ನೆಬುಕದ್ನೆಚ್ಚರ ರಾಜಾ಼ನಾ ನ್ಯಾಯಾಲಯನಾ ಕ್ಹಾಮಾ ಜಾಂಜಿಮಾನೊ
1 ಶನೆಬುಕದ್ನೆಚ್ಚರ ಬಾಬೆಲೊನನೊ ರಾಜೊ಼ ಥಯೊತೊ. ನೆಬುಕದ್ನೆಚ್ಚರ ಯೆರುಸಲೆಮನೆ ಆಯೊ. ನೆಬುಕದ್ನೆಚ್ಚರ ತಿನಾ ಸೆನಾನಾ ಕ್ಹಾತೆ ಯೆರುಸಲೆಮನೆ ಮುತ್ತಿಗೆ ಘಾಲ್ಯೊ. ಯೆಹುದನೊ ರಾಜೊ಼ ಥಯಲ ಯೆಹೊಯಾಕಿಮನಾ ಅದಿಕಾರನಾ ತನ್ವಾ ವರಕ್ಹಮಾ ಎ ಘಟನಾ ಥೈ. 2 ನೆಬುಕದ್ನೆಚ್ಚರ ಯೆಹುದನೊ ರಾಜೊ಼ ಥಯಲ ಯೆಹೊಯಾಕಿಮನೆ ಹರಾಡೆ ಲಿಂಗತ ಯಹೊವಾ ಕರ‍್ಯೊ. ತೆ ಆಲಯನಾ ಸಾಮನೊನೆ ಸಿನಾರ ದೆಶೆ ಲಿನ ಗಯೊ. ತೆ ಸಾಮನೊನೆ ತೆ ತಿನಾ ಮುರ್ತಿಯೊನಿ ಆಲಯಮಾ ಮ್ಹೆಲ್ಯೊ. 3 ತೆಳಾಮಾ ರಾಜೊ಼ ಥಯಲ ನೆಬುಕದ್ನೆಚ್ಚರ ಅಶ್ಪನಜನೆ ಆದೆಶ ದಿದ್ಯೊ. ಅಶ್ಪೆನಜ ರಾಜಾ಼ನಿ ಸೆವಾಮಾ ರ‍್ಹಯಲ ಕ್ಹಾರಾ ಕಂಚುಕಿಯೊನೆ ಮ್ಹೊಟೊ ವ್ಹತ್ತೊ. ರಾಜೊ಼ ದಕ್ಹಾ ಜನಾ ಇಸ್ರಾಯೆಲೊನೆ ತಿನಾ ಮಹೆಲಮಾ ಮ್ಹೆಲು ಕೈನ ಅಶ್ಪೆನಜನೆ ಕದ್ಯೊ. ನೆಬುಕದ್ನೆಚ್ಚರ ಇಸ್ರಾಯೆಲನಾ ರಾಜವಂಶಿವಾಲಿಯೊನೆ ವರಿ ಕ್ಹಾಸ ಘರ್ದಾನವಾಲಾವೊನೆ ತಿನಾ ಮಹೆಲಮಾ ಮ್ಹೆಲು ಕೈನ ಆಸ ಕರ‍್ಯೊ. 4 ರಾಜೊ಼ ಥಯಲ ನೆಬುಕದ್ನೆಚ್ಚರ ಘಟ್ಟಮುಟ್ಟ ರ‍್ಹಯಲವಾಲಾ ಅಂಗೊಮಾ ಸುಜ ಕಮ್ಮ ನೈಸೊವಾಲಾ ಕ್ಹುಬಸುರತ ರ‍್ಹಯಲವಾಲಾ ಶಾಣ್ಯಾ ರ‍್ಹಯಲವಾಲಾ ಅಕ್ಷರೊನು ಗ್ಯಾನ ರ‍್ಹಯಲವಾಲಾ ಜಾಂಜಿಮಾನೊನೆ ತಿನಾ ಸನ್ನಿಧಿನಾ ಸೆವೆನಾ ಹುತಿ ಇನಿಲಿನ ತ್ಯುನೊನೆ ಕಸ್ದಿಯ ಬಾಷಾನಿ ಲಿಕ್ಹಾವಟ ಶಿಕಲೌ ಕೈನ ಆಗನ್ಯಾ ದಿದ್ಯೊ. 5 ರಾಜೊ಼ ಥಯಲ ನೆಬುಕದ್ನೆಚ್ಚರ ದಿನ್ನೆ ತೆ ಶಾಣ್ಯಾ ರ‍್ಹಯಲವಾಲಾವೊನೆ ತೆ ಖಾವಾನು ಅನ್ನ ವರಿ ದ್ರಾಕ್ಷಿಯೊನು ರಕ್ಹ ದೆತೊತೊ. ತ್ಯುನೊನೆ ತಿನಾ ಸೆವಕೊ ಕರಿಲಿವಾನಾ ಉದ್ದೆಶಕ್ಹು ತನ್ನ ವರಕ್ಹನಿ ತರಬೆತಿ ದಿವ ಕೈನ ಅಗನ್ಯಾ ದಿದ್ಯೊ. ತನ್ನ ವರಕ್ಹ ಥಯಲ್ಪರ ತ್ಯುನೆ ರಾಜಾ಼ನಾ ಕ್ಹಾಮಾ ಹಾಜರ ಥಾವಾನು ವ್ಹತ್ತು. 6 ತೆ ಶಾಣ್ಯಾವೊಮಾ ಯೆಹುದ ಕುಲನಾ ದಾನಿಯಲ, ಹನನ್ಯ, ಮಿಶಾಯೆಲ, ಅಜರ್ಯ ಕವಾಲಾ ಯೆಹುದಿವಾಲಾ ವ್ಹತ್ತಾ. 7 ಹಿಜ಼ಡಾವೊಮಾನೊ ಮ್ಹೊಟೊ ತೆ ಯೆಹುದ್ಯನಾ ಶಾಣ್ಯಾವೊನೆ ಬಾಬಿಲೊನನಾ ನಾಮೊ ಮ್ಹೆಲ್ಯೊ. ದಾನಿಯಲನೆ ಬೆಲ್ತೆಶಚ್ಚರ ಕೈನ, ಹನನ್ಯನೆ ಶದ್ರಕ, ಮಿಶಾಯೆಲನೆ ಮೆಶಕ ವರಿ ಅಜರ್ಯನೆ ಅಬೆದ್ನೆಗೊ ಕೈನ ನವಾ ನಾಮೊ ಮ್ಹೆಲ್ಯೊ. 8 ತೆನೈಸೊ ದಾನಿಯಲ ರಾಜಾ಼ನೆ ಸಲಹಾ ದಿವಾಲೊ ಅನ್ನನೆ ವರಿ ಪಿವಾನೆ ರ‍್ಹಯಲನೆ ನಿರ್ಧಾರ ಕರ‍್ಯೊ. ತಿಕ್ಹು ಕ್ಹುದ್ದನೆ ಅಶುದ್ದ ಕರಿಲಿವಾನೆ ದಾನಿಯಲನೆ ಪಸಂದ ನ್ಹೊತು ತಿನಾಹುತಿ ಇನಾ ಲಿಂಗತ ಕ್ಹುದ್ದನೆ ಅಶುದ್ದ ಕರಿಲಿದ್ಯಾ ಬಗರ ರ‍್ಹವಾನೆ ಅಶ್ಪೆನಜಕನ ಮಾಂಗಿಲಿದ್ಯೊ. 9 ಕ್ಹುದಾ ಕಂಚುಕಿಯನಾ ಮ್ಹೊಟಾನಾ ಮನಸಮಾ ದಾನಿಯಲನಾ ಉಪ್ಪರ ಮರ್ಗಾ ದಯಾ ಹುಟ್ಸಾಯೊ. 10 ತೆನೈಸೊ ಅಶ್ಪೆನಜ ದಾನಿಯಲನೆ, ‘ಮಿ ಮಾರಾ ಮಾಲಕ ಥಯಲ ರಾಜಾ಼ನೆ ಭುಚ್ಕುಸ. ಎ ಅನ್ನ ವರಿ ಪಿವಾನು ಕ್ಹಾರು ತುನೆ ದ್ಯು ಕೈನ ರಾಜೊ಼ ಅಪ್ಪಣೆ ದಿದ್ಯೊಸ. ತು ಎ ಅನ್ನ ನೈ ಲಿದ್ಯೊಮ ತಾಕತ ನೈಸೊ ಥೈನಬಿ ಅರಾಮ ನೈಸೊ ಥೈನಬಿ ದಿಕ್ಹಶಿ. ತು ತಾರಾ ವಾರ್ಗಿನಾ ಬಿಜಾ ಶಾಣ್ಯಾವೊತಿಬಿ ಕಮಜೊರ ಥೈನ ದಿಕ್ಹಶಿ. ರಾಜೊ಼ ಎ ದೆಕಿನ ಮಾರಾ ಉಪ್ಪರ ಶಿಟ್ಟ ಥೈನ ಮಾರಿ ಗರ್ದನಜ ಕಾಟಾ ಲಗಾಡಿ ಪಡಸ. ತಿನೆ ತುಜ ಕಾರಣ ಥಾಶಿ" ಕದ್ಯೊ. 11 ತೆಳಾಮಾ ದಾನಿಯಲ ತಿನೆ ಕೈದಾಲಾವೊನಾ ಕ್ಹಾತೆ ಬೊಲಿಲಿದ್ಯೊ. ಅಶ್ಪೆನಜ ಕೈದಾಲಾವೊನೆ ದಾನಿಯಲ, ಹನನ್ಯ, ಮಿಶಾಯೆಲ, ಅಜರ್ಯ ಇವ್ನಾ ಉಪ್ಪರ ಡೊಳಾ ಮ್ಹೆಲೊ ಕೈನ ಆಗನ್ಯಾ ದಿದ್ಯೊ. 12 ದಾನಿಯಲ ಕೈದಾಲಾವೊನೆ, ‘ದಯಾ ಕರಿನ ದಕ್ಹ ದಿನ್ನ ಲಕ್ಕಾ ಹಮೊನೆ ಪರಿಕ್ಷಾ ಕರೊ. ಖಾವಾನೆ ತರಕಾರಿ, ಪಿವಾನೆ ಪಾನಿ, ಎ ಛೊಡಿನ ಹಮೊನೆ ಸುಜ಼ ದಿವೊ ನಕೊ. 13 ಪಾಚ಼ಲ್ತಾ ದಕ್ಹ ದಿನ್ನ ಥಯಲ್ಪರ ಹಮೊನೆ ರಾಜಾ಼ನು ಅನ್ನ ವರಿ ಪಿವಾನು ಲಿವಾಲಾ ಶಾಣ್ಯಾವೊನಾ ಕ್ಹಾತೆ ಹೊಲಿಕಿ ಕರಿನ ದೆಕೊ. ಕುನ್ನ ಜಾಸ್ತ ಘಟ್ಟಮುಟ್ಟ ದಿಕ್ಹಸ ಕವಾನು ತುಮೆಜ಼ ಪರಿಕ್ಷಾ ಕರಿನ ದೆಕೊ. ಪಾಚಲ್ತಾ ಹಮಾರಾ ವಿಶಯಮಾ ತುಮೆಜ಼ ಫೈಸಲೊ ಕರೊ. ಹಮೆ ತುಮಾರಾ ಸೆವಕೊ ಥಯಾಸ" ಕೈನ ಮಾಂಗಿಲಿದ್ಯೊ. 14 ಕೈದಾಲೊ ದಾನಿಯಲ, ಹನನ್ಯ, ಮಿಶಾಯೆಲ, ಅಜರ್ಯ ಇವ್ನೊನೆ ದಕ್ಹ ದಿನ್ನ ಲಕ್ಕಾ ಪರಿಕ್ಷಾ ಕರಾನೆ ಒಪ್ಪಿಲಿದ್ಯೊ. 15 ದಕ್ಹ ದಿನ್ನ ಥಯಲ್ಪರ ದಾನಿಯಲ ವರಿ ತಿನಾ ದೊಸ್ತೊ ರಾಜಾ಼ನು ಅನ್ನ ಖೈನ ರ‍್ಹಯಲವಾಲಾ ಬಿಜಾ಼ ಕ್ಹಾರಾ ಶಾಣ್ಯಾವೊತಿಬಿ ಘಟ್ಟಮುಟ್ಟ ದಿಕ್ಹ್ಯಾ. 16 ತಿನಾಹುತಿ ಕೈದಾಲೊ ರಾಜಾ಼ನು ಕ್ಹಾಸ ಅನ್ನ ವರಿ ದ್ರಾಕ್ಷಿಯೊನು ರಕ್ಹ ಲಿನ ತಿನಾ ಬದಲ ತ್ಯುನೊನೆ ತರಕಾರಿ ದಿವಾನು ಶುರು ಕರ‍್ಯೊ. 17 ಕ್ಹುದಾ ತೆ ಚಾ಼ರೆ ಜಾಂಜಿಮಾನೊನೆ ಘನ್ನಾ ಶಾಸ್ತ್ರೊ, ವಿಜ್ಞಾನ ಶಿಕಾನು ಗ್ಯಾನ ದಿದ್ಯೊ. ದಾನಿಯಲ ಪುರಾ ಕ್ಹಪನೊ ದಿವ್ಯ ದರ್ಶನೊ ತಿಳ್ದಿಲಿವಾಲೊ ಥಯೊತೊ. 18 ಕ್ಹಾರಾ ಶಾಣ್ಯಾ ತನ್ನ ವರಕ್ಹ ತರಬೆತಿ ಲಿವ ಕೈನ ರಾಜೊ಼ ಕದ್ಯೊತೊ. ತೆ ಟೈಮ ಕ್ಹರಲ್ಪರ ಅಶ್ಪೆನಜ ತೆ ಕ್ಹಾರಾ ಶಾಣ್ಯಾವೊನೆ ರಾಜೊ಼ ಥಯಲ ನೆಬುಕದ್ನೆಚ್ಚರನಾ ಕ್ಹಾಮೊ ಬಲಾಯೊ. 19 ರಾಜೊ಼ ತ್ಯುನಾ ಕ್ಹಾತೆ ಬೊಲ್ತಾಮಾ ರಾಜಾ಼ನೆ ದಾನಿಯಲ, ಹನನ್ಯ, ಮಿಶಾಯೆಲ, ಅಜರ್ಯ ಇವ್ನಾಯೆಕ್ಲಾ ಯೊಗ್ಯ ಥಯಲವಾಲಾ ತೆ ಕ್ಹಾರಾ ಜಾಂಜಿಮಾನೊಮಾ ಬಿಜಾ಼ ಕುನ್ನಜ಼ ದಿಕ್ಹಿನ ಆಯಾ ನೈ. ತಿನಾಹುತಿ ತೆ ಚಾರೆ ಜ಼ನಾ ಜಾಂಜಿಮಾನೊ ರಾಜಾ಼ನಾ ಸನ್ನಿದಿನಾ ಸೆವಕೊ ಥಯಾ. 20 ರಾಜೊ಼ ಕ್ಹಾಸ ರ‍್ಹಯಲ ವಿಶಯೊನಾಹುತಿ ತ್ಯುನೊನೆ ಪುಚ್ಚಲ ಟೈಮಮಾ ತ್ಯುನೆ ಘನ್ನಿ ಹುಶಾರಕಿಕ್ಹು, ಗ್ಯಾನ ದೆಕಾಡ್ಯಾ. ತ್ಯುನೆ ಪುರಾ ದೆಶನಾ ಕ್ಹಾರಾ ಜೊಯಿಸತೊಬಿ ಮಂತ್ರವಾದಿಯೊತಿಬಿ ದಕ್ಹಯಕ್ಲಾ ಶಾಣ್ಯಾ ಛೆ ಕವಾನು ರಾಜೊ಼ ತಿಳ್ದಿಲಿದ್ಯೊ. 21 ದಾನಿಯಲ ರಾಜೊ಼ ಥಯಲ ಕೊರೆಶ ಆಳ್ವಿಕೆನಿ ಪಸ್ಟ ವರಕ್ಹಲಕ್ಕಾ ರಾಜಾ಼ನಿ ಸನ್ನಿದಿನೊ ಸೆವಕ ಥೈನ ವ್ಹತ್ತೊ.