1 ತೆ ಕುಲೊನಾ ನಾಮೊ ಅಮ್ಮ ಛೆ ದೆಶನು ಉತ್ತರಮಾ ಹಮಾತ ಗಡಿನಾ ನಜಿಕ ದಾನಿನೆ ಯಕ್ಕ ಪಾಲ, ತಿನಾ ಉತ್ತರನು ಗಡಿನ ಹೆತ್ಲೊನನು ವಾಟನಾ ಬಾಜು಼ಮಾ ಗೈನ ಹಮಾತಿನಾ ವಾಟ ದಾಟಿನ ದಮಸ್ಕನಿ ಗಡಿಮಾ ರ‍್ಹಯಲ ಹಚರ ಎನಾನಲಕ್ಕಾ ಫೈಲಸ. 2 ದಾನಿನನು ದಿಕ್ಕನಾ ಗಡಿನಾ ಬಾಜು಼ಮಾ ಪುರ್ವತಾ ಪಶ್ಚಿಮಲಕ್ಕಾ ಆಶೆರನೆ ಯಕ್ಕ ಪಾಲ. 3 ದಾನಿನನಾ ಸರಹದ್ದನಾ ಬಾಜು಼ಮಾ ಪುರ್ವತು ಪಶ್ಚಿಮಲಕ್ಕಾ ನಫ್ತಾಲಿನೆ ಯಕ್ಕ ಪಾಲ. 4 ನಫ್ತಾಲಿನಾ ಗಡಿನಾ ಬಾಜು಼ಮಾ ರ‍್ಹಯಲ ಪುರ್ವತೊ ಪಶ್ಚಿಮಲಕ್ಕಾ ಮನಸ್ಸೆನೆ ಯಕ್ಕ ಪಾಲ. 5 ಮನಸ್ಸೆ ಗಡಿನಾ ಬಾಜು಼ಮಾ ಪುರ್ವತೊ ಪಶ್ಚಿಮಲಕ್ಕಾ ಎಫ್ರಾಯಿಮನೆ ಯಕ್ಕ ಪಾಲ. 6 ಎಫ್ರಯಿಮಗಡಿನಾ ಬಾಜು಼ಮಾ ಪುರ್ವತು ಪಶ್ಚಿಮಲಕ್ಕಾ ರೊಬೆನನೆ ಯಕ್ಕ ಪಾಲ. 7 ರೊಬೆನ ಗಡಿನಾ ಬಾಜು಼ಮಾ ಪುರ್ವತಾ ಪಶ್ಚಿಮಲಕ್ಕಾ ಯುದನೆ ಯಕ್ಕ ಪಾಲ. 8 ಯುದನು ಗಡಿನಾ ಬಾಜು಼ಮಾ ಪುರ್ವತಾ ಪಶ್ಚಿಮಾಲಕ್ಕಾ ತುಮೆ ಮಿಸಲ ಥಯಲ ಸಮರ್ಪಿಸುವಾನು ಪಾಲ ರ‍್ಹವಸ. ತಿನು ರುಂದ ಕ್ಹಡಾ ಬಾರಾ ಹಜಾ಼ರಾ ಹತೊ ಲಾಂಬಾಮಾ ಪಶ್ಚಿಮತಾ ಪುರ್ವನೆ ಕುಲಾನಾ ಪಾಲೊ ಲಾಂಬಾಮಾ ಸರಿಸಮಾನ; ತಿನಾ ವಚ್ಮಾ಼ ಪವಿತ್ರ ಆಲಯ ರ‍್ಹವಸ 9 ತುಮೆ ಮಿಸಲ ಭುಮಿಮಾ ಕ್ಹುದಾನೆ ಕ್ಹಾಸ ಮಿಸಲ ಥಯಲ ಸಮರ್ಪಿಸಾನು ಪಾಲನು ಲಾಂಬು ಕ್ಹಡಾ ಬಾರಾ ಹಜಾ಼ರ ಹತೊ ವ್ಹತಾ. 10 ಮಿಸಲ ಥಯಲ ಪವಿತ್ರ ಜ಼ಗಾ ಯಾಜೊಕೊನು ವ್ಹೈ.ಉತ್ತರಮಾ ತೆ ಲಾಂಬಾಮಾ ಪಾಂಚ಼ ಹಜಾ಼ರ ಹತೊ. ಪುರ್ವಮಾ ಅಗಲಮಾ ಕ್ಹಡಾ ಬಾರಾ ಹಜಾ಼ರ ಹತೊ ವ್ಹತಾ. ಉತ್ತರಮಾ ಕ್ಹಡಾ ಬಾರಾ ಹಜಾ಼ರ ಹತೊ ವ್ಹತಾ. ತಿನಾ ವಚ್ಮಾ಼ ಯಹೊವಾನಿ ಪವಿತ್ರ ಆಯಲ ರ‍್ಹವಸ. 11 ತೆ ಕ್ಷೆತ್ರ ಚಾದಕೊನಾ ಸಂತಾನೊಮಾ ಮಾರಾಹುತಿ ಮಿಸಲ ರ‍್ಹಯಲ ವರಿ ಮಾರಿ ಆಲಯನಿ ದೆಕ್ರಾಣಕಿ ಪುರಾಕರಾಲಾ ಥಯಲ ತ್ಯುನು ರ‍್ಹವಸ. ಇಸ್ರಾಯಲೊ ಮನೆ ತಿರಸ್ಕಾರ ಕರ್ತಾಮಾ ಲೆವಿಯೊ ತಿರಸ್ಕಾರ ಕರಲನಿಂಗತ ಇವ್ನೆ ತಿರಸ್ಕಾರ ಕರ್ಯಾನೈ. 12 ಲೆವಿಯೊನಾ ಪಾಲನಾ ಗಡಿನಾ ಬಾಜು಼ಮಾ ರ‍್ಹಯಲ ತೆ ಜ಼ಗಾ ಪವಿತ್ರ ದೆಶಮಾ ರ‍್ಹಯಲ ಮಿಸಲ ಥೈನ ಯಾಜಕೊ ರ‍್ಹವಸ. ಎ ಕ್ಹಾಸ ರ‍್ಹಯಲ ಜಗಾ ವ್ಹೈ. 13 ವರಿ ದಕ್ಹ ಹಜಾ಼ರ ಹತೊ ಲಾಂಬಾಮಾ ವರಿ ಪಾಂಚ಼಼ ಹಜಾ಼ರ ಹತೊ ಅಗಲನು ಯಕ್ಕ ಪಾಲ ಯಾಜಕೊನಾ ಪಾಲನು ಗಡಿನಾ ಬಾಜು಼ಮಾ ರ‍್ಹಯಲ ಲೆವಿಯೊನು ವ್ಹೈ. ಎ ಭಂಬಿ ಪಾಲೊ ವಟ್ಟ ಅಳತಿ ಕೆಕ್ಲು ಕದ್ಯಾಮ ಲಾಂಬಾಮಾ ಕ್ಹಡಾ ಬಾರಾ ಹತೊ ವರಿ ಅಗಲ ದಕ್ಹ ಹಜಾ಼ರ ಹತೊ ವ್ಹೈ. 14 ತಿನಾಹುತಿ ತೆ ಕ್ಷೆತ್ರ ಯಹೊವಾನೆ ಮಿಸಲ ರ‍್ಹಯಲ ಹುತಿ ತಿಮಾನು ಕಯುಜ಼ ಭಗ ಇಕ್ಕೊ ನೈ. ವರಿ ಬದಲಿಬಿ ಕರುನೈ. ವರಿ ತೆ ಕಿನಾಜ ಶಮಾ ಥೌ ನೈ. 15 ಕ್ಹಡಾ ಬಾರಾ ಹತೊ ಲಾಂಬಾಮಾ ರ‍್ಹಯಲ ತೆ ಕ್ಷೆತ್ರನಾ ಬಾಜು಼ಮಾ ಮಿಸಲ ಪಾಲ ವಟ್ಟಜ಼ ಅಳತಿಮಾ ಉಗ್ರಲ ಅಡಿ ಹಜಾ಼ರ ಹತೊ ಅಗಲನಿ ಭುಮಿ ಮಿಸಲ ವ್ಹೈ ಕೈನ ಗಾಮನೆ ಕದ್ಯಾಮ ಮನಕ್ಹೊನೆ ರ‍್ಹವಾನೆ ವರಿ ಸುತ್ತೆ ರ‍್ಹಯಲ ಗಾಮೊನೆ ಜು಼ದು ಕರಲ ರ‍್ಹವಾದೆ. ತೆ ಗಾಮ ತಿನಾ ವಚ್ಮಾ಼ ರ‍್ಹವಾದೆ. 16 ಗಾಮನಿ ಅಳತಿ ಅಮ್ಮ ರ‍್ಹೌ ಉತ್ತರ ಭಾಗಮಾ ಬೆ ಹಜಾ಼ರ ಅಡಿಕ್ಹೊ ಹತೊ. ಪುರ್ವ ಬಗಲ ಬೆ ಹಜಾ಼ರ ಅಡಿ ಕ್ಹೊ ಹತೊ ರ‍್ಹೌ. ವರಿ ಪಸ್ಚಿಮ ಬಗಲ ಯಕ್ಕ ಕ್ಹಾತಕ್ಹೊನ ಐವತ್ತ ಹತೊ ರ‍್ಹೌ. 17 ಗಾಮಾನಾ ಸುತ್ತೆ ಪ್ರದೆಶ ರ‍್ಹೌ. ತಿನು ಅಗಲ ಉತ್ತರಮಾ ಯಕ್ಹೊನ ಪಚ್ಚಕ್ಹ ಹತೊ ದಕ್ಷಿಣಮಾ ಯಕ್ಹೊನ ಪಚ್ಚಕ್ಹ ಹತೊ ವರಿ ಪುರ್ವಾಮಾ ಯಕ್ಹೊನ ಪಚ್ಚಕ್ಹ ಹತೊ ವರಿ ಪಸ್ಚಿಮಮಾ ಬೆಕ್ಹೊನ ಯಕ್ಹೊನ ಪಚ್ಚಕ್ಹ ಹತೊ ರ‍್ಹೌ. 18 ಗಾಮನೆ ಛೊಡಿನ ತಿನಾ ವಳಪಟ್ಟಮಾ ಉಗ್ರಲ ಭುಮಿನು ಲಾಂಬು ಮಿಸಲ ರ‍್ಹಯಲ ಪವಿತ್ರ ಜ಼ಗಾನಾ ಬಾಜು಼ಮಾ ಪುರ್ವನಾ ಬಾಜು಼ಮಾ ಪಾಂಚ಼಼ ಹಜಾ಼ರ ಹತೊ ವರಿ ಪಶ್ಚಿಮನು ಪಾಂಚ಼಼ ಹಜಾ಼ರ ಹತೊ ರ‍್ಹೌ. ತೆ ಜಿಮಿನ ಮಿಸಲ ರ‍್ಹಯಲ ಪವಿತ್ರ ಜ಼ಗಾನೆ ಅನುಸರಿಸು. ತಿನು ಉತ್ಪತ್ತಿ ತೆ ಗಾಮನಾ ಮನಕ್ಹೊನೆ ಅನ್ನ ಥಾವಸ. 19 ತ್ಯುನೆ ಇಸ್ರಾಯೆಲನಾ ಕಯಾ ಕುಲನೆ ಸೆರ್ಯಾತಾ. ಗಾಮಮಾ ರ‍್ಹಯಲವಾಲಾ ತೆ ಜಿಮಿನ ಬಿತ್ತಸ. 20 ಮಿಸಲ ರ‍್ಹಯಲ ಪುರಾ ಜ಼ಗಾನಿ ಲಾಂಬು ಕ್ಹಡಾ ಬಾರಾ ಹಜಾ಼ರ ಹತೊ ವರಿ ತುಮೆ ಮಿಸಲ ರ‍್ಹಯಲನೆ ಅರ್ಪಿಸಾನೆ ಪವಿತ್ರ ಜ಼ಗಾ ಗಾಮನೆ ಒಳಪಟ್ಟಿನ ಭುಮಿನೆ ಧರಿನೆ ಚೌಕ ಥೈನ ರ‍್ಹೌ. 21 ಮಿಸಲ ರ‍್ಹಯಲ ಪವಿತ್ರ ಜ಼ಗಾ ವರಿ ಗಾಮ ಒಳಪಟ್ಟಲ ಭುಮಿ ಭಂಬಿ ಬಗಲ ಉಗ್ರಲ ಭುಮಿ ಮುಖಂಡ ಪಾಲ ರ‍್ಹವಾದೆ ತೆ ಪಾಲ ಮಿಸಲ ರ‍್ಹಯಲ ಜ಼ಗಾನೆ ಪುರ್ವ ಬಗಲ ಕ್ಹಡಾ ಬಾರಾ ಹಜಾ಼ರಾ ಹತೊ ಲಾಂಬು. ತಿನಾ ಬಾಜುಮಾ ಪಶ್ಚಿಮ ಬಗಲ ಕ್ಹಡಾ ಬಾರಾ ಹಜಾ಼ರ ಹತೊ ಲಾಂಬು ತಿನಾ ಬಾಜು಼ಮಾ ಕುಲನಾ ಪಾಲ ಯಕ್ಲು ಲಾಂಬು ಥೈನ ಹಬ್ಬಸ; ತೆ ಮುಖಂಡೊ ಸೆರಲ ವ್ಹೈ. ಎ ಪವಿತ್ರ ಆಲಯ ಮಿಸಲ ರ‍್ಹಯಲ ಜಗಾನಾ ವಚ್ಮಾ ರ‍್ಹವಸ. 22 ರಾಜಾನು ಪಾಲ ರ‍್ಹಯಲ ಬೆ ಭಾಗನಾ ವಚ್ಮಾ ಉತ್ತರ ಗಡಿತು ಗಾಮ್ಮಾ ರ‍್ಹೈನ ದಕ್ಷಿಣ ಗಡಿನಾ ಲಕ್ಕಾ ಕದ್ಯಾಮ ಯುದನು ದಕ್ಷಿಣ ಗಡಿತು ಬೆನ್ಯಾಮಿನ ಗಡಿಲಕ್ಕಾ ರಾಜಾ಼ನು ಪಾಲ ರ‍್ಹವಸ.

23 ಉಗ್ರಲ ಕುಲಾನಾ ಪಾಲೆ ಕ್ರಮಾ ಸು ವೈ ಕದ್ಯಾ ಪುರ್ವತು ಪಶ್ಚಿಮಲಕ್ಕಾ ಬೆನ್ಯಾಮಿನನೆ ಯಕ್ಕ ಪಾಲ. 24 ಬೆನ್ಯಾಮಿನನಾ ಬಾಜು಼ಮಾ ಪುರ್ವತು ಪಶ್ಚಿಮಲಕ್ಕಾ ಸಿಮೊಯನನೆ ಯಕ್ಕ ಪಾಲ. 25 ಸಿಮೊಯನನಾ ಗಡಿನಾ ಬಾಜು಼ಮಾ ಪುರ್ವತೊ ಪಶ್ಚಿಮಲಕ್ಕಾ ಇಸ್ಸಾಕಾರನೆ ಯಕ್ಕ ಪಾಲ. 26 ಇಸ್ಸಾಕಾರ ಗಡಿನಾ ಬಾಜು಼ಮಾತೊ ಪುರ್ವತೊ ಪಶ್ಚಿಮಲಕ್ಕಾ ಜೆಬೊಲೊನೆ ಯಕ್ಕ ಪಾಲ. 27 ಜೆಬೊಲೊನೆನಿ ಗಡಿತೊ ಬಾಜು಼ಮಾ ರ‍್ಹಯಲ ಪುರ್ವತೊ ಪಶ್ಚಿಮಾಲಕ್ಕಾ ಗಾದ ಕವಾಲಾಕುಲನೆ ಯಕ್ಕ ಪಾಲ. 28 ಗಾದನಿ ಗಡಿ ದಕ್ಷಿಣನಿ ಗಡಿ ತಾಮಾರ್ತು ಗೈನ ಮೆರೆಬತ್ತ ಕಾದೆಶ ವಕಳೊ ದಾಟಿನ ಐಗುಪ್ತು ನ ಅಗು ನದಿನಿ ವಾಟ ಧರಿನ ಮಹಾ ಸಮುದ್ರಾನೆ ಮಳಸ. 29 ತುಮೆ ಇಸ್ರಾಯಲನಾ ಕುಲನೆ ಖುದ್ದ ತುಮೆಜ ವಾಟಿನ ದಿವಾನು ದೆಶ ಎಜ಼. ಕುಲನು ಪಾಲ ಎಜ಼ ವ್ಹೈ. ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ.

30 ಗಾಮಮಾತು ಜಾ಼ವಾನು ಅಮ್ಮ ರ‍್ಹೌ. ಉತ್ತರ ಬಗಲ ಲಾಂಬಾಮಾ ಬೆ ಹಜಾರ ಅಡಿಕ್ಹೊ ಹತೊ ಛೆ. 31 ಗಾಮನಾ ಬಾಕಲೊನೆ ಇಸ್ರಾಯಲನಾ ಕುಲೊನೊ ನಾಮೊ ರ‍್ಹವಾದೆ. ಉತ್ತರಮಾ ತನ್ನ ಬಾಕಲೊ, ಯಕ್ಕ ರುಬೆನ ಬಾಕಲ, ಬಿಜೆಕ ಯುದನು ಬಾಕಲ, ಬಿಜೆಕ ಲೆವಿಯೊನು ಬಾಕಲ. 32 ಪುರ್ವನಾ ಬಗಲನು ಲಾಂಬಾಮಾ ಬೆ ಹಜಾ಼ರ ಕ್ಹೊ ಹತೊ ಛೆ. ತಿಮಾ ತನ್ನ ಬಾಕಲೊ, ಯಕ್ಕ ಯೊಸೆಫನು ಬಾಕಲ. ಬಿಜೆಕ ಬೆನ್ಯಾಮಿನನು ಬಾಕಲ. ಬಿಜೆಕ ದಾನಿನು ಬಾಕಲ. 33 ದಕ್ಷಿಣನು ಬಗಲ ಲಾಂಬಾಮಾ ಬೆ ಹಜಾರ ಅಡಿಕ್ಹೊ ಹತೊ ತಿಮಾ ತನ್ನ ಬಾಕಲೊ ಯಕ್ಕ ಸಿಮೊಯೊನನು ಬಾಕಲ ಬಿಜೆಕ ಇಸ್ಸಾಕಾರನು ಬಾಕಲ ಬಿಜೆಕ ಜೆಬೊಲಿನು ಬಾಕಲ, 34 ಪಸ್ಚಿಮ ಗಡಿನು ಲಾಂಬು ಬೆ ಹಜಾರ ಅಡಿಕ್ಹೊ ಹತೊ ತಿಮಾ ತನ್ನ ಬಾಕಲೊ, ಯಕ್ಕ ಬಾಕಲ ಗಾದಿನು ಬಾಕಲ. ಬಿಜೆಕ ಆಶೆರನು ಬಾಕಲ, ಬಿಜೆಕ ನಫ್ತಾಲಿನು ಬಾಕಲ. 35 ಗಾಮನು ಸುತ್ತೆನು ಅಳತಿ ನೌ ಹಜಾರ ಹತೊ; ತೆ ತಯ್ಯಾರ ಕರಲ ದಿನತು ತೆ ಗಾಮನೆ ಯಹೊವಾ ಶಮಹಾ ಮತ್ಲಬ ವ್ಹೈ. ಜ಼ಗಾ ಕೈನ ನಾಮ ಥಾವಸ.