Atos 2

ಪೆತ್ರಾನು ಸಂದೆಶ

14 ತೆಳಾಮಾ ಪೆತ್ರಾ ಗ್ಯಾರಾ ಜ಼ನಾ ಅಪೊಸ್ತಲೊನಾ ಕ್ಹಾತೆ ಉಟಿನ ಹುಬ್ರಯೊ. ಕ್ಹಾರಾ ಮನಕ್ಹೊನೆ ಘಟ್ಟ ಆವಾಜ಼ಕ್ಹು ಅಮ್ಮ ಕದ್ಯೊ "ಯೆಹುದ್ಯೊ, ಯೆರುಸಲೆಮಮಾ ರ‍್ಹವಾನಾ ಕ್ಹಾರಾ ಮನಕ್ಹೊ, ಮಿ ಕವಾನು ಕಾನ ದಿನ ಐಕೊ. ತುಮೆ ತಿಳ್ದಿಲಿವಾನಿಯೊ ಸಂಗತಿಯೊ ಮಿ ತುಮೊನೆ ಕೌಸ. 15 ತುಮೆ ತಿಳ್ದಿಲಿದಲ ನಿಂಗತ ಎ ಮನಕ್ಹೊ ನಶಾಮಾ ರ‍್ಹಯಲವಾಲಾ ನ್ಹವೈ. ಹಮ್ನಾ ಪಾಟ್ನಾ ನೌ ವಾಜಾಸ. 16 ತೆನೈಸೊ ಆ ಟೈಮಮಾ ನ್ಹ್ಯಾ ಥಾವಾನಿಯೊ ಸಂಗತಿಯೊನಾ ಹುತಿ ಪ್ರವಾದಿ ಥಯಲ ಯೊವೆಲ ಅಮ್ಮ ಬರ್ದ್ಯೊಸ; 17 ಕ್ಹುದಾ ಅಮ್ಮ ಕವಸ; ಲಾಸ್ಟನಾ ದಿನೊಮಾ ಮಾರಿ ಆತ್ಮಾ ಖಾರಾವೊಪರ ಆವಸ

ತೆನೈಸೊ ತುಮಾರಾ ಕ್ಹಾತೆ ರ‍್ಹಯಲ

ದಾಣ್ಗಾ ವರಿ ಬಾಕ್ಡಿಯೊ ಪ್ರವಾದನೆ ಕರಸ ವರಿ ಜಾಂಜಿಮಾನೊನೆ ದರ್ಶನ ಥಾವಸ ತುಮಾರಾ ಮ್ಹೊಟಾ ಮನಕ್ಹೊನೆ ಕ್ಹಪನೊ ಪಡಸ

18 ತೆನೈಸೊ ತೆ ದಿನೊಮಾ ಮಿ ಮಾರಾ ದಾಸ ದಾಸಿಯೊನಾ ಉಪ್ಪರ ಮಾರಿ ಆತ್ಮಾ ಘಾಲುಸ. ತ್ಯುನೆ ಪ್ರವಾದನೆ ಕರಸ.

19 ಮಿ ಹಬಾಳಪರ ಅದ್ಭುತ ಕಾಮೊ ಕರಿನ ದೆಕಾಡುಸ, ಜಿಮಿನಪರ ಮ್ಹೊಟಾ ಕಾಮೊ ದೆಕೊಶಿ, ರಗತ ಆಗನು ವಾಪನಿಂಗತ ಧವಾಂಡೊ ದೆಕೊಸಿ

20 ಸುರ‍್ಯೊ ಅಂದಾರೊ ಥಾವಸ,ಚಂದಪ್ಪಾ ರಗತನಾ ರಂಗನೊ ಥಾವಸ

21 ತೆನೈಸೊ ಕರ್ತಾನು ನಾಮ ಕೈಲಿವಾಲಾವೊನೆ ರಕ್ಷಣೆ ಥಾವಸ.

22 ಇಸ್ರಾಯಲನಾ ಮನಕ್ಹೊ ಎ ವಾತೊ ಐಕೊ ಕ್ಹುದಾನಜರೆತನಾ ಯೆಸುನಾ ಮುಲಕ ಕರಲ ಮ್ಹೊಟಾ ಕಾಮೊ ವರಿ ಅದ್ಭುತ ಕಾಮೊನಾ ಮುಲಕ ತೆ ಚೊ಼ಕಿ ತರಾ ದೆಕಾಡಿನ ದಿದ್ಯೊಸ. ಎ ಸಂಗತಿಯೊ ತುಮೆ ಕ್ಹಾರಾ ಜ಼ನಾ ದೆಕ್ಯಾಸ. ತಿನಾಹುತಿ ಎ ಕ್ಹಾರು ಕ್ಹರಿಜ಼ ವ್ಹೈ ಕೈನ ತುಮೊನೆ ಗ್ವತ್ತ ಛೆ. 23 ಯೆಸುನೆ ತುಮೊಕನ ವಪ್ಸಾಯಾ. ತುಮೆ ಕೆಟ್ಟ ಮನಕ್ಹೊನಾ ಮದತಕ್ಹು ತಿನೆ ಶಿಲುಬಿ ಪರ ಘಾಲ್ಯಾ. ತೆನೈಸೊ ಎ ಕ್ಹಾರು ಥಾವಸ ಕವಾನು ಕ್ಹುದಾನೆ ಗ್ವತ್ತ ವ್ಹತ್ತು. ಎ ಕ್ಹುದಾನಿ ಚಿತ್ತ ವ್ಹತ್ತಿ. ಘನ್ನಾ ಟೈಮನಾ ಪಾಚೊ಼ಜ಼ ಎ ಫೈಸ್ಲೊ ಥಯಲ ವ್ಹತ್ತೊ. 24 ಯೆಸು ಮೌತನೊ ತ್ರಾಸ ಖಾದ್ಯೊ. ತೆನೈಸೊ ಕ್ಹುದಾ ತಿನೆ ಛೊಡಾಯೊ. ಕ್ಹುದಾ ಯೆಸುನೆ ಮರಲವಾಲಾವೊಮಾತೊ ಜಿವ್ತೊ ಕರಿನ ಉಟಾಡ್ಯೊ. ಮೌತನೆಬಿ ಯೆಸುನೆ ಧರಲಿವಾನೆ ಥಯು ನೈ.

25 ದಾವಿದ ಯೆಸುನಾ ವಿಷಯನಾ ಹುತಿ ಅಮ್ಮ ಕದ್ಯೊಸ ಕರ್ತಾ ಹಮೆಶಾಬಿ ಮಾರಾಖಾತೆ ಛೆ ಮಿ ಕೆಳೆಜ ಪಡು ನೈಕೈನ ತೆ ಮಾರಾ ಬಾಜು಼ಮಾ ಛ.

26 ತಿನಾಹುತಿ ಮಾರಾ ಮನಸ್ಮಾ ಖುಶಿ ಥಾವಸ. ಮಾರಿ ಜಿಬ್ಬ ಕೆಳಾಮಾಬಿ ಖುಶಿಕ್ಹು ತಿನೆ ಸ್ತೊತ್ರ ಕವಸ ಮಾರು ಅಂಗ ಕೆಳಾಮಾಬಿ ನಿರಾಸೆ ನೈ ಥಾತು.

27 ಕಾಕದ್ಯಾಮ ತು ಮಾರಿ ಜಿವ ಆತ್ಮಾನೆ ಪಾತಾಳಮಾ ಛೊಡತೊ ನೈ. ತಾರಾ ಮಯಾನಾ ಆಳನೆ ಪಡೆಲ ಜ಼ಗಾ ಪಡಾನೆ ದಿನ ಕ್ಹಡಾನೆ ದಿದ್ಯೊ ನೈ.

28 ತು ಮನೆ ಜ್ಯು ಮಳಾನಿ ವಾಟ ದೆಕಾಡಿನ ದಿದ್ಯೊ ತಾರಾ ಪ್ರಸನ್ನತೆಮಾ ಕ್ಹುಶಿ ಕರೊ.

29 "ಮಾರಾ ಭಾಯೊ ಭೆನ, ಅಪ್ನೊ ಮುಲ ಪಿತೃ ಥಯಲ ದಾವಿದನಾ ವಿಷಯಮಾ ಮಿ ತುಮೊನೆ ಕ್ಹರಿಜ಼ ಕೌಸ. ತೆ ಮರಿ ಗಯೊ ವರಿ ತಿನಿ ಸಮಾದಿ ಥೈ. ತಿನಿ ಸಮಾದಿ ಅಪ್ನಾ ವಚ್ಮಾ಼ ಎ ದಿನ್ನ ಲಕ್ಕಾ ಛೆ. 30 ದಾವಿದ ಯಕ್ಕ ಪ್ರವಾದಿ ವ್ಹತ್ತೊ ವರಿ ‘ತಾರಾ ಘರನಾ ಯಕ್ಲಾನೆ ತಾರಾ ನಿಂಗತ ರಾಜೊ಼ ಕರುಸ’ ಕೈನ ಕ್ಹುದಾ ತಿನೆ ಕ್ಹಮ್ಮ ಘಾಲಿನ ವಾಗ್ದಾನ ಕರಲ ತಿನೆ ಗ್ವತ್ತ ವ್ಹತ್ತು.

31 ತೆ ಥಾವಾತಿ ಪೈಲಾಜ಼ ದಾವಿದನೆ ಗ್ವತ್ತ ಥಯುತು.

ತಿನಾಹುತಿ ದಾವಿದ ಮೌತಮಾತೊ ಜಿವ್ತೊ ಥಾವಾನಾ ಕ್ರಿಸ್ತನಾ ಹುತಿ ತಿನೆ ಪಾತಾಳಮಾ ಛೊಡತಾ ನೈ ತಿನು ಅಂಗ ನೈ ಕ್ಹಡತು ಕೈನ ಕದ್ಯೊ.

32 ತಿನಾಹುತಿ ಕ್ಹುದಾ ಮರಲವಾಲಾವೊಮಾತೊ ಜಿವ್ತೊ ಕರಿನ ಉಟಾಡಲ ಯೆಸುನೆಜ಼ ಅಪೆ ಕ್ಹಾರಾ ಜ಼ನಾ ಸಾಕ್ಷಿಯೊ ಥಯಾಸ. 33 ಯೆಸು ಸ್ವರ್ಗನೆ ಗಯೊ. ಹಮ್ನಾ ಯೆಸು ಕ್ಹುದಾನಾ ಕ್ಹಾತೆ ಛೆ, ಕ್ಹುದಾನಾ ಸಿದಾ ಬಗಲ ಛೆ. ಹಮ್ನಾ ಬಾ (ಕ್ಹುದಾ) ಪವಿತ್ರ ಆತ್ಮಾ ಯೆಸುನೆ ದಿದ್ಯೊಸ. ಪವಿತ್ರ ಆತ್ಮಾ ದಿವ್ಸ ಕೈನ ಕ್ಹುದಾ ವಾಗ್ದಾನ ಕರ‍್ಯೊತೊ. ತಿನಾಹುತಿ ಯೆಸು ಹಮ್ನಾ ತೆ ಆತ್ಮಾನೆ ದಿದ್ಯೊಸ. ತುಮೆ ದೆಕಾನು ವರಿ ಐಕಾನು ಆಜ ವ್ಹೈ. 34 ಸ್ವರ್ಗನೆ ಗಯಲವಾಲೊ ದಾವಿದ ನ್ಹವೈ, ಯೆಸುಜ಼ ವ್ಹೈ. ದಾವಿದಜ಼ ಇನಾ ಹುತಿ ಕವಸ, 35 ಮಿ ತಾರಾ ವಿರೊಧಿಯೊನೆ ತಾರಾ ಪಗನು ಥಳ ಕರೆಲಕ್ಕಾ ತು ಮಾರಾ ಬಾಜು಼ಮಾ ಬೈಟಶಿ ಕೈನ ಕ್ಹುದಾ ಥಯಲ ಕರ್ತಾ ಮಾರಾ ಕರ್ತಾನೆ ಕದ್ಯೊ’ ಕೈನ. 36 "ತಿನಾಹುತಿ ಯೆಹುದಿಯೊ ಕ್ಹಾರಾ ಎ ಕ್ಹರಿಬಿ ತಿಳದಿಲಿವ. ಕ್ಹುದಾ ಯೆಸುನೆ ಪ್ರಭು ಥೈನ ಕ್ರಿಸ್ತ ಥೈನ ಕರ‍್ಯೊಸ. ತುಮೆ ಶಿಲುಬಿ ಪರ ಘಾಲ್ಯಲ ಮನಕ್ಹಜ಼ ತೆ ವ್ಹೈ" 37 ಎ ಐಕಲ ಪರ ತ್ಯಾನಾ ಪುರಾ ಮನಕ್ಹೊ, ತ್ಯುನಾ ಮನಸ್ಸೊಮಾ ಮ್ಹೆಲಿದ್ಯಲವಾಲಾ ಥೈನ ಪೆತ್ರನೆ ವರಿ ತಿನಾ ಕ್ಹಾತೆ ರ‍್ಹಯಲ ಅಪೊಸ್ತಲೊನೆ "ಭಾಯೊ, ಹಮ್ನಾ ಹಮೆ ಸು ಕರು? ಕೈನ ಪುಚ್ಯಾ. 38 ಪೆತ್ರಾ ತ್ಯುನೊನೆ"ತುಮೊಮಾನೊ ಹರಯಕ್ಲೊ ತುಮಾರಾ ಪಾಪೊನಾ ಹುತಿ ಪಶ್ಚಾತಾಪ ಪಡಿನ ಕ್ಹುದಾನಾ ಬಗಲ ಫರೊ ಯೆಸು ಕ್ರಿಸ್ತನಾ ನಾಮಮಾ ಬಾಪ್ತಿಸ್ಮ ಕರೈಲಿವೊ. ತೆಳಾಮಾ ಕ್ಹುದಾ ತುಮಾರಾ ಪಾಪೊ ಮಾಫ ಕರಸ. ತೆನೈಸೊ ಕ್ಹುದಾ ವಾಗ್ದಾನ ಕರಲ ಪವಿತ್ರ ಆತ್ಮಾನೆ ವ್ಹಂದಿಲಿವೊಶಿ. 39 ತೆ ವಾಗ್ದಾನ ತುಮೊನೆ ತುಮಾರಾ ಬಚ್ಚಾ಼ವೊನೆ ದುರ ರ‍್ಹಯಲ ಮನಕ್ಹೊನೆಬಿ ದಿದಲ ಛೆ. ಅಪ್ನೊ ಕ್ಹುದಾ ಥಯಲ ಪ್ರಭು ತಿಕನ ಬಲಾವಾನಾ ಹರ ಯಕ್ಲಾನೆ ಎ ವಾಗ್ದಾನ ದಿದ್ಯೊಸ" ಕೈನ ಕದ್ಯೊ.

40 ಪೆತ್ರಾ ಹಜು಼ನ ಘನ್ನಾ ವಾತೊಕ್ಹು ತ್ಯುನೊನೆ ಹುಶಾರ ಕರಿನ"ಎ ಕೆಟ್ಟ ಸಂತತಿವಾಲಾಕ್ಹು ಚು಼ಕೈಲಿವೊ" ಕೈನ ಮಾಂಗಿಲಿದ್ಯೊ. 41 ಪೆತ್ರಾನಿ ವಾತೊನೆ ವಪ್ಪಿಲಿದ್ಯಲವಾಲಾ ಬಾಪ್ತಿಸ್ಮ ಕರೈಲಿದ್ಯಾ. ತೆ ದಿನ್ನ ತನ್ನ ಹಜಾ಼ರ ಮನಕ್ಹೊ ತ್ಯಾ ಮಳ್ಯಾತಾ.