ಯಜಕೆಲಾ 40

ಯೆಜೆಕೆಲನೆ ಯೆರುಸೆಲಿಮನೆ ಲಿನ ಗಯಲ

1 ಹಮೆ ಸೆರೆ ಥಯಲ ಪಚ್ಚಕ್ಹವಾ ವರಕ್ಹನಾ ಕದ್ಯಾಮ ಗಾಮ ಹಾಳ ಥೈನ ಚೌದಾವಾ ವರಕ್ಹನಾ ಯಕ್ವಾ ಮ್ಹೈನಾನಾ ದಕ್ಹವಾ ದಿನ್ನಮಾ, ಹೊ, ತೆಜ಼ ದಿನ್ನಮಾ ಮಿ ಯಹೊವಾನು ಹತ್ತ ಮ್ಹೆಲಲ ಹುತಿ ಕ್ಹುದಾನಿ ತಾಕತ ಮಾರಾಮಾ ಐನ ತೆ ಮನೆ ತ್ಯಾ ಲಿನ ಗಯೊ. 2 ತೆ ಮನೆ ಇಸ್ರಾಯೆಲ ದೆಶನೆ ಲೈನ ಅತ್ಯುನ್ನತ ಡೊಂಗರಪರ ಉತಾರ್ಯೊಸ ಕೈನ ಕ್ಹುದಾನಾ ದರ್ಶನಮಾ ಮನೆ ದಿಕ್ಹಿನ ಐಯು. ದಕ್ಷಿಣ ಬಗಲ ತೆ ಡೊಂಗರನಾ ಉಪ್ಪರ ಗಾಮ ನಿಂಗತ ರ‍್ಹವಾನು ಯಕ್ಕ ಘರ ದಿಕ್ಹ್ಯು. 3 ತೆ ಮನೆ ತ್ಯಾ ಲಾವಾನೆ ದೆಕ, ತಾಂಬಾ ನಿಂಗತ ಚಮ್ಕಾನೊ ಯಕ್ಕ ಮನಕ್ಹ ಕಿಮ್ಮತನಿ ಹುರಿ ಹುರಿನೆ ಅಳತಿನಿ ಲಾಕಡಿ ಹತ್ತಮಾ ಧರಿಲಿನ ಬಾಕಲಮಾ ಹುಬ್ರಯೊತೊ. 4 ತೆ ಮನಕ್ಹ ಮನೆ - ಮನಕ್ಹನಾ ದಿಕ್ರಾ, ತು ಡೊಳಾ ಘಾಲಿನ ದೆಕ, ಕಾನ ದಿನ ಐಕ; ಮಿ ತುನೆ ದೆಕಾಡಾನು ಕ್ಹಾರು ಮನಸ್ಸಮಾ ತಿಳ್ದಿಲೆ; ಮಿ ತುನೆ ದೆಕಡಾನು ತು ದೆಕುಜ಼ ಕೈನ ನ್ಹ್ಯಾ ಲಾಯಲ ವ್ಹೈ; ತು ದೆಕಲ ಕ್ಹಾರು ಇಸ್ರಾಯೆಲ ವಂಶವಾಲಾವೊನೆ ಪ್ರಕಟ ಕರು ಕೈನ ಕದ್ಯೊ. 5 ದೆಕ, ಯಕ್ಕ ಗೊಡಿ ತೆ ಘರನೆ ಸುತ್ತಿಲಿದ್ಯು; ತೆ ಮನಕ್ಹನಾ ಹತ್ಮಾ 3 ಹತ್ತ ಲಾಂಬು ಅಳತಿಕೊಲ ವ್ಹತ್ತು. ತೆ ಗೊಡಿನೆ ಜಾ಼ಡು ಯಕ್ಕ ಲಾಕಡು, ಉಚ್ಚು ಯಕ್ಕ ಲಾಕ್ಡು ಅಳತಿ ಕರ‍್ಯೊ. 6 ಪಾಚಲ್ತೊ ತೆ ಪುರ್ವನಾ ಹೆಬ್ಬಾಗಿಲನೆ ಐನ ಪೊಟಂಗ್ಯೊ ಚ಼ಡಿನ ಹೊಚ಼ಲನಿ ರುಂದನೆ ಯಕ್ಕ ಲಾಕ್ಡು ಅಳತಿ ಕರ‍್ಯೊ. ಯಕ್ಕೆಕ ಹೊಚ಼ಲನು ರುಂದನೆ ಯಕ್ಕೆಕ ಲಾಕ್ಡು ವ್ಹತ್ತು. 7 ತ್ಯಾ ಗೊಡಿಮಾ ರ‍್ಹಯಲ ಯಕ್ಕೆಕ ಕ್ಹೊಲಿನು ಲಾಂಬು ಯಕ್ಕ ಲಾಕ್ಡು, ರುಂದ ಯಕ್ಕ ಲಾಕ್ಡು; ದಿವಸ್ತಾನನಾ ಕ್ಹಾಮು ಮ್ಹೊಟು ಬಾಕಲ ತಿನಾ ಕ್ಹಾಮು ವ್ಹಚ಼ಲ ಲಾಂಬಾಮಾ ಯಕ್ಕ ಲಾಕಡಿ ವ್ಹತಿ ತೆ ಕೊಲಿಯೊ ಯಕ್ಕೆಕ 5 ಹತೊ ಲಾಂಬಾಮ ವ್ಹತಾ ದಿವಸ್ತಾನ 8 ತೆ ಗೊಡಿನಾ ಕೊಣಾ ಯಕ್ಕನೆ ಯಕ್ಕ ಪಾಂಚ಼-ಪಾಂಚ಼ ಮಾರ ದುರ ವ್ಹತ್ತಾ; ದೆವಸ್ಥಾನನೆ ಕ್ಹಾಮು ಹೆಬ್ಬಾಗಿಲ ಕೈಸಾಲೆನಾ ಹೊಚ಼ಲನಾ ರುಂದ ಯಕ್ಕ ಲಾಕ್ಡು ವ್ಹತ್ತು. 9 ಪಾಚ಼ಲ್ತೊ ತೆ ಹೆಬ್ಬಾಗಿಲ ಕೈಸಾಲೆನಾ ರುಂದನೆ ಅಳತಿ ಕರ‍್ಯೊ; ತೆ 4 ಹತ್ತ ವ್ಹತ್ತು; ಕ್ಹಾಮೊನು ರುಂದ 1-1 ಹತ್ತ ವ್ಹತ್ತು; ಹೆಬ್ಬಾಗಿಲ ಕೈಸಾಲೆ ದೆವಸ್ಥಾನನಾ ಕ್ಹಾಮು ವ್ಹತ್ತು. 10 ಪುರ್ವನು ಹೆಬ್ಬಾಗಿಲನಾ ಬೆ ಜ಼ಗಾ ತನ್ನ ತನ್ನ ಗೊಡಿನಾ ಕೊಣಿಯೊ ವ್ಹತ್ತಾ; ತೆ ಕ್ಹಾರು ಯಕ್ಕಜ಼ ಅಳತಿನು ವ್ಹತ್ತು; ಬೆ ಜ಼ಗಾನಾ ನಿಲವುಕಂಬಾ ಯಕ್ಕಜ಼ ಅಳತಿನಾ ವ್ಹತ್ತಾ.

11 ಪಾಚ಼ಲ್ತೊ ತೆ ಹೆಬ್ಬಾಗಿಲನಾ ದ್ವಾರನೆ ಅಳತಿ ಕರ‍್ಯೊ; ರುಂದಮಾ 5 ಹತ್ತ ವ್ಹತ್ತು; ಲಾಂಬಾಮಾ 7 ಹತ್ತ ವ್ಹತ್ತಾ. 12 ಬೆ ಜ಼ಗಾಮಾ ಗೊಡಿನಾ ಕೊಣಿಯೊನಾ ಕ್ಹಾಮಾ ಅರ್ದಾಲೊ ವ್ಹತ್ತು. ಅವಕಾಶ ವ್ಹತ್ತು; ಭಂಬಿ ಬನಿನಾ ಗೊಡಿನಾ ಕೊಣಿಯೊನು ರುಂದ 3-3 ಹತ್ತ ವ್ಹತ್ತು. 13 ತೆ ಯಕ್ಕ ಬನಿನಾ ಗೊಡಿನಾ ಕೊಣಿನಾ ಮಾಳಗಿನಾ ಭರ್ಲ್ಯಾ ಕೊಣಾನೆ ಕದ್ಯಾಮ (ಯಕ್ಕ ಕೊಣಿನಾ) ಬಾಕಲತಾ (ವರಿಯಕ್ಕ ಕೊಣಿನಾ) ಬಾಕಲನೆ ಹೆಬ್ಬಾಗಿನಾ ರುಂದನೆ ಅಳತಿ ಕರ್ತಾಮಾ ಕ್ಹಡಾ ಬಾರಾ ಹತ್ತ ವ್ಹತಾ. 14 ಪ್ರಾಕಾರಮಾನಾ ನಿಲವುಕಂಬಾ ಲಕ್ಕಾ ನಿಲವುಕಂಬಾನಾ ಅಳತಿ ಕರ್ತಾಮಾ 30 ಹತೊ ವ್ಹತ್ತಾ; ಹೆಬ್ಬಾಗಿನೆ ಸುತ್ತ ಮುತ್ತ ಅಳತಿ ಕರ್ಯೊ. 15 ಪ್ರವೆಶ ಸ್ಥಾನನಾ ಭಾರಾತಾ ಮ್ಹೈನಾ ಕೈಸಾಲೆನಾ ಲಾಸ್ಟ ಲಕ್ಕಾ ಹೆಬ್ಬಾಗಿಲ 25 ಹತ್ತ ಲಾಂಬು ವ್ಹತ್ತು. 16 ಗೊಡಿನಾ ಕೊಣಿಯೊಮಾ ಮ್ಹೈನಾ ಭಂಬಿ ಬನಿನಾ ನಿಲವು ಖಂಬಾವೊಮಾ ಕೈಸಾಲೆಯೊಮಾ ನೈ ಕಾಡಾನಾ ಕಿಡಕಿಯೊ ಹೆಬ್ಬಾಗಿಲಮಾ ಸುತ್ತ ಮುತ್ತ ವ್ಹತ್ತಾ; (ಭಾರ್ಲ್ಯಾ) ನಿಲವು ಖಂಬಾವೊಮಾ ಕರ್ಜುರನಾ ಝಾಡೊ ಚಿತ್ರಾ ಕರಲ ವ್ಹತ್ತಾ.

ಭಾರ್ಲ್ಯು ಅಂಗ್ಳಾ

17 ಪಾಚ಼ಲ್ತೊ ತೆ ಮನೆ ಭಾರ್ಲ್ಯು ಪ್ರಾಕಾರ ಕನ ಲಾಯೊ; ದೆಕ, ಕ್ಹೊಲಿಯೊ ಪ್ರಾಕಾರನಾ ಸುತ್ತೆ ಘಾಲನ ನೆಲಗಟ್ಟ ದೆಕ್ಹ್ಯಾ; ಮಳಿನ ನೆಲಗಟ್ಟನಾ ಉಪ್ಪರ ಮುವ್ವತ ಕ್ಹೊಲಿಯೊ ವ್ಹತ್ತಾ. 18 ತೆ ಹೆಟಲ್ಯಾ ನೆಲಗಟ್ಟ ಹೆಬ್ಬಾಗಿನಾ ಭಂಬಿ ಜ಼ಗಾ ವಚಾ಼ಯಲ ತ್ಯುನಾ ಅಕ್ಲಾ ರುಂದ ವ್ಹತ್ತಾ. 19 ತೆ ಪುರ್ವಮಾಬಿ ಪಚ್ಚಿಮಮಾಬಿ ಹೆಟಲ್ಯಾ ಹೆಬ್ಬಾಗಿಲನಾ ಮ್ಹೈತಾ ಮ್ಹೈನಾ ಪ್ರಾಕಾರನಾ ಭಾರಾ ಲಕ್ಕಾ ಅಳತಿ ಕರ್ತಾಮಾ ಐವತ್ತ ಹತ್ತ ಯಕ್ಲು ವ್ಹತ್ತು. 20 ಎ ನೈಸೊ ಭಾರ್ಲ್ಯು ಪ್ರಾಕಾರನಾ ಉತ್ತರನು ಹೆಬ್ಬಾಗಿಲನು ರುಂದನೆ ಲಾಂಬಾನೆ ಅಳತಿ ಕರ‍್ಯೊ. 21 ತಿಮಾ ಭಂಬಿ ಬನಿ ಗೊಡಿನಾ ಕೊಣಿಯೊ ತನ್ನ ತನ್ನ ವ್ಹತ್ತಾ; ತ್ಯಾನಾ ನಿಲವು ಕಂಬಾ ಕೈಸಾಲೆನಿ ಪಸ್ಟನಾ ಹೆಬಾಗಿಲನಾ ಅಳತಿ ನಿಂಗತ ವ್ಹತ್ತಾ; ತೆ ಹೆಬ್ಬಾಗಿಲನು ಲಾಂಬು ಪಚ್ಚಕ್ಹ ಹತ್ತ ವ್ಹತ್ತು. ರುಂದಮಾ ಕ್ಹಡಾ ಬಾರಾ ಹತೊ ವ್ಹತಾ. 22 ತ್ಯಾನಾ ಕಿಡಕಿಯೊ ಕೈಸಾಲೆ ಚಿತ್ರಿತ ಥಯಲ ಕರ್ಜುರನಾ ಝಾಡೊ ಪುರ್ವ ಹೆಬ್ಬಾಗಿಲನಾ ಅಳತಿ ಅಕ್ಲಾ ವ್ಹತ್ತಾ; ಕ್ಹಾತ ಪೊಟಂಗ್ಯೊ ಚ಼ಡಿನ ತ್ಯಾ ಚಾ಼ಲ್ಯಾತಾ; ಕೈಸಾಲೆ ಮ್ಹೈ ವ್ಹತ್ತು. 23 ಭಾರ್ಲ್ಯು ಪ್ರಾಕಾರನಾ ಪಚ್ಚಿಮ ಪುರ್ವ ಹೆಬ್ಬಾಗಿಲೊನಾ ಕ್ಹಾಮಾ ಮ್ಹೈನಾ ಪ್ರಾಕಾರನೆಬಿ ಹೆಬ್ಬಾಗಿಲೊ ವ್ಹತ್ತಾ; ಯಕ್ಕ ಬಾಕಲತಾ ಬಿಜೆಕ್ಕ ಬಾಕಲನೆ ಐವತ್ತ ಹತೊ ಅಳತಿ ಕರ‍್ಯೊ.

ದಕ್ಷಿಣನು ಬಾಕಲ

24 ಪಾಚಾ಼ಲ್ತೊ ತೆ ಮನೆ ದಕ್ಷಿಣನೆ ಬಲೈಲಿನ ಆಯೊ. ದೆಕ, ತ್ಯಾ ಯಕ್ಕ ಹೆಬ್ಬಾಗಿಲ ಛೆ; ತೆ ತ್ಯಾನಾ ನಿಲವುಖಂಬಾವೊನೆ ಕೈಸಾಲೆನೆ ಅಳತಿ ಕರ್ತಾಮಾ ಪಾಚ಼ಲ್ಯಾ ಅಳತಿಯೊಜ಼ ದಿಕ್ಹಿನ ಆಯಾ. 25 ತಿಮಾಬಿ ತಿನಾ ಕೈಸಾಲೆಮಾಬಿ ಕ್ಹಾರಾ ಬನಿ ತ್ಯವಾ ಕಿಡಕಿಯೊ ವ್ಹತ್ತಾ; ಹೆಬ್ಬಾಗಿಲನು ಲಾಂಬು ಪಚ್ಚಕ್ಹ ಹತೊ, ರುಂದ ಕ್ಹಡಾಬಾರಾ ಹತ್ತ ವ್ಹತ್ತು. 26 ತ್ಯಾ ಚ಼ಡಾನೆ ಕ್ಹಾತ ಪೊಟಂಗ್ಯೊ ವ್ಹತ್ತಿಯೊ; ಕೈಸಾಲೆ ಮ್ಹೈ ವ್ಹತ್ತು; ಕೈಸಾಲೆನಾ ಇದ್ರಾ ಬದರ ನಿಲವು ಖಂಬಾವೊಮಾ ಕರ್ಜುರನಾ ಝಾಡೊ ಚಿತ್ರಿತ ಥಯಾತಾ. 27 ಮ್ಹೈನಾ ಪ್ರಾಕಾರಮಾಬಿ ದಕ್ಷಿಣನೆ ಹೆಬ್ಬಾಗಿಲ ವ್ಹತ್ತು; ದಕ್ಷಿಣಮಾ ಯಕ್ಕ ಬಾಕಲತಾ ಕ್ಹಾಮಲ್ಯಾ ಬಲನೆ ಕ್ಹೊ ಹತ್ತ ಅಳತಿ ಕರ‍್ಯೊ.

ಮ್ಹೈನಿ ಅಂಗ್ಳಾ

28 ಪಾಚ಼ಲ್ತೊ ತೆ ಮನೆ ದಕ್ಷಿಣನು ಬಾಕಲನಾ ವಾಟತೊ ಮ್ಹೈನಾ ಪ್ರಾಕಾರನೆ ಬಲೈಲಿನ ಆಯೊ; ತೆ ಪಶ್ಚಿಮ ಹೆಬ್ಬಾಗಿಲನೆ ತ್ಯಾನಾ ಗೊಡಿನಾ ಕೊಣಿಯೊ, ನಿಲವುಕಂಬ, ಕೈಸಾಲೆ ಎ ಕ್ಹಾರು ಅಳತಿ ಕರ್ತಾಮಾ ತೆಕ್ಲಾಜ಼ ಅಳತಿ ವ್ಹತ್ತಾ; 29 ತಿಮಾಬಿ ತಿನಾ ಕೈಸಾಲೆಮಾಬಿ ಕಿಡಕಿಯೊ ಕ್ಹಾರಾ ಬನಿ ವ್ಹತ್ತಾ; ಹೆಬ್ಬಾಗಿಲ ಲಾಂಬಾಮಾ ಐವತ್ತ ಹತೊ ವ್ಹತಾ, ರುಂದಮಾ ಪಚ್ಚಕ್ಹ ಹತ್ತೊ ವ್ಹತ್ತಾ. 30 ಸುತ್ತ ಮುತ್ತ ಕೈಸಾಲಿ ವ್ಹತ್ತಾ; ಯಕ್ಕೆಕ ಲಾಂಬಾಮಾ ಪಚ್ಚಕ್ಹ ಹತೊ, ರುಂದಮಾ ಪಾಂಚ಼ ಹತೊ ವ್ಹತಾ. 31 ತೆ ಹೆಬ್ಬಗಿಲ ಕೈಸಾಲೆ ಭಾರಲ್ಯಾ ಪ್ರಾಕಾರನೆ ಅಭಿಮುಖ ವ್ಹತ್ತಾ; ತಿನಾ ನಿಲವು ಖಂಬಾವೊಮಾ ಕರ್ಜುರನಾ ಝಾಡೊ ಚಿತ್ರಿತ ಥಯಾತಾ; ತ್ಯಾ ಚ಼ಡಾನೆ ಆಟ ಪೊಟಂಗ್ಯೊ ವ್ಹತ್ತಾ.

ಪುರ್ವ ಬಗಲನಿ ಅಂಗ್ಳಾ

32 ತೆನೆ ಮ್ಹೈನಾ ದ್ರಾಕಾರನಾ ಪುರ್ವನೆ ಬಲೈ ಲೈನ ತ್ಯಾನಾ ಹೆಬ್ಬಾಗಿನೆ ತಿನಾ ಗೊಡಿನಾ ಕೊಣಿಯೊ, ನಿಲವುಕಂಬ, ಕೈಸಾಲೆ ಎ ಕ್ಹಾರು ಅಳತಿ ಕರ್ತಾಮಾ ತೆ ಅಳತಿಜ಼ ದಿಕ್ಹಿನ ಆಯಾ; 33 ತಿಮಾಬಿ ತಿನಾ ಕೈಸಾಲೆಮಾಬಿ ಕ್ಹಾರಾ ಬನಿ ಕಿಡಕಿಯೊ ವ್ಹತ್ತಿಯೊ; ತೆ ಹೆಬ್ಬಾಗಿಲ ಲಾಂಬಾಮಾ ಪಚ್ಚಕ್ಹ ಹತೊ ವ್ಹತಾ. ರುಂದಮಾ ಕ್ಹಡಾ ಬಾರಾ ಹತೊ ವ್ಹತಾ. 34 ತಿನು ಕೈಸಾಲೆ ಭಾರ್ಲ್ಯಾ ಪ್ರಾಕಾರನೆ ಅಭಿಮುಖ ವ್ಹತ್ತು; ಕೈಸಾಲೆನಾ ಎದುರಾ ಬದುರನಾ ನಿಲವು ಖಂಬಾವೊಮಾ ಕರ್ಜುರನಾ ಝಾಡೊ ಚಿತ್ರಿತ ವ್ಹತ್ತಾ; ತ್ಯಾ ಚ಼ಡಾನೆ ಆಟ ಪೊಟಂಗ್ಯೊ ವ್ಹತ್ತಾ.

ಉತ್ತರ ಬಾಕಲನು ಮ್ಹೈನು ಭಾಗ

35 ಪಾಚ಼ಲ್ತೊ ತೆ ಮನೆ ಪಚ್ಚಿಮನಾ ಬಾಕಲೆ ಬಲೈಲಿನ ಗೈನ ತಿನೆ ತಿನಾ ಗೊಡಿನಾ ಕೊಣೆ, ನಿಲವು ಕಂಬಾ, ಕೈಸಾಲೆ ಎ ಕ್ಹಾರು ಅಳತಿ ಕರ್ತಾಮಾ ತ್ಯಾಬಿ ತೆ ಅಳತಿಜ಼ ದಿಕ್ಹಿನ ಐಯು; 36 ತಿಮಾ ಕ್ಹಾರಾ ಬನಿ ಕಿಡಕಿಯೊ ವ್ಹತ್ತಿಯೊ; ತೆ ಲಾಂಬಾಮಾ ಐವತ್ತ ಹತ್ತ, ರುಂದಮಾ ಪಚ್ಚಕ್ಹ ಹತ್ತ ವ್ಹತ್ತು. 37 ತಿನಾ ನಿಲವುಕಂಬಾ ಭಾರ್ಲ್ಯಾ ಪ್ರಾಕಾರನೆ ಅಭಿಮುಖ ಥೈನ ವ್ಹತ್ತಾ; ತ್ಯಾ ಚ಼ಡಾನೆ ಆಟ ಪೊಟಂಗ್ಯೊ ವ್ಹತ್ತಿಯೊ.

ಉತ್ತರ ಭಾಕಲನಾ ನಜಿಕ ರ‍್ಹಯಲ ಘರೊ

38 ಹೆಬ್ಬಾಗಿಲನಾ ನಿಲವುಖಂಬಾವೊನಾ ಬಾಜು಼ಮಾ ಯಕ್ಕ ಕ್ಹೊಲಿ ತಿನು ದ್ವಾರ ದಿಕ್ಹ್ಯು; ತೆ ಕ್ಹೊಲಿಯೊಮಾ ಸರ್ವಾಂಗಹೊಮ ಜಾನವರೊನಾ ಮಾಕ್ಹನೆ ಧವಾಡಾತಾ. 39 ಹೆಬ್ಬಾಗಿಲನಾ ಕೈಸಾಲೆಮಾ ಭಂಬಿ ಬನಿಬಿ ಬೆ ಬೆ ಪಿಠಾ ವ್ಹತ್ತಾ; ತ್ಯುನಾ ಉಪ್ಪರ ಸರ್ವಾಂಗಹೊಮ ಜಾನವರ, ದೊಷ ಪರಿಹಾರಕ ಯಜ್ಞನು ಜಾನವರ, ಪ್ರಾಯಶ್ಚಿತ್ತ ಯಜ್ಞನು ಜಾನವರ ಎ ಕ್ಹಾರನೆ ಕ್ಹಲಾಸ ಕರ್ತಾ ವ್ಹತ್ತಾ . 40 ಉತ್ತರನು ಹೆಬ್ಬಾಗಿಲ ಪ್ರವೆಶ ಸ್ಥಾನನಾ ಪೊಟಂಗ್ಯೊನಾ ಬಾಜು಼ತೆ ಬಾಕಲ ಕೈಸಾಲೆನಾ ಭಾರೊ ಯಕ್ಕ ಕೊನಿಮಾ ಬೆ ಪಿಠೊ, ವರಿಯಕ್ಕ ಕೊನಿಮಾ ಬೆ ಪಿಠೊ ವ್ಹತ್ತಾ. 41 ಹೆಬ್ಬಾಗಿಲನಾ ಬೆ ಜ಼ಗಾವೊಮಾ ಹೈಂ ಚಾರ ತ್ಯಾ ಚಾರ ಪಿಠೊ, ಪುರಾ ಯಜ್ಞ ಜಾನವರೊನೆ ಕತ್ರಾನಾ ಆಟ ಪಿಠೊ ವ್ಹತ್ತಾ. 42 ತೆನೈಸೊ ಸರ್ವಾಂಗಹೊಮನೆ ಉಪಯುಕ್ತ ಥಯಲ ಕೆತ್ತಲ ದಗ್ಡಾನಾ ಚಾರ ಪಠೊ ವ್ಹತ್ತಾ; ತ್ಯುನು ಅಗಲ ದೆಡ ಹತ್ತ, ಲಾಂಬಾಮಾ ದೆಡ ಹತ್ತ, ಉಚ್ಚಾಮಾ ಯಕ್ಕ ಹತ್ತ; ತ್ಯುನಾ ಉಪ್ಪರ ಸರ್ವಾಂಗಹೊಮ ಜಾನವರೊನಾ ಕಾಟಾನಾ ಸಾಮನೊನೆ ಮ್ಹೆಲತಾತಾ. 43 ಅಂಚಮಾ ಹತ್ತ ಯಕ್ಲು ಕೊಡಿಯೊ ಮಾರಲ ವ್ಹತು. ನೈವೆದ್ಯನು ಮಾಕ್ಹ ಪಿಠೊನಾ ಉಪ್ಪರ ವ್ಹತ್ತು.

ಯಾಜಕೊನಾ ಹುತಿ ಖೊಲಿ

44 ಪಾಚ಼ಲ್ತೊ ತೆ ಮನೆ ಮ್ಹೈನಾ ಪ್ರಾಕಾನೆ ಬಲೈ ಲಿನ ಆಯೊ; ದೆಕ, ತ್ಯಾ ಬೆ ಕ್ಹೊಲಿಯೊ ದಿಕ್ಹ್ಯೊ; ಉತ್ತರ ಬಾಕಲನಾ ಬಾಜು಼ಮಾ ಯಕ್ಕ ಕ್ಹೊಲಿ ದಕ್ಷಿಣನಾ ಬಗಲ ಮ್ಹೊಡು ಕರಿನ ವ್ಹತು. ವರಿಯಕ್ಕ ಕ್ಹೊಲಿ ಪಚ್ಚಿಮನೆ ವರಿ ಉತ್ತರ ಅಭಿಮುಖ ವ್ಹತ್ತು. 45 ತೆಳಾಮಾ ತೆ ಮನೆ- ದಕ್ಷಿಣ ಅಭಿಮುಖ ಥಯಲ ಎ ಕ್ಹೊಲಿ ದೆವಾಲಯನಾ ಪಾರುಪತ್ಯನೆ ಚ಼ಲಾವಾನಾ ಯಾಜಕೊನೆ ನೆಮಕ ಥಯುಸ; 46 ಉತ್ತರ ದಿಕ್ಕನೆ ಅಭಿಮುಖ ಥಯಲ ತೆ ಕ್ಹೊಲಿ ಯಜ್ಞವೆದಿನಾ ಕಾರ್ಯ ದರ್ಶಿ ಥಯಲ ಯಾಜಕೊನೆ ನೆಮಕ ಥಯುಸ; ಚದೊಕನಾ ಸಂತತಿವಾಲಾ ಥಯಲ ಇವ್ನೆ ಲೆವಿ ಕುಲವಾಲಾವೊಮಾ ಯಹೊವಾನಿ ಸನ್ನಿದಿ ಸೆವಕೊ ಥಯಾಸ ಕೈನ ಕದ್ಯೊ.

ದ್ವಾರ ಮಂಟಪ

47 ಪಾಚ಼ಲ್ತೊ ತೆ ಪ್ರಾಕಾರನಿ ಅಳತಿ ಕರ್ತಾಮಾ ತೆ 50 ಹತ್ತೊ ವ್ಹತ್ತಾ. ಲಾಂಬುಬಿ 50 ಹತ್ತೊ ವ್ಹತ್ತಾ. ಅಗಲಬಿ ಚಚ್ಚೌಕ ವ್ಹತ್ತು; ಬಲಿನೊ ಕಟ್ಟೊ ದೆವಸ್ಥಾನನಾ ಕ್ಹಾಮು ವ್ಹತ್ತು. 48 ತೆಳಾಮಾಜ಼ ತೆ ಮನೆ ದೆವಸ್ಥಾನನಾ ದ್ವಾರ ಮಂಟಪನೆ ಬಲೈ ಲೈನ ಅಳತಿ ಕರ್ತಾಮಾ ತಿನಾ ಎದುರ ಬದುರನಾ ನಿಲವು ಕಂಬಾನಾ ಅಗಲ ತನ್ನ ತನ್ನ ಹತೊ ವ್ಹತೊ. 49 ದ್ವಾರ ಮಂಟಪ ಲಾಂಬಾಮಾ ಇಕ್ಹ ಹತೊ ವ್ಹತಾ. ಅಗಲಮಾ ಗ್ಯಾರಾ ಹತೊ ವ್ಹತ್ತಾ; ದಕ್ಹ ಪೊಟಂಗ್ಯೊನೆ ಚ಼ಡಿನ ತ್ಯಾ ಚಾ಼ಲ್ಯಾತಾ; ಭಂಬಿ ಬಿನಾ ನಿಲವು ಖಂಬಾವೊನಾ ಬಾಜು಼ಮಾ ಯಕ್ಕೆಕ ಆದಾರನೆ ಖಂಬಾ ವ್ಹತ್ತಾ.