ಯಜಕೆಲಾ 41

1 ಪಾಚ಼ಲ್ತೊ ತೆ ಮನೆ ಪರಿಶುದ್ದ ಸ್ಥಳನೆ ಲೈನ ತಿನೆ ಅಳತಿ ಕರ್ತಾಮಾ ತಿನು ಎದುರ ಬದುರನಾ ನಿಲವು ಕಂಬಾನಾ ಅಗಲ ಕ್ಹುದಾನಾ ಗುಡಾರನಾ ಅಗಲ ನಿಂಗತ ತನ್ನ ತನ್ನ ಹತೊ ವ್ಹತಾ. ದ್ವಾರನು ಅಗಮಲ ಪಾಂಚ಼ ಹತೊ ವ್ಹತಾ, 2 ದ್ವಾರನಾ ಭಂಬಿ ಬಾಜು಼ನಾ ಗೊಡಿಯೊನು ಅಗಲ ಅಡಿ ಹತೊ ವ್ಹತಾ, ಪರಿಶುದ್ದ ಸ್ಥಳ ಲಾಂಬಾಮಾ ಇಕ್ಹ ಹತೊ ವ್ಹತಾ. ಅಗಲಮಾ ದಕ್ಹ ಹತೊ ವ್ಹತಾ.

3 ಪಾಚ಼ಲ್ತೊ ತೆ ಹಜು಼ನ ಅಗೊ ಗೈನ ಪರಿಶುದ್ದ ಸ್ಥಳನಾ ಕೊನಿಮಾ ಗರ್ಭಗ್ರಹನೆ ಅಳತಿ ಕರ್ತಾಮಾ ದ್ವಾರನು ಯಕ್ಕೆಕ ನಿಲವುಕಂಬನು ಅಗಲ ಯಕ್ಕ ಯಕ್ಕ ಹತ್ತ ವ್ಹತಾ. ದ್ವಾರನು ಅಗಲ ತನ್ನ ಹತೊ ವ್ಹತಾ. 4 ದ್ವಾರನಾ ಬಾಜು಼ನಾ ಗೊಡಿಯೊನು ಅಗಲ ಕ್ಹಡಾ ತನ್ನ ಕ್ಹಡಾ ತನ್ನ ಹತೊ ವ್ಹತಾ. ಗರ್ಭಗ್ರಹ ಲಾಂಬಾಮಾ ದಕ್ಹ ಹತೊ ವ್ಹತಾ. ಅಗಲಮಾ ದಕ್ಹ ಹತೊ ವ್ಹತಾ. ತೆಳಾಮಾ ತೆ ಮನೆ ಎ ಮಹಾಪರಿಶುದ್ದ ಸ್ಥಳ ವ್ಹೈ ಕೈನ ಕದ್ಯೊ.

ದೆವಸ್ಥಾನನಾ ಸುತ್ತೆ ರ‍್ಹಯಲ ಕ್ಹೊಲಿಯೊ

5 ಪಾಚ಼ಲ್ತೊ ತೆ ಅಳತಿ ಕರ್ತಾಮಾ ದೆವಸ್ಥಾನನಿ ಗೊಡಿನು ಅಗಲ ತನ್ನ ಹತೊ ವ್ಹತಾ, ದೆವಸ್ಥನನಾ ಸುತ್ತ ಮುತ್ತ ಕ್ಹಾರಾ ಬನಿ ತಿನಾ ಬಾಜು಼ನೆ ಚಿಟ್ಕಾಯಲ ಕ್ಹೊಲಿಯೊನು ಅಗಲ ಬೆ ಬೆ ಹತೊ ವ್ಹತಾ. 6 ತೆ ಕ್ಹೊಲಿಯೊ ಯಕ್ನಾ ಉಪ್ಪರ ಯಕ್ಕ ತನ್ನ ಅಂತಸ್ತ ವ್ಹತ್ತಾ; ಯಕ್ಕೆಕ ಅಂತಸ್ತಮಾ ಮುವತ್ತ-ಮುವತ್ತ ವ್ಹತ್ತಾ; ದೆವಸ್ಥಾನನಿ ಗೊಡಿ ಪೊಟಂಗ್ಯೊ-ಪೊಟಂಗ್ಯೊ ಕರಿನ ಭಾಂದಲ ವ್ಹತ್ತಾ. ಗೊಡಿಮಾ ಕಾಡಾ ನೈಸೊ ತೆ ಪೊಟಂಗ್ಯಜ಼ ಸುತ್ತೆ ರ‍್ಹಯಲ ಕ್ಹೊಲಿಯೊನಾ ತೊಲೆನೆ ಆಧಾರ ಥಯಾತಾ. 7 ಸುತ್ತೆ ರ‍್ಹಯಲ ಅಂತಸ್ತೊ ಉಪ್ಪರ-ಉಪ್ಪರ ಗಯಲ ತಿಮ್ಮ ತೆತೆ ಕ್ಹೊಲಿಯೊನು ಅಗಲ ಹೆಚ್ಕಿ ಥಾತು ಗಯು; ತೆ ದೆವಸ್ಥಾನನೆ ಸುತ್ತಿ ಲಿನ ಉಪ್ಪರ-ಉಪ್ಪರ ಗಯಲ ತಿಮ್ಮ ತಿನೆ ಬಿಗಿಬಿಗಿ ಥೈನ ಅವ್ಳಿ ಲಿದ್ಯಲ ನಿಂಗತ ವ್ಹತ್ತಾ. ಇಮ್ಮ ಉಪ್ಪರ ಉಪ್ಪರಲ್ಯಾ ಅಂತಸ್ತೊ ದಸ್ಥಾನನಾ ಬನಿ ಅಗಲ ಥಾತು ಐಯು; ಹಲ್ಯಾ ಅಂತಸ್ತತು ವಚ್ಮಾನಾ ಅಂತಸ್ಥನಾ ವಾಟತಾ ಉಪ್ಪರಲ್ಯಾ ಅಂತಸ್ಥನೆ ಚ಼ಡಾಡಾತಾ. 8 ದೆವಸ್ಥಾನನಸುತ್ತ ಮುತ್ತ ಯಕ್ಕ ಜಗಲಿ ದಿಕ್ಹ್ಯು; ತೆ ಕ್ಹೊಲಿಯೊನೆ ತಹದಿ ಥೈನ ನಮಟ್ಟತಾ ಪುರಾ ಛೆ ಮಾರ ಅಳತಿಕೊಲ ತೆಕ್ಲು ಉಚ್ಚು ವ್ಹತ್ತು. 9 ಕ್ಹೊಲಿಯೊನಾ ಭಾರ್ಲಿ ಗೊಡಿ ಜಾ಼ಡಾಮಾ ಅಡಿ ಹತೊ ವ್ಹತಾ. 10 ದೆವಸ್ಥಾನನೆ ಚಿಟ್ಕಲ ತೆ ಕ್ಹೊಲಿಯೊನಾ ದಿಕ್ಷಿತ ಯಾಜಕೊನಾ ಕ್ಹೊಲಿಯೊನಾ ವಚ್ಮಾ ದೆವಸ್ಥಾನನಾ ಸುತ್ತ ಮುತ್ತ ದಕ್ಹ ಹತೊ ಅಂತರ ವ್ಹತ್ತು. 11 ತೆ ಕ್ಹಾರಾ ಕ್ಹೊಲಿಯೊನಾ ಪ್ರವೆಶನೆಬಿ ಬೆಜ಼ ಬಾಕಲೊ, ಉತ್ತರ ಯಕ್ಕ ದಕ್ಷಿಣ ಯಕ್ಕ, ತೆ ಭಂಬಿ ಜಗಲಿಕನ ವ್ಹತ್ತಾ; ತೆ ಜಗಲಿ ಕ್ಹಾರಾ ಬನಿ ಅಡಿ ಹತೊ ವ್ಹತಾ.

ಪಸ್ಚಿಮ ಖೊಲಿಯೊ

12 ಪಡುವಣಮಾ ದಿಕ್ಷತನಾ ಪ್ರಾಕಾರನಾ ಪಾಚ಼ಲ್ಯಾ ಶಾಲೆನು ಅಗಲ ದಕ್ಹ ಹತೊ ವ್ಹತಾ, ಲಾಂಬಾಮಾ ಚಾ಼ಳಕ್ಹಪರ ಪಾಂಚ಼಼ ಹತೊ ವ್ಹತಾ. ತಿನಿ ಗೊಡಿ ಜಾ಼ಡಾಮಾ ಅಡಿ ಹತೊ ವ್ಹತಾ. 13 ತೆ ಮನಕ್ಹ ಅಳತಿ ಕರ್ತಾಮಾ ದೆವಸ್ಥಾನ ಲಾಂಬಾಮಾ ಐವತ್ತ ಹತೊ ವ್ಹತಾ. ದಿಕ್ಷತರನಾ ಪ್ರಾಕಾರ, ಶಾಲೆ, ಶಾಲೆನಾ ಗೊಡಿಯೊ, ಇವ್ನು ಪುರಾ ಅಗಲ ಐವತ್ತ ಹತೊ ವ್ಹತಾ.

ದೆವಸ್ಥಾನನಾ ಪುರಾ ಅಳತಿ

14 ಪುರ್ವಮಾನಾ ದೆವಸ್ಥಾನನು ಮ್ಹೊಡು, ದಿಕ್ಷಿತರ ಪ್ರಾಕಾರ, ಇವ್ನು ಪುರಾ ಅಗಲ ಐವತ್ತ ಹತೊ ವ್ಹತಾ. 15 ತೆ ದಿಕ್ಷತರ ಪ್ರಾಕಾರನಾ ಪಾಚ಼ಲಿ ಶಾಲೆನೆ ತೆ ಪ್ರಾಕಾರಕನ ಅಳತಿ ಕರ್ತಾಮಾ ತೆ ಲಾಂಬಾಮಾ ಭಂಬಿ ಬನಿ ಗೊಡಿಯೊನಾ ಕ್ಹಾತೆಜ಼ ಕ್ಹೊ ಮಾರ ವ್ಹತ್ತು.

ದೆವಸ್ತಾನನು ಪುರಾ ವಿವರಣ

16 ಗರ್ಭಗ್ರಹ, ಪ್ರಾಕಾರಮಾನಾ ದ್ವಾರ ಮಂಟಪೊ, ಹೊಚ್ಚಲೊ, ಕಾಡಾನೆ ನೈ ಥಾವಾನಾ ಕಿಡಕಿಯೊ, ಹೊಚ್ಚಲನಾ ಕ್ಹಾಮಾ ತನ್ನ ಅಂತಸ್ತ ಸುತ್ತೆ ಭಾಂದಲ ಗೊಡಿಯೊನಾ ಎಟ್ಟೊ, ಇವ್ನೊನೆ ಅಳತಿ ಕರ‍್ಯೊ; 17 ಜಿಮಿನತಾ ಕಿಡಕಿ ಲಕ್ಕಾ ದ್ವಾರನಾ ಉಪ್ಪರ ಗರ್ಭಗ್ರಹನಾ ವರಿ ಹೈಂನಾ ಗ್ರಹನಾ ಗೊಡಿಯೊನೆ ಸುತ್ತ ಮುತ್ತ ಹಲಗಿಯೊ ಚೌಕ-ಚೌಕ ಥೈನ ವರಾಡ್ಯಲ ವ್ಹತ್ತಾ; ಕಿಯೊನಾ (ಬಾಜು಼ಮಾ ಹಲಗಿನಾ) ಹೊದಿಕೆ ವ್ಹತ್ತು. 18 (ತೆ ಚೌಕಮಾ) ಕೆರುಬಿಯೊ ಕರ್ಜುರನಾ ಝಾಡೊ ಚಿತ್ರಿತ ಥಯಾತಾ; ಬೆ ಬೆ ಕೆರುಬಿಯೊನಾ ವಚ್ಮಾಯಕ್ಕೆಕ ಕರ್ಜುರನು ಝಾಡ; ಯಕ್ಕೆಕ ಕೆರುಬಿನೆ ಬೆ ಬೆ ಮ್ಹೊಡಾ ವ್ಹತ್ತಾ; 19 ಕರ್ಜುರನಾ ಝಾಡನಾ ಯಕ್ಕ ಬಾಜು಼ಮಾ ಮನಕ್ಹನಾ ಮ್ಹೊಡಾನಾ ಕ್ಹಾಮು, ಬಿಜೆಕ್ಕ ಬಾಜು಼ಮಾ ಶಿಂಯ್ಯಾನಾ ಮ್ಹೊಡಾನಾ ಕ್ಹಾಮೊ; ದೆವಸ್ಥಾನನಾ ಕ್ಹಾರು ಮ್ಹೈನು ಭಾಗ ಸುತ್ತ ಮುತ್ತ ಇಮ್ಮ ಚಿತ್ರಮಯ ಥಯುತು. 20 ಜಿಮಿನತಾ ದಾರವಂದಮಾ ಉಪ್ಪರ ಲಕ್ಕಾ ಕೆರುಬಿಯೊ ಕರ್ಜುರನಾ ಝಾಡೊ ಚಿತ್ರತ ಥಯಾತಾ.

ಲಾಕ್ಡಾನೊ ಬಲಿನೊ ಕಟ್ಟೊ

21 ಪರಿಶುದ್ದ ಸ್ಥಳ (ಹೈಂನಾ) ಗೊಡಿನು ಬಾಕಲಚೌಕಟ್ಟ ಚೌಕ ವ್ಹತ್ತು; ಮಹಾಪರಿಶುದ್ದ ಸ್ಥಳನಾ ಹೈಂನಾ ಗೊಡಿನು ಚೌಕಟ್ಟ ನಿಂಗತ ವ್ಹತ್ತು.

22 ತ್ಯಾ ಝಾಡನು ವೆದಿ ಯಕ್ಕ ವ್ಹತ್ತು; ತೆ ಉಚ್ಚಾಮಾ ತನ್ನ ಮಾರ, ಲಾಂಬಾಮಾ ಯಕ್ಕ ಹತ್ತ ವ್ಹತೊ. ತಿನಾ ಮುಲಾಬಿ ಪಿಠಬಿ ಪಕ್ಕಬಿ ಝಾಡನಾ ವ್ಹತ್ತಾ; ತೆ ಮನಕ್ಹ ಮನೆ - ಎ ಯಹೊವಾನಾ ಸಮ್ಮುಖನು ಟೆಬಲ ವ್ಹೈ ಕೈನ ಕದ್ಯೊ.

ಬಾಕಲೊ

23 ಪರಿಶುದ್ದ ಸ್ಥನಾ ವರಿ ಮಹಾಪರಿಶುದ್ದ ಸ್ಥಲನಾ ಬಾಕಲೊನೆ ಬೆ ಬಾಕಲೊ; 24 ಯಕ್ಕೆಕ ಬಾಕಲನೆ ಬೆ-ಬೆ ಮಡಚಾ಼ನಾ ಭಾಗೊ; ಹೈನಾ ಬಾಕಲನೆ ಬೆ ಭಾಗ ತಿನಾ ಬಾಕಲನೆ ಬೆ ಭಾಗ ವ್ಹತ್ತಾ. 25 ತೆ ಬಾಕಲೊಮಾ, ಕದ್ಯಾಮ ಪರಿಶುದ್ದ ಸ್ಥಳನಾ ಬಾಕಲೊಮಾ ಕೆರುಬಿಯರೊ ಕರ್ಜುರನಾ ಝಾಡೊ ಗಿಯೊಮಾ ಚಿತ್ರಿತ ಥಯಲ ತಿಮ್ಮಜ಼಼ ಚಿತ್ರಿತ ಥಯಾತಾ; ದ್ವಾರ ಮಂಟಪನಾ ಭಾರಾ ಝಾಡನು ಸುರು ವ್ಹತ್ತು 26 ದ್ವಾರಮಂಟಪನಾ ಬಾಜು಼ನಾ ಗೊಡಿಯೊಮಾ ಕಾಡನೆ ನೈ ಥಾವಾನಾ ಕಿಡಕಿಯೊ (ಚಿತ್ರಿತ) ಕರ್ಜುರನಾ ಝಾಡೊ ವ್ಹತಾ.