಪಕೈನ ಯೆರುಸಲೆಮ್ಮಾ ವಳೌ ಕೈನ ಫೆಸ್ತ ಕನ ಮಾಂಗಿಲಿದ್ಯಾ, 3 ಕಾಕದ್ಯಾಮ್ಮಾ ಯೆರುಸಲೆಮ್ಮಾ ಜಾತ್ತಾಮ್ಮಾ ರಸ್ತಾಮ್ಮಾ ತಿನೆ ಮಾರಾನಾ ಹುತಿ ವಿಚಾರ ಕರ‍್ಯಾತ್ತಾ. 4 ಫೆಸ್ತ ಅಮ್ಮ ಕದ್ಯೊ;ಪೌಲಾ ಕೈಸರೈನಾ ಜೆಲಮ್ಮಾ ಛೆ,ಮಿ ತ್ಯಾ ಜಲದಿ ಜೌ ಕೈನ ಛೆ. 5 ತಿನಾಹುತಿ, ತಮಾರಾಮ್ಮಾ ಖಾಸ, ಮಾರಾಕ್ಹಾತೆ ಕೈಸರೈಮ್ಮಾ ಐನ ತೆ ಮನಕ್ಹಮಾ ಅಪರಾದ ಕೈಬಿ ರ‍್ಹೈಮ್ಮ ತಿನಾ ಉಪ್ಪರ ತಪ್ಪ ಘಾಲಾಂದೆ ಕದ್ಯಾ.

6 ತೆ ಯೆರುಸಲೆಮ್ಮಾ ಆಟ ದಕ್ಹತಿ ಹೆಚ್ಕಿ ದಿನೊ ಹುಬರಯಾವಾಚಿ ಕೈಸರೈನೆ ಗೈನ ಮರನಾದಿನೆ ಫೆಸ್ತ ಫೈಸಲಾನಿ ಜ಼ಗಾ ಬೈಟಿನ, ಪೌಲಾನೆ ಬಲೆಲಿನ ಆವೊ ಕೈನ ಅಪ್ಪಣೆ ದಿದ್ಯೊ. 7 ತೆ ಆತ್ತಾ ಟೆಮ್ಮಾ ಯೆರುಸಲೆಮಾತ್ತಾ ಆಯೆಲ ಯೆಹುದಿಯೊ, ತಿನಾ ಸುತ್ತೆ ಹುಬರೈನ ತ್ಯುನೆ ಸಾಬಿತ ನೈಥಯಲ ಘನ್ನಾ ಮ್ಹೊಟಾ ಮ್ಹೊಟಾ ತಪ್ಪೊ ಘಾಲತ್ತಾ ಟೆಮ್ಮಾ, ತ್ಯುನೊನೆ ತೆ ಯಕ್ಕಬಿ ಸಾಬಿತ ಕರಾನೆ ಥೈಯು ನೈ. 8 ತೆನೈಸೊ ಪೌಲಾ;ಯೆಹುದಿಯೊ ಧರಮಶಾಸ್ತ್ರನಾ ವಿಷಯಮ್ಮಾ ರ‍್ಹಂದೆ ದೆವಾಲಯನಿ ವಿಷಯಮ್ಮಾ ಥಾವಾಂದೆ, ಚಕ್ರವರ್ತಿನಾ ವಿಷಯಮ್ಮಾ ಥಾವಾಂದೆ, ಮಿ ಸುಜ಼ ತಪ್ಪ ನತಿ ಕರ‍್ಯೊ ಕೈನ ಉತ್ತರ ದಿದ್ಯೊ.

9 ತೆನೈಸೊ ಫೆಸ್ತಾ ಯೆಹುದಿಯೊನಿ ಮಯಾ ಗಳಸಿಲ್ಯು ಕೈನ ಆಸ ಮ್ಹೆಲಿನ ಪೌಲಾನೆ; ತು ಯೆರುಸಲೆಮನೆ ಜಾ಼ವಾವು ಕೊಶಿಶ ಕರತ್ತಾಮ್ಮಾ ತ್ಯಾ ಆ ಕಾಮನಾ ವಿಷಯಮ್ಮಾ ಮಾರಾ ಕ್ಹಾಮೊ ವಿಚಾರ ಕರಾನೆ ತುನೆ ಮನಸಚೆ? ಕೈನ ಪುಚತ್ತಾಮ್ಮಾ, ಪೌಲಾ;

10 ಮಿ ಪೌಲಾ ಕದ್ಯೊ ಚಕ್ರವರ್ತಿ ಥಯಲ ಕೈಸರೈನಾ ಫೈಸಲಾನಿ ಜ಼ಗಾನಾ ಕ್ಹಾಮೊ ಹುಬರಯೊಸ; ನ್ಹ್ಯಾಜ಼ ಮಾರು ವಿಚಾರಣೆ ಥೌ. ಯೆಹುದಿಯೊನೆ ಮಿ ಅನ್ಯಾಯ ನತಿ ಕರ‍್ಯೊ; ತೆ ತುನೆಬಿ ಚೊ಼ಕಿತರಾ ಗೊತ್ತ ಛೆ. 11 ಮಿ ಧರಮಶಾಸ್ತ್ರಾನೆ ವಿರೊದ್ದ ಥಯೊಮ್ಮ ಮೌತ್ತನಿ ಶಿಕ್ಷಾನೆ ಕಾರಣ ಥಯಲ ಸುಬಿ ಕರಲ ರ‍್ಹಯುಮ ಮೌತ್ತನಿ ಶಿಕ್ಷಾನೆ ಇನಾಕಾರತೊ ನೈ. ವರಿ ತ್ಯುನೆ ಮಾರಾ ಉಪ್ಪರ ಘಾಲೆಲ ತಪ್ಪೊ ತಾಕತ ನೈಸೊ ಪಕ್ಷಮ್ಮಾ,ಕುನಬಿ ಮನೆ ತ್ಯುನಾ ಹತೆ ಒಪಸಾನೆ ನೈ ಥಾತು. ಮಿ ಕೈಸರನಾ ಕ್ಹಾಮೊ ಕೈಲ್ಯುಸ ಕದ್ಯೊ.

12 ತೆಳಾಮಾ ಫೆಸ್ತಾನೆ ತ್ಯುನಾ ಸಭೆವಾಲಾವೊನಾ ಕ್ಹಾತೆ ಕ್ಹಾರು ವಿಚಾರ ಕರಲ ಪರ ಪೌಲಾನೆ; ತು ಕೈಸರನಾ ಕ್ಹಾಮೊ ಕೈಲ್ಯುಸ ಕದ್ಯೊ ತೊ ತಿನಾ ಹುತಿ ಕೈಸರ ಕನ ಜೌ ಕೈನ ಕದ್ಯೊ.

ಅಗ್ರಿಪ್ಪೆ ವರಿ ಬರ್ನಿಸತಿ ಪೈಲಾ ಅಗೊ ಪೌಲ

13 ದಕ್ಹಾದಿನೊ ಥಯಲ ಅಗ್ರಿಪ್ಪ ರಾಜೊ಼, ಬೆರ್ನಿಕೆರಾಣಿ, ಫೆಸ್ತಾನೆ,ಮಳಾನೆ ಸ್ವಾಗತ ಕರಾನೆ ಕೈಸರೈನೆ ಆಯಾ. 14 ತ್ಯುನೆ ದಕ್ಹಾ ದಿನ್ನ ತ್ಯಾ ರ‍್ಹತ್ತಾಮ್ಮಾ ಫೆಸ್ತಾ ಪೌಲಾನಿ ಸಂಗತಿಯೊ ರಾಜಾ಼ನೆ ತಿಳಸಿ ಕದಲ ; ಫೆಲಿಕ್ಸ ಛೊಡಿನ ಗಯೆಲ ಎಕ ಜೆಲಮ್ಮಾನೊ ಮನಕ್ಹ ವ್ಹತ್ತೊ. 15 ಮಿ ಯೆರುಸಲೆಮ್ಮಾ ರ‍್ಹತ್ತಾಮ್ಮಾ ಯೆಹುದಿಯೊನಾ ಖಾಸ ಯಾಜಕೊ, ಮ್ಹೊಟಾ ಮನಕ್ಹೊ ತಿನಾ ವಿಷಯಮ್ಮಾ ಮನೆ ತಪ್ಪ ಕೈನ ತಿನೆ ವಿರುದ್ದ ಥೈನ ಫೈಸಲೊ ಥಾನಾದೆ ಕೈನ ಮಾಂಗಿಲಿದ್ಯಾ. 16 ಮಿ ತ್ಯುನಾ ಪ್ರಾವಾದಿಯೊ ವಾದಾ ಕರಾವಾಲಾ ವೊನೆ ತ್ಯುನಾ ಕ್ಹಾಮಾಜ಼ ಹುಬರೈನ ತಿಪರ ಘಾಲೆಲ ದೊಷನಾ ಹುತಿ ಪ್ರತಿವಾದ ಕರಾನೆ ದಿದ್ಯಾವಾಚಿ ತಿನೆ ಒಪ್ಪನಿ ದಿವಾನೆ ರೊಮ್ಮಾವಲೊನಿ ಪದ್ದತ ನ್ಹೊವೈ ಕೈನ ಕದ್ಯೊ. 17 ತ್ಯಾ ತ್ಯುನೆ ಮಳಿನ ಮಿ ದಕ್ಹಿಯೆಳ ಬಿ ತಡಾ ಕರೆವಾಚಿ ಮರ್ನಾ ದಿನೆ ಫೈಸಲಾನಿ ಜ಼ಗಾಪರ ಬೈಟಿನ ತೆ ಮನಕ್ಹನೆ ನಿನೌ ಕೈನ ಅಪ್ಪಣೆ ದಿದ್ಯೊ, 18 ಯೆಹುದಿಯೊ ತ್ಯಾ ಹುಬರೈನ ತಿನಾ ಉಪ್ಪರ ತಪ್ಪ ಘಾಲ್ಯಾ. ತಿನಾಹುತಿ ಮಿ ವಿಚಾರ ಕರಲ ತ್ಯುನೆ ಅಪರಾಧಮಾ ಯಕಬಿ ತಿನಾ ಉಪ್ಪರ ಘಾಲ್ಯಾ ನೈ. 19 ತ್ಯುನೆ ಕದಲ ಸಂಗತಿಯೊ ತ್ಯುನಾ ಧರಮಶಾಸ್ತ್ರನಾ ಪ್ರಕಾರ ಜಿವ್ನಾ ಕರಾಡೊತೊ ಕೈನ, ಪೌಲಾ ಕವಾನು ಮರಿಗಯೆಲ ಯೆಸು ಜಿವಾಸಾಡೊಸ ಕೈನ ಯಕ್ಲಾನಾ ವಿಚಾರಮಾ, ತಿನಾ ಉಪ್ಪರ ದಕ್ಹಾ ವಿವಾದ ಥವಾನು ವಾತೊ ಬೊಲ್ಯಾ. 20 ಹವಾ ಕಾಮೊ ಕಿಮ್ಮ ವಿಚಾರ ಕರು ಕೈನ ಮನೆ ಕಳೆ ನೈಸೊ. ತು ಯೆರುಸಲೆಮೆ ಗೈನ ತಾರಾ ಅಪರಾಧನಾ ವಿಷಯಮಾ ವಿಚಾರ ಕರಾನಾಹುತಿ ಕೊಶಿಶ ಕರಾನೆ ಮನಸ ಛೆ ಸು? ಕೈನ ಮಿ ಪುಚ್ಯೊ಼. 21 ತಿನೆ ಪೌಲಾ ಚಕ್ರವರ್ತಿ ಥಯಲ ಕೈಸರನಾ ಕ್ಹಾಮೊ ಹುಬರೈನ ಕದೆಮಟಾ, ಮಾರಾ ಹುತಿ ಕೈದು ಕೈನ ಮಾಂಗಿಲೆತ್ತಾಮ್ಮಾ ಮಿ ಕೈಸರ ಕೈನ ಮೊಕಲೆ ಲಕ್ಕಾ ತಿನೆ ಕೈದಾನಾ ಹುತಿ ಅಪ್ಪಣೆ ದಿದ್ಯೊ ಕೈನ ಕದ್ಯೊ"

22 "ತಿನೆ ಅಗ್ರಿಪ್ಪ; ತೆ ಮನಕ್ಹ ಕಲಿವಾನು ಕತ್ತಾಮ್ಮಾ ಮನೆಬಿ ಮನಸ್ಸ ಛೆ ಕೈನ ಪುಚತ್ತಾಮ್ಮಾ ಫೆಸ್ತಾ ಉತ್ತಾರಾ ದಿದ್ಯೊ ವಂತಾ ಪುಚಸಕಸಿ ಕದ್ಯೊ"

23 ಮರಾನಾ ದಿನೆ ಅಗ್ರಿಪ್ಪ ರಾಜೊ಼,ಬೆರ್ನಿಕೆರಾಣಿ ಘನ್ನಾ ವತಡಕ್ಹು ಐನ ಅದಿಕಾರಿಯೊ ವರಿ ಗಾಮನಾ ಖಾಸ ಮನಕ್ಹೊನಾ ಕ್ಹಾತೆ ಸಭಾಮಂದಿರಮ್ಮಾ ಮಳಿನ ಆತ್ತಾಮ್ಮಾ ಫೆಸ್ತಾ ಅಪ್ಪಣೆ ದೆತಾಮ್ಮಾ ಪೌಲಾನೆ ಬಲೆಲಿನ ಆಯಾ. 24 ತೆಳಾಮಾ ಫೆಸ್ತಾ; ಅಗ್ರಿಪ್ಪ ರಾಜೊ಼,ಹಮ್ಮಾರಾ ಕ್ಹಾತೆ ಮಳಿನಾಯೆಲ ಕ್ಹಾರಾ ಮನಕ್ಹೊ, ಆ ಮನಕ್ಹನೆ ದೆಕೊಶಿನೈ,ಅನಾ ವಿಷಯಮ್ಮಾ ಯೆಹುದಿಯೊ ಆ ಅಬಾದಾತೊ ಜಿವ್ನಾ ಕರುನೈ ಕೈನ ವದರತ್ತಾ ಯೆರುಸಲೆಮ್ಮಾ ವರಿ ಯ್ಹಾಬಿ ಮನೆ ಮಾಂಗಿಲಿದ್ಯಾ. 25 ತೆ ಮಾರಾನೆ ದಂಡನೆ ಕಾರಣಾ ಥಾವಾನೆ ಸು ನತ್ತಿ ಕರ‍್ಯೊಕೈನ ಮನೆ ದಿಕ್ಹಿನ ಐಯು. ತೆಜ಼ ಕೈಸರನೆ ಮಾಂಗಿಲೆತ್ತಾಮ್ಮಾ ತಿನೆ ಕೈಸರಕನ ವಳಾವಾನೆ ಫೈಸಲೊ ಲಿದ್ಯೊ. 26 ತೆನೈಸೊ ತಿನಾಹುತಿ ಕೈಸರ ಆವಾನೆ ಕೈಜ಼ ಕಾರಣ ದಿಕ್ಹಿನ ಆಯು ನೈ. ಜೆಲಮ್ಮಾರಹೆಲವಾಲಾನಾ ಹುತಿ ಆರೊಪ ಘಾಲೆಲ ತಪ್ಪ ದಿಕ್ಹೆವಾಚಿ, ತಿನೆ ವಳಾವಾನು ಚೊ಼ಕು ನ್ಹವೈ ಕೈನ ಮನೆ ದಿಕ್ಹಿ ಐ ನೈ. 27 ತಿನಾಹುತಿ ವಿಚಾರ ಕರಲ ಪರ ಸುಬಿ ಲಿಕಾನೆ ಮಳಸ ಕೈನ ತಿನೆ ತಾರಾ ಕ್ಹಾಮಾ ಖಾಸ ಕರಿನ ಅಗ್ರಿಪ್ಪ ರಾಜಾ಼ ತಾರಾ ಕ್ಹಾಮಾ ಲಾಯಾಸ ಕೈನ ಕದ್ಯೊ.