ತುರನಾ ರಾಜಾ ಪ್ರವಾದನೆ
1 ಯಹೊವಾ ವರಿಯಕ್ಕ ವಾಕ್ಯಾ ಮನೆ ದಿದ್ಯೊ. 2 ಮನಕ್ಹನಾ ದಿಕ್ರಾ, ತು ತುರನಾ ಪ್ರಭುನೆ ಅಮ್ಮ ಕೆ ಕರ್ತಾ ಥಯಲ ಯಹೊವಾ ಅಮ್ಮ ಕವಸ, ತು ಪುಗ್ಯಲ ಮನಸ್ಸವಾಲೊ ಥಯಲ ಆಹಾ, ಮಿ ಕ್ಹುದಾ ವ್ಹೈ, ಸಮುಂದರನಾ ವಚ್ಮಾ ಕ್ಹುದಾನಿ ಸಿಂಹಾಸನನೆ ಚ಼ಡ್ಯೊಸ ತೆಕ್ಲುಜ಼ ಕೈಲಿದ್ಯೊ; ತು ತಾರಾ ಮನಸನೆ ಕ್ಹುದಾನಾ ಮನಸ ನಿಂಗತ ಹೆಚ್ಕಿ ಕರಿಲಿದಲ ಕಾ? ತು ಕೆಳಾಮಾಜ಼಼ ಕ್ಹುದಾ ನ್ಹವ್ಹೈ, ತು ನರಪ್ರಾಣಿಜ಼ ವ್ಹೈ. 3 ದೆಕ, ತು ದಾನಿಯೆಲತೊ ಗ್ಯಾನಿ ವ್ಹೈ; ತುನೆ ಝಕಾಯಲ ಗುಟ್ಟ ಕಯುಜ಼ ನತ್ತಿ; 4 ತುರು ಗ್ಯಾನ ವಿವೆಕಕ್ಹು ತು ಆಸ್ತಿ ಕರಿನ ತಾರಾ ಟಿಜೊ಼ರಿಯೊಮಾ ಕ್ಹೊನು ರುಪ್ಪ ಭರಿಲಿದ್ಯೊಸ; 5 ತು ತಾರಿ ಘನ್ನಿ ಗ್ಯಾನಕ್ಹು ವ್ರಾಪಾರಕ್ಹು ಆಸ್ತಿ ಗಳಸಿಲಿದಲಕ್ಹು ತಾರು ಮನಸ ತಾರಿ ಆಸ್ತಿಕ್ಹು ಫುಗ್ಯುಸ; 6 ಇಮ್ಮ ರ‍್ಹತಾಮಾ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ತು ತಾರಾ ಮನಸನೆ ಕ್ಹುದಾನಾ ಮನಸ ಅಕ್ಲು ಹೆಚ್ಕಿ ಕರಿಲಿದಲಕ್ಹು 7 ಮಿ ತಾರಾ ಉಪ್ಪರ ಘನ್ನಾ ಕೆಟ್ಟ ಜನಾಂಗನಾ ಪಾಡಾಲಗಾಡುಸ; ತ್ಯುನೆ ತಾರಿ ಗ್ಯಾನನಾ ಉಪ್ಪರ ತಲ್ವಾರ ಫರೈನ ತಾರು ಉಜಾಲು ಹೊಲಸ ಕರಸ. 8 ತುನೆ ಪಾತಾಳನೆ ಢಕ್ಲಿ ಪಡಸ; ಸಮುಂದರನಾ ವಚ್ಮಾ ತುನೆ ಮರಲವಾಲಾವೊನಿ ಗತಿ ಥಾವಸ. 9 ತು ತುನೆ ಕ್ಹಾಲಾಸ ಕರಾಲಾವೊನಾ ಕ್ಹಾಮೊ ಮಿ ಕ್ಹುದಾ ವ್ಹೈ ಕೈನ ಕಶಿ ಸು? ಕ್ಹಲಾಸ ಥಾವಾಲಾನಾ ಹತ್ಮಾ ತು ಕೆಳಾಮಾಜ಼಼ ಕ್ಹುದಾ ನ್ಹವ್ಹೈ, ನರಪ್ರಾಣಿಜ಼ ವ್ಹೈ. 10 ತು ಬಿಜಾ಼ವೊನಾ ಹತ್ಮಾತೊ ಮನೆ ನೈ ನಂಬಲವಾಲಾವೊನಾ ಮೌತನೆ ಗುರಿ ಥಾಶಿ; ಮಿಜ಼ ದೆಕ್ಯೊಸ, ಎ ಕರ್ತಾ ಥಯಲ ಯಹೊವಾನಿ ವಿಚಾರ ವ್ಹೈ. 11 ಯಹೊವಾ ವರಿಯಕ್ಕ ವಾಕ್ಯಾ ಮನೆ ದಿದ್ಯೊ.
ತುರ ರಾಜೊ಼ ಪಡಾನು
12 ಮನಕ್ಹನಾ ದಿಕ್ರಾ, ತು ತುರನಾ ರಾಜಾ಼ನಾ ವಿಷಯಮಾ ಶೊಕನು ಗಿದ್ದ ಕೈನ, ತಿನೆ ಅಮ್ಮ ಕೆ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ತು ಸರ್ವಸುಲಕ್ಷಣ ಶಿರೊಮಣಿ, ಪುರಾ ಗ್ಯಾನಿ, ಪುರಾ ಕ್ಹುಬಸುರತ ವ್ಹೈ. 13 ಕ್ಹುದಾನೊ ಮಳೊ ಥಯಲ ಎದೆನಮಾ ತು ವ್ಹತ್ತೊ; ಮಾಣಿಕ್ಯ, ಪುಷ್ಯರಾಗ, ಪಚ್ಚೆ, ಪಿತರತ್ನ, ಬೆರುಲ್ಲ, ವೈಡುರ್ಯ, ನಿಲಕೆಂಪರಲು, ಸ್ಫಟಿಕ, ಎ ನವರತ್ನಕ್ಹು, ಭುಶಿತ ಥಯೊಸ; ತಾರಾಮಾನಾ (ಎ ರತ್ನನಾ) ಗುಡೊ ಘರೊ ಸುವರ್ಣಕ್ಹು ತಯ್ಯಾರ ಥಯಾತಾ; ತಾರಿ ಸೃಷ್ಟಿನಾ ದಿನ್ನಮಾ ತಯ್ಯಾರ ಥಯಾ. 14 ತು ರೆಕ್ಯಾ ಕಾಡಿನ ಛೊಲಿ ದಿವಾನಿ ಕೆರುಬಿ ಥಯೊತೊ; ಮಿ ತುನೆ ಕ್ಹುದಾನಾ ಪರಿಶುದ್ದ ಡೊಂಗರಪರ ಹುಬ್ರಾಡ್ಯೊ; ತು ಕೆಂಡಾನಾ ಪಾನಿಮಾ ಅಂಗ ಧೊಲ್ಲೆತೊ ವ್ಹತ್ತೊ. 15 ತಾರಿ ಸೃಷ್ಟನಾ ದಿನ್ನತೊ ತಾರಾಮಾ ಅಪರಾದ ಮಳೆಲಕ್ಕಾ ತಾರಿ ನಡತೆ ನಿರ್ದೊಷ ಥೈನ ದಿಕ್ಹಾಡುತು. 16 ತಾರಿ ಮಿತಿ ನೈ ರ‍್ಹಯಲ ವ್ಯಾಪಾರಕ್ಹು ತಾರಾಮಾ ಬಲಾತ್ಕಾರ ಭರಿನ ತು ಪಾಪಿ ಥಯೊ. ತಿನಾಹುತಿ ಮಿ ತುನೆ ಕ್ಹುದಾನಾ ಡೊಂಗರೊ ಹೊಲಸ ಕರಿನ ಢಕ್ಲಿ ಪಡ್ಯೊ; ಹೊ. ಛೌಲಿ ದಿವಾನು ಕೆರುಬಿ, ಕೆಂಡನಾ ಪಾನಿನಾ ವಚ್ಮಾನು ತಾರಿ ಜ಼ಗಾತು ಮಿ ತುನೆ ಕಿತ್ತಿ ನಾಶ ಕರ‍್ಯೊ. 17 ತು ತಾರಾ ಸೊಬಗನಾ ಹುತಿ ಫುಗ್ಯಲ ಮನಸವಾಲೊ ಥಯನ ತಾರು ಉರ್ದಾನು ತಾರಿ ಗ್ಯಾನನೆ ಹಾಳ ಕರಿಲಿದ್ಯೊಸ; ಇನಾಕ್ಹು ಮಿ ತುನೆ ಜಿಮಿನಪರ ಢಕ್ಲಿನ ತು ರಾಜಾ಼ವೊನೆ ಸಬಕ ಥಯೆ ಲಿಂಗೆ ತಯುನಾ ಡೊಳಾ ಕ್ಹಾಮೊ ಘಾಲ್ಯೊ. 18 ತಾರಾ ಘನ್ನಾ ಅಪರಾದೊಕ್ಹು ಅನ್ಯಾಯನಾ ವ್ಯಾಪಾರಕ್ಹು ತಾರಾಮಾನಾ ಪವಿತ್ರಾಲಯೊನೆ ಹೊಲಸ ಕರ‍್ಯೊಸ; ತಿನಾಹುತಿ ಮಿ ತಾರಾಮಾತೊ ಆಗನೆ ಆವಾ ಲಗಾಡ್ಯೊ, ತೆ ತುನೆ ಗಳ್ಯು, ದೆಕಾಲಾ ಕ್ಹಾರಾವೊನಾ ಡೊಳಾ ಕ್ಹಾಮು ತುನೆ ರಾಕ ಕರಿಪಡ್ಯೊ; 19 ಜನಾಂಗೊಮಾ ತುನೆ ಗ್ವತ್ತ ರ‍್ಹಯಲ ಕ್ಹಾರಾ ತಾರಿ ಗತಿನೆ ಭುಚ್ಕಿನ ಘಾಬ್ರಾ ಥಾವಸ; ತು ಘನ್ನೊ ನಾಶ ಥೈನ ಕೆಳಾಮಾಜ಼಼ ನೈಸೊವಾಲೊ ಥಯೊ.
ಸಿದೊನನಾ ವಿಷಯಮಾ ಪ್ರವಾದನ
20 ಯಹೊವಾ ಎ ವಾಕ್ಯ ಮನೆ ದಿದ್ಯೊ 21 ಮನಕ್ಹದಿಕ್ರಾ, ತು ಸಿದೊನನೆ ಅಭಿಮುಖ ಥಯನ ತಿನಾ ವಿಷಯಲಮಾ ಅಮ್ಮ ಕೆ, 22 ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಆಹಾ, ಚಿದೊನ, ಮಿ ತುನೆ ವಿರುದ್ದ ಥಯನ ತಾರಾ ವಚ್ಮಾ ಮಶುರ ಥೌಸ; ಮಿ ಎ ಗಾಮನೆ ಶಿಕ್ಷಾ ದಿನ ಮಾರಿ ಮರ್ಯಾದಿ ವಚಾ಼ಡಿಲಿದಲ ಪರ ಮಿಜ಼ ಯಹೊವಾ ವ್ಹೈ ಕೈನ ಕ್ಹಾರಾವೊನೆ ಗ್ವತ್ತ ಥಾವಸ. 23 ಮಿ ತಿಮಾ ರೊಗೊ ತಿನಾ ಒಣಿಯೊಮಾ ನಾಶನ ಉಂಟ ಕರುಸ; ತಲ್ವಾರ ಸುತ್ತ ಮುತ್ತ ತಿನಾ ಉಪ್ಪರ ಫರಾವಾಕ್ಹು ಮನಕ್ಹೊ ತಿನಾ ವಚ್ಮಾ ಕ್ಹಲಾಸ ಥೈನ ಪಡಸ; ತೆಳಾಮಾ ಮಿಜ಼ ಯಹೊವಾ ವ್ಹೈ ಕೈನ ತ್ಯುನೊನೆ ಗ್ವತ್ತ ಥಾವಸ. 24 ಇಸ್ರಾಯೆಲ ವಂಶವಾಲಾವೊನೆ ಚೊ಼ಟಾವಾನೊ ಕಾಟೊ ಹಬ್ದಾ ನೈ ರ‍್ಹತೊ; ಕದ್ರಾವಾನಾ ಆಜು಼ ಬಾಜು಼ನಾ ತ್ರಾಸವೊನು ತ್ರಾಸ ಹಬ್ದಾ ನೈ ಥಾತು; ಮಿಜ಼ ಕರ್ತಾ ಥಯಲ ಯಹೊವಾ ವ್ಹೈ ಕೈನ ತ್ಯುನೊನೆ ದಿಕ್ಹಸ.
25 ಕರ್ತಾ ಥಯಲ ಯಹೊವಾ ಅಮ್ಮ ಕವಸ, ಜನಾಂಗೊಮಾ ಚದರಿ ಗಯಲ ಇಸ್ರಾಯೆಲ ವಂಶವಾಲಾವೊನೆ ಮಿ ಮಳೈನ ಕ್ಹಾರಾ ಜನಾಂಗನಾ ಡೊಳಾ ಕ್ಹಾಮೊ ಮಾರಿ ಮರ್ಯಾದಿ ವಚಾ಼ಡಿ ಲಿದಲಪರ ತೆ ಇಸ್ರಾಯೆಲ ವಂಶವಾಲಾ ಮಾರೊ ಸೆವಕ ಥಯಲ ಯಾಕೊಬನೆ ಮಿ ದಿದಲ ತ್ಯುನಾ ಸ್ವಂತ ದೆಶಮಾ ರ‍್ಹವಸ. 26 ತ್ಯಾ ಭೆಂವಾಚಿ ರ‍್ಹವಸ, ಘರೊ ಭಾಂದಿಲಿನ ಕ್ಹೆತರೊ ಕರಿಲಿನ ಸುಕಾಕ್ಹು ರ‍್ಹವಸ; ತ್ಯುನೊನೆ ಕದ್ರಾವಾಲಾ ಆಜು಼ ಬಾಜು಼ವಾಲಾವೊನೆ ಮಿ ಶಿಕ್ಷಾ ದಿದಲಪರ ಮಿಜ಼ ತ್ಯುನೊ ಕ್ಹುದಾ ಥಯಲ ಯಹೊವಾ ವ್ಹೈ ಕೈನ ಗ್ವತ್ತ ಥಾವಸ.