ಯಜಕೆಲಾ 27

ತುನರನಾ ಆಂತ್ಯಕ್ರಿಯೆನು ಗಿದ್ದ

1 ಯಹೊವಾ ವರಿಯಕ್ಕ ವಾಕ್ಯಾ ಮನೆ ದಿದ್ಯೊ 2 ಮನಕ್ಹನಾ ದಿಕ್ರಾ, ತು ತುರನಾ ವಿಷಯಮಾ ಶೊಕನು ಗಿದ್ದ ಉಚಾ, ತಿನೆ ಅಮ್ಮ ಕೆ 3 ಸಮುಂದರನಾ ಬಾಕಲಕನ ರ‍್ಹತಿ ಜನಾಂಗೊನಾ ಹುತಿ ಘನ್ನಾ ದ್ವಿಪನಾ ಕ್ಹಾತೆ ವ್ಯಾಪಾರ ಕರಾನಿ ಪುರಿ! ಕರ್ತಾ ಥಯಲ ಯಹೊವಾ ಅಮ್ಮ ಕವಸ ತುರ, ಪುರಿತರಾ ಕ್ಹುಬಸುರತ ಥಯಸ ಖೈನ ಕೈಲಿದಿತೊ! 4 ತಾರಿ ಜ಼ಗಾತೊ ಸಮುಂದರನಾ ವಚ್ಮಾ಼ಜ಼಼ ವ್ಹೈ; ತುನೆ ಭಾಂದಲವಾಲಾ ತಾರಿ ಸುಂದರತಾನೆ ಪುರಾ ಕರ‍್ಯಾ. 5 ಶೆನಿರ, ಪಾನಿನಾ ತುರಾಯಿ ಝಾಡಕ್ಹು ತಾರಾ ಪಕ್ಕೆನಾ ಹಲಗಿಯೊ ಕರಿನ ತ್ಯಾ ಕ್ಹಂಬೊ ತಯ್ಯಾರ ಕರಾನೆ ಲೆಬುನೊನಕ್ಹು ದೆವದಾರ ಝಾಡನೆ ಲಾಯಾ. 6 ಬಾಷಾನನಾ ಅಲ್ಲೊನ ಝಾಡತಾ ತಾರಾ ಹುಟ್ಟೊ ತಯ್ಯರ ಕರಿನ ಕಿತ್ತಿಮ್ ದ್ವಿಪನಾ ತಿಲಕನಾ ಹಲಗಿಕ್ಹು ತಾರಾ ಉಪ್ಪರ್ಲಿ ಮಾಳಗಿನೆ ಭಾಂದಿನ ದತಕ್ಹು ಕೆತ್ಯಾ. 7 ತಾರಿ ಹಾಯಿ ತುನೆ ಝಂಡೊ ಥಾವಾದೆ ಕೈನ ತಿನೆ ಐಗುಪ್ತನಾ ಕಾಮೊನಾ ನಾರುಬಟ್ಟೆಕ್ಹು ಕರ‍್ಯಾ. ತಾರಾ ಮೆಲ್ಕಟ್ಟ ಎಲಿಷಕರಾವಳಿನಾ ಧುಮ್ರ ರಕ್ತವರ್ಣಕ್ಹು ಚಿತ್ರಾ ನಿಂಗತ ಭರೈತು. 8 ಚಿದೊನನಾ ಅವಾರ್ದಿವಾಲಾ ತುನೆ ಹುಟ್ಟ ಘಾಲಸ; ತುರ ಗಾಮವಾಲಾ, ತಾರಾಮಾನಾ ವಿವೆಕಿಯೊ ತಾರಾ ಹಡಗೊ ಚ಼ಲಾವಾಲಾ; 9 ತಾರಾಮಾ ಮಳ್ಯಲ ಗೆಬಲಿನನಾ ಶಾನಾ ಶಾಣ್ಯಾ ತಾರಿ ಕಂಡಿಯೊನೆ ಘಟ್ಟ ಕರಸ. ಸಮುಂದರನಾ ಕ್ಹಾರಾ ಹಡಗೊ ಹಡಗಾ ಚ಼ಲಾವಾಲಾವೊನಾ ಕ್ಹಾತೆಜ಼ ತಾರಾ ಕ್ಹಾತೆ ರ‍್ಹೈನ ತುನೆ ಸಾಮನೊ ಲೈನ ದೆತಾತಾ, 10 ಪಾರಸಿಯವಾಲಾ ಲುದ್ಯವಾಲಾ ಪುಟ್ಯವಾಲಾ ತಾರಾ ಸೈನ್ಯನಾ ಅದಿಕಾರಿಯೊ ಥೈನ ವ್ಹತಾ ಕ್ಹೆಡ್ಯ ಶಿರಸ್ತ್ರಾಣೊನೆ ತಾರಾಮಾ ಜೊತ ಪಾಡಿನ ತುನೆ ಭುಷಣೆ ಕರಾಡಾತಾ. 11 ಅವಾರ್ದಿನಾವಾಲಾ ಹಲೆಕ ಸೈನಿಕೊ ಸುತ್ತ ಮುತ್ತ ತಾರಾ ಗೊಡಿಯೊ ಪರ ಹುಬ್ರಯಾತಾ, ಗಮ್ಮದ್ಯವಾಲಾ ತಾರಾ ಕೊತ್ತಲೊಮಾ ಕೈದಾಲಾ ಥಯಾತಾ, ಕ್ಹಾರಾ ಜ಼ನಾ ತ್ಯುನಾ ಕ್ಹೆಡ್ಯವೊನೆ ಸುತ್ತ ಮುತ್ತೆ ತಾರಾ ಗೊಡಿಯೊನೆ ಜೊತ ಘಾಲಿನ ತಾರಿ ಸುಂದರತಾನೆ ಪುರಾ ಕರ‍್ಯಾ. 12 ಘನ್ನಾ ತಾರಾ ತರಾನಿ ಆಸ್ತಿ ತುನೆ ಚಾ಼ಯೆ ಥಯಲಕ್ಹು ತಾರ್ಷಿಷವಾಲಾ ತುಕನ ಕಾಮವಾಲಾ ಥೈನ ರುಪ್ಪು ಲ್ಹೊಡು ತವರ ಸಿಸೊ ತುನೆ ದಿದ್ಯಾ.

13 ಯಾವಾನವಾಲಾ ತುಬಲವಾಲಾ ಮೆಷೆಕವಾಲಾ ತಾರಾ ಪರವಾಗಿ ವ್ಯಾಪಾರ ಕರಿನ ನರಜಾನವರೊನೆ ತಾಂಬಾ ಸಾಮನೊ ತುನೆ ಲಿವಾನು ದಿವಾನು ಕರ‍್ಯಾ. 14 ತೊಗರ್ಮವಾಲಾ ಯುದ್ದನಾ ಘೊಡಾ, ಜಾ಼ತನಾ ಘೊಡಾ ಹೆಸರಗದಡಾ ಎಕ್ಹಾರು ತಾರಾಹುತಿ ಲಾಯಾ. 15 ದೆದಾನವಾಲಾ ತಾರಾ ವ್ಯಾಪಾರಿಯೊ; ಘನ್ನಾ ದ್ವಿಪನಾ ಉತ್ಪತ್ತಿ ತಾರಾ ಹತೆ ಮಳ್ಯು; ಹತ್ತಿನಾ ದಾತೊನೆ ಕರಿಝಾಡೊ ತುನೆ ವಾಟೊ ದಿದ್ಯಾ. 16 ತಾರಾ ಹತ್ತನಾ ಕಾಮನಾ ಸಾಮನೊ ಘನ್ನಾ ರ‍್ಹಯಲಕ್ಹು ಆರಾಮವಾಲಾ ತಾರಾ ಥೈನ ವ್ಯಾಪಾರ ಕರಿನ ಕೆಂಪರಲ ರಕ್ತಾಂಬರ ಕಸುತಿನಾ ವಣ್ಣಾ ನಾರುಬಟ್ಟೆ ಹವಳ ಮಾಣಿಕ್ಯ ಎಕ್ಹಾರಾ ಸಾಮನೊ ತುನೆ ಲೈನ ರಿಚಾ಼ಯಾ. 17 ಯೆಹುದ್ಯವಾಲಾ ಇಸ್ರಾಯೆಲ ದೆಶವಾಲಾ ತುಕನನಾ ಕಾಮವಾಲಾ ಥೈನ ಮಿನ್ನಿಥಿವಾಲಾ ಘೌಂ ಖಡಿಸಕ್ಕರ ಜೆನ ತೆಲ ಬಾಸನು ತೆಲ ಎ ಸಾಮನೊನೆ ತುನೆ ದಿದ್ಯಾ. 18 ತಾರಾ ಹತ್ತಾನಾ ಕಾಮನಾ ಸಾಮನೊ ತುಕನ ಘನ್ನಾ ರ‍್ಹಯಲಕ್ಹು ಘನ್ನಾ ತರಾ ತರಾನಿ ಆಸ್ತಿ ತುನೆ ಚಾ಼ಯೆ ಥಯಲಕ್ಹಿಬಿ ದಮಸ್ಕವಾಲಾ ತಾರಾ ಪರವಾಗಿ ವ್ಯಾಪಾರ ಕರಿನ ಹೆಲ್ಬೊನನು ದ್ರಾಕ್ಷಿಯೊನು ರಕ್ಹನೆ ಚಾಹರನಾ ಬಕ್ರಾನಾ ಬಾಲೊ ತುಕನ ಭರ್xಯಾ. 19 ವೆದಾನವಾಲಾ ದಾವಾನವಾಲಾ ಉಜಾಲಿತಾ ಬಿಜಾ಼ ಬಿಜಾ಼ ಸನುಗೊನೆ ಲೈನ ತುನೆ ದಿದ್ಯಾ. ಲ್ಹೊಡು ಮಸಾಲಾನು ಸಾಮನ ತುನೆ ದಿದ್ಯಾ. 20 ದೆದಾನವಾಲಾ ಹಲ್ಲಣನೆ ಕರೆಟ್ಟ ರ‍್ಹಯಲ ಚೊ಼ಕಾ ಜಮಕಾನೊ ತಾರಾಹುತಿ ಲಾವಾಲಾ ವ್ಯಾಪಾರಿಯೊ ಥಯಾತಾ. 21 ಅರಬವಾಲಾ ಕೆದಾರನಾ ಕ್ಹಾಸ ಅದಿಕಾರಿಯೊ ತಾರಾ ಹತ್ತನಾ ಕಾಮ ಕರಾಲಾ; ಬಕ್ರಿಯೊ ಟಗರೊ ಬೈಲೊನೆ ತಾರಾಹುತಿ ಚ಼ಲೈಲಿನ ಆಯಾ. 22 ಶೆಬದವಾಲಾ ರಗ್ಮವಾಲಾ ತುಕನನಾ ಕಾಮವಾಲಾ ಥಯನ ಕನಕ ಕ್ಹಾಸ-ಕ್ಹಾಸ ಬಾಸನು ತೆಲ ಸಮಾಸ್ತಾಮುಲ ರತ್ನ ಎ ಸಾಮನೊ ತಾರಾಹುತಿ ಲಾಯಾ. 23 ಹಾರಾನ ಕನ್ನೆ ಎದೆನ ಜ಼ಗಾವಾಲಾ ಶೆಬ, ಅಶ್ಯುರ್, ಕಿಲ್ಮದ ಗಾಮ್ನಾ ಕಾಮವಾಲಾ. 24 ತಾರಾ ವ್ಯಾಪಾರಿಯೊ ಥೈನ ಉತ್ತಮಾಂಬರನಾ ಕಸುತಿನಾ, ಧುಮ್ರನಾ ನಿಲುವಂಗಿ, ಎ ಕ್ಹಾರಾ ಮಾಲೊನೆ ರಾಕ್ಹಕ್ಹು ಘಟ್ಟ ಬಿಗ್ದಿನ ಯಕ್ಕತರಾ ವಣ್ಣಾಕ್ಹು ಗಾಟ್ರಾ, ತಾರಾಹುತಿ ಕಮಾಯಾ. 25 ತಾರ್ಷಿನಾ ಹಡಗಾ ಸಾಲ-ಸಾಲ ತುನೆ ಚಾ಼ಯೆ ಥಯಲ ಜಿನಿಸೊನೆ ಲಿನ ಆಯಾ. ತು ಬರ್ತಿ ಥಯನ ಸಮುಂದರನಾ ವಚ್ಮಾ ಘನ್ನು ವಜ್ಜು ಥೈ. 26 ಹುಟ್ಟ ಘಾಲಾಲಾ ತುನೆ ಮಹಾ ತರಂಗೊನೆ ಅಟ್ಕಾಯಾಸ; ಪುರ್ವ ದಿಕ್ಕನೊ ಘನ್ನೊ ಜೊ಼ರ ವಾರು ತುನೆ ಸಮುಂದರನಾ ವಚ್ಮಾ ಲಾಗ್ಯುಸ. 27 ತಾರಿ ಆಸ್ತಿ, ತಾರಾ ಜಿನಿಸೊ, ತಾರಾ ಸಾಮನೊ, ತಾರಾ ಹಡಗೊ ಚ಼ಲಾವಾಲಾ, ತಾರಾ ಅಂಬಿಗೊ, ತಾರಾ ಕಂಡಿಯೊನೆ ಘಟ್ಟ ಕರಾಲಾ, ತಾರಾ ವ್ಯಾಪಾರಿಯೊ, ತುಕನನಾ ಕ್ಹಾರಾ ಸೈನಿಕೊ, ಕಿಮ್ಮೆಬಿ ತಾರಾಮಾ ಮಳ್ಯಲ ತಾರಾ ಸಿಬ್ಬಂದೊಯೊ ತಾರಾ ನಾಶನನಾ ದಿನ್ನಮಾ ಸಮುಂದರ ಡುಬಿ ಜಾ಼ವಸ. 28 ತಾರಾ ಹಡಗೊ ಚಲಾವಾಲಾವೊನಾ ಕುಗಾಟನೆ ನಜಿಕನಾ ಗಾಮೊ ಕಾಪಸ. 29 ಹುಟ್ಟ ಘಾಲಾಲಾ ಕ್ಹಾರಾ ಜ಼ನಾ ಅಂಬಿಗೊ ಸಮುಂದರನಾ ಕ್ಹಾರಾ ನಾವಿಕೊ ತ್ಯುನಾ ತ್ಯುನಾ ಹಡಗೊತಾ ಉತ್ರಿನ ಜಿಮಿನ ಪರ ಹುಬ್ರೈನ 30 ತಾರಾಹುತಿ ಅವಾಜ಼ ಗೈನ ದುಕ್ಕಕ್ಹು ಅಡ್ಡಿನ ಮಾತಾಪರ ಧುಳನೆ ನಾಕಿನ ರಾಕ ಪರ ಪಡಿನ ಉಳ್ಯಾಡಿನ 31 ತಾರಾಹುತಿ ಮಾತು ಭದ್ರ್ಯಲಿನ ಕೊತ್ಳೊ ಸುತ್ತಿಲಿನ ದುಕ್ಕಕ್ಹು ಗೊಳಾಡಿನ ತಾರಾಹುತಿ ಘನ್ನಾ ರವಸ. 32 ತ್ಯುನೆ ರೊದನ ಕರ್ತಾ ತಾರಿ ವಿಷಯಮಾ ಶೊಕನು ಗಿದ್ದ ಕೈನ ಅಮ್ಮ ಕದ್ಯಾ, ಸಮುಂದರನಾ ವಚ್ಮಾ ಬಿಕೊ ಕವಾನಾ ತುರನೆ ಕಯು ಸಮಾನ ವ್ಹೈ? 33 ತಾರಾ ಸಾಮನೊ ಸಮುಂದರೊನೆ ಹೈದಿನ ಫೈಲಿ ಗಯಾ. ತ್ಯುನಾಕ್ಹು ಘನ್ನಾ ಜನಾಂಗೊ ಭರ್xಯೊ; ತಾರಿ ಘನ್ನಿ ಆಸ್ತಿಕ್ಹು ವ್ಯಾಪಾರನಾ ಜಿನಿಸೊಕ್ಹು ಭುರಾಜೊ಼ನೆ ಬೆಳ್ಸಾಯೊ. 34 ಹಮ್ನಾತುನಿ ತು ಸಮುಂದತೊ ಹಾಳ ಥಯೊ. ತಾರಾ ಸಾಮನೊ ತುಕನ ಮಳ್ಯಲ ಕ್ಹಾರಾ ಮನಕ್ಹೊ ಘನ್ನಾ ಪಾನಿಮಾ ಡುಬಿ ಗಯಾ. 35 ಕರಾವಳಿನಾ ಕ್ಹಾರಾ ರ‍್ಹವಾಲಾ ತಾರಿ ಗತಿನೆ ಭುಚ್ಕಿ ಗಯಾಸ; ರಾಜಾ಼ ಚುಮ್ಮೈಗಯು ಘಾಬ್ರಾ ಥಯಾಸ. 36 ಜನಾಂಗೊನಾ ಕಾಮವಾಲಾ ತುನೆ ದೆಕಿನ ಅಕ್ಹಸ; ತು ಘನ್ನು ನಾಶ ಥಯನ ವರಿ ಕೆಳಾನಾಜ ನೈ ರ‍್ಹಯಲವಾಲೊ ಥಾಶಿ.