ಅಮೊನಿಯನಾ ವಿರುದ್ದ ಪ್ರವಾದನೆ
1 ಯಹೊವಾ ಎ ವಾಕ್ಯಾ ಮನೆ ದಿದ್ಯೊ, 2 ಮನಕ್ಹನಾ ದಿಕ್ರಾ ತು ಅಮ್ಮೊನೆ ಕ್ಹಾಮೊ ಥೈನ ತಿನಾ ವಿಷಯಮಾ ದೈವ ಸಂಕಲ್ಪನೆ ಪ್ರಕಟ ಕರ್ತೊ ತಿನೆ ಇಮ್ಮ ಕೆ, 3 ಕರ್ತಾ ಥಯಲ ಯಹೊವಾನಿ ವಾತನೆ ಐಕ ಕರ್ತಾ ಥಯಲ ಯಹೊವಾ ಅಮ್ಮ ಕವಸ. ಅಮ್ಮೊನ ಮಾರಾ ಪವಿತ್ರ ಆಲಯನೆ ಹೊಲಸ ರ‍್ಹಯಲನೆ, ಇಸ್ರಾಯಲನು ದೆಶ ಹಾಳ ಪಡಲನೆ ಯಹೊದ ವಂಶವಾಲಾ ಸೆರೆ ಗಯಲನೆ ತು ದೆಕಿನ ಆಹಾ ಕದ್ಯೊ. 4 ಹಮ್ನಾ ಮಿ ತುನೆ ಮೂಡಣವಾಲಾವೊನೆ ಬಾದ್ಯಥೈನ ವಶಮಾ ಕರುಸ; ತ್ಯುನೆ ತಾರಾಮಾ ತ್ಯುನಾ ಗುಡಾರೊನೆ ಘಾಲಿನ ಪಾಳೆ ಕರಲಿವಸ; ತಾರಾ ಫಲನೆ ಕ್ಹೈನ ತಾರಾ ದುದ್ದನೆ ಪಿಪಡಸ. 5 ಮಿ ರಬ್ಬಾ ಗಾಮನೆ ಹುಂಟೊನೆ ಲಾಯಥೈನ ಅಮ್ಮೊನ ಸಿಮೆನೆ ಬಕ್ರಾನಾ ಹಿಂಡನೆ ಅರಾಮ ಕರಾನಿ ಜ಼ಗಾ ನಿಂಗತ ಕರಸ; ಮಿಜ಼ ಯಹೊವಾ ವ್ಹೈ ಕೈನ ತುಮೊನೆ ಗೊತ್ತ ಥಾವಸ. 6 ಕರ್ತಾ ಥಯಲ ಯಹೊವಾ ಇಮ್ಮ ಕವಸ, ತು ಚಪ್ಪಾಳೊ ಮಾರಿನ ಪಗ್ಗಕ್ಹು ಜಿಮಿನ ಬಡೈನ ಇಸ್ರಾಯಲ ದೆಶನೆ ಪೂರಾ ಮನಸಕ್ಹು ಇನ್ಕಾರ ಕರಿನ ತಿನಾ ಗತಿನೆ ಹಿಗ್ಗಿ ಲಿದಲಕ್ಹು 7 ಹಮ್ನಾ ಮಿ ತಾರಾ ಉಪ್ಪರ ಹತ್ತ ಉಚೈನ ತುನೆ ಸುರೆ ಥೈನ ಕಿಳ ಮನಕ್ಹೊನಾ ವಶಮಾ ಕರಲಿನ ಜನಾಂಗೊಮಾತು ಕಿತ್ತಿನ ದೆಶಮಾತೊ ತಾರು ನಾಮ ನುಚ್ಚಿನ ತುನೆ ಹಾಳ ಕರುಸ; ತೆಳಾಮಾ ಮಿಜ಼ ಯಹೊವಾ ವ್ಹೈಕೈನ ತುಮೊನೆ ಗೊತ್ತ ಥಾವಸ,
ಮೊವಾಬ್ಯನಾ ವಿರುದ್ದ ಪ್ರವಾದನ
8 ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಆಹಾ, ಯಹೊದವಂಶ ಕ್ಹಾರಾ ಜನಾಂಗನಾ ನಿಂಗತ ಛೆ, ಕ್ಹಾಸ ಸುವೈ? ಕೈನ ಮೊವಾಬು ಸೆಯಿರು ಕೈಲಿದಲಕ್ಹು 9 ಹಮ್ನಾ, ದೆಶ ಭುಷಣ ಥಯಲ ಮೊವಾಬಿನ ಗಡಿನಾ ಗಾಮೊ ಕದ್ಯಾಮ ಬೆತಯೆಷಮೊತ ಬಾಳಮೆಯೊನ, ಕಿರ್ಯಾಥಯಮ ಕವಾನಾ ಗಾಮೊ ರ್ಹವಾನಾ ಜ಼ಗಾಮಾ ಮಿ ಮೊವಾಬಿನಾ ಮೆರೆನೆ ಫೊಡಿನ 10 ತೆ ಸಿಮೆನೈಸೊ ಅಮ್ಮೊನೆ ಪುರ್ವತೊ ಬಾದ್ಯಥೈನ ದಿನ ಅಮ್ಮೊನ್ಯರೊ ಜನಾಂಗೊಮಾ ನಿರ್ನಾಮ ಥವುಕೈನ ಮಾರಾ ಸಂಕಲ್ಪನೆ ಪುರಾಕರುಸ; 11 ಮೊವಾಬ್ಯನೆ ದಂಡ ದಿನ ತಿರಸುಸ; ತೆಳಾಮಾ ಮಿಜ಼ ಯಹೊವಾ ವ್ಹೈಕೈನ ತ್ಯುನೊನೆ ಗೊತ್ತ ಥಾವಸ.
ಯೆದೊಮನಾ ವಿರುದ್ದ ಪ್ರವದನೆ
12 ಕರ್ತಾ ಥಯಲ ಯಹೊವಾ ಅಮ್ಮ ಕವಸ, ಎದೊಮು ಯಹುದ ವಂಶನೆ ಪ್ರತಿಕಾರ ಕರ್‍ಯಾಸ; ಮುಯ್ಯಿನೆ ಮುಯ್ಯಿತಿರುಸುಸ ಮಹಾ ಅಪರಾಧನೆ ಕರ್‍ಯಾವಾಚಿ಼; 13 ಇಮ್ಮ ರ್‍ಹತಾಮಾ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಮಿ ಎದೊಮನಾ ಉಪ್ಪರ ಹತ್ತ ಉಚೈನ ತಿಮಾತು ಮನಕ್ಹೊನೆ ಜಾನವರೊನೆ ನಿರ್ಮೂಲ ಕರಿನ ತೆಮಾನತು ದೆದಾನಿಲಕ್ಕಾ ತಿನೆ ಹಾಳ ಕರಿನ ಪ್ರಜೆನೆ ತಲ್ವಾರನೆ ಕ್ಹಾಪಡೌಸ. 14 ಮಿ ಎದೊಮನೆ ಮಾರಾ ಮನಕ್ಹೊ ಥಯಲ ಇಸ್ರಾಯಲನಾ ಹತ್ತಕ್ಹು ಮುಯ್ಯಿ ತಿರಸುಸ; ತ್ಯುನೆ ಮಾರಾ ಶಿಟ್ಟನೆ ತಕ್ಕ ನಿಂಗತ ತಿನೆ ಕರಸ; ಮಾರಿ ಪ್ರತಿಕಾರ ಎದೊಮಿನು ಅನುಭವನೆ ಆವಸ; ಆಂ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ.
ಪಿಲಿಸ್ತಿನನಾ ವಿರುದ್ದ ಪ್ರವಾದನೆ
15 ಕರ್ತಾ ಥಯಲ ಯಹೊವಾ ಅಮ್ಮ ಕವಸ, ಪಿಲಿಷ್ಟಿವಾಲಾ ಯಹುದನೆ ವಿರುದ್ದ ಕರ್‍ಯಾಸ; ಹೊ, ಮುಯ್ಯಿನೆ ಮುಯ್ಯಿ ತಿರಸಾತಾ ತಿನೆ ಪುರಾ ಮನಸಕ್ಹು ಇನ್ಕಾರಿನ ದಿರ್ಘ ದ್ವೆಷಕ್ಹು ಹಾಳ ಕರ್‍ಯಾಸ; 16 ಇಮ್ಮ ರ್‍ಹತಾಮಾ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಹಮ್ನಾ, ಮಿ ಪಿಲಿಷ್ಟೊನಾ ವಿರುದ್ದ ಹತ್ತ ಉಚೌಸ; ಕೆರೆತಿವಾಲಾವೊನೆ ಕತ್ರಿನ ಸಮಂದರನಾ ದಂಡಿಮಾ ಮನಕ್ಹೊನೊ ಯಕ್ಲಾನೆಬಿ ವಚಾ಼ಡತೊ ನೈ. 17 ತ್ಯುನೆ ಕ್ಹಾರಾ ಘಟ್ಟ ಹುಶಾರಕಿ ದಿನ ಕರಿನ ಮುಯ್ಯಿನೆ ಮುಯ್ಯಿ ತಿರುಸುಸ; ಇಮ್ಮ ಶೆಡ ಕರಾನೆ ಮಿಜ಼ ಯಹೊವಾ ವ್ಹೈ ಕೈನ ತ್ಯುನೊನೆ ಗೊತ್ತ ಥಾವಸ.