ಯರುಸೆಲಿಮ ಅನ್ನ ತಪಾಲೊ ವ್ಹೈ
1 ನೌವಾ ವರಕ್ಹನಾ ದಕ್ಹವಾ ಮ್ಹೈನಾನಾ ದಕ್ಹವಾ ದಿನಮಾ ಯಹೊವಾ ಎ ವಾಕ್ಯಾ ಮನೆ ದಿದ್ಯೊ. 2 ಮನಕ್ಹನಾ ದಿಕ್ರಾ, ಎ ದಿನನಾ ಎಜ಼ ದಿನನು ನಾಮನೆ ಲಿಕ್ಕಿಲೆ; ಎಜ಼ ದಿನಮಾ ಬಾಬಲೊನನೊ ರಾಜೊ಼ ಯರುಸಲೆಮನೆ ಮುತ್ತಿಗೆ ಘಾಲ್ಯೊಸ. 3 ಆಂ ದ್ರೊಹಿ ವಂಶನೆ ದೃಷ್ಟಾಂತನೆ ಉಚೈನ ಅಮ್ಮ ಕೆ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ತಪಾಲೊ ಚು಼ಲ್ಲಾನಾ ಉಪ್ಪರಮ್ಹೆಲ, ತಿಮಾ ಪಾನಿ ಘಾಲ; 4 ಮಾಕ್ಹನಾ ತುಕ್ಡಾವೊನೆ ಕದ್ಯಾಮ ಮಾಂಡಿ ಮುಂದೊಡ ಪೈಲಾ ರ‍್ಹಯಲ ಚೊ಼ಕಾ ಮಾಕ್ಹನೆ ಕ್ಹಾರಾ ತಿಮಾ ಮಳೈ ಘಾಲ, ಚೊ಼ಕಾ ರ‍್ಹಯಲ ಹಡ್ಕಾವೊನೆ ತಿಮಾ ಭರಾ. 5 ಹಿಂಡಮಾ ಚೊ಼ಕು ರ‍್ಹಯಲನೆ ಕಾಳ್ಳೆ; ಹಂಡಾನಾ ಹೆಟೊ ಹಡ್ಕಾವೊನೆ ರಾಸಿರಾಸಿ ಥಯನ ವಟ್ಟಿನ ಚೊ಼ಕಿತರಾ ಉಕಳೈನ; ಹೊ, ಹಡ್ಕಾ ತಿಮಾ ಚ಼ಡಾದೆ. 6 ಕರ್ತಾ ಥಯಲ ಯಹೊವಾ ಅಮ್ಮ ಕವಸ. ಹಾ, ಮಾಡ್ರೊ ಥಯಲ ಗಾಮನಿ ಗತಿ ಸು ಕೌ! ತೆ ಹಂಡಾನು ಕಾಳು ಗಯೆವಾಚಿ಼ ತಿಮಾಜ಼ ಹೆಪ್ಪ ಗಟ್ಟ್ಯುಸತೊ! ಮಾಕ್ಹನಾ ತುಕ್ಡಾವೊನೆ ಮಳಲ ನಿಂಗತ ಕಾಡಿಪಡ, ಇನೆ ಕ್ರಮನು ಚಿಟ ನತ್ತಿ. 7 ಯರುಸಲೆಮ ಚು಼ವಾಯಲ ರಗತ ತಿಮಾಜ಼ ಹುಬ್ರಯುಸ; ದುಳ ಝಾಕ್ಯುಸ ಕೈನ ತೆ ಗಾಮವಾಲಾ ತಿನೆ ಜಿಮಿನ್ಪರ ರಿಚಾ಼ಯೆವಾಚಿ ಕ್ಹಾಲಿ ದಗ್ಡಾಪರ ಹುಬ್ರಾಡಾಸ; 8 ತೆ ರಗತಕ್ಹು ಶಿಟ್ಟ ಐನ ಶೆಡನೆ ಶೆಡ ತಿರಸು ಕೈನ ತಿನೆ ಮಿ ಇಂಗ ಕರೆವಾಚಿ಼ ಕ್ಹಾಲಿ ದಗ್ಡಾಪರ ಹುಬ್ರಾಡ್ಯೊಸ. 9 ಇಮ್ಮ ರ್‍ಹತಾಮಾ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಹಾ,ಮಾಡ್ರೊ ಥಯಲ ಗಾಮನಿ ಗತಿನೆ ಸು ಕೌ! ಮಿಜ಼ ಆಗನೆ ರಾಶಿಥೈನ ಲಗಾಡುಸ. 10 ಘನು ಸೌದೆ ಘಾಲ, ಆಗನೆ ಲಗಾಡ, ಮಾಕ್ಹನೆ ಘನೊ ಚ಼ಡಾ, ಶರವೊ ಉಕಳಾ ಹಡ್ಕಾವೊ ಚ಼ಡಿನ ಜಾ಼ವಾದೆ. 11 ಪಾಚಾ಼ತೊ ಹಂಡೊ ಉನ್ನೊ ಥೈನ ತಾಂಬು ಲಾಲ ಥೈನ ಮ್ಹೈನು ಗಲಿಜ ಕರಗಿನ ಕಾಳು ನೈಸೊ ಥೈನ ತಿನೆ ಬರಿದು ಕರಿನ ಆಗನಾ ಕೆಂಡಾವೊಪರ ಮ್ಹೆಲ. 12 ತೆ ಮನೆ ಕ್ಹಾಲಿ ಪ್ರಯಾಸನೆ ಆಯಾಸನೆ ಉಂಟ ಕರ್‍ಯುಸ; ತೆ ರ್ಹೈತಬಿ ತಿನೆ ಲಾಗಲ ಘನ್ನು ಕಾಳು ಗಯು ನೈ, ಆಗಕ್ಹುಬಿ ಥಯು ನೈ. 13 ತಾರಿ ಉರುಣಗಿ ಅಸಹ್ಯ ರ‍್ಹಯಲಕ್ಹುಬಿ ಮಿ ತುನೆ ಕೆಕ್ಲೊ ಶುದ್ದ ಕರಿತಬಿ ತು ಶುದ್ದ ಥಯೆವಾಚಿ಼ ಗಯಲಕ್ಹು ಮಿ ಮಾರಿ ಶಿಟ್ಟನೆ ತಾರಾಮಾ ತಿರಿಸಿಲಿನ ಶಾಂತ ಥಯೆಲಕ್ಕಾ ತು ತಾರಾ ರಾಡಿನೆ ಹಜಿ಼ ನೈ ಗೈನ ಶುದ್ದ ಥಯೆವಾಚಿ಼ ರ್ಹಸಿ. 14 ಯಹೊವಾ ಥಯಲ ಮಿಜ಼ ಎ ಕದ್ಯೊಸ; ಎ ಸಾಗಸ, ಮಿ ಪುರಾಕರುಸ; ಪಾಚು಼ ರ‍್ಹಯಲ ಮಾಫಕರುಸ, ಮರಗುಸ, ತಾರಾ ಕೆಟ್ಟವಾಟನೆ ಕೆಟ್ಟಕಾಮೊನೆ ಕರೆಟ್ಟ ತುನೆ ಫೈಸಲೊ ಥಾವಸ; ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ.
ಪ್ರವಾದಿನಿ ಬೈಕೊನು ಮರಣ
15 ಯಹೊವಾ ಹಜಿಯಕ್ಕ ವಾಕ್ಯಾ ಮನೆ ದಿದ್ಯೊ 16 ಮನಕ್ಹನಾ ದಿಕ್ರಾ ಹಮ್ನಾ, ಯಕ್ಕಜ಼ ಮಾರಕ್ಹು ಮಿ ತುನೆ ಡೊಳಾನೆ ಪಸಂದ ಥಯಲವಾಲಿನೆ ತಾರಾಮಾತೊ ಕಾಡಿ ಪಡುಸ, ತೆ ರ್ಹೈತಬಿ ತು ಬೊಂಬಲು ನಕೊ, ರೌನಕೊ, ತಾರು ಡೊಳಾಮಾನು ಪಾನಿ ಔನೈ, ಅವಾಜ಼ ನೈಸೊ ಮಾಂಗಿಲೆ. 17 ದುರ ಥಯಲ ದುಕ್ಕನೆ ದೆಕಾಡು ನಕೊ, ಟುವಾನೆ ಸುತ್ತಿಲೆ, ಕಾರಮಲಿಯೊನೆ ಘಾಲಿ ಲಿದಲ ರ್ಹೆ, ಮ್ಹೊಡಾನೆ ಪಡ್ಕಾಕ್ಹು ಝಾಕಿಲ್ಯು ನಕೊ, ಮೌತನು ಅನ್ನ ಕ್ಹೌ ನಕೊ, 18 ಇಮ್ಮ ಅಗನ್ಯಾ ಥಾವಾನೆ ಮಿ ಪ್ರಾಂತಕಾಲಮಾ ಮನಕ್ಹೊನೆ ಕದ್ಯೊ; ಕ್ಹಾಂಜ಼ೆ ಮಾರಿ ಬೈಕೊ ಮರಿ ಗಯಿ; ಮರನಾದಿನ್ನೆ ಪಾಟೆ ಮನೆ ಅಗನ್ಯಾ ಥಯಲ ನಿಂಗತ ಚಾ಼ಲ್ಯೊ. 19 ಮನಕ್ಹೊ ತು ಅಮ್ಮ ಕರಲಕ್ಹು ಹಮೆ ತಿಳದ್ಯಾನೈಸು? ತಿಳಸಾತಾನೈಸು? ಕೈನ ಮನೆ ಪುಚ್ಚತಾಮಾ 20 ಮಿ ತ್ಯುನೊನೆ ಅಮ್ಮ ಕದ್ಯೊ. ಯಹೊವಾ ಅಂ ವಾಕ್ಯಾ ಮನೆ ದಿದ್ಯೊಸ 21 ಇಸ್ರಾಯಲನಾ ವಂಶವಾಲಾನೆ ಅಮ್ಮ ಕೆ ಹಾ, ತುಮೊನೆ ಕ್ಹಾಸ ತಾಕತ ಡೊಳಾನಿ ಕ್ಹುಶಿ ಜ಼ಲಮತೊ ಮಯಾ ಥಯಲ ಮಾರಾ ಪವಿತ್ರ ಆಲಯನೆ ಮಿ ಹೊಲೆ ಕರುಸ. ತುಮೆ ಛೊಡಿನ ಆಯಲ ತುಮಾರಾ ಗಂಡ ಹೆಣ್ಣ ಬಚ್ಚಾ ತಲ್ವಾರನೆ ಬೊಂದೊ ಥಾವಸ ಕವಾನು ಕರ್ತಾ ಥಯಲ ಯಹೊವಾ ಕದ್ಯೊಸ. 22 ಮಿ ಕರಲ ನಿಂಗತ ತೆಳಾಮಾ ತುಮೆಬಿ ಕರೊಸಿ, ಕದ್ಯಾಮ ಫಡ್ಕಾಕ್ಹು ಮ್ಹೊಡು ಝಾಕಿಲಿದ್ಯಾವಾಚಿ಼ ಗಾರಿಕೆನೆ ಕ್ಹಾದ್ಯಾವಾಚಿ಼ 23 ಟುವಾನೆ ಸುತ್ತಿಲಿನ ಕಾರಮಲಿಯೊ ಘಾಲಿನ ರ್ಹವೊಸಿ, ತುಮೆ ಅಡ್ಡತಾ ನೈ ರೊತಾನೈ; ತುಮಾರಾ ಅಧರ್ಮಕ್ಹು ಕ್ಷಿಣಥೈನ ಜಾ಼ವೊಸಿ, ಯಕ್ಲಾನಾ ಕ್ಹಾಮಾ ಯಕ್ಲಾ ನಳ್ಳೊಸಿ. 24 ಯಹೊವಾನಿ ಎ ವಾತನೆ ಐಕೊ ಎ ವಿಷಯಮಾ ಯೆಹೆಜ್ಕೆಲಾ ತುಮೊನೆ ಪೈಲಾ ವಳಕ ಥಾವಸ, ತೆ ಕರಲ ನಿಂಗತ ಕ್ಹಾರುಜ಼ ಕರೊಸಿ; ಎ ಸಂಬವ ಥಾತಾಮಾ ಮಿಜ಼ ಕರ್ತಾ ಥಯಲ ಯಹೊವಾ ವ್ಹೈ ಕೈನ ತುಮೊನೆ ಗೊತ್ತ ಥಾವಸ. 25 ಮನಕ್ಹನಾ ದಿಕ್ರಾ, ತ್ಯುನೊನೆ ಬಲಾಧಾರಬಿ ಡೊಳಾನಿ ಕ್ಹುಶಿ ಥಯಲ ತ್ಯುನಾ ಪಸಂದ ಸುಂದರಾಲನೆ ಮನಸ ಉಲ್ಲಾಸ ಥಯಲ ತ್ಯುನಾ ಗಂಡ ಹೆಣ್ಣ ಬಚ್ಚಾವೊನೆ 26 ಮಿ, ನಿರ್ಮೂಲ ಕರಾನಾ ದಿನಮಾ ಚು಼ಕೈಲಿನ ತುಕನ ಔಸ, ಥಯಲ ಸಂಗತಿನೆ ತಾರಾ ಕಾನೆ ಪಡಾ ವರಕ್ಹು ಕೌಸ. 27 ತೆ ದಿನಮಾ ಚು಼ಕೈಲಿದಲ ವಾಲಾನೆ ತು ಮ್ಹೊಡು ಕ್ಹೊಲಸಿ, ತಾರಾ ಮೂಕಾತನಾನೆ ಜ಼ವೈಲಿನ ಬೊಲಸಿ; ಅಮ್ಮ ತು ತ್ಯುನೊನೆ ವಳಕ ಥಾವಾನೆ ಮಿಜ಼ ಯಹೊವಾ ವ್ಹೈ ಕೈನ ತ್ಯುನೊನೆ ಗೊತ್ತ ಥಾವಸ.