1 ಅಪೆ ಇಟಲಿನೆ‍ ಹಡಗಾಮಾತಾ ಜೌ಼ ಕೈನ ಫೈಸ್ಲೊ ಥಯೊ. ಪೌಲಾನಾ ವರಿ ಬಿಜಾ಼ ಕೈದಿಯೊನೆ ಜುಲಿಯಸ ಕವಾಲೊ ಸೆನಾಧಿಕಾರಿ ಕೈದಾಲು ವ್ಹತ್ತೊ. ರೊಮ್ಮನೊ ಶತಾದಿಪತಿ ಥಯಲ ಜೊಲಿಯಸ ಚಕ್ರವರ್ತಿನಾ ಸೈನ್ಯಮಾ ಸೆವೆ ಕರಾಲೊ ವ್ಹತ್ತೊ. 2 ಹಮೆ ತೆ ಹಡ್ಗೊ ಚ಼ಡಿನ ತ್ಯಾಂತಾ ಚಾ಼ಲ್ಯಾ. ತೆ ಹಡ್ಗೊ ಅದ್ರಮಿತ್ತ ಗಾಮ್ತೊ ಆಯೊತೊ ವರಿ ಎಶ್ಯಾಮಾ ರ‍್ಹಯಲ ಬಿಜಾ಼ ಬಿಜಾ಼ ಗಾಮೊಯೆ ಜಾ಼ವಾನೆ ತಯ್ಯಾರ ವ್ಹತ್ತೊ. ಅರಿಸ್ತರ್ಕಬಿ ಹಮಾರಾ ಕ್ಹಾತೆ ಆಯೊ. ತೆ ಮೆಕೆದೊನಿಯಾನೆ ಮಳಲ ಥೆಸಲೊನಿಕ ಗಾಮವಾಲೊ ವ್ಹತ್ತೊ. 3 ಮರ್ನಾ ದಿನ್ನೆ ಹಮೆ ಸಿದೊನ ಗಾಮೆ ಆಯಾ. ಜೊಲಿಯಸ ಪೌಲಾನೆ ಮರಗತೊತೊ. ದೊಸ್ತೊನೆ ಗೈನ ಮಳಾನಾ ಹುತಿ ತೆ ಪೌಲಾನೆ ಅನುಮತಿ ದೆತೊತೊ. ದೊಸ್ತೊ ಪೌಲಾನೆ ಚಾ಼ಯೆ ಥಯಲ ಕ್ಹಾರುಜ಼ ದೆತಾತಾ. 4 ಹಮೆ ಸಿದೊನ ಗಾಮ್ತಾ ಚಾ಼ಲ್ಯಾ. ಹಮಾರಾ ವಿರುದ್ದ ವಾರೊ ಛುಟಲಹುತಿ ಹಮೆ ಸೈಪ್ರಸ ದ್ವಿಪನಾ ನಜಿಕ ನೌಕಾಯಾನ ಕರ‍್ಯಾ. 5 ಸಿಲಿಸಿಯಸನೆ ಪಾಂಫಿಯಾನೆ ಕ್ಹಾಮು ರ‍್ಹಯಲ ಸಮುಂದರ ದಾಟ್ಯಾ. ತೆ ಥಯಲ್ಪರ ಹಮೆ ಲುಸಿಯಾ ಪ್ರಾಂತ್ಯಮಾ ರ‍್ಹಯಲ "ಮುರ "ಕವಾನಾ ಗಾಮೆ ಆಯಾ. 6 ಅಲೆಕ್ಸಾಂಡ್ರಿಯಾತೊ ಆಯಲ ಹಡಗೊ "ಮುರ "ಮಾ ರ‍್ಹಯಲ ಸೆನಾದಿಕಾರಿ ದೆಕ್ಯೊ. ಎ ಹಡ್ಗೊ ಇಟಲಿಯೆ ಚಾ಼ಲ್ಯೊತೊ. ತಿನಹುತಿ ತೆ ಹಮೊನೆ ತೆ ಹಡಗಾಮಾ ಚ಼ಡಾಯೊ.

7 ಹಮೆ ನಿಧಕ್ಹು ಘನ್ನಾ ದಿನ್ನ ಲಕ್ಕಾ ಪ್ರಯಾಣ ಕರಾತ್ತಾ ಘನಾ ಕಷ್ಟ ಖಾತಾ ಸ್ನಿಡ ಗಾಮೆ ಮೂಟ್ಯಾ. ವಾಟ್ಮಾ ಹಜು಼ನ ಅಗಾ ಜಾ಼ವಾನೆ ಥಯು ನೈ. ತಿನಾಹುತಿ ಹಮೆ ಸಾಲ್ಮೊನೆಯ ನಜಿಕ್ಮಾ ರ‍್ಹಯಲ ಕ್ರೆಟ ದ್ವಿಪ ದಕ್ಷಿಣ ಭಾಗಮಾ ನೌಕಾಯಾನ ಕರ‍್ಯಾ. 8 ಹಮೆ ತ್ರಾಸ ಕ್ಹು ಕರಾವಳಿಮಾ ನೌಕಾಯಾನ ಕರ‍್ಯಾ. ತೆ ಥಯಲ್ಪರ ಹಮೆ ಚೊ಼ಕಿ ತರಾರೆವು ಕವಾನಾ ಜ಼ಗಾಪರ ಆಯಾ. ಲಸಾಯಾ ಗಾಮ ತಿನಾ ನಜಿಕ ವ್ಹತ್ತು.

9 ತೆನೈಸೊ ಘನ್ನೊ ವಕ್ಹತ ಥೈಗೈಯೊತೊ. ಹಮ್ನಾ ನೌಕಾಯಾನ ಕರಾನು ಘನ್ನು ಖತರ್ನಾಕ ವ್ಹತ್ತು. ಕಾಕದ್ಯಾಮ ಯೆಹುದಿಯೊನು ಉಪವಾಸನೊ ದಿನ್ನ ತೆಳಾಮಾಜ಼ ಥೈಗಯೊತೊ. 10 ತಿನಾಹುತಿ ಪೌಲಾ ತ್ಯುನೊನೆ"ಮನಕ್ಹೊ, ಎ ಪ್ರಯಾಣಮಾ ಹಮೊನೆ ಘನ್ನೊ ತ್ರಾಸ ಛೆ ಕೈನ ಮನೆ ತಿಳದಾಡ್ಯುಸ. ಹಡ್ಗೊ ವರಿ ತಿಮಾರ‍್ಹಯಲ ಸಾಮನ ಹಾಳ ಥಾವಸ. ಅಪ್ನೊ ಜ಼ಲಮಬಿ ಹಾಳ ಥೈ ಜಾ಼ಸ! ಕೈನ ಹುಷಾರ ಕರ‍್ಯೊ. 11 ವರಿಬಿ ಹಡಗಾನೊ ನಾಯಕ ವರಿ ಹಡಗಾನೊ ಮಾಲಕ ಪೌಲಾ ಕದಲನೆ ವಪ್ಯಾ ನೈ. ತಿನಾಹುತಿ ಸೆನಾದಿಕಾರಿ ಪೌಲಾನಿ ವಾತ ಐಕ್ಯಾವಾಚಿಹಡಗಾನಾ ಮಾಲಕನಿ ವರಿ ಹಡಗಾನಾ ನಾಯಕನಿ ವಾತ ಐಕ್ಯೊ. 12 ತೆ ರೆವು ಥಂಡಾನಾ ದಿನೊಮಾ ಹುಬ್ರವಾನೆ ಚೊ಼ಕಿ ನ್ಹೊತಿ. ತಿನಾಹುತಿ ಹಡ್ಗೊ ತ್ಯಾಂತೊ ಲಿನ ಜಾ಼ಜ಼ ಕೈನ ಘನ್ನಾ ಮನಕ್ಹೊ ಕದ್ಯಾ. ಹಮೆ ಫೆಲಿಕ್ಸನೆ ಮುಟ್ಟಿಯೆಸ ಕೈನ ತ್ಯುನಿ ಆಸ ವ್ಹತ್ತಿ. ಥಂಡನಾ ದಿನೊಮಾ ಹಡ್ಗೊ ತ್ಯಾ ರ‍್ಹವಾನು ವ್ಹತ್ತು. ಫೆನಿಕ್ಸ ಕ್ರೆಟ ದ್ವಿಪನು ಬಂದರ ತೆ ವ್ಹಂದ್ಯುತು. ಇಶ್ಯಾನನಾ ದಿಕ್ಕನೆ ಆಗ್ನೆಯಾ ದಿಕ್ಕನೆ ಕ್ಹಾಮು ರ‍್ಹಯಲ ಮ್ಹೊಡು ಕರಿನ ವ್ಹತ್ತು.

13 ತೆ ಥಯಲ್ಪರ ಚೊ಼ಕೊ ವಾರೊ ದಕ್ಷಿಣ ಬಗಲ್ತಾ ಛುಟಾನು ಚಾಲು ಥಯೊತೊ. ಹಡಗಾಮಾ ರ‍್ಹಯಲ ಮನಕ್ಹೊ, ಅಪೊನೆ ಚಾ಼ಯೆ ಥಯಲ ಎಜ಼ ವಾರೊ ವ್ಹೈ, ಹಮ್ನಾ ತೆ ಹಮೊನೆ ಮಳ್ಯೊ! ಕೈನ ವಿಚಾರ ಕರ್ಲಿದ್ಯಾ. ತಿನಾ ಹುತಿ ತ್ಯುನೆ ಹಡಗಾನಾ ಲಂಗತ ಉಪ್ಪರ ಯಳದ್ಯಾ. ಹಮೆ ಕ್ರೆಟ ದ್ವಿಪನಾ ಕರಾವಾಳಿಮಾ ನೌಕಾಯಾನ ಕರ‍್ಯಾ. 14 ತೆನೈಸೊ ಇಶಾನ್ಯ ಮಾರುತ ಕವಾನಿಬಿರುಗಾಳಿ ದ್ವಿಪಮಾ ಛುಟ್ಯೊ. 15 ಹಡ್ಗಗಾನೆಬಿ ಲಾಗ್ಯು ಹಡ್ಗೊ ತಿನಾ ವಿರುದ್ದ ಜಾ಼ವಾನೆ ಥಯು ನೈ. ತಿನಾ ಹುತಿ ವಾರೊ ಐನ ಹಮ್ಮಾರಾ ಹಡ್ಗೊ ಲಿನ ಗಯಾ. 16 ಅಪೆ "ಕಾವ್ದ "ಕವಾನಿ ದ್ವಿಪ ಮೆರೆಮಾತಾ ಗಯಾ ತೆಳಾಮಾ ಅಪೆ ಹಡಗಾಮಾ ರಯೆಲ ನ್ಹಾನಿ ದ್ವಿಪ ಲಿವಾನಾಹುತಿ ಹಮೊನೊಕ್ಹು ಥೈಯು ನೈ. 17 ತೆಳಾಮಾ ಡೊಣಿಮ್ಮಾ ತುಟು ನೈ ಕೈನ ಹಡಗಮ್ಮಾ ಸುತೆ ರಾಕ್ಹೊ ಭಾಂದಿನ. ತೆಳಾಮಾ ಸುರ್ತಿಸ ಕವಾನು ಕಳ್ಳುಸುಬಿಮ್ಮಾ ಹಡಗೊ ಕಿಲಗಾ ಅಟಕೆಲ ಕೈನ ತ್ಯುನೊನೆ ಬುಚುಕ ವಾಟ್ಯು. ತಿನಾಹುತಿ ತ್ಯುನೆ ಪ್ಹಡಕಾನೆ ಉತರಾಡಿನ ಡೊಣಿನೆ ಲಾಗಿನ ಜಾ಼ವಾನೆ ವಾರಾನೆ ಮೌಕೊ ಕರಿನ ದಿದ್ಯಾ. 18 ಬಿರುಗಾಳಿ ವರಿ ಪಾನಿ ಹಮನೊನೆ ಜೊ಼ರಕ್ಹು ಚ್ಹುಟಾಕ್ಹು ಮನಕ್ಹೊ ಹಡಗಮ್ಮಾ ದಕ್ಹಜ಼ನಾ ಸಾಮಾನೊ ಒಗದಿಪಡ್ಯಾ. ತುಫಾನಮಾ ಫುಟಿಗಯಲ ಹಡ್ಗೊ 19 ತಿನಾ ಮೆರ್ನಾ ದಿನ ಥಯಲ ಪರ ಹಡಗನಾ ಸಾಮಾನೊ ತ್ಯುನಾ ಹತೊಕ್ಹು ನಾಕಿ ಪಡ್ಯಾ. 20 ಘನ್ನಾ ದಿನೊಪರ ಹಮೆ ಸುರ್ಯನೆ ಥಾವಾದೆ ನಕ್ಷತ್ರವೊನೆ ಥಾವಾದೆ ದೆಕ್ಯಾನೈ. ಮ್ಹೊಟೊ ವಾರ‍್ಯೊ ಭಿಕರ ಥಯೊತೊ. ಹಮೆ ಜ಼ಲಮ್ಮಕ್ಹು ವಾಚು ಕೈನ ನಿರಿಕ್ಷೆ ಜುನೈ ಗೈ.

21 ತೆ ಮನಕ್ಹೊ ಗನಾದಿನ ತಕ್ಕ ಕ್ಹಾದ್ಯಾ ನ್ಹೊತ್ತಾ. ತೆಳಾಮಾ ಯಕ್ಕ ದಿನ್ನ ಪೌಲಾ ಉಟಿನ ಹುಬರೈನ ತ್ಯುನೊನೆ ಮನಕ್ಹೊ ಕ್ರೆಟ ದ್ವಿಪಕಂತ್ತಾ ನಕೊ ಜಾವೊ ಕೈನ ಮಿ ತಮನೊನೆ ಕದ್ಯೊ. ತಮೆ ಮಾರಿ ವಾತ್ತ ಐಕಾನು ವ್ಹತ್ತು. ತೆಳಾಮಾ ತಮನೊನೆ ದುಖ ರ‍್ಹವಾದೆ ಲುಕ್ಸಾನ ರ‍್ಹವಾದೆ ನೈ ಆತುತು. 22 ಹಮ್ನಾ ತಬಿ ತುಮೆ ಧೈರ್ಯಕ್ಹು ರ‍್ಹೈ ಕೈನ ತಮನೊನೆ ಕವಾಡೊಸ. ತಮನೊಮ್ಮಾ ಯಕ್ಲೊಬಿ ನೈ ಮರತೊ. ತೆನೈಸೊ ಹಡ್ಗೊ ಹಾಳ ಥೈನ ಜಾ಼ವಸ. 23 ಕಾಕದ್ಯಾಮ ಮಿ ಕಿನೊ ವ್ಹೈ ಕೈನ, ಕಿನೆ ಸ್ತುತಿ ಕರಶಿ ತೆ ಕ್ಹುದಾಕ್ಹು ಆಯೆಲ ಯಕ್ಕ ದುತ ಗಯೆಲ ರಾತ್ತಮ್ಮಾ ಮಾರಾಕ್ಹಾತೆ ಹುಬರೈನ 24 ಪೌಲಾ ಬುಚಕು ನಕೊ ತು ಕೈಸರನಾ ಕ್ಹಾಮೊ ಹುಬರೌ ತೆನೈಸೊ ತಾರಾ ಕ್ಹಾತೆ ತೆ ಹಡಗಮ್ಮಾ ಪ್ರಯಾಣ ಕರಾವಾ ವಾಲಾವೊನೆ ಜ಼ಲಮ್ಮ ಕ್ಹುದಾ ತುಪರ ರ‍್ಹಯಲ ಮರಗಾ ಕ್ಹು ವಚಾಡ್ಯೊಸ ಕೈನ ಮಾರಾ ಕ್ಹಾತೆ ಬೊಲ್ಯೊ. 25 ತಿನಾಹುತಿ, ಮನಕ್ಹೊ ಧೈರ್ಯಕ್ಹು ರವೊ ಮನೆ ಕದಲ ನಿಂಗತ ಥಾವಸ ಕೈನ ಕ್ಹುದಾನೆ ನಂಬೆಸೊ. 26 ತಿನಾಹುತಿ, ಮಿ ಕೈಜ಼ ಯಕ್ಕ ದ್ವಿಪನಿ ದಂಡಿ ಮುಟು ಕೈನ ಕದ್ಯೊ"

27 ಚ಼ೌದಾ ರಾತ್ತೊ ರಾತೆ ಹಮೆ ಆದ್ರಿಯ ಸಮುಂದರಮಾ ಹೈತಾ ತಿತಾ ಹಲ್ತಾ ಅಗಾ ಬಡ್ಯಾ. ಹಮೆ ಜಿಮಿನ್ನಾ ನಜಿಕ ವ್ಹತ್ತಾ ಕೈನ ಹಡಗಾಮಾ ರ‍್ಹಯಲವಾಲಾ ವಿಚಾರ ಕರ‍್ಯಾ. 28 ತ್ಯುನೆ ಅಳತಿ ಕರಾನು ಗುಂಡ ರಾಕ್ಹನಾ ತುದಿಯೆ ಭಾಂದಿನ ರಾಕ್ಹ ಪಾನಿಮಾ ಘಲಿನ ಪಾನಿ ಕ್ಹೊನ ಇಕ್ಹ ಅಡಿ ಉಂಡು ವ್ಹತ್ತು. ತ್ಯುನೆ ವರಿ ನಕ್ಕರ ದುರ ಗೈನ ರಾಕ್ಹ ಪಾನಿಮಾ ಗಾಲಿನ ತ್ಯಾ ಪಾನಿ ನವ್ವದ ಅಡಿ ಉಂಡು ವ್ಹತ್ತು. 29 ಹಡ್ಗೊ ದಗ್ಡಾನೆ ಲಾಗ್ಸ ಕೈನ ಹಡ್ಗೊ ಚಹಲಾವಾಲಾ ಭುಚ಼ಕ್ಯಾ. ತಿನಾಹುತಿ ತ್ಯುನೆ ಚಾರ ಲಂಗುರು ಪಾನಿಮಾ ಉತಾರ‍್ಯಾ. ತೆ ಥಯಲ್ಪರ ತ್ಯುನೆ ದಿನ್ನ ನಿಕ್ಹಳಾದೆ ಕೈನ ಪ್ರಾಥನಾ ಕರ‍್ಯಾ. 30 ಯಕ್ಕ ಸಲಾ ಹಡ್ಗೊ ಚ಼ಲಾವಾಲಾ ತೆ ದಕ್ಹಾಜ಼಼ನಾ ತೆ ಹಡ್ಗೊ ಛೊಡಿನ ಜೌ಼ ಕೈನ ಕೈಲಿವಾಡ್ಯಾತಾ. ತ್ಯುನೆ ಹಡಗೊ ಪಾನಿಮಾ ಉತಾರಿನ ಹಡಗಾನಾ ಕ್ಹಾಮಲ್ಯಾ ಹಿಸ್ಸಾಮಾ ಹಜು಼ನ ದಕ್ಹಾ ಲಂಗುರೊ ಪಾನಿಮಾ ಉತಾರಾನಾ ನಿಂಗತ ನಾಟಕ ಕರ‍್ಯಾ. 31 ತೆ ಲಾಮಾ ಪೌಲಾ ಶತಾದಿಪತಿನೆ ವರಿ ಸಿಪಾಯಿಯೊನೆ; ತ್ಯುನೆ ಹಡಗಾಮಾ ಉಗರ‍್ಯಾಮ್ಮಾ ತುಮಾರು ಜ಼ಲಮ್ಮ ನೈ ವಾಚತು ಕೈನ ಕದ್ಯೊ. 32 ತೆಳಾಮಾ ಸಿಪಾಯಿಯೊ ಹಡಗನಾ ರಾಕ್ಹೊ ಕಟ್ಟ ಕರಿನ ತೆ ಪಡಿನ ಜೌವರಕ್ಹು ಕರ‍್ಯಾ.

33 ಪಾಟ ಥಾತಾಟೆಮ್ಮಾ ಪೌಲಾ ಸುಬಿ ಕ್ಹಾವಾನೆ ಲ್ಯು ಕೈನ ಕ್ಹಾರಾವೊನೆ ಮಾಂಗಿಲೆತೊ. ಹಮನಾತೊ ತಮೆ ಚ಼ೌದಾ ದಿನತ್ತಾ ಕೈದಿನ ಕ್ಹಾವಾನೆ ಲಿದೆವಾಚಿ ಬುಖಾಜ಼ ವ್ಹತ್ತಾ. 34 ತಿನಾಹುತಿ, ಕ್ಹಾವಾನೆ ಸುಬಿ ಲ್ಯುಕೈನ ತಮನೊನೆ ಮಾಂಗಿಲ್ಯುಸ. ತೆ ತಮನೊನೆ ಜ಼ಲಮನೆ ಜ಼ರುರತ ಛೆ. ತಮಾರಾಮ್ಮಾ ಕುನಜ ಮಾತ್ತಾಮಾತು ಯಕ್ಕ ಬಾಲಬಿ ನೈ ಉದರತ್ತು ಕೈನ ಕದ್ಯೊ. 35 ಅಮ್ಮ ಕೈನ ಪೌಲಾ ರೊಕ್ಲೊ ಲಿನ ಕ್ಹಾರಾವೊನಾ ಕ್ಹಾಮೊ ಕ್ಹುದಾನೆ ಸ್ತೊತ್ರ ಕರಿನ ತೆ ತೊಡಿನ ಕ್ಹಾವಾನು ಶುರು ಕರ‍್ಯೊ. 36 ತೆಳಾಮಾ ಕ್ಹಾರಾ ಜ಼ನಾ ಧೈರ್ಯ ಕರಲಿನ, ತ್ಯುನೆಬಿ ಅನ್ನ ಕ್ಹಾದ್ಯಾ. 37 ತೆಳಾಮಾ ಹಡಗಮ್ಮಾ ರಹೆಲವಾಲಾ ಹಮೆ ಕ್ಹಾರಾಜ಼ನಾ ಬೆಕ್ಹೊನ ಸತ್ತರಪರ ಕ್ಹಾತ್ತಜ಼ನಾ ವ್ಹತ್ತಾ. 38 ಬಸಥೈಯೆಲಕುನ ಕ್ಹಾದೆಲ ಪರ, ಉಗರೆಲ ಘ್ಹೈ ಸಮುಂದರಮ್ಮಾ ನಾಕಿನ ಹಡ್ಗೊ ಹಲಕು ಕರ‍್ಯಾ.

39 ಪಾಟ ಥಯಲ ಪರ ತೆ ದೆಶನು ವಳಕ ನೈಸೊ ಉಸುಬಿನಾ ದಡ ಕವಾನು ಯಕ್ಕ ಕೊಲ್ಲಿ ದೆಕಿನ ತೆ ದಡಮ್ಮಾ ಹಡ್ಗೊ ಜಾಸ ಕೈನ ಯೊಚನೆ ಕರ‍್ಯಾ. 40 ತ್ಯುನೆ ಲಂಗುರೊ ಕಾಡಿನ ಸಮುಂದರಮ್ಮಾ ಛೊಡಿನ ಚುಕ್ಕಾಣಿನಾ ಕಟ್ಟೊ ಚ್ಹಡಿನ, ಮ್ಹೊಟಾ ಹಾಯಿಯೊ ವಾರಾನೆ ಉಟಿನ ಭಾಂದಿನ ಡೊಣಿನೆ ತೆ ದಡನೆ ಚಾ಼ಲ್ಯಾತಾ. 41 ತಿನಿಹುನಾ ಹಡ್ಗೊ ವಚಮ್ಮಾತ್ಯುನೊನೆ ಮಾತಿನಿ ವಾಟ ಮಳಾತ್ತಾಮ್ಮಾ ತೆಳಾಮಾ ಹಡ್ಗೊ ಚಡ್ಯಾ. ಕ್ಹಾಮಲ್ಯು ಭಾಗ ದಿಣ್ಣೆನೆ ಲಾಗಿನ ಹಲೆವಾಚಿ ಹುಬರೈತು. ಪಾಚಲು ಭಾಗ ಹುಚ್ಚು ಅಲೆಕ್ಹು ಮಾರಕ್ಹು ಟುಟಿನ ಚುರ ಥೈಗೈಯು.

42 ಜೆಲಮ್ಮಾನಾ ದಕ್ಹಜ಼ನಾ ಚುಕೈಲಿದ್ಯಾಸ ಕೈನ ಸಿಪಾಯಿಯೊ ತ್ಯುನೊನೆ ಮಾರು ಕೈನ ಯೊಚನೆ ಕರಾಡಾತ್ತಾ. 43 ತೆಳಾಮಾ ಶತಾದಿಪತಿ ಪೌಲಾನೆ ವಚಾಡು ಕೈನ ವಿಚಾರ ಕರಿನ ತ್ಯುನೆ ಯೊಚನೆನೆ ನೊ ಕೈನ, ಇಜತ್ತಾ ನೈ ಕೈನ ಹಡಗಮ್ಮಾತ್ತಾ ಡುಕಲಿನ ಪೈಲಾ ದಂಡಿನೆ ಜೌ ಕೈನ 44 ಅಪೆ ಕ್ಹಾರಾ ಉಗರೆಲಮ್ಮಾ ದಕ್ಹಜ಼ನಾ ಹಲಿಗ್ಯೊನಾ ಉಪ್ಪರ, ದಕ್ಹಜ಼ನಾ ಡೊನಿನಾ ತುಕಡಾಪರ ಜೌ ಕೈನ ಅಪ್ಪಣೆ ದಿದ್ಯೊ. ತೆ ರಿತಿಕ್ಹು ಕ್ಹರಾಜ಼ನಾ ಚೊ಼ಕಿ ತರಾ ದಂಡಿ ಪೊಂಚಾ.