ಯೆಜಿಕೆಲ ಯರುಸೆಲಿಮನೆ ವಶಮಾ ಕರಲಿವಾನಿಂಗತ ಕರಾನು
1 ಮನಕ್ಹನಾ ದಿಕ್ರಾ, ತು ಯಕ್ಕ ಇಟಂಗಿ ಲಿನ ತಾರಾ ಕ್ಹಾಮೊ ಮ್ಹೆಲಿನ ತಿಮಾ ಯೆರುಸೆಲಿಮನೊ ನಕ್ಷೊ ಕಾಡ 2 ನಕ್ಷಾನಾ ಸುತ್ತೆಬಿ ದಿಬ್ಬ ಘಾಲಿನ ಒಡ್ಡು ಭಾಂದಿನ ಪಾಳೆಯನೆ ಕರಿನ ಕತ್ರಾನಿಯೊ ಮಿಶಿನೊ ಹುಬ್ರಾಡಿನ ತಿನೆ ಮುತ್ತು. 3 ತೆ ಥಯಲ್ಪರ ಲ್ಹೊಡಾನಾ ತಗಡೊ ಲಿನ ತೆ ತುನೆಬಿ ತೆ ಗಾಮನೆಬಿ ವಚ್ಮಾ ಲ್ಹೊಡಾನಿ ಗೊಡಿ ನಿಂಗತ ಹುಬ್ರಾಡಿನ ತೆ ಗಾಮ್ನಾ ಉಪ್ಪರ ಡೊಳೊ ಮ್ಹೆಲ; ತು ತಿನೆ ಮುತ್ತಿಗೆ ನಿಂಗತ ಥವಾನು ಆ ಇಸ್ರಾಯಲ ವಂಶವಾಲಾವೊನೆ ವಳಕ ವ್ಹೈ. 4 ತೆ ನೈಸೊ ತು ತಾರಾ ರೊಡ್ಡಾ ಬಗಲ ಕ್ಹುರೆ, ಇಸ್ರಾಯಲನಾ ವಂಶವಾಲಾ ಪಾಪನು ವಜ್ಜು ತಿನಾ ಉಪ್ಪರ ಪಡ್ಯುಸ ತು ಕೆಕಲಾ ದಿನ್ನ ಅಮ್ಮ ಕ್ಹುರೆಸಿ ದೆಕ ತೆಕ್ಲಾ ದಿನ ತ್ಯುನು ಪಾಪನು ಉಚೈಲಿನ ರ‍್ಹೌ. 5 ತ್ಯುನೆ ಕೆಕ್ಲಾ ವರಕ್ಹ ತಿನಾ ಅಧರ್ಮನು ಫಲ ಅನಭವ ಕರು ತೆಕ್ಲಾ ದಿನ್ನ ಕದ್ಯಾಮ ತನಕ್ಹೊನ ನೌವದ ದಿನ್ನ ತು ಕ್ಹುರೆಲ ರ‍್ಹೌ ಕೈನ ತುನೆ ನೆಮಸ್ಯೊಸ; ತೆಕ್ಲಾ ದಿನ್ನ ಇಸ್ರಾಯಲನಾ ವಂಶವಾಲಾ ಪಾಪನು ವಜ್ಜು಼ ತು ಉಚೈಲಿದಲ ರ‍್ಹೌ. 6 ತೆಕ್ಲಾ ದಿನ್ನ ಥಯಲ್ಪರ ಸಿದಾ ಬಗಲ ಕ್ಹುರೈನ ಯೆಹುದ ವಂಶವಾಲಾವೊನು ಪಾಪನೆ ಉಚೈಲ್ಯು; ವರಕ್ಹನಾ ಯಕ್ಕನಾ ಯಕ್ಕ ದಿನ್ನೆ ಚಾಳಕ್ಹ ದಿನ್ನ ತ್ಯುನು ಅಧರ್ಮನೆ ಉಚೈಲ್ಯು ಕೈನ ತುನೆ ಗೊತ್ತ ಕರ‍್ಯೊಸ.
7 ತಾರಾ ಭಾಂವಾನೆ ವಚ್ಚಾ಼ನಾ ನೈಸೊ ಮುತ್ತಿಗೆ ಥಯಲ ಯೆರುಸಲೆಮಕನ ಮೊರೆ ಫರೈನ ತಿನಾ ವಿಷಯಮಾ ವಿರುದ್ದ ಪ್ರಕಟ ಕರ.
8 ದೆಕ ಹಮ್ನಾ ತಾರಾ ಮುತ್ತಿನಾ ದಿನೊ ಗಯೆಲಕ್ಕಾ ತು ಸಿದಾ ಬಗಲತೊ ರೊಡ್ಡಾಬಗಲನೆ ಫರೆವಾಚಿ ತುನೆ ಬಂದ ಕರುಸ. 9 ತೆ ನೈಸೊ ಗೌಂ, ಜವೆ ಗೌಂ, ಅವರಿ ಕಾಳ, ಅಲಸಂದಾ, ಸಾವೆ, ಹರಬುರಾ , ತೆ ಕ್ಹಾರು ಲಿನ ಯಕ್ಕ ತಪಾಲಾಮಾ ಘಾಲಿನ ತಿನಾಕ್ಹು ರೊಕ್ಲಾ ಕರಲೆ; ಬಾಜು಼ಮಾ ಕ್ಹುರೆಲ ದಿನ್ನ ಲಕ್ಕಾ, ಕದ್ಯಾಮ ತನಕ್ಹೊನ ನೌವದ ದಿನ್ನ ತಿನೆ ಕ್ಹಾ. 10 ತಾರಾ ಅನ್ನನೆ ತೊಲನಾ ನಿಂಗತ ಹರ ದಿನ್ನೆ 230 ಗ್ರಾಂ ನಿಂಗತ ಕ್ಹಾ; ತೆಳಾಮ ತೆಳಾಮ ದಕ್ಹು ದಕ್ಹು ಕ್ಹೌ. 11 ವರಿ ಪಾನಿನೆ ಅಳತಿನಾ ಪ್ರಕಾರ ಹರದಿನ್ನೆ ಯಕ್ಕ ತಾಂಬಿಯೊ ಪಾನಿ ತೆಳಾಮ ತೆಳಾಮ ದಕ್ಹು ದಕ್ಹು ಪ್ಯೂ. 12 ತು ಸೌದೆನಾ ಬದಲ ಮನಕ್ಹನು ಛಾನ ಉಪಯೊಗ ಕರಿನ ತಾರಾ ಮನಕ್ಹನಾ ಡೊಳಾನಾ ಕ್ಹಾಮೊ ತೆ ಲೊಟನೆ ರೊಕ್ಲಾ ಕರಿನ ಜವ ಗೌಂನಾ ರೊಕ್ಲಾನಿಂಗತ ಕ್ಹಾ. 13 ತಿಮ್ಮಜ಼ ಇಸ್ರಾಯಲನಾ ವಂಶವಾಲಾ ಮಾರಾಕ್ಹು ಬಿಜಾ಼ ಗಾಮೊನೆ ನ್ಹಟಾಡಾನು ಪಟ್ಟಿನ ತೆ ದೆಶವಾಲಾವೊನಾ ವಚ್ಮಾ ರ‍್ಹತಾ ತ್ಯುನಾ ಅನ್ನನೆ ಹೊಲಸ ಕರಿನ ಕ್ಹಾವಸ; ಆ ಯಹೊವಾನಿ ವಾತ. 14 ತಿನಾಹುತಿ ಮಿ ನಕೊ ಕರ್ತಾ ಥಯಲ ಯಹೊವಾ, ಮಿ ಹೊಲಸ ಮುಟ್ಟಲವಾಲೊ ನ್ಹವೈ, ಮಿ ನ್ಹಾನಪಂತೊಬಿ ಹಮ್ನಾ ಲಕ್ಕಾ ಮರಲ ಪಶುನು ಮಾಕ್ಹ ಥೈತಬಿ ಕಾಡ ಮೃಗೊ ಖಲಾಸ ಕರಲ ಪಶುನೂ ಮಾಕ್ಹ ಥೈತಬಿ ಕ್ಹಾದಲವಾಲೊ ನ್ಹವೈ; ಕಯುಬಿ ಅಶುದ್ದ ಥಯಲ ಪದಾರ್ಥ ಮಾರಾ ಮ್ಹೊಡಾಮಾ ಸೆರ್xಯು ನತ್ತಿ ಕೈನ ಕೈಲಿದ್ಯೊ, 15 ದೆಕ, ಮನಕ್ಹನಾ ಛಾನ ಬದಲ ಬೈಲೊನಾ ಛಾನನೆ ತುನೆ ಗೊತ್ತ ಕರ‍್ಯೊಸ,ಅನೆ ಉಪಯೊಗ ಕರಿನ ತಾರಾ ರೊಕ್ಲಾನೆ ಬಾಳ್ಳೆ ಕೈನ ಉತ್ತರ ದಿದ್ಯೊ. 16 ತೆ ನೈಸೊ ತೆ ಮನೆ ಅಮ್ಮ ಕದ್ಯೊ ಮನಕ್ಹನಾ ದಿಕ್ರಾ, ಮಿ ಯೆರುಸಲೆಮಾ ಅನಾಜ ಆವಾನು ಹುಬ್ರಾಡುಸ. ನಿವಾಸಿಯೊ ಅನ್ನನೆ ತೊಲ ನಿಂಗತ ಬೆದರಕ್ಹು ಕ್ಹಾವಸ, ಪಾನಿನೆ ಅಳತಿನಾ ನಿಂಗತ ಭುಚ಼ಕತಾ ಪಿವಸ; 17 ತ್ಯುನಾಮಾ ಹರಯಕ್ಲೊ ಅನ್ನ ಪಾನಿನಾ ಕೊರತೆ ಪಟ್ಟಿನ ಸ್ತಬ್ದ ಥೈನ ತ್ಯುನಾ ತ್ಯುನಾ ಪಾಪಕ್ಹು ನಾಶ ಥೈನ ಜಾ಼ವಸ.