ಯಜಕೆಲಾ 29

ಐಗುಪ್ತನಾ ವಿಷಯಮಾ ಪ್ರವಾದನೆ

1 ಯೆಹೊಯಾಕಿನ ಸೆರೆಯಾದ ದಕ್ಹವಾ ವರಕ್ಹನಾ ದಕ್ಹವಾ ಮ್ಹೈನಾನಾ ಬಾರಾವಾ ದಿನ್ನಮಾ ಯಹೊವಾ ಎ ವಾಕ್ಯಾ ಮನೆ ದಿದ್ಯೊ, 2 ಮನಕ್ಹನಾ ದಿಕ್ರಾ , ತು ಐಗುಪ್ತನೊ ರಾಜಾ಼ನಾ ವಿರುದ್ದ ಮ್ಹೊಡು ಕರಿನ ತಿನಾ ವಿಷಯಮಾಬಿ ಐಗುಪ್ತನಾ ಕ್ಹಾರಾವೊನಾ ವಿಷಯಮಾ ಅಮ್ಮ ಕೆ 3 ಕರ್ತಾ ಥಯಲ ಯಹೊವಾ ಅಮ್ಮ ಕವಸ, ಐಗುಪ್ತನೊ ರಾಜೊ಼ ಥಯಲ ಫರೊಹನ, ತಾರಾ ನದಿಯೊನಾ ವಚ್ಮಾ ದಡಿಲಿನ ಎ ನದಿ ಮಾರಿಜ಼ ವ್ಹೈ, ಮಾರಾಹುತಿಜ಼ ಕರಿಲಿದಲ ವ್ಹೈ ಕೈನ ಕೈಲಿವಾನಿ ಮ್ಹೊಟೊ ಕ್ಹಾಪ ದೆಕ, ಮಿ ತುನೆ ವಿರುದ್ದ ಥಯೊಸ. 4 ಮಿ ತಾರಾ ದಾತೊನೆ ಬಲಿ ಘಾಲಿನ ತಾರಿ ನೈಲ ನದಿನಾ ಮಚ್ಲಿಯೊ ತಾರಾ ಪಿಟ್ಟನಾ ಚಿಪ್ಪೊನೆ ಚಿಟ್ಕಾಯೆ ನಿಂಗತ ಕರಿನ ಚಿಟ್ಕಾಯಲ ತೆ ಮಚ್ಲಿಯೊನಾ ಕ್ಹಾತೆ ತುನೆ ತಾರಿ ನೈಲ ನದಿನಾ ವಚ್ಮಾತೊ ಭಾರೊ ಜಗ್ಗಿನ, 5 ತುನೆ ತಾರಾ ನದಿನಾ ಕ್ಹಾರಾ ಮಚ್ಲಿಯೊನೆ ರಾನನಾ ಪಾಲೆ ಕರುಸ; ತು ಭಾರು ಪಡ್ಯಲ ರ‍್ಹಶಿ; ತುನೆ ಕುನ್ನಜ಼ ಉಚಾತು ನೈ, ಬುರತಾ ನೈ; ಮಿ ತುನೆ ಬುಜಂತೊನೆ ಹಬಾಳನಾ ಪಕ್ಷಿಯೊನೆ ಆಹಾರ ಕರ‍್ಯೊಸ. 6 ತೆಳಾಮಾ ಐಗುಪ್ತನಾ ಕ್ಹಾರಾ ಮನಕ್ಹೊ ಇಸ್ರಾಯೆಲ ವಂಶವಾಲಾವೊನೆ ತ್ಯುನೆ ಕ್ಹಾಲಿ ದಂಡಿನಾ ಉರುಲಗೊಲ ಥಯಾ ಕೈನ ಸರ್ಮೈನ ಮಿಜ಼ ಯಹೊವಾ ಕವಾನು ತಿಲ್ದಿಲಿವಸ. 7 ಐಗುಪ್ತ, ಇಸ್ರಾಯೆಲವಾಲಾ ತಾರಾ ಉಪ್ಪರ ಹತ್ತ ಮ್ಹೆಲ್ತಾಮಾ ತು ತುಟಿನ ತ್ಯುನಾ ಕ್ಹಾರಾವೊನಾ ಕ್ಹಾಂದಾವೊನೆ ಚೊ಼ಟಿ; ಉರಿಕೊಳ್ಳಾನೆ ತು ಫುಟಿನ ತ್ಯುನಾ ವಚ್ಮಾ ಭೆಂ ಉಂಟ ಕರಿ. 8 ಇಮ್ಮ ರ‍್ಹತಾಕ್ಹು ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಆಹಾ, ಮಿ ತಾರಾ ಉಪ್ಪರ ತಲ್ವಾರ ಆವಾಲಗಾಡಿನ ಮನಕ್ಹೊನೆ ಜಾನವರೊನೆ ತುಕಂತೊ ನಾಶ ಕರುಸ. 9 ಫರೊಹನ ಎ ನದಿ ಮಾರಿಜ಼ ವ್ಹೈ, ಮಿಜ಼ ಕರಿಲಿದಲ ವ್ಹೈ ಕೈಲಿದಲಕ್ಹು ಐಗುಪ್ತ ದೆಶ ಹಾಳ ಥಾವಸ; ತೆಳಾಮಾ ಮಿಜ಼ ಯಹೊವಾ ವ್ಹೈ ಕೈನ ತ್ಯುನೊನೆ ಗ್ವತ್ತ ಥಾವಸ. 10 ದೆಕ, ಮಿ ತುನೆಬಿ ತಾರಿ ನದಿನೆಬಿ ವಿರುದ್ದ ಥೈನ ಐಗುಪ್ತ ದೆಶನೆ ಮಿಗ್ದೊಲತೊ ಸೆವೆನೆಯ ಲಕ್ಕಾ, ಹೊ ಕುಷಿನ ಲಕ್ಕಾ ಘನ್ನು ಹಾಳ ಕರುಸ. 11 ಕಯೊಜ಼ ಮನಕ್ಹ ತ್ಯಾ ಪಗ್ಗ ಮ್ಹೆಲಿನ ದಾಟಿನ ಜಾ಼ತೊ ನೈ; ಕಯುಜ಼ ಜಾನವರ ಕ್ಹುಂದಿನ ದಾಟಿನ ಜಾ಼ತು ನೈ; ಚಾಳಕ್ಹ ವರಕ್ಹ ಮನಕ್ಹೊ ನೈಸೊ ಥಾವಸ. 12 ಹಾಳ ಪಡ್ಯಲ ದೆಶೊಮಾ ಐಗುಪ್ತ ದೆಶನೆ ಹಾಳ ಕರುಸ; ಹಾಳ ಥಯಲ ಗಾಮೊಮಾ ತಿನಾ ಗಾಮೊನೆ ಹಾಳ ಕರುಸ; ಚಾ಼ಳಕ್ಹ ವರಕ್ಹ ತಿಮ್ಮ ರ‍್ಹವಸ; ಮಿ ಐಗುಪ್ತವಾಲಾವೊನೆ ಜನಾಂಗೊಮಾ ಚದರಿನ ದೆಶದೆಶೊನೆ ತುರಿ ಪಡುಸ. 13 ಚಾ಼ಳಕ್ಹ ವರಕ್ಹನಾ ಉಪ್ಪರ ಮಿ ಐಗುಪ್ತವಾಲಾವೊನೆ ತ್ಯುನೆ ಚದರಿ ಗಯಲ ಜನಾಂಗೊಮಾತೊ ತ್ಯುನೊನೆ ಮಳೈನ ಐಗುಪ್ತನಿ ಕೆಟ್ಟ ಸ್ಥಿತಿ ತಪ್ಸಿನ, 14 ತ್ಯುನಿ ಜನ್ಮ ಭುಮಿ ಥಯಲ ಪತ್ರೊಸ ದೆಶನೆ ಫರಿನ ಆವಾ ಲಗಾಡುಸ; ತ್ಯಾಜ಼ ತ್ಯುನೆ ಕಿಳ ಮಟ್ಟ ರ‍್ಹಯಲ ರಾಜ್ಯವಾಲಾ ಥಾವಸ. 15 ತೆ ರಾಜ್ಯ ಕ್ಹಾರಾ ರಾಜ್ಯವೊಮಾ ಕಮ್ಮ ಕವೈ ಲಿವಸ; ಬಿಜಾ಼ ಜನಾಂಗೊತಿ ತೆ ಮ್ಹೊಟು ವ್ಹೈ ಕೈನ ತೆ ವರಿ ಮಾತು ನೈ ಉಚಾ಼ತು; ತೆ ಜನಾಂಗೊನಾ ಉಪ್ಪರ ಫರಿನ ಅದಿಕಾರ ಕರ‍್ಯಾವಾಚಿ ಮಿ ತಿನೆ ಕೆಟ್ಟ ಗತಿನೆ ಲೌಸ. 16 ಐಗುಪ್ತ ಫರಿನ ಇಸ್ರಾಯೆಲ ವಂಶವಾಲಾವೊನು ಭರೊಕ್ಹೊ ಥಾತು ನೈ; ವರಿ ತಿಕನ ಡೊಳಾ ಉಚಾವಾನಾ ಕ್ಹುದಾನಾ ದ್ರೊಹನೆ ಶೆಂ ಇಸ್ರಾಯೆಲವಾಲಾವೊಮಾ ಐಗುಪ್ತತು ಹಬ್ದಾ ಹುಟ್ತು ನೈ. ಮಿಜ಼ ಯಹೊವಾ ವ್ಹೈ ಕೈನ ತ್ಯುನೊನೆ ಗ್ವತ್ತ ಥವಸ.

ನೆಬುಕದ್ನೆಚ್ಚರ ಐಗುಪ್ತನೆ ವಶ ಕರಿಲಿದಲ

17 ಯೆಹೊಯಾಕಿನ ಸೆರೆ ಥಯಲ ಇಕ್ಹಪರ ಕ್ಹಾತವಾ ವರಕ್ಹನಾ ಯಕ್ಕವಾ ಮ್ಹೈನಾನಾ ಯಕ್ಕವಾ ದಿನ್ನಮಾ ಯಹೊವಾ ಎ ವಾಕ್ಯಾ ಮನೆ ದಿದ್ಯೊ. 18 ಮನಕ್ಹನಾ ದಿಕ್ರಾ, ಬಾಬೆಲನೊ ರಾಜೊ಼ ಥಯಲ ನೆಬುಕದ್ನೆಚ್ಚರ ತುರನೆ ದಾಳಿ ಕರಿನ ತಿನಾ ಸೈನಿಕೊಕ್ಹು ಘನ್ನಾ ಪ್ರಯಾಸನಾ ಸೆವಾ ಕರಾಯೊಸ; ಹರಯಕ್ಲಾನು ಮಾತು ಟಕ್ಳು ಛೆ, ಹರಯಕ್ಲಾನೊ ಕ್ಹಾಂದೊ ಕಾಯಿ ಭಾಂದಲ ಛೆ; ತೆನೈಸೊ ತೆ ದಾಳಿಮಾ ತೆ ಕರಲ ಮ್ಹೈನತನೆ ತಿನೆ ರ‍್ಹವಾದೆ ತಿನಾ ಸೈನಿಕೊನೆ ರ‍್ಹವಾದೆ ತುರತು ಸುಜ಼಼ ಪೈದೊ ಮಳ್ಯು ನೈ. 19 ಇಮ್ಮ ರ‍್ಹಯಲಕ್ಹು ಕರ್ತಾ ಥಯಲ ಯಹೊವಾ ಅಮ್ಮ ಕವಸ ದೆಕ, ಮಿ ಬಾಬೆಲನೊ ರಾಜೊ಼ ಥಯಲ ನೆಬುಕದ್ನೆಚ್ಚರನೆ ಐಗುಪ್ತ ದೆಶ ದ್ಯುಸ; ತೆ ತಿನಾ ಮನಕ್ಹೊ ಯಾವತ್ತನೆ ಲಿನ ತೆ ದೆಶನೆ ಬಂದಿ ಕರಿನ ಲುಟಿ ಕರಸ ತೆಜ಼ ತಿನಾ ಸೈನ್ಯನೆ ಪಗಾರ ವ್ಹೈ. 20 ತೆ ಸೈನ್ಯನಾ ಕ್ಹಾತೆ ಮಾರಾಹುತಿ ಸೆವೆ ಕರಕ್ಹು ತೆ ಕರಲ ಮ್ಹೈನತನೆ ಪ್ರತಿಫಲ ಥೈನ ಮಿ ಐಗುಪ್ತ ದೆಶ ತಿನೆ ದಿದ್ಯೊಸ; ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ. 21 ತೆ ದಿನ್ನಮಾ ಮಿ ಇಸ್ರಾಯೆಲ ವಂಶನೆ ಶಿಂಗ್ಡೊ ಉಟಾಡಿನ ತೆ ವಂಶವಾಲಾವೊನಾ ವಚ್ಮಾ ತಾರು ಮ್ಹೊಡು ಕ್ಹೊಲುಸ; ಮಿಜ಼ ಯಹೊವಾ ವ್ಹೈ ಕೈನ ತ್ಯುನೊನೆ ಗ್ವತ್ತ ಥಾವಸ.