ದೆವಾಲಯಮಾನಿ ಆರಾಧನಾ
ಯಹೊವಾನಿ ಪುನರಾಗಮನ
1 ಪಾಚ಼ಲ್ತೊ ತೆ ಮನೆ ಪುರ್ವ ಬಾಕಲಕನ ಬಲೈ ಲಿನ ಗಯಲ್ಪರ, 2 ದೆಕ, ಇಸ್ರಾಯೆಲನೊ ಕ್ಹುದಾನು ತೆಜಸ್ಸ ಪುರ್ವ ವಾಟತು ಐಯು; ತಿನಿ ಅವಾಜ಼ ಪಾನಿನಾ ತುಫಾನನಾ ಅವಾಜ಼ ನಿಂಗತ ವ್ಹತ್ತು; ತಿನಾ ತೆಜಸ್ಸಕ್ಹು ಭುಮಿ ಬೆಳಗಿ. 3 ಪಸ್ಟ ಮನೆ ದಿಕ್ಹಿನ ಆಯಲ ತೆಜಸ್ಸ ನಿಂಗತ ತೆ ದಿಕ್ಹ್ಯು; ಗಾಮನೆ ಹಾಳ ಕರಾನೆ ಮಿ ಆಯಲ್ಪರ ಕೆವು ದೆಕ್ಹೊ ತೆವುಜ಼ ದೆಕ್ಯೊ; ಕೆಬಾರ್ ನದಿಕನ ಮನೆ ಥಯಲ ಅದ್ಭುತ ದರ್ಶನ ನಿಂಗತ ದರ್ಶನ ಹಮ್ನಾಬಿ ಮನೆ ಥಯು; ತಿನೆ ದೆಕಿನ ಅಡ್ಡ ಪಡ್ಯೊ. 4 ತೆಳಾಮಾ ಯೆಹೊವನಿ ತೆಜಸ್ಸ ಪುರ್ವ ಬಾಕಲನಾ ವಾಟತು ದೆವಸ್ಥಾನಮಾ ಐಯು. 5 ಕ್ಹುದಾನಿ ಆತ್ಮಾ ಮನೆ ಉಚೈನ ಮ್ಹೈನಾ ಪ್ರಾಕಾರನೆ ಲಾತಾಮಾ ಆಹಾ, ಯಹೊವಾನಿ ತೆಜಸ್ಸ ದೆವಸ್ಥಾನಮಾ ಭರಿ ಗಯುತು. 6 ತೆಳಾಮಾ ದೆವಸ್ಥಾನಮಾ ಮನೆ ಬೊಲಿ ಕವಾಲಾನಿ ಅವಾಜ಼ ಮಾರಾ ಕಾನೆ ಪಡಿ; ತೆ ಮನಕ್ಹ ಮಾರಾ ಬಾಜು಼ಮಾ ಹುಬ್ರಯೊತೊ. 7 ಬೊಲಾಲೊ ಮನೆ ಅಮ್ಮ ಕದ್ಯೊ- ನರನಾ ದಿಕ್ರಾ, ಎ ಮಾರಿ ಸಿಂಹಾಸನನಿ ಜ಼ಗಾ ವ್ಹೈ, ಮಾರಿ ಪಾದಸನ್ನಿದಿ ವ್ಹೈ; ನ್ಹ್ಯಾ ಮಿ ಇಸ್ರಾಯೆಲೊನಾ ವಚ್ಮಾ ಹಮೆಶಾ ರ‍್ಹೌಸ; ಇಸ್ರಾಯೆಲ ವಂಶವಾಲಾ ರ‍್ಹವಾದೆ ತ್ಯುನಾ ರಾಜಾ಼ ರ‍್ಹವಾದೆ ತ್ಯುನಾ ದೆವ ದ್ರೊಹಕ್ಹುಜ಼, ನಾಶ ಥಯಲ ರಾಜಾ಼ವೊನಾ ಮುರ್ದಾಕ್ಹು ಮಾರು ನಾಮ ಅಪವಿತ್ರ ಕರ್ತು ನೈ. 8 ಮಾರಾ ಹೊಚ್ಚಲ ನಿಲವುಕನ ತ್ಯುನಾ ಹೊಚಚಲ ನಿಲವು ಘಾಲ್ಲಿನ ಮಾರಾ ಘರೆಬಿ ತ್ಯುನಾ ಘರೆಬಿ ಯಕ್ಕಜ಼ ಗೊಡಿ ಥಯೆ ನಿಂಗತ ಕರಿಲಿವಾಕ್ಹು ಹಬ್ದಾ ಮಾರು ಪವಿತ್ರ ನಾಮ ಕೆಡಸ್ಯಾ; ತಿನಾಹುತಿ ಮಿ ಶಿಟ್ಟ ಥೈನ ತ್ಯುನೊನೆ ನಾಶ ಕರ‍್ಯೊ. 9 ಹಮ್ನಾತಬಿ ತ್ಯುನು ದೆವದ್ರೊಹನೆ ವರಿ ರಾಜಾ಼ವೊನಾ ಮುರ್ದಾ ಮಕ್ಹು ದುರ ಕರಾದೆ; ತೆಳಾಮಾ ಮಿ ತ್ಯುನಾ ವಚ್ಮಾ ಹಮೆಶಾ ರ‍್ಹೌಸ.
10 ಮನಕ್ಹನಾ ದಿಕ್ರಾ , ಇಸ್ರಾಯೆಲ ವಂಶವಾಲಾ ತ್ಯುನಾ ಅಪರಾದೊಕ್ಹು ಸರಮೆ ನಿಂಗತ ದೆವಾಲಯ ತ್ಯುನೊನೆ ದೆಕಾಡ; ತ್ಯುನೆ ತಿನಿ ಅಳತಿ ಕರಾದೆ. 11 ತ್ಯುನೆ ಕರಲ ಕ್ಹಾರಾ ಕೆಟ್ಟ ಕಾಮೊನೆ ಸರಮ್ಯಾಮ ತು ದೆವಸ್ಥನನಾ ರುಪನೆ ವ್ಯವಸ್ಥೆನೆ ಗಮನಾಗಮನ ನಿಯಮೊನೆ ಕ್ಹಾರಾ ರಚನಾ ವಿಧಾನನೆ ಕ್ಹಾರಾ ವಿಧಿಯೊನೆ ಕ್ಹರು ನಿರ್ಮಾಣ ರಿತಿನೆ ಕ್ಹಾರಾ ಕಟ್ಟಳೆನೆ ತ್ಯುನೊನೆ ತಿಳಸೈನ ತ್ಯುನಾ ಡೊಳಾ ಕ್ಹಾಮೊ ಲಿಕ್ಕ. 12 ಎಜ಼ ದೆವಸ್ಥಾನನು ನಿಯಮ ವ್ಹೈ; ಪರ್ವತಾಗ್ರಮಾತಿನಾ ಕ್ಹಾರಾ ಪ್ರದೆಶ ಸುತ್ತ ಮುತ್ತ ಘನ್ನು ಪರಿಶುದ್ದ ರ‍್ಹೌ. ದೆಕ, ದೆವಸ್ಥಾನನು ನಿಯಮ ಎಜ಼ ವ್ಹೈ.
ಬಲಿನೊ ಕಟ್ಟೊ
13 ಯಜ್ಞವೆದಿ ಲಾಂಬಾ ಯಕ್ಕ ಹತ್ತ ಅಳತಿನಾ ಪ್ರಕಾರ ಅಮ್ಮ ರ‍್ಹೌ (ಲಾಂಬಾ ಮಾರ ಕದ್ಯಾಮ ಮಾರಪರ ಯಕ್ಕ ಹಿಡಿಯುದ್ದ) ಹೆಟಲ್ಯಾ ಭಾಗನು ಉಚ್ಚು ಯಕ್ಕ ಹತ್ತ ವ್ಹತು, ಉಪ್ಪರಲ್ಯಾ ಬಿಡುವನು ಅಗಲ ಸುತ್ತೆ ಯಕ್ಕ ಹತ್ತ ವ್ಹತಾ. ಬಿಡುವನಿ ತುದಿಮಾ ಸುತ್ತೆ ದಿಂಡಿನಿ ಅಗಲ ಯಕ್ಕ ಗೆಂಡ; ಎಜ಼ ಯಜ್ಞವೆದಿನು ಪಿಠ ವ್ಹೈ. 14 ಜಿಮಿನಪರ ಕದ್ಯಾಮ ಹೆಟಲ್ಯಾ ಭಾಗನಾ ಉಪ್ಪರ ಹೆಟಲ್ಯಾ ಅಂತಸ್ತನು ಉಚ್ಚು ಯಕ್ಕ ಹತ್ತ ವ್ಹತಾ. ತಿನಾ ಉಪ್ಪರಲ್ಯು ಬಿಡುವನು ಅಗಲ ಅರ್ದೊ ಹತ್ತ ಯಕ್ಲು ವ್ಹತು. ತೆ ನ್ಹಾನಾ ಅಂತಸ್ತನಾ ಉಪ್ಪರ ಮ್ಹಾಟಾ ಅಂತಸ್ತನು ಉಚ್ಚು ಬೆ ವ್ಹತೊ ಯಕ್ಲು ವ್ಹತು, ಉಪ್ಪರಲ್ಯಾ ಬಿಡುವನು ಅಗಲ ಅರ್ದೊ ಹತ್ತ ವ್ಹತು, ವ್ಹೈ. 15 ಹೊಮಕುಂಡನಾ ಅಂತಸ್ತನು ಉಚ್ಚು ಬೆ ಹತೊ ಯಕ್ಲು ವ್ಹತು. ಹೊಮಕುಂಡನಾ ಉಪ್ಪರ ಚಾರ ಶಿಂಗ್ಡಾ ರ‍್ಹೌ. 16 ಹೊಮಕುಂಡ ಛೆ ಹತೊ ಯಕ್ಲು ವ್ಹತು. ಅಗಲ ಚೌಕ ರ‍್ಹೌ. 17 ಮ್ಹೊಟು ಅಂತಸ್ತ ಕ್ಹಾತ ಹತೊ ವ್ಹತಾ. ಅಗಲ ಚಾರೆ ಪಾರ್ಶ್ವಮಾ ಸಮಾ ರ‍್ಹೌ. ಸುತ್ತೆನೆ ದಿಂಡಿನು ಅಗಲ ಅರ್ದು ಮಾರ; ಹೆಟಲ್ಯಾ ಭಾಗನು ಸುತ್ತ ಅಂಚನು ಅಗಲ ಅರ್ದೊ ಹತ್ತ ವ್ಹತು. ಸೊಪಾನ ಪುರ್ವನೆ ಅಭಿಮುಖ ಥೈನ ರ‍್ಹೌ.
ಯಜ್ಞವೆದಿನು ಕ್ಹುದಾನಾ ಹುತಿ ಶುದ್ದಿಕರಾನು
18 ತೆಳಾಮಾ ತೆ ಮನಕ್ಹ ಮನೆ ಇಮ್ಮ ಕದ್ಯೊ- ನರನಾ ದಿಕ್ರಾ, ಕರ್ತಾ ಥಯಲ ಯಹೊವಾ ಅಮ್ಮ ಕವಸ- ಸರ್ವಾಂಗಹೊಮನೆ ರಗತ ಚಿಪ್ಡಾವಾನಿ ಸಂಸ್ಕಾರನೆ ಯಜ್ಞವೆದಿನೆ ಶುದ್ದಿಕರ್ತಾಮಾ ಎ ಚಿಧಿಯೊನೆ ಕರು- 19 ಲೆವಿಯೊ ಚಾದೊಕನಾ ಸಂತಾನವಾಲಾ ಮಾರಿ ಸನ್ನಿದಿನಾ ಸೆವಕೊ ಥಯಲ ಯಾಜಕೊನೆ ತು ಯಕ್ಕ ಹೊರಿನೆ ದೊಷಪರಿಹಾರಕ ಬಲಿದೆ. ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ. 20 ತಿನಾ ರಗತಮಾ ದಕ್ಹು ಲಿನ ಯಜ್ಞವೆದಿನಾ ಚಾರೆ ಶಿಂಗ್ಡಾವೊನೆ ಮ್ಹೊಟಾ ಅಂತಸ್ತನಾ ಚಾರೆ ಮುಲಾವೊನೆ ಸುತ್ತೆ ದಿಂಡಿನೆಬಿ ಲಗಾಡಿನ ಯಜ್ಞವೆದಿನಾ ದೊಷನೆ ಪರಿಹರಸಿನ ತಿನೆ ಶುದ್ದ ಕರ. 21 ವರಿ ದೊಷಪರಿಹಾರಯಜ್ಞನಾಹುತಿ ಕತ್ರಲ ಹೊರಿನೆ ತು ಒಪ್ಪಿಸಾನೆ ನೆಮಿಸಲವಾಲೊ ಪವಿತ್ರಾಲಯನಾ ಭಾರೊ ದೆವಸ್ಥಾನನೆ ಸಂಬಂಧ ರ‍್ಹಯಲ ಜ಼ಗಾಪರ ತಿನೆ ಬಾಳು. 22 ಬೆವಾ ದಿನ್ನಮಾ ತು ಪುರಾ ಅಂಗ ರ‍್ಹಯಲ ಹೊತನೆ ದೊಷಪರಿಹಾರಯಜ್ಞನಾಹುತಿ ಅರ್ಪಿಸ; ಹೊರಿಕ್ಹು ಯಜ್ಞವೆದಿ ಶುದ್ದ ಥಯಲ ನಿಂಗತ ಬಕ್ರಾಕ್ಹು ಶುದ್ದ ಕರು. 23 ತು ಯಜ್ಞವೆದಿನು ಶುದ್ದಿ ಕಾರ್ಯನೆ ಕ್ಹರಾಯಲ್ಪರ ಪುರಾ ಅಂಗ ರ‍್ಹಯಲ ಗುಳಿ ಹಿಂಡಮಾತೊ ಲಾಯಲ ಪುರಾ ಅಂಗ ರ‍್ಹಯಲ ಟಗರನೆ ಅರ್ಪಿಸು. 24 ತು ತೆ ಕ್ಹಾರು ಯಹೊವಾನೆ ಸಮರ್ಪಿಸಾನೆ ಯಾಜಕೊ ತ್ಯುನಾ ಉಪ್ಪರ ಮಿಟ್ಟು ನಾಕಿನ ಯಹೊವಾನಾಹುತಿ ಸರ್ವಾಂಗಹೊಮ ಕರು. 25 ಕ್ಹಾತ ದಿನ್ನ ತು ದಿನ್ನೆ ದಿನ್ನೆ ದೊಷಪಿಹಾರಕಯಜ್ಞನಾಹುತಿ ಯಕ್ಕೆಕ ಹೊತ ಅರ್ಪಿಸ; ಯಾಜಕೊಬಿ ಪುರಾ ಅಂಗ ರ‍್ಹಯಲ ಹೊರಿನೆ ಹಿಂಡಮಾತಾ ಲಾಯಲ ಪುರಾ ಅಂಗ ರ್xಯಲ ಟಗರನೆ ಅರ್ಪಿಸಾದೆ. 26 ಇಮ್ಮ ಕ್ಹಾತ ಇಮ್ಮ ಯಜ್ಞವೆದಿನು ದೊಷನೆ ಪರಿಹಾರ ಕರ್ತೊ ತಿನೆ ಶುದ್ದ ಕರಿನ ಪ್ರತಿಷ್ಟೆ ಕರು. 27 ಕ್ಹಾತ ದಿನ್ನ ಕಾರ್ಯ ಕ್ಹರಾಯಲ್ಪರ ಅಟವಾ ದಿನ್ನಮಾಬಿ ಅಗಾಬಿ ಯಾಜಕೊ ಯಜ್ಞವೆದಿನಾ ಉಪ್ಪರ ತುಮಾರಾ ಪಕ್ಷ ಥೈನ ಸರ್ವಾಂಗಹೊಮ ಸಮಾಧಾನಯಜ್ಞ ಕರು; ತೆಳಾಮಾ ಮಿ ತುಮೊಪರ ಕ್ಹುಶಿ ಥೌಸ; ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ.