1 ಯಹೊವಾ ಮನೆ ಆಂ ವಾಕ್ಯಾ ದಿದ್ಯೊ. 2 ಮನಕ್ಹನಾ ದಿಕ್ರಾ, ತು ದ್ರೊಹಿವಂಶನಾ ವಚ್ಮಾ ರ‍್ಹಶಿ, ತೆ ವಂಶವಾಲಾ ದ್ರೊಹಿಯೊ ರ‍್ಹಯಲಕ್ಹು ಡೊಳಾ ರ‍್ಹಯಾತಬಿ ದೆಕ್ತಾ ನೈ, ಕಾನೊ ರ‍್ಹಯಾತಬಿ ಐಕ್ತಾ ನೈ. ಕಾ ಕದ್ಯಾಮ ತ್ಯುನೆ ದ್ರೊಹಿ ವಂಶವಾಲಾ ವ್ಹೈ. 3 ಮನಕ್ಹನಾ ದಿಕ್ರಾ, ತು ಜಾ಼ವಾನೆ ಚಾಯೆ ಥಯಲ ಸಾಮ್ನೊ ಜಮಾ ಕರಿನ ಪಾಟೆ ತ್ಯುನಾ ಡೊಳಾ ಕ್ಹಾಮೊ ಜಾ಼, ಕದ್ಯಾಮ ತಾರಿ ರ‍್ಹವಾನಿ ಜ಼ಗಾ ಛೊಡಿನ ತ್ಯುನೆ ದೆಕೆ ನಿಂಗತ ಬಿಜಿಯಕ್ಕ ಜ಼ಗಾಯೆ ಜಾ಼; ತ್ಯುನೆ ದ್ರೊಹಿವಂಶವಾಲಾ ರ‍್ಹಯಾತಬಿ ಯಕ್ಕೆಳೆ ಮನಸಮಾ ಲಾವಾಸ. 4 ತು ತಾರಾ ಸಾಮ್ನೊ ವರಿ ಜಾ಼ವಾನೆ ಚಾಯೆ ಥಯಲ ಸಾಮ್ನೊನೆ ಕೈನ ಪಾಟೆ ತ್ಯುನಾ ಡೊಳಾ ಕ್ಹಾಮೊ ಘರಮಾತೊ ಭಾರೊ ಘಾಲಿನ ಜಾ಼ವಾಲೊ ನಿಂಗತ ಕ್ಹಾಂಜೆ ತ್ಯುನಾ ಕ್ಹಾಮಾತೊ ಗೈಪಡ. 5 ತ್ಯುನೆ ದೆಕ್ತಾಮಾ ತು ಗೊಡಿಮಾ ಭೊಕಾಡೊ ಕರಿನ ತಿಮಾತೊ ತಾರಾ ಸಾಮ್ನೊ ಲಿನ ಜಾ಼. 6 ತ್ಯುನಾ ಡೊಳಾ ಕ್ಹಾಮೊ ತೆ ಕ್ಹಾಂದಾಪರ ಮ್ಹೆಲಿನ ಅಂದಾರಾಮಾ ಉಚೈಲಿನ ಜಾ಼; ಜಿಮಿನೆ ದೆಕ್ಯಾ ಬಗರ ತಾರು ಮ್ಹೊಡು ಝಾಕಿಲೆ; ಮಿ ತುನೆ ಇಸ್ರಾಯಲ ವಂಶವಾಲಾವೊನೆ ಯಕ್ಕ ಅಗಲ್ಯು ಗುರುತ ಥೈನ ಕರ‍್ಯೊಸ.

7 ತೆಳಾಮಾ ಮಿ ಮನೆ ಥಯಲ ಅಪ್ಪಣೆ ಪೂರಾ ಕರ‍್ಯೊ; ಪಾಟೆ ಮಾರಾ ಸಾಮ್ನೊ ಮಿ ಜಾ಼ವಾನೆ ಚಾ಼ಯೆ ಥಯಲ ಸಾಮ್ನೊ ಘರಮಾತೊ ಭಾರೊ ಘಾಲಿನ ಕ್ಹಾಂಜೆ ಮಾರಾ ಹತ್ತಕ್ಹುಜ ಗೊಡಿನೆ ಭೊಕಾಡೊ ಕರಿನ ಅಂದಾರಾಮಾ ತೆ ಸಾಮ್ನೊ ಭಾರೊ ಘಾಲಿನ ತ್ಯುನಾ ಡೊಳಾ ಕ್ಹಾಮೊ ಕ್ಹಾಂದಾಪರ ಉಚೈಲಿನ ಗಯೊ. 8 ಮರ್ನಾ ದಿನ್ನಾ ಪಾಟೆ ಯಹೊವಾ ಮನೆ ಆಂ ವಾತ ದಿದ್ಯೊ. 9 ಮನಕ್ಹನಾ ದಿಕ್ರಾ, ತು ಸು ಕರಾಡೊಸ ಕವಾನು ಇಸ್ರಾಯಲನಾ ದ್ರೊಹಿವಂಶವಾಲಾ ತ್ಯುನೆ ಪುಚ್ಯಾ ನತ್ತಿ ಸು? 10 ತು ತ್ಯುನೊನೆ ಅಮ್ಮ ಕೆ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಎ ಗಾಟ್ರು ಯೆರುಸಲೆಮನಾ ರ‍್ಹವಾನಾ ರಾಜ ಕುಮಾರೊನೆ ತ್ಯಾನಾ ಕ್ಹಾರಾ ಇಸ್ರಾಯಲ ವಂಶವಾಲೊವೊನೆಬಿ ಸಂಬಂದ ರ‍್ಹಯಲ ವ್ಹೈ. 11 ತು ತ್ಯುನೊನೆ ಅಮ್ಮ ಕೆ: ಮಿ ತುಮೊನೆ ಯಕ್ಕ ಅಗು ಥಾವಾನು ವಳಕ ಥಯೊಸ. ಮಿ ಕರಲನಿಂಗತಜ಼ ತ್ಯುನೊನೆ ಥಾವಾಸ; ತ್ಯುನೆ ಗೈನ ಬಂಧಿಯೊ ಥಾವಸ. 12 ತ್ಯುನೊಮಾನೊ ರಾಜ ಕುಮಾರ ಗೊಡಿಮಾ ಭೊಕಾಡೊ ಕರಿನ ಕ್ಹಾಂಜೆನಾ ಟೈಮಾ ತಿಮಾತೊ ಪಾರ ಥಾವಸ. ಮ್ಹೊಡು ಝಾಕಿಲಿವಸ ಜಿಮಿನ ತಿನೆ ದಿಕ್ಹ್ತಿ ಮನೈ. 13 ತೆ ಚೂಕೈಲಿವಾನೆ ಕೊಶಿಶ ಕರಸ. ತೆನೈಸೊ, ಮಿ ತಿನೆ ಬಲಿ ನಾಕೊಸ . ತೆ ಮಾರಾ ಬಲಿಮಾ ಪಡಸ. ಮಿ ತಿನೆ ಕಸ್ದಿಯವಾಲಾವೊನು ದೆಶ ಥಯಲ ಬಾಬಿಲೊನನೆ ಲೌಸ. ತೆ ತೆ ದೆಶ ದೆಕ್ತೊ ನೈ; ತೆನೈಸೊ ತೆ ತ್ಯಾ ಮರಸ. 14 ತಿನಾ ಸುತ್ತೆಬಿ ರ‍್ಹಯಲವಾಲಾ ಕ್ಹಾರಾವೊನೆ ಮಿ ಸುತ್ತೆ ಮುತ್ತ ರ‍್ಹಯಲ ದೆಶೊನೆ ನ್ಹಾಟಾಡಿ ಪಡುಸ. ತಿನಾ ಕಾಮವಾಲಾವೊನೆ ವರಿ ತಿನಿ ಸೈನ್ಯನೆ ವಾರಾ ನಿಂಗತ ತುರಿಪಡುಸ. ವರಿ ತ್ಯುನೊನೆ ತಲ್ವಾರ ಬಿಸುಸ.

15 ಮಿ ತ್ಯುನೊನೆ ಜನಾಂಗೊನಾ ವಚ್ಮಾ ಭಿಕ್ಹರೈ ಪಡ್ಯೊಸ ವರಿ ಬಿಜಾ಼ ದೆಶೊನೆ ನ್ಹಾಟಾಡ್ಯೊಸ. ಮಿಜ ಯಹೊವಾ ವ್ಹೈಕೈನ ತೆಳಾಮಾ ಮನಕ್ಹೊ ತಿಳ್ದಿಲಿಸ 16 ತೆನೈಸೊ ಮಿ ತ್ಯುನಾಮಾ ದಕ್ಹಾ ಜನಾವೊನೆ ಯುದ್ದಕಹುಬಿ, ಬರಗಾಲಕ್ಹುಬಿ ವರಿ ರೊಗೊಕ್ಹುಬಿ ವಚಾ಼ಡುಸ. ತ್ಯುನೆ ಜಾ಼ವಾನಾ ದೆಶೊನಾ ಮನಕ್ಹೊನೆ ತ್ಯುನೆ ಕರಾನಾ ಅಸೈಂಯೊನಿ ಪದ್ದತೊನಾಹುತಿ ಕಯೆ ನಿಂಗತ ಮಿ ಎ ಕರುಸ. ಮಿಜ ಯಹೊವಾ ವ್ಹೈಕೈನ ತೆಳಾಮಾ ತ್ಯುನೆ ತಿಳ್ದಿಲಿವಸ.

17 ತೆಳಾಮಾ ಯಹೊವಾ ಮನೆ ವಾಕ್ಯಾ ದಿದ್ಯೊ. ತೆ ಸು ಕದ್ಯೊ ಕದ್ಯಾಮ, 18 ಮನಕ್ಹನಾ ದಿಕ್ರಾ, ತು ತ್ರಾಸಮಾ ಛೆ ಕೈನ ನಾಟಕ ಕರು. ತು ಅನ್ನ ಲೆತಾಮಾ ಕಾಪು ವರಿ ಹಲ್ಲು. ಪಾನಿ ಪಿತಾಮಾ ಬುಚ್ಕು ವರಿ ಚಿಂತಾ ಕರು. 19 ಎ ತು ಸಾಮಾನ್ಯ ಮನಕ್ಹೊನೆ ತಿಳಸೌ. ತು ಅಮ್ಮ ಕೌ, ‘ಹಜುನ ಇಸ್ರಾಯಲ ದೆಶಮಾ ರ‍್ಹಯಲವಾಲಾ ಯೆರುಸಲೆಮಾ ರ‍್ಹಯಲವಾಲಾವೊನಾಹುತಿ ಅಪ್ನೊ ಕರ್ತಾ ಥಯಲ ಯಹೊವಾ ಅಮ್ಮ ಕವಸ: ತ್ಯುನೆ ಕ್ಹಾತಾ ಟೆಮಾ ಬುಚ್ಕಿನ; ತ್ಯುನೆ ಪಿತಾ ಟೆಮಾ ಬುಚ್ಕಿನ ರ‍್ಹವಸ. ಕಾ ಕದ್ಯಾಮ ತ್ಯಾ ರ‍್ಹವಾಲಾ ಕ್ಹಾರಾ ಜನಾ ಹಿಂಸಾ ಕರಾಲಾ ಥಯಾಸ. ತ್ಯುನಾ ದೆಶಮಾ ರ‍್ಹಯಲ ಕ್ಹಾರು ನಾಶ ಥಾವಸ ವರಿ ತೆ ದೆಶ ಹಾಳ ಪಡಿಜಾ಼ವಸ. 20 ಮನಕ್ಹೊ ರ‍್ಹಯಲ ಗಾಮೊ ನಾಶ ಥಾವಸ; ಪೂರಾ ದೆಶಜ ನಾಶ ಥಾವಸ. ಮಿಜ ಯಹೊವಾ ವ್ಹೈ ಕೈನ ತೆಳಾಮಾ ತುಮೊನೆ ಗೊತ್ತ ಥಾವಸ."

21 ಪಾಚಲ್ತೊ ಯಹೊವಾ ಮನೆ ಆಂ ವಾಕ್ಯಾ ದಿದ್ಯೊ. ತೆ ಸು ಕದ್ಯೊ ಕದ್ಯಾಮ, 22 ಮನಕ್ಹನಾ ದಿಕ್ರಾ, ‘ಟೈಮ ಚಾ಼ಲ್ಯೊಸ. ಕ್ಹಾರಾ ದರ್ಶನೊ ಪೂರಾ ನೈ ಥಾತಾ’ ಕೈನ ಇಸ್ರಾಯಲ ದೆಶವಾಲಾ ಕೈಲಿವಾನು ಆಂ ವಾತ ಸುವೈ? 23 ತೆ ಮನಕ್ಹನೆ ಅಮ್ಮ ಕೆ: ತ್ಯನೊ ಕರ್ತಾ ಥಯಲ ಯಹೊವಾ ಅಮ್ಮ ಕವಸ: ಮಿ ಎ ವಾತನೆ ಅಂತ್ಯ ಆವಾಲಗಾಡುಸ. ಇಸ್ರಾಯಲೊನಿ ತೆ ವಾತ ತ್ಯುನೆ ಹಬ್ದಾ ಕೆಳಾಮಾಬಿ ಕತಾ ನೈ. ತಿನಾ ಬದಲ ತ್ಯುನೊನೆ ಅಮ್ಮ ಕೆ: ಟೈಮ ನಜಿಕ ಆಯಾಸ; ಹರಿಯಕ್ಕ ದರ್ಶನ ಪೂರಾ ಥಾವಸ. 24 ಇಸ್ರಾಯಲೊಮಾ ಇತ್ತಿ ಉಪ್ಪರ ದರ್ಶನೊ ರ‍್ಹತಾಜ ನೈ; ಮೊಸ ಕರಾನಿ ಕಣಿ ರ‍್ಹತಿಜ ನೈ. 25 ಕಾ ಕದ್ಯಾಮ ಮಿಜ ಯಹೊವಾ ವ್ಹೈ. ಮಿ ಕವಾನುಜ಼ ಕೌಸ ವರಿ ತೆ ಸಂಗತಿ ಪೂರಾ ಥಾವಸ. ತಿನೆ ಘನೊ ಟೈಮ ನೈ ಚಾಯೆ ಥಾತೊ ತೆ ತ್ರಾಸೊ ಘನ್ನಾ ಜಲ್ದಿ ಆವಸ; ತುಮಾರಾ ಜಿವಮಾನ ಕಾಲಮಾಜ ಆವಸ. ಎ ದ್ರೊಹಿಯೊ ಥಯಲ ಮನಕ್ಹೊ, ಮಿ ಯಕ್ಕ ವಿಷಯಮಾ ಕದ್ಯೊರೆ ತೆ ವಿಷಯ ಪೂರಾ ಥಾಯೆ ನಿಂಗತ ಕರುಸ." ಮಾರಾ ಕರ್ತಾ ಥಯಲ ಯಹೊವಾ ಎ ಕದ್ಯೊ.

26 ವರಿ ಯಹೊವಾ ಎ ವಾಕ್ಯಾ ಮನೆ ದಿದ್ಯೊ. ತೆ ಸು ಕದ್ಯೊ ಕದ್ಯಾಮ, 27 ಮನಕ್ಹನ ದಿಕ್ರಾ, ತುನೆ ಮಿ ದಿದಲ ದರ್ಶನೊನಾಹುತಿ ಘನೊ ಟೈಮ ಥಯಲ್ಪರ ತೆ ಪೂರಾ ಥಾವಸ ಘನ್ನಾ ದಿನೊ ಥಯಲ್ಪರ ಥಾವಾನು ಹಮ್ನಾಜ಼ ಥಾವಸ ಕಯನ ಕವಸ ಕೈನ ಇಸ್ರಾಯಲನಾ ಮನಕ್ಹೊ ತಿಳ್ದಿಲಿವಾಡಾಸ. 28 ತಿನಾಹುತಿ ತು ತ್ಯುನೊನೆ ಆಂ ವಿಷಯ ತಿಳ್ಸಾ, ಮಾರೊ ಕರ್ತಾ ಥಯಲ ಯಹೊವಾ ಅಮ್ಮ ಕವಸ: ಸು ವೈ ಕದ್ಯಾಮ ಮಿ ಹಜುನ ಘನೊ ತಡಾ ನೈ ಕರ್ತೊ. ಮಿ ಯಕ್ಕ ವಿಷಯ ಪೂರಾ ಥಾವಸ ಕೈನ ಕದ್ಯೊಮ ತೆ ಕ್ಹರಿಬಿ ಪೂರಾ ಥಾವಸ." ಎ ಮಾರೊ ಕರ್ತಾ ಥಯಲ ಯಹೊವಾನಿಯೊ ವಾತೊ ವ್ಹೈ.