1 ಪಾಚಲ್ತೊ ಯಹೊವಾ ಆಂ ವಾಕ್ಯಾ ಮನೆ ದಿದ್ಯೊ 2 ಮನಕ್ಹನಾ ದಿಕ್ರಾ, ತು ಯರುಸಲೆಮನೆ ತಿನಾ ಅಸಹ್ಯ ಕಾಮೊನೆ ತಿಳಸಿನ ಅಮ್ಮ 3 ಕೆ ಕರ್ತಾ ಥಯಲ ಯಹೊವಾ ಯರುಸಲೆಮ ವಾಲಾವೊನೆ ಆಂ ವಾತ ಕೈನ ಮೊಕಲ್ಯೊಸ ತು ಹುಟ್ಟಲ ಕಾನಾನ ದೆಶ ತೆಜ ತಾರಿ ಹುಟ್ಟಲ ಜಿಮಿನ ವ್ಹೈ, ತಾರಬಾ ಅಮೊರಿವಾಲೊ ವ್ಹೈ ತಾರಿಯಾ ಹಿತ್ತಿವಾಲಿ ವ್ಹೈ. 4 ತಾರಾ ಜನ್ಮಾನಾಹುತಿ ಸು ಕೌ! ತು ಹುಟ್ಟಲ ದಿನಮಾ ಕುನಬಿ ತಾರಿ ದುಟ್ಟಿ ಕಾಟಿನ ಭಾಂದ್ಯಾ ನೈ, ತುನೆ ಪಾನಿಕ್ಹು ಧ್ಯಯಿನ ಶುದ್ದ ಕರ‍್ಯಾ ನೈ, ಮಿಟ್ಟನ್ನು ದಕ್ಹುಬಿ ಸವರ್ಯಾನೈ, ತುನೆ ಫಡ್ಕಾಮಾ ಕೆಕ್ಲಾ ಸಲಾ ಸುತ್ಯಾ ನೈ. 5 ತುನೆ ಕಟಾಕ್ಷಿನ ಕರುಣೆ ಕರಿನ ಕುನ್ನ ತುನೆ ಹೈ ಮದದ ಕರ‍್ಯಾ ನೈ. ತಾರಾ ಹುಟ್ಟಲ ದಿನಮಾ ತು ಹೆಸಿಗೆ ಥಯೊತೊ, ತುನೆ ಬಯಲಮಾ ಭಿರಕೈ ಪಡ್ಯಾ.

6 ಮಿ ದಾಟಿನ ಜಾ಼ತಾಮಾ ತಾರಾ ರಗತಮಾ ಉಳ್ಯಾಡಾನು ತುನೆ ದೆಕಿನ ತು ರಗತಮಾ ರ್ಹೈತಬಿ ವಾಚ ಕೈನ ಕದ್ಯೊ, ಹಾ, ತು ರಗತಮಾ ರ‍್ಹೈತಬಿ ವಾಚ ಕೈನ 16.6 ಮೂಲ ಕದ್ಯೊ. ವಚಾ಼ಡ್ಯೊ. 7 ಜಿಮಿನಮಾ ಮೊಳಕೆನಾ ನಿಂಗತಮಿ ತುನೆ ಬೆಳಸಾನೆ ತು ಪ್ರಾಯ ಭರಿನ ಘನ್ನಿ ಸುಂದರಿ ಥೈ; ತುನೆ ಸ್ತನ ಐಯು, ತಾರಾ ಬಾಲೊ ಮ್ಹೊಟಾ ಥಯಾ; ತೆನೈಸೊ ತು ಫಡ್ಕಾಮಾ ಉಗಾಡಿ ವ್ಹತ್ತಿ.

8 ಮಿ ಜಾ಼ತಾಮಾ ತುನೆ ದೆಕ್ತಾಮಾ ಹಮ್ನಾ, ತು ಹಿವಾನೆ ತಯ್ಯಾರ ಥೈಸ; ತೆಳಾಮಾ ಮಿ ಮಾರಾ ಹೊದಿಕೆ ತಾರಾ ಉಪ್ಪರ ಘಾಲಿನ ತಾರಿ ಮಾನನೆ ವಚಾ಼ಡ್ಯೊ; ತೆನೈಸೊ ಮಿ ತುನೆ ವಾತ ದಿದಲ ಒಡಂಬಡಿಕೆ ಕರಿಲಿದಲಕ್ಹು ತು ಮಾರಿ ಥೈಸ; ಆಂ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ 9 ತೆಳಾಮಾ ಮಿ ಪಾನಿಮಾ ತುನೆ ಅಂಗ ಧವೈನ ತಾರೊ ಉಪ್ಪರಲ್ಯು ರಗತ ಧ್ಯನಿ ತುನೆ ತೆಲ ಲಗಾಡ್ಯೊ. 10 ತೆನೈಸೊ ಮಿ ಕಸುತಿನು ವಣ್ಣಾ ತುನೆ ಘಾಲಿನ ಚೊ಼ಕು ಚಾಮ್ಡಾನಾ ಕಾರಮಲಿಯೊನೆ ತಾರಾ ಪಗೊನೆ ಘಾಲಿನ ನವು ಥಯಲ ಚೊಕಿ ಮಡಿನೆ ತುನೆ ಪೆರ್xಯಾಡಿನ ರೆಷ್ಮನು ಹೊದಿಕೆ ತುನೆ ವರಾಡ್ಯೊ. 11 ವರಿ ಮಿ ತಾರಾ ಹತೊನೆ ಬಾಂಗ್ಡಿಯೊನೆ ಗಳಾಮಾ ಹಾರನೆ, 12 ನಾಕೆ ನತನಿನೆ, ಮಾತೆ ಚೊಕು ಕಿರಿಟ ಮ್ಹೆಲಿನ ತುನೆ ಕ್ಹೊನಾನಾ ಸಾಮ್ನೊಕ್ಹು ಸಿಂಗಾರ ಕರ‍್ಯೊ. 13 ತಾ ಸಾಮ್ನೊ ಕ್ಹೊನು ರುಪ್ಪು; ತಾರಾ ವಣ್ಣಾ ನವಿ ಥಯಲ ಚೊಕಿ ಮಡಿ, ರೆಷ್ಮನು ಹೊದಿಕಿ, ಕಸುತಿನಾ ವಣ್ಣಾ; ತಾರು ಅನ್ನ ಘೌಂನು ಲೊಟ ಜೆನ, ತೆಲ, ತಾರು ಲಾವಣ್ಯ ಘನ್ನು ಚೊಕು ರ‍್ಹಯಲ; ತು ಚೊಕಿ ಥೈನ ರಾಣಿ ಥಯಿ. 14 ಮಿ ತುನೆ ದಿದಲ ಮಾರಾ ವೈಭವಕ್ಹು ತಾರಿ ಸುಂದರತಾಬಿ ಪೂರಾ ಥಯು; ತಾರಿ ಚೆಲುವಕೆ ನಾಮ ವಾಸಿನು ಜನಾಂಗೊಮಾ ಫೈಲ್ಯು; ಆಂ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ.

15 ತೆನೈಸೊ ತು ತಾರಾ ಸುಂದರತಾಮಾ ಬರೊಕ್ಹೊ ಮ್ಹೆಲಿನ ಮಿ ಪ್ರಸಿದ್ದಿ ಥೈಸ ಕೈನ ಫುಗ್ಗಿನ ಸುಳೆತನ ಕರಿ; ದಾಟಿನ ಜಾ಼ವಾನು ಹರಯಕ್ಲಾನಾ ಕ್ಹಾತೆ ಮಿತಿಮಿರಿನ ಹಾದರ ಕರಿ ಯಕ್ಕ ಯಕ್ಲಾನೆ ಮ್ಹೈ ಥೈ. 16 ತು ಪೂಜಾನಾ ಜ಼ಗಾವೊ ಭಾಂದಿಲಿನ ತಾರಿ ಚಿತ್ರಾ ವಿಚಿತ್ರ ವಣ್ಣಾವೊಕ್ಹು ತಿನೆ ತಯ್ಯಾರ ಕರಿನ ತ್ಯಾ ವ್ಯಬಿಚಾರ ಕರಿ. ಆಂ ಥಯಲ ಕ್ಹಾರು ಥಾವಾನು ನ್ಹೊತು. 17 ವರಿ ಮಿ ಮಾರಾ ಕ್ಹೊನಾ ರುಪ್ಪಾಕ್ಹು ಕರೈನ ತುನೆ ದಿದಲ ತಾರಾ ಪಸಂದ ರ‍್ಹಯಲ ಸಾಮ್ನೊನೆ ಲಿನ ತು ತಿಕ್ಹು ದಾಣ್ಗಾವೊನಾ ಮೂರ್ತಿಯೊ ಕರಲಿನ ತ್ಯುನಾಕ್ಹಾತೆ ಹಾದರ ಕರಿ. 18 ತಾರಾ ಕಸುತಿ ವಣ್ಣಾವೊನೆ ಲಿನ ಮೂರ್ತಿಯೊನೆ ಘಾಲಿನ ತ್ಯುನಾ ಕ್ಹಾಮು ಮಾರಾ ತೆಲನೆ ಮಾರಾ ಊದನೆ ಚಡೈ. 19 ಮಿ ತುನೆ ದಿದಲ ರೊಕ್ಲಾನೆ ತಾರಾ ಅನ್ನನೆ ಮಿ ದಿದಲ ಘೌಂನೊ ಲೊಟ, ತೆಲ, ಜೆನ ಎ ಕ್ಹಾರು ತು ಆಂ ಮೂರ್ತಿಯೊನಾ ಕ್ಹಾಮಾ ಬಾಸನುಹೊಮ ಕರಿ; ಅಮ್ಮ ಥಯುತು! ಆಂ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ. 20 ತೆನೈಸೊ ತು ಮನೆ ಜನ್ನಲ ಗಂಡ ವರಿ ಹೆಣ್ಣ ಬಚ್ಚಾವೊನೆ ಧರಿನ ಮೂರ್ತಿಯೊನೆ ಅನ್ನ ಥೌ ಕೈನ ಬಲಿ ದಿದಿ. ಎ ನ್ಹಾನಿ ವಿಶಯ ವ್ಹೈ ಕೈನ ವಿಚಾರ ಕರಿಸು? 21 ತಿನೆ ಮಿರಸು ಕೈನ ತು ಮಾರಾ ಬಚ್ಚಾವೊನೆ ಹತಸಿನ ಆಗನ್ಯಾ ದಿನ ಮೂರ್ತಿಯೊನೆ ಚಡೈ? 22 ಆಂ ತಾರಾ ಅಸಹ್ಯ ಕಾಮೊನೆ ಸುಳೆತನಾನತ ತು ಹಗಲೆಲಾ ಕರ್ತಾಮಾ ತು ವಣ್ಣಾವಾಚಿ ಉಗಾಡಿ ಥೈನ ತಾರಾ ರಗತಮಾ ವದ್ಯಾಡತಾ ತಾರು ಎಳೆತನಾನೆ ತಾರಾ ಸ್ಹೆಂನೆ ಲೈ ನೈ. 23 ಅಯ್ಯೊ, ತಾರಿ ಗತಿ ಮಿ ಸು ಕೌ ಕವಾನು ಕರ್ತಾ ಥಯಲ ಯಹೊವಾನಿ ವಾತ ವ್ಹೈ.

24 ತು ಆಂ ಕೆಟ್ಟ ಕಾಮೊನೆ ಕ್ಹಾರಾ ಕರಲ ಹರಯಕ್ಕ ಚೌಕಮಾ ಗುಬ್ಬು ಕರಿನ ಜಗಲಿನೆ ಭಾಂದಿಲಿದಿತಿ. 25 ಯಕ್ಕಯಕ್ಕ ರಸ್ತಾನಾ ಕೊನಾಮಾಬಿ ತು ಜಗಲಿನೆ ಭಾಂದಿಲಿನ ತಾರಾ ಸುಂದರತಾನೆ ಕೆಟ್ಟ ಕಾಮನೆ ಒಪ್ಸಿನ ಜಾ಼ವಾಲಾ ಕ್ಹಾರಾವೊನೆ ಮಳಿನ ಸುಳೆತನ ಹೆಚ್ಚ ಕರಿಸ. 26 ತಾರಾ ಬಾಜು಼ವಾಲಾ ಅತಿಕಾಮಿ ಥಯಲ ಐಗುಪ್ತ ವಾಲಾವೊನಾ ಕ್ಹಾತೆ ತುಬಿ ಸಿಕ್ಕಿನ ಹೆಚ್ಚ ಹಾದರ ಕರಿನ ಮನೆ ತಡೈಸ. 27 ತೆ ಥಯಲ್ಪರ ಮಿ ತುಪರ ಹತ್ತ ಉಚೈನ ತಾರಾ ಅನ್ನನೆ ಕಮ್ಮ ಕರ‍್ಯೊ; ತುನೆ ದ್ವೆಶ ಕರಿನ ತಾರಾ ಕೆಟ್ಟ ಚಾಲನೆ ಅಸಹ್ಯ ಕರಾಲಾ ಪಿಲಿಷ್ಟಿನಾ ಜಾ಼ಂಜಿಮಾನ ಛೊಕ್ರಿಯೊನಾ ಹತ್ಮಾ ಕ್ಹಾಪ್ಡಾಯೊ. 28 ವರಿ ಅಕ್ಲು ಬಸ ನೈ ಥಾತು ಕೈನ ಅಶ್ಯೂರ್ಯನಾ ಕ್ಹಾತೆ ಹಾದರ ಕರಿನ; ಹಾ, ತ್ಯುನಾಕ್ಹಾತೆ ಹಾದರ ಕರಿತಬಿ ತುನೆ ತೃಪ್ತಿ ಥಯಿ ನೈ. 29 ತೆನೈಸೊ ತು ಘನ್ನು ವ್ಯಾಪಾರ ರ‍್ಹಯಲ ಕಸ್ದಿಯ ದೆಶನೆ ಸೆರಿನ ತ್ಯಾಬಿ ಘನ್ನು ಸುಳೆತನಾ ಕರಿ, ತಿನಾಹುತಿ ತುನೆ ತೃಪ್ತಿ ಥಯಿ ನೈ.

30 ಕರ್ತಾ ಥಯಲ ಯಹೊವಾ ಅಮ್ಮ ಕವಸ ತಾರು ಮನಸ ಆಸನೆ ಕೆಕ್ಲಿಸಲಾ ಆಸ! ಅಕ್ಲಾಕ್ಹಾರಾ ಕೆಟ್ಟ ಕಾಮೊ ರಿನ ಭಾಂದಲ ಕ್ಹಾರು ಜಾರಸ್ತಿ ಥಯಾಸತೊ; 31 ಹರಿ ಯಕ್ಕ ಒಣಿನಾ ಮುಲಾಮಾ ಕ್ಹಾರಾ ಚೌಕೊಮಾ ಜಗಲಿನೆ ಕರಲಿದಿಸ; ಮಳಲ ಕಮ್ಮರ‍್ಹಯಲ ಇನ್ಕಾರ ಕರಾನಾ ಸುಳೆನಿಂಗತ ತು ಚಾಲಾಲಿ ನವೈ. 32 ತು ಸುಳೆತನ ಕರಾನು ಪತಿವರ್ತಾ! ಮಾಟಿನಾ ಬಿಜಾ಼ ಮನಕ್ಹೊನೆ ಮಳಾನಿ ಜಾರಿನಿ! 33 ಕ್ಹಾರಿ ಜ಼ಗಾಮಾ ಸುಳೆಯೊನೆ ದೊಕ್ಡಾ ದಿವಾನು ಛೆ; ತುತಬಿ ತಾರಾ ಕ್ಹಾರಾ ಗೆಣ್ಯಾವೊನೆ ತುಜ ದೆಸಿ; ತ್ಯುನೆ ಕ್ಹಾರಾ ಜ಼ಗಾತಾ ಐನ ತುಕನ ವ್ಯಭಿಚಾರ ಕರಲಕ್ಹು ತ್ಯುನೊನೆ ಇನಾಮ ದೆಸಿ. 34 ತಾರಾ ಸುಳೆತನಾನೆ ವರಿ ಬಿಜಾ಼ ವೆಷನಾ ಸುಳೆತನಾನೆ ವ್ಯತ್ಯಾಸ ಛೆ; ತಾರಾಮಾ ವ್ಯಬಿಚಾರ ಕರಾನೆ ಕುನಬಿ ಕುನಬಿ ತಾರಾ ಪಾಚಾ಼ ನೈ ಆತಾ; ತು ದೆಸಿ ರ‍್ಹೈತಬಿ ತುನೆ ಸುಜ಼ ಮಳತು ನೈ; ತಾರಿ ಕೆಟ್ಟ ವಿಚಾರ ವಿಪರಿತ ವ್ಹೈ.

35 ಇಮ್ಮ ರ‍್ಹತಾಮಾ ವ್ಯಬಿಚಾರಣಿ, ಯಹೊವಾನಿ ವಾಕ್ಯಾ ಐಕ! 36 ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಮಿತಿಮಿರಲ ತಾರಾ ಕಾಮಮಾ, ತಾರಾಮಾ ವ್ಯಬಿಚಾರ ಕರಲ ತಾರಾ ಗುಂಪನಾ ಮೂಲಕ ತುನೆ ಥಯಲ ಮಾನಭಂಗ, ತಾರಾ ಕ್ಹಾರಾ ಅಸಹ್ಯನಾ ಸಾಮ್ನೊನೆ, ತು ತಿನೆ ಚಡಾಯಲ ತಾರಾ ಬಚ್ಚಾವೊನು ರಗತ. 37 ಎ ಕ್ಹಾರಾವೊನೆ ಮಿ ದೆಕಿನ ತು ಪೊಕ್ಹಲಾಯಲ ಕ್ಹಾರಾ ಗುಂಪನೆ ತು ಮೊಹಿಸಲ ಕ್ಹಾರಾವೊನೆ ತು ಹಗೆ ಕರಲ ಕ್ಹಾರಾವೊನಾ ಕ್ಹಾತೆ ಸುತ್ತೆ ಮುತ್ತೆ ತುನೆ ವಿರುದ್ದ ಥೈನ ಮಳೈನ ತ್ಯುನಾ ಡೊಳಾನಾ ಕ್ಹಾಮೊ ತಾರಿ ಮನಾ ಮರ್ಯಾದಿನೆ ಬಟ್ಟ ಬೈಲ ಕರುಸ. 38 ವ್ಯಬಿಚಾರ ಕರಲ ನಿಂಗತ, ರಗತ ಚುವಾ ನಿಂಗತ ಹೆಣ್ಣ ಮನಕ್ಹೊನೆ ತಿನಾ ತಕ್ಕ ಶಿಕ್ಷಾ ದಂಡದಿನ ಶಿಟ್ಟಕ್ಹು ಘನ್ನಿ ಶಿಟ್ಟಕ್ಹು ತಾರು ರಗತ ಚುವೌಸ. 39 ಮಿ ತಾರಾ ಸುತ್ತೆ ರ‍್ಹಯಲ ವಾಲಾನೆ ಹತ್ತ ವಶಮಾ ಕರುಸ; ತ್ಯುನೆ ತಾರಾ ದಿಬ್ಬಾನೆ ಪಾಡಿನ ತಾರಾ ಜಗಲಿಯೊನೆ ತೊಡಿನ ತಾರಾ ವಣ್ಣಾವೊನೆ ಕಿತ್ತಿನ ತಾರಾ ಕ್ಹೊನಾನಾ ಸಾಮ್ನೊನೆ ಕಿತ್ತಿಲಿನ ತುನೆ ಬಟ್ಟ ಬೈಲಮಾ ಛೊಡಿನ ಜಾ಼ವಸ.

40 ತ್ಯುನೆ ತಾರಾ ವಿಚಾರಮಾ ಶಾನಾವೊನೆ ಮಳೈನ ತುನೆ ದಗ್ಡಾ ನಾಕಿನ ಮಾರಸ, ತಲ್ವಾರೊಕ್ಹು ಕತ್ರಸ. 41 ತಾರಾ ಘರೊನೆ ಆಗಕ್ಹು ಬಾಳಿ ಪಾಡಸ; ಘನಾ ಜನಾ ಹೆಣ್ಣ ಮನಕ್ಹೊನಾ ಡೊಳಾನಾ ಕ್ಹಾಮಾ ತುನೆ ದಂಡ ದಿವಸ; ತು ತಾರು ಸುಳೆತನಾ ಛೊಡಿಪಡು ಕೈನ ಮಿ ಕರುಸ; ತು ತಾರಾ ಗುಂಪನೆ ಹಜಿ ದೊಕ್ಡಾ ನೈ ದೆತಿ. 42 ಅಮ್ಮ ಮಿ ತಾರಾ ಉಪ್ಪರ ಶಿಟ್ಟ ತಿರಸಾನೆ ಮಾರಿ ಶಿಟ್ಟ ತುಕಂತು ಗೈಪಡಸ ; ಮಿ ಶಾಂತ ಥೈನ ಹಜಿ ಯಕ್ಕೆಮ್ಮ ಶಿಟ್ಟ ಥಾತೊ ನೈ. 43 ತು ತಾರಾ ನ್ಹಾನಪಂತ ಸ್ಹೆಂ ಕರೆವಾಚಿ ಆಂ 16.43 ಪಾಟಾ ನಿಂಗತ ಮಾರಾ ಉಪ್ಪರ ಕಾಪತಾಮಾ ಆ ಕೆಟ್ಟ ಕಾಮೊ ಕರಿನ ಮನೆ ತಡಾಯಲಕ್ಹು ಹಮ್ನಾ, ಮಿ ತಾರಾ ಕೆಟ್ಟ ವಾಟನೊ ಫಲನೆ ತಾರಾ ಮಾತೆ ಭಾಂದುಸ; ತು ಲೆಕ್ಕಾ ನೈಸೊ ಕೆಟ್ಟ ವಿಚಾರೊ ಕರಿಸತೊ ವರಿ ಆಂ ಅಸಹ್ಯ ಕಾಮೊಬಿ ಕರಿಸತೊ. ಆಂ ಕರ್ತಾ ಥಯಲಯಹೊವಾನಿ ವಾತ ವ್ಹೈ.

44 ಒಡಪೊಮಾ ಶ್ಯಾಣ್ಯಾ ಯಾ ನಿಂಗತ ದಿಕ್ರಿ ಕವಾನಾ ಒಡಪನೆ ತಾರಾ ವಿಷಯಮಾ ಕವಸ. 45 ಮಾಟಿನೆಬಿ ವರಿ ಬಚ್ಚಾವೊನೆಬಿ ತಾರಿ ಯಾನೆ ತಿನಾ ತಕ್ಕ ದಿಕ್ರಿ; ಮಾಟಿನೆಬಿ ಬಚ್ಚಾವೊನೆಬಿ ಬೆಜಾರ ಥವಾಲಾ ತಾರಾ ಮ್ಹೊಟಿ ಭೆನೊನೆ ತಿನಾತಕ್ಕ ಭೆನ ರ‍್ಹೌ; ತಾರಿಯಾ ಹಿತ್ತಿವಾಲಿ ವ್ಹೈ, ತಾರಬಾ ಅಮೊರಿವಾಲೊ ವ್ಹೈ;

46 ತಾರಾ ಉತ್ತರ ದಿಕ್ಕನೆ ತಾರಿಯೊ ದಿಕ್ರಿಯೊರೊನಾ ಕ್ಹಾತೆ ರ‍್ಹವಾನಾ ಸಮಾರ್ಯ ತಾರಿ ಮ್ಹೊಟಿ ಭೆನ ದಕ್ಷಿಣ ದಿಕ್ಕನಾ ತಾರಿಯೊ ದಿಕ್ರಿಯೊನಾ ಕ್ಹಾತೆ ರ‍್ಹವಾನಿ ಸೊದೊಮ್ ತಾರಿ ಭೆನ ವ್ಹೈ. 47 ತೆನೈಸೊ ತು ಚಾಲಲ ಕೆಟ್ಟವಾಟ ತ್ಯುನೆ ಚಾಲಲ ನ್ಹವ್ಹೈ, ತಾರಾ ಅಸಹ್ಯ ಕಾಮೊ ತ್ಯುನೆ ಕರಲವಾಲಾ ನ್ಹವೈ, ತ್ಯುನಿ ಕೆಟ್ಟ ವಾಟ ಚೊಕಿ ನ್ಹವೈ ಕೈನ ತ್ಯುನಾತಿ ಘನ್ನಿ ಕೆಟ್ಟ ಥೈನ ಚಾಲ್ಲಿದಿ.

48 ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಮಾರೊ ಜಲಮ, ತುಬಿ ತಾರಾ ಕುಮಾರ್ತೆಯೊ ಚಾಲಲ ನಿಂಗತ ಸೊದೊಮ್ ಕವಾಲಿ ತಾರಿ ಭೆನ ರ‍್ಹವಾದೆ ತಿನಾ ಕುರ್ತೆ ರ‍್ಹವಾದೆ ಚಾಲ್ಯಾ ನೈ. 49 ಸೋದೊಮ್ ಕವಾಲಿ ತಾರಿ ಭೆನೊ ದೊಷ ದೆಕ; ಹೆಮ್ಮೆ ಪಡದಾನು ವ್ಹೈ. ಪೆಟ ಭರಲಿವಾನು ಸ್ವಂತ ಸುಖಾಮಾ ಡುಬಲ ರ‍್ಹವಸ, ಇಬಿ ತಿನಾಮಾ ತೆಬಿ ಕುಮಾರ್ತೆಮಾ ವ್ಹತ್ತಾ. ತೆನೈಸೊ ತೆ ದಿನ್ನ ದರಿದ್ರನೆ ಬೆಂಬಲ ಥಯು ನ್ಹೊತು. 50 ತ್ಯುನೊನೆ ಸೊಕ್ಕ ಐನ ಮಾರಾ ಡೊಳಾ ಕ್ಹಾಮೊ ಅಸಹ್ಯ ಕಾಮೊನೆ ಕರ‍್ಯಾ; ಮಿ ತೆ ದೆಕಿನ ತ್ಯುನೊನೆ ನಿರ್ಮೂಲ ಕರ‍್ಯೊಸ.

51 ಸಮಾರ್ಯಾ ಕವಾಲಿ ತು ಕರಲ ಪಾಪೊಮಾ ಅರ್ದು ಕರಿ ನೈ. ತುಬಿ ತಾರಾ ಭೆನೊತಿಬಿ ಘನ್ನಾ ಕೆಟ್ಟ ರ‍್ಹಯಲ ಅಸಹ್ಯ ಕಾಮೊನೆ ಕರಿಸ; ತು ಕರಲ ಹಿಸಾಬ ನೈಸೊ ಕೆಟ್ಟ ವಿಚಾರೊಕ್ಹು ತ್ಯುನೆ ನಿರ್ದೊಶಿಯೊ ವ್ಹೈ ಕೈನ ದೆಕಾಡಿನ ದಿದಿ. 52 ತಾರಾ ದೊಷೊಜ ತಾರಾ ಭೆನೊನಾ ಪಕ್ಷಮಾ ಹುಬ್ರಯಲಕ್ಹು ತು ಸರಮಾ; ತ್ಯುನಾತಿಬಿ ಘನ್ನಾ ತು ಕರಲ ಅಸಹ್ಯ ಪಾಪೊನಾ ಮೂಲಕ ತ್ಯುನೆ ತಾರಾತಿಬಿ ಚೊಕಾ ವ್ಹೈ ಕೈನ ದಿಕ್ಹಿನ ಆಯಾಸ; ತು ಲಜ್ಜೆಪಡು, ಸರಮ ನೈಸೊ; ತಾರಾ ಭೆನೊ ನಿರ್ದೊಶಿಯೊ ಕೈನ ದೆಕಾಡಿನ ದಿದಿಸ.

53 ಸೊದೊಮ, ತಿನಾ ಕುಮಾರ್ತೆಯರೊ, ಸಮಾರ್ಯಾ, ತಿನಾ ಕುಮಾರ್ತೆಯರೊ, ಇವ್ನಿ ಕೆಟ್ಟ ವಾಟ ಮಿ ತಪ್ಸಾಡುಸ, ತಿನಾ ಕ್ಹಾತೆ ತಾರಿ ಕೆಟ್ಟ ವಾಟನೆ ತಪ್ಸಾಡುಸ. 54 ಅಮ್ಮ ರ‍್ಹತಾಮಾ ತು ತಾರಾ ಕೆಟ್ಟ ಕಾಮೊನಾ ಮೂಲ ತ್ಯುನೊನೆ ಸ್ಹೆಂ ಕರಲಕ್ಹು ಲಜ್ಜೆ ಪಡ್ದುಸ, ಸರಮಾಸಿ. 55 ತೆಳಾಮಾ ಸಮಾರ್ಯಾ, ಸೊದೊಮ್ ಕವಾಲಿಯೊ ತಾರಾ ಭೆನೊ ತ್ಯುನಾ ಕುಮಾರ್ತೆಯೊ ತ್ಯುನಾ ಪೈಲಾನಾ ಸ್ಥಿತಿನೆ ಸೆರಸ, ತುಬಿ ತಾರಾ ಕುಮಾರ್ತೆಯೊ, ತುಮಾರಾ ಪೈಲಾನಾ ಸ್ಥಿತಿನೆ ಸೆರೊಸಿ. 56 ಅರಾಮಿನಾ ಕುಮಾರ್ತೆಯೊ, ತಿನಾ ಸುತ್ತೆ ರ‍್ಹಯಲ ಕ್ಹಾರಾಜನಾ, ತುನೆ ಕಿಯಾಬಿ ಹಿನಾವಾಲಾ ಪಿಲಿಷ್ಟಿನಾ ಕುಮಾರ್ತೆಯೊ, ವರಿ ಎ ಕ್ಹಾರಾವೊನಾ ದೊಷನೆ ತು ಗುರಿ ಥಾವಾತಿ ಪೈಲಾಜ಼, 57 ತಾರು ಕೆಟ್ಟತನಾ ಬಯಲೆ ಆವಾತಿ ಪೈಲಾಜ಼ ತೆ ತಾರಾ ಗರ್ವಕಾಲಮಾ ಸೊದೊಮ್ ಕಾವಾಲಿ ತಾರಿ ಭೆನು ನಾಮ ತಾರಾ ಮ್ಹೊಡಾಮಾ ಐಯುಜ ನೈ; 58 ಹಮ್ನಾ ತಾರಿ ಕೆಟ್ಟ ವಾಟ ವರಿ ಕೆಟ್ಟ ವಿಚಾರೊನು ಫಲ ನೆ ತು ಅನುಭವಿಸಆನು ಐಯು. ಆಂ ಯಹೊವಾನಿ ವಾತ ವ್ಹೈ.

59 ಕರ್ತಾ ಥಯಲ ಯಹೊವಾ ಅಮ್ಮ ಕವಸ ತು ಒಡಂಬಡಿಕೆ ಮಿರಿನ ತಾರಿ ಕ್ಹಮ್ಮನೆ ಇನ್ಕಾರ ಕರಿಸ, ತು ಕರಲಕ್ಹು ತಿನಾ ತಕ್ಕ ಮಿ ತುನೆ ಕರುಸ. 60 ಕಿಮ್ಮಬಿ ಮಿ ತಾರಾ ಜಾಂಜಿಮಾನನಾ ಕಾಲಮಾ ತಾರಾ ಕ್ಹಾತೆ ಕರಿಲಿದಲ ಒಡಂಬಡಕೆನೆ ಸ್ಹೆಂ ನೆ ಲೈನ ತಾರಾಕ್ಹಾತೆ ಕೆಳಾಮಾಜ಼ ನೈ ತಪ್ಪಲ ಒಡಂಡಿಕೆ ಕರಲಿನ ಖಾತ್ರಿ ಕರುಸ. 61 ಇನಾಹುತಿ ಮಿ ಕುಮಾರ್ತೆಯೊನೆ ನಿಂಗತ ತುನೆ ದಿವಾನಾ ತಾರಾ ಭೆನೊ ತಾರಾಮಾ ಸೆರತಾಮಾ ತು ತಾರಾ ಕೆಟ್ಟ ವಾಟೊನೆ ಸ್ಹೆಂ ಕರಲಿನ ಸರಮಾಸಿ; ಆಂ ಮಾರಿ ದಯಾ ತಾರಾ ಪಾಚಲಿ ಒಡಂಡಿಕೆನು ಫಲ ನ್ಹವೈ. 62 ಮಿ ಎ ಒಡಂಬಡಿಕೆನ ತಾರಾ ಕ್ಹಾತೆ ಕರಿಲಿವಾನೆ ಮಿಜ ಯಹೊವಾ ವ್ಹೈ ಕೈನ ತುನೆ ಗೊತ್ತ ಥಾವಸ; 63 ಮಿ ತಾರಾ ಕೆಟ್ಟ ಕಾಮೊನೆ ಕ್ಹಾರಾ ಮಾಫ ಕರಲ್ಪರ ತು ತೆ ಕ್ಹಾರಾವೊನೆ ಸ್ಹೆಂ ಕರಿನ ಸರಮೈನ ತಾರಾ ಅವಮಾನನಾ ನಿಮಿತ್ತ ಹಜಿ ಮ್ಹೊಡು ಕ್ಹೊಲ್ಯಾವಾಚಿ ರ‍್ಹಶಿ ಆಂ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ.