ಯೆರುಸಲಿಮನು ಖಂಡನ ಕರಾನು
1 ಪಾಚಲ್ತಾ ಕ್ಹುದಾನಿ ಆತ್ಮಾ ಮನೆ ಉಚೈನ ಯಹೊವಾನಾ ಆಲಯನಾ ಪುರ್ವದಿಕ್ಕನಾ ರ‍್ಹಯಲ ಬಾಕಲಕನ ಲೈನ ಛೊಡ್ಯೂ; ಹಮ್ನಾ ಬಾಕಲನಾ ಕ್ಹಾಮಾ ಪಚ್ಚಕ್ಹ ಜನಾ ಹುಬ್ರಯಾತಾ; ಮಿ ತ್ಯುನಾ ವಚ್ಮಾ ಅಜ್ಜುರನೊ ದಿಕ್ರೊ ಥಯಲ ಯಾಜನ್ಯ, ಬೆನಾಯನೊ ದಿಕ್ರೊ ಥಯಲ ಪೆಲ್ಯತ ಕವಾಲೊ ಮನಕ್ಹೊನಾ ನಾಯಕೊನೆ ದೆಕ್ಯೊ.
2 ತ್ಯಾ ಕ್ಹುದಾ ಮನೆ ಮನಕ್ಹನಾ ದಿಕ್ರಾ, ಗಾಮಾ ಕುತಂತ್ರಯೊನೆ ಕಲ್ಪನೆ ಕರಿನ ದುರ ಆಲೊಚನಾ ಕವಾಲಾ ಆಜ಼ ಮನಕ್ಹೊ ವ್ಹೈ; 3 ಔನೆ ಘರೊ ಭಾಂದಿಲಿವಾನೊ ಟೈಮ ನತ್ತಿ ಆಯೊ; ಆ ಗಾಮ ತಪಾಲೊ ವ್ಹೈ, ಅಪೆ ತಿಮಾನು ಮಾಕ್ಹ ವ್ಹೈ ಕವಸ. 4 ತೆ ಥಯಲ್ಪರ ಮನಕ್ಹನಾ ದಿಕ್ರಾ, ತು ಔನಾ ವಿಷಯಮಾ ಪ್ರವಾದನೆ ಕರ. ಎ ಮನಕ್ಹನಾ ದಿಕ್ರಾ ಪ್ರವಾದನೆ ಕರ.
5 ತೆಳಾಮಾ ಯಹೊವಾನಿ ಆತ್ಮಾ ಮಾರಾಮಾ ಆವಾಹುತಿ ಅಮ್ಮ ಕೆ ಕೈನ ಅಪ್ಪಣ್ಣೆ ಥಯು. ಯಹೊವಾ ಅಮ್ಮ ಕವಸ ಇಸ್ರಾಯಲನಾ ವಂಶವಾಲಾ, ತುಮೆ ಅಮ್ಮ ಬೊಲಾಡಾಸ, ಥಯು ತುಮಾರಾ ಮನಸಮಾ ಹುಟ್ಟಲ ಆಲೊಚನಾ ಮನೆ ಗೊತ್ತ ಛೆ. 6 ತುಮೆ ತೆ ಗಾಮ್ಮಾ ನರಹತ್ಯಾನೆ ಹೆಚ್ಚ ಹೆಚ್ಚ ಕರಿನ ಹತ ಥಯಲವಾಲಾವೊಕ್ಹು ಬಿದಿಯೊನೆ ಭರ್xಯಾಸ. 7 ತೆ ಥಯಲ್ಪರ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ತುಮಾರಾ ದೊಷಕ್ಹು ಹತ ಥೈನ ಗಾಮಮಾ ಪಡಲ ತುಮಾರಾವೊನಾಜ ಮುರ್ದಾ ವ್ಹೈ ತಪಾಲೊ ಮಾಕ್ಹ, ಆ ಗಾಮನೊ ತಪಾಲೊ ವ್ಹೈ, ತುಮೊನೆಬಿ ಮಿ ತೆ ಹಂಡಾಮಾತೊ ಕಿತ್ತಿನ ಭಾರೊ ಘಾಲುಸ. 8 ತಲ್ವಾರಕ್ಹು ಭುಚಕ್ಯಾಸು? ತುಮೊನೆಜ ತವ್ವಾರನೊ ನಿಶ್ಯಾನೊ ಕರುಸ; ಆ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ. 9 ಮಿ ಗಾಮಾತೊ ತುಮೊನೆ ಕಿತ್ತಿನ ಅನ್ಯನಾ ಹತೆ ದಿನ ದಂಡ ದಿವಾಲಗಾಡುಸ. 10 ತುಮೆ ತಲ್ವಾರನಾ ಮ್ಹೊಡಾಮಾ ಜಾ಼ವೊಶಿ. ಇಸ್ರಾಯಲನಾ ಸಿಮೆನಾ ಮ್ಹೈಜ ತುಮೊನೆ ದಂಡನೆ ದ್ಯುಸ, ಮಿಜ ಯಹೊವಾ ವ್ಹೈ ಕೈನ ತುಮೊನೆ ಗೊತ್ತ ಥಾವಸ. 11 ಆ ಗಾಮ ತುಮೊನೆ ತಪಾಲೊ ನೈ ಥಾತೊ; ತಿಮಾನು ಮಾಕ್ಹಬಿ ತುಮೆ ನೈ ಥಾತಾ. ಇಸ್ರಾಯಲನಾ ಸಿಮೆನಾ ಮ್ಹೈಜ಼ ತುಮೊನೆ ದಂಡನೆ ದ್ಯುಸ. 12 ಮಿಜ ಯಹೊವಾ ವ್ಹೈಕೈನ ತುಮೊನೆ ಗೊತ್ತ ಥಾವಸ; ತುಮೆ ಮಾರಿಯೊ ಪದ್ದತಿಯೊ ಪಾಲಶ್ಯಾವಾಚಿ ಮಾರಾ ನಿಯಮೊನೆ ನೈ ಪಾಲಶ್ಯಾವಾಚಿ ತುಮಾರಾ ಸುತ್ತೆಬಿನಾ ಜನಾಂಗೊನೆ ಆಚಾರೊನೆ ಪಾಲಸಲಕ್ಹು ಆ ಕ್ಹಾರು ಥಾವಸ. 13 ಮಿ ಆ ವಾತ ಕತಾಮಾ ಬೆನಾಯನೊ ದಿಕ್ರೊ ಥಯಲ ಪೆಲತ್ಯನ ಮರಿ ಗಯೊ. ತೆಳಾಮಾ ಮಿ ಡಬ್ಬ ಪಡಿನ ಜೊ಼ರ ವದ್ರಿನ ಎ, ಕರ್ತಾ ಥಯಲ ಯಹೊವಾ, ಇಸ್ರಾಯಲಮಾ ಉಗ್ರವಾಲಾವೊನೆ ನಾಶ ಕರುಸಿಸು? ಕೈನ ಮೊರೆ ಮ್ಹೆಲ್ಯೊ.
ದೆಶ ಭ್ರಷ್ಟೊನಾ ಹುತಿ ಕ್ಹುದಾನಿ ವಾತ
14 ತೆಳಾಮಾ ಯಹೊವಾ ಆ ವಾತನೆ ಮನೆ ದಿದ್ಯೊ. 15 ಮನಕ್ಹನಾ ದಿಕ್ರಾ ತಾರಾ ಸಹೊದರೊ, ತಾರಾ ನ್ಹಾನಾ ವರಿ ಮ್ಹೊಟಾ ಭಾಯೊ, ತಾರಾ ನೆಂಟೊ ವರಿ ಯೆರುಸಲೆಮವಾಲಾ ಇಸ್ರಾಯಲನಾ ವಂಶವಾಲಾವೊಮಾ ಕಿನೆ ಕಿನೆಬಿ ಯಹೊವಾನಾ ಕ್ಹಾಮಾತಾ ದುರ ಢಕಲೊ, ಆ ದೆಶ ಅಪೊನೆ ಸಾಸ್ವ್ತ ಥೈನ ಮಳ್ಯುಸ ಕೈನ ಹಿನಾಯಲವಾಲಾ ತ್ಯುನೆ ಕ್ಹಾರಾ ಉಗ್ರ್ಯಾಸತೊ. 16 ತೆ ಥಯಲ್ಪರ ತು ಅಮ್ಮ ಕೆ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಮಿ ತ್ಯುನೊನೆ ದುರ ಮೊಕಲೈನ ಜನಾಂಗೊಮಾ ಅನ್ಯ ದೆಶೊಮಾ ಬಿಖರೈಗಯಾ ತ್ಯುನೆ ಸೆರಲ ದೆಶೊಮಾ ಮಿ ದಕ್ಹೊ ಟೈಮ ತ್ಯುನೊನೆ ಪವಿತ್ರ ಆಲಯ ಥಯಲ ರ‍್ಹವುಸ.
17 ತೆ ಥಯಲ್ಪರ ತ್ಯುನೊನೆ ಜನಾಂಗೊಮಾತೊ ಕುಡಸುಸ, ಭಿಕ್ಹರೈಗಯಲ ದೆಶೊಮಾತು ತ್ಯುನೊನೆ ಮಳಿನ ಆವಾಲಗಾಡಿನ ಇಸ್ರಾಯಲ ದೆಶನೆ ತ್ಯುನೊನೆ ದಯಪಾಲಸುಸ. 18 ತ್ಯನೆ ತ್ಯಾ ಐನ ಕ್ಹಾರಾ ಅಸಯ್ಯ ಸಾಮನೊನೆ ಸಮಸ್ತ ಹೆಯ ವಿಗ್ರಹವೊನೆ ತ್ಯಾಂತಾ ಕಾಡಿ ಪಡಸ. 19 ತ್ಯುನೆ ಮಾರಾ ನಿಯಮೊನೆ ಅನುಸರಸಿನ ಮಾರಾ ವಿಧಿಯೊನೆ ಕೈ ಗೊಳ್ಳಿನ ಪಾಲಸಾಲೊ ಕೈನ ಮಿ ತ್ಯುನೊನೆ ಯಕ್ಕಜ ಮನಸ ದಯಪಾಲಸಿನ ನಯಿ ಆತ್ಮಾ ತ್ಯುನಾಮಾ ಹುಟ್ಟಸುಸ; ದಗ್ಡೊ ಥಯಲ ಮನಸನೆ ತ್ಯುನಾಮಾತು ಕಾಡಿನ ಮೃದು ಮನಸ ಥಯಲ ತ್ಯುನೊನೆ ಘಾಲುಸ; 20 ತ್ಯುನೆ ಮನೆ ಪ್ರಜೆ ಥಾವಸ, ಮಿ ತ್ಯುನೊನೆ ಕ್ಹುದಾ ಥವೊಸ. 21 ತೆ ನೈಸೊ ಕಿನಿ ಚಿತ್ತಬಿ ತುಮಾರಾ ಅಸಯ್ಯ ಸಾಮನೊನೆ ಹೆಯ ವಿಗ್ರಹವೊನೆ ಅನುಸರಸಲ ತ್ಯುನಿ ದುರ್ನಡತೆನೆ ತ್ಯುನಾ ಮಾತೆ ಭಾಂದುಸ. ಆ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ.
ಕ್ಹುದಾನು ಮಹಿಮಾ ಜೆರುಸೆಲಿಮನೆ ಛೊಡಿನ ಗಯಲ
22 ತೆ ಥಯಲ್ಪರ ಗಾಲಿಯೊನಾ ಬಾಜು಼ಮಾ ಕೆರುಬಿಯೊ ರೆಕ್ಯಾ ಫೈಲೈಲಿದ್ಯಾತಾ, ಇಸ್ರಾಯಲನಾ ಕ್ಹುದಾನಾ ತೆಜಸ್ಸನೆ ತಿನಾ ಉಪ್ಪರ ನೆಲಸ್ಯುತು. 23 ತೆಳಾಮಾ ಯಹೊವಾನಿ ಮಹಿಮಾ ಗಾಮ್ನಾ ವಚ್ಮಾತಿ ಚಡಿನ ಗಾಮ್ನಾ ಪುರ್ವ ದಿಕ್ಕಮಾ ರ‍್ಹಯಲ ಡೊಂಗರಪರ ಹುಬ್ರಯುತು. 24 ಪಾಚಾ಼ತು ಕ್ಹುದಾನಿ ಆತ್ಮಾ ಭರ್ತರ ಥೈನ ಮನೆ ಉಚೈನ ದಿವ್ಯ ದರ್ಶನನಾ ಮುಕಾಂತರ ಕಸ್ದಿಯ ದೆಶಮಾ ಆಳಥಯಲವಾಲಾವೊನಾ ಕ್ಹಾಮೊ ಲಿಂಗೈನ ಲೈಯು ಮನೆ ಥಯಲ ದಿವ್ಯದರ್ಶನಬಿ ತೆಳಾಮಾ ಗಾಯಬ ಥಯು. 25 ಬಬಬಬ