1 ಯಹೊವಾ ಆಂ ವಾಕ್ಯಾ ಮನೆ ದಿದ್ಯೊ 2 "ಮನಕ್ಹನಾ ದಿಕ್ರಾ, ಕೈನ ಕ್ಹರಿ ಥಯಲನೆ ಕತಾಮಾ ಇಸ್ರಾಯಲೊನಾ ಪ್ರವಾದಿಯೊನೆ ತು ಪ್ರವಾದನೆ ದೆತಾಮ ಅಮ್ಮ ಕೆ ಯಹೊವಾನಿ ವಾಕ್ಯಾ ಐಕೊ, 3 ಕರ್ತಾ ಥಯಲ ಯಹೊವಾ ಅಮ್ಮ ಕವಸ- ಕಯುಬಿ ಚಮತ್ಕಾರ ನೈಸೊ ಸ್ವಂತ ಬುಧ್ಧಿನೆ ಪೂರಾ ಕರಾನಿ ಮುರ್ಖ ಪ್ರವಾದಿಯೊನಾ ಗತಿ ಸು ಕೌ! 4 ಇಸ್ರಾಯಲೊ ತುಮಾರಾ ಪ್ರವಾದಿಯೊ ಹಾಳು ಪ್ರದೆಶೊಮಾ ನರಿಯೊ ನಿಂಗತ ಛೆ. 5 ಯಹೊವಾನಾ ದಿನ್ನಮಾ ಯುದ್ದನೆ ಹುಬ್ರೌ ಕೈನ ತುಮೆ ಪೌಳಿನಾ ಒಡುಕುವೊನಾ ಛೌಲಿಮಾ, ಇಸ್ರಾಯಲ ವಂಶನಿ ರಕ್ಷಣೆನಾಹುತಿ ಗೊಡಿಬಿ ಘಟ್ಟ ಕರ‍್ಯಾ ನತ್ತಿ. 6 ಯಹೊವಾ ಅಮ್ಮ ಕವಸ ಕೈನ ಕವಾಲಾವೊನೆ ಥಯಲ ದರ್ಶನ ಮಿಥ್ಯ, ಐಕಲ ಕಣಿ ಸುಳ್ಳ ವ್ಹೈ; ಯಹೊವಾ ತ್ಯುನೊನೆ ವಳಾಯೊ ನೈ, ತ್ಯುನೆ ಕದಲ ವಾತೊ ಕ್ಹರಿ ಥಾವಸ ಕೈನ ಗಪ್ಪ ಚುಪ್ಪ ನಿರಿಕ್ಷಾ ಕರಲಿದಾಸ. 7 ಮಿ ಬೊಲ್ಯಾವಾಚಿ ರ‍್ಹೈತುಬಿ ಯಹೊವಾ ಅಮ್ಮ ಕವಸ ಕವಾಲಾ ತುಮೊನೆ ಥಯಲ ದರ್ಶನಬಿ ಮಿಥ್ಯ, ತುಮೆ ಕದಲ ಕಣಿ ಸುಳ್ಳ ವ್ಹೈ.

8 ಅಮ್ಮ ರ‍್ಹತಾಮಾ ಕರ್ತಾ ಥಯಲ ಯಹೊವಾ ಅಮ್ಮ ಕವಸ - ತುಮೆ ವ್ಯರ್ಥ ಥಯಲ ಕೈನ ಸುಳ್ಳ ರ‍್ಹಯಲ ಕಂಡ ಧರಲಕ್ಹು ಹಮ್ನಾ, ತುಮೊನೆ ವಿರುದ್ದ ಥಯೊಸ, ಆಂ ಕರ್ತಾ ಥಯಲ ಯಹೊವಾ ಕೈನ ಮಾರಿ ವಾತ ವ್ಹೈ. 9 ಮಿಥ್ಯಾ ದರ್ಶನ ಹೊಂದಿನ ಸುಳ್ಳ ಕಣಿ ಕವಾಲಾ ಪ್ರವಾದಿಯೊನಾ ಉಪ್ಪ ಮಿ ಹತ್ತ ಕರುಸ; ತ್ಯುನೆ ಮಾರಾ ಮನಕ್ಹೊನಾ ಮ್ಹೊಟಾವೊನಿ ಸಭೆಮಾ ಸೆರು ನೈ, ಇಸ್ರಾಯಲ ವಂಶನಾ ಪಟ್ಟಿಮಾ ತ್ಯುನಾ ನಾಮೊ ಬರದಲ ರ‍್ಹವಸ, ತ್ಯುನೆ ಇಸ್ರಾಯಲ ದೆಶಮಾ ಮ್ಹೈ ಔಬಿ ನೈ; ಮಿಜ ಕರ್ತಾ ಥಯಲ ಯಹೊವಾ ವ್ಹೈ ಕೈನ ತುಮೊನೆ ಗೊತ್ತ ಥಾವಸ;

10 ಕ್ಷೆಮ ನೈ ರ್ಹೈತಬಿ ತ್ಯುನೆ ಕ್ಷಮ ಕೈನ ಮಾರಾ ಮನಕ್ಹೊಮಾ ನಕೊ ಕದ್ಯಾಸ ತೊ. ಯಕ್ಲೊ ಪಾತಳಿ ರ‍್ಹಯಲ ಗೊಡಿಬಿ ಭಾಂದ್ಯಾರೆ, ಹಮ್ನಾ ತಿನೆ ಚುನ್ನೊ ಲಗಾಡಸ. 11 ತೆನೈಸೊ ತು ಚುನ್ನೊ ಲಗಾಡಾವಾಲಾವೊನೆ ಅಮ್ಮ ಕೆ ಘನ್ನು ಜೊ಼ರ ಪಾನಿ ಐನ ಗೊಡಿಬಿ ಪಡಿಜಾ಼ವಸ, ಬರ್ಪೊ ಪಡಸ; ಜೊ಼ರ ವಾರೊ ಗೊಡಿನಿ ಪಾಡಿಪಡಸ; 12 ಹಮ್ನಾ, ಗೊಡಿ ಪಡಲ್ಪರ ತುಮೆ ಚುನ್ನೊ ಲಗಾಡಲ ಕಿಜಾ಼ ಛೆ ಕೈನ ತುಮೊನೆ ಪುಚ್ಚಸಕಸ! 13 ಇಮ್ಮ ರxಹತಾಮಾ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಮನೆ ಸಿಟ್ಟ ಐನ ಜೊ಼ರ ವಾರಾಕ್ಹು ಗೊಡಿನೆ ತೊಡಿಪಡುಸ; ತಿನೆ ನಾಶಕರಾನೆ ಮಾರಿ ಶಿಟ್ಟಕ್ಹು ಜೊ಼ರ ಪಾನಿ ಆವಸ, ವರಿ ಘನ್ನಿ ಶಿಟ್ಟಕ್ಹು ಬರ್ಪೊ ಪಡಸ; 14 ತು ಮೆ ಚುನ್ನೊ ಲಗಾಡಲ ಗೊಡಿನೆ ಮಿ ಅಮ್ಮ ಪಾಡಿನ ಜಿಮಿನಾ ಸಮಾ ಕರಿನ ತಿನು ಅಸ್ತಿವಾರನೆ ಬೈಲು ಕರುಸ ತೆ ಪಡಿಜಾ಼ವಸ, ವರಿ ತುಮೆ ತಿಮಾ ಕ್ಹಾಪ್ಡಿನ ನಾಶ ಥಾವೊಸಿ; ಮಿಜ ಯಹೊವಾ ವ್ಹೈ ಕೈನ ತುಮೊನೆ ಗೊತ್ತ ಥಾವಸ.

15 ಅಮ್ಮ ಮಿ ಗೊಡಿಮಾಬಿ ವರಿ ತುಮೊಮಾಬಿ ತಿನೆ ಚುನ್ನೊ ಲಗಾಡಲ ತುಮೊಮಾಬಿ ಶಿಟ್ಟ ತಿರ್ಸಿಲಿನ ಅಮ್ಮ ಕೌಸ ಗೊಡಿಬಿ ನತ್ತಿ ತಿನೆ ಚುನ್ನೊ ಲಗಾಡಾಲಾಬಿ ನತ್ತಿ. 16 ಇಸ್ರಾಯಲನಾ ಪ್ರವಾದಿಯೊ, ಮಾಫಿ ನೈ ರ‍್ಹೈತಬಿ ಮಾಫಿ ಥಾವಸ ಕೈನ ದರ್ಶನೊ ಕರಿನ ತುಮೆ ಯೆರುಸಲೆಮನಾ ಹುತಿ ತುಮೆ ಕದ್ಯಾಸತೊ; ಆಂ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ.

17 ಮನಕ್ಹನಾ ದಿಕ್ರಾ, ಸ್ವಂತ ವಿಚಾರ ಕರಲ ತಿಳಸೈನ ಕವಾನು ತಾರಾ ಸ್ವಂತ ಕುಲನಾ ಹೆಣ್ಣ ಮನಕ್ಹೊನಾ ಕ್ಹಾಮೊ ಮ್ಹೊಡು ಕರಿನ ತ್ಯುನೊನೆ ಮ್ಹೊಟಿ ಅವಾಜಮಾ ಅಮ್ಮ ಕೆ. 18 ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಮನಕ್ಹೊನಾ ಜಲಮನೆ ಸಿಕಾರ ಕರುಕೈನ ಕ್ಹಾರಾವೊನಾ ರಟ್ಟಾವೊನೆ ತಾವಿಜೊ ಭಾಂದಿನ ಲಾಂಬಾ ರ‍್ಹಯವಾಲಾವೊನೆಬಿ ವರಿ ಗಿಡ್ಡಾ ರ‍್ಹಯಲವಾಲಾವೊನೆಬಿ ತಿನಾ ತಕ್ಕ ಮಸುಕೊನೆ ತಯ್ಯಾರ ಕರಲ ಹೆಣ್ಣ ಮನಕ್ಹೊನು ಗತಿ ಸು ಕೌ! ಹೆಣ್ಣ ಮನಕ್ಹೊ ತುಮೆ ಮಾರಾ ಮನಕ್ಹೊನಾ ಜಲಮನೆ ಸಿಕಾರ ಕರಿನ ಸ್ವಂತ ಜಲಮನೆ ವಚಾ಼ಡಿಲಿವೊಶಿ? ವಚಾ಼ಡಿಲಿವೊಸಿ? 19 ತುಮೆ ಜವೆಘೌಂನಾ ದಾನಾವೊನೆ ರೊಕ್ಲಾನಾ ತುಕ್ಡಾವೊನೆ ಆಸಕರಿನ ಸುಳ್ಳವಾತೆ ಕಾನ ದಿವಾಲಾ ಮಾರಾ ಮನಕ್ಹೊನೆ ಸುಳ್ಳ ಕವಾಕ್ಹು ನೈ ಮರಾಲಾವೊನೆ ಮರಾಡಿನ ಮರಾವಾಲಾವೊನೆ ಉಗ್ರಾಡಿನ ಮಾರಾ ಮನಕ್ಹೊನಾ ವಚ್ಮಾ ಮಾರಾ ಘನತೆನೆ ಕುಂದಿನ ಲಾಯಾಸ.

20 ಇಮ್ಮ ರ‍್ಹತಾಮಾ ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಆಹಾ, ತುಮೆ ಮನಕ್ಹೊನಾ ಜಲಮನೆ ಪಕ್ಷಿಯೊನಿಂಗತ ಸಿಕಾರ ಕರಾನಾಹುತಿ ಸಾಧನ ಥಯಲ ತುಮಾರಾ ತಾವಿಜೊನೆ ಮಿ ಹೆಸಿನ ತಿನೆ ತುಮಾರಾ ಹತೊಮಾತೊ ಕಿತ್ತಿಪಡುಸ; ತುಮೆ ಪಕ್ಷಿಯೊನಾ ನಿಂಗತ ಸಿಕಾರ ಕರಾನು ಜಲಮನೆ ಮಿ ಛೊಡಾವಾಲಗಾಡುಸ. 21 ಮಿತುಮಾರಾ ಮಸಕೊನೆ ಫಾಡಿನ ಮಾರಾ ಮನಕ್ಹೊನೆ ತುಮಾರಾ ಹತೊಮಾತೊ ತಪ್ಸಾಡುಸ; ತ್ಯುನೆ ಅಪರ್ತಾತುಮಾರಾ ಹತೊಮಾ ಸಿಕಾರ ಥಾವಾನೆ ಮಳ್ತಾ ನೈ; ಮಿಜ ಯಹೊವಾ ವ್ಹೈ ಕೈನ ತುಮೊನೆ ಗೊತ್ತ ಥಾವಸ.

22 ಮಿ ನಿರಾಸ ಕರಲ ಶಿಶ್ಯಾನಾ ಮನಸನೆ ತುಮೆ ಸುಳ್ಳ ಕೈನ ಕುಂದಿಸಲಕ್ಹು ದುಷ್ಟ ತಿನಾ ಕೆಟ್ಟ ವಾಟೊನೆ ಛೊಡಿನ ತಿನೊ ಜಲಮ ವಚಾ಼ಡಿಲಿವಾನಾಹುತಿ ತುಮೆ ತಿನಾ ಹತೊನೆ ತಾಕತ ದಿದಲಕ್ಹು 23 ತುಮೆ ಮಿಥ್ಯಾ ದರ್ಶನ ಕರಿನ ತಿಳಸೈನ ಕವಾನು ಕಾಮ ಹಜಿ ಚಾಲ್ತುಜ ನೈ; ಮಾರಾ ಮನಕ್ಹೊ ತುಮಾರಾ ಹತೊಮಾತಾ ತಪ್ಸಾಡುಸ; ಮಿಜ ಯಹೊವಾ ವ್ಹೈ ಕೈನ ಗೊತ್ತ ಥಾವಸ.