1 ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಹಪ್ತಾಮಾ ಕಾಮ ಥಾವಾನಾ ಛೆ ದಿನ್ನಮಾ ಮ್ಹೈನಾ ಪ್ರಾಕರನಾ ಪುರ್ವ ಹೆಬ್ಬಗಿಲ ಝಾಕ್ಯಲ ರ‍್ಹೌ; ತೆನೈಸೊ ಸಬ್ಬತ ದಿನ್ನಮಾಬಿ ಅಮಾಸಮಾಬಿ ಕಾಡಲ ರ‍್ಹೌ. 2 ಮುಖಂಡ ಭಾರಲ್ಯಾ ಕೈಸಾಲೆನಾ ವಾಟತಾ ತೆ ಹೆಬಾಗಿಲನೆ ಪ್ರವೆಶ ಕರಿನ ಬಾಕಲ ನಿಲವುಕಂಬನಾ ಬಾಜು಼ಮಾ ಹುಬ್ರೈನ ತೆ ವಪ್ಪಿಸಲ ಸರ್ವಾಂಗಹೊಮಪಶುನೆ ಸಮಾಧಾನಯಜ್ಞಪಶುನೆ ಯಾಜಕೊ ಅರ್ಪಿಸ್ತಾಮಾ ಬಾಕಲನಾ ಹೊಚ್ಚಲಮಾ ಅಡ್ಡ ಪಡಾದೆ; ಪಾಚ಼ಲ್ತಾ ಜೈ಼ಪಡಾದೆ; ತೆ ದಿನ್ನ ಕ್ಹಾಂಜ಼ ಲಕ್ಕಾ ಬಾಕಲನೆ ಝಾಕು ನೈ. 3 ಸಬ್ಬತ ದಿನ್ನಮಾಬಿ ಅಮಾಸಮಾಬಿ ದೆಶನಾ ಮನಕ್ಹೊ ತೆ ಹೆಬ್ಬಗಿಲನಾ ದ್ವಾರನಾ ಕ್ಹಾಮಾ ಯಹೊವಾನಾ ಸಮ್ಮುಖಮಾ ಅಡ್ಡಪಡಾದೆ. 4 ಸಬ್ಬತ ದಿನ್ನಮಾ ಪ್ರಭು ಯಹೊವಾನೆ ಪುರಾ ಅಂಗ ರ‍್ಹಯಲ ಛೆ ಬಕ್ರಾ ಪುರಾ ಅಂಗ ರ‍್ಹಯಲ ಯಕ್ಕ ಟಗರನೆ ಸರ್ವಾಂಗಹೊಮ ಥೈನ ಅರ್ಪಿಸು; 5 ಟಗರನಾ ಕ್ಹಾತೆ ಮುವತ್ತ ಸೆರ ಘೌಂನೊ ಲೊಟ ಬಕ್ರಾವೊನಾ ಕ್ಹಾತೆ ತಾಕತ ರ‍್ಹಯಲ ತೆಕ್ಲು ಘೌಂನು ಲೊಟ ಮುವತ್ತ-ಮುವತ್ತ ಸೆರ ಘೌಂನು ಲೊಟ ಛೆ ಛೆ ಸೆರ ನಿಂಗತ ತೆಲನೆ ಧಾನ್ಯನೈವೆದ್ಯನಹುತಿ ದಿವಾದೆ. 6 ಅಮಾಸಮಾ ತೆ ಪುರಾ ಅಂಗ ರ‍್ಹಯಲ ಯಕ್ಕ ಹೊರಿನೆ ಛೆ ಬಕ್ರಾವೊನೆ ಯಕ್ಕ ಟಗರ ವಪ್ಪಿಸೌ; ತೆ ಪುರಾ ಅಂಗ ಥೈನಜ಼ ರ‍್ಹೌ; 7 ವರಿ ಹೊರಿನಾ ಕ್ಹಾತೆ ಮುವತ್ತ ಸೆರ, ಟಗರನಾ ಕ್ಹಾತೆ ಮುವತ್ತ ಸೆರ, ಬಕ್ರಾವೊನಾ ಕ್ಹಾತೆ ತಾಕತ ರ‍್ಹಯಲ ತೆಕ್ಲು ಸೆರ ಘೌಂನೊ ಲೊಟ ಮುವತ್ತ-ಮುವತ್ತ ಸೆರನೆ ಛೆ ಛೆ ಸೆರ ನಿಂಗತ ತೆಲ ಧಾನ್ಯನೈವೆದ್ಯನಾಹುತಿ ಒದಗಿಸು.

8 ಮುಖಂಡ ಪ್ರವೆಶ ಕರ್ತಾಮಾ ಹೆಬ್ಬಾಗಿಲ ಕೈಸಾಲೆನಾ ವಾಟತಾ ಮಳಿನ ತೆಜ಼ ವಾಟತಾ ಜಾ಼ವಾದೆ. 9 ದೆಶನಾ ಮನಕ್ಹೊತೊ ಸನ್ನೊಮಾ ಯಹೊವಾನಾ ಸಮ್ಮುಖಮಾ ಧಿಕ್ಹತಾಮಾ ಉತ್ತರ ದಿಕ್ಕ ಬಾಕಲತಾ ಆರಾಧನೆ ಕರಾನೆ ಪ್ರವೆಶ ಕರಲವಾಲೊ ಪಶ್ಚಿಮ ಬಾಕಲತೊ ಜಾ಼ವಾದೆ; ಪಶ್ಚಿಮ ಬಾಕಲತೊ ಆಯಲವಾಲೊ ಉತ್ತರ ದಿಕ್ಕ ಬಾಕಲತೊ ಜಾ಼ವಾದೆ; ತೆ ಪ್ರವೆಶ ಕರಲ ಬಾಕಲತೊ ವಾಪಸ ಗಯಾವಾಚಿ ಆಯಲ ಮ್ಹೊಡಾಕ್ಹುಜ಼ ಜಾ಼ವಾದೆ. 10 ಮನಕ್ಹೊ ಪ್ರವೆಶ ಕರ್ತಾಮಾ ಪ್ರಭು ತ್ಯುನಾ ವಚ್ಮಾ ಪ್ರವೆಶ ಕರಾದೆ; ತ್ಯುನೆ ಜಾ಼ತಾಮಾ ತೆಬಿ ಜಾ಼ವಾದೆ. 11 ಮುಖಂಡ ಉತ್ಸವೊಮಾ ಸನ್ನೊಮಾ ಹೊರಿನಾ ಕ್ಹಾತೆ ಮುವತ್ತ ಸೆರ, ಟಗರನಾ ಕ್ಹಾತೆ ಮುವತ್ತ ಸೆರ, ಬಕ್ರಾವೊನಾ ಕ್ಹಾತೆ ತಾಕತ ರ‍್ಹಯಲ ತೆಕ್ಲಿ ಸೆರ ಘೌಂನಾ ಲೊಟನೆ ಮುವತ್ತ-ಮುವತ್ತ ಸೆರನೆ ಛೆ ಛೆ ಸೆರ ನಿಂಗತ ತೆಲನೆ ಧಾನ್ಯನೈವೆದ್ಯನಾಹುತಿ ಒದಗಿಸು. 12 ಮುಖಂಡ ಸ್ವಂತ ಇಚ್ಛಾಕ್ಹು ಕಾಣಕಿ ರ‍್ಹವಾದೆ ಸರ್ವಾಂಗಹೊಮ ರ‍್ಹವಾದೆ ಸಮಾದಾನ ಯಜ್ಞನೆ ರ‍್ಹವಾದೆ ಯಹೊವಾನೆ ಸಮರ್ಪಿಸ್ತಾಮಾ ತಿನಾಹುತಿ ಪುರ್ವ ಹೆಬ್ಬಾಗಿಲನೆ ಕಾಡು; ತೆ ಸಬ್ಬತ ದಿನ್ನಮಾ ಸಮರ್ಪಿಸೆ ನಿಂಗತ ಸರ್ವಾಂಗಹೊಮಪಶುನೆ ರ‍್ಹವಾದೆ ಸಮಾಧಾನ ಯಜ್ಞಪಶುನೆ ಸಮರ್ಪಿಸಿನ ಜಾ಼ವಾದೆ; ಗಯಲ್ಪರ ಬಾಕಲ ಝಾಕು.

13 ತು ಪುರಾ ಅಂಗ ರ‍್ಹಯಲ ವರಕ್ಹನು ಬಕ್ರಾನೆ ಯಹೊವಾನೆ ಸರ್ವಾಂಗಹೊಮ ಥೈನ ದಿನ್ನೆ ಅರ್ಪಿಸು; ಹರದಿನ್ನ ಪಾಟೆ ತಿನೆ ಅರ್ಪಿಸು. 14 ತಿನಾಕ್ಹಾತೆ ಹರದಿನ್ನ ಪಾಟೆ ಧಾನ್ಯನೈವೆದ್ಯ ಥೈನ ಪಾಂಚ಼಼ ಸೆರ ಘೌಂನಾ ಲೊಟನೆ ತಿನೆ ಪಗ್ಳಾವಾನೆ ಬೆ ಸೆರ ತೆಲನೆ ತು ಸಮರ್ಪಿಸು; ಎಕ್ಹಾರು ಹರಹಮೆಶಾ ಯಹೊವಾನೆ ಧಾನ್ಯನೈವೆದ್ಯ ಥೈನ ಅರ್ಪಿಸು; ಎ ಹಮೆಶಾನು ನಿಯಮ ವ್ಹೈ. 15 ಯಾಜಕೊ ಬಕ್ರಾನೆ ಧಾನ್ಯ ನೈವೆದ್ಯನೆ ತೆಲನೆ ಹಮೆಶಾ ಸರ್ವಾಂಗಹೊಮ ಥೈನ ಹರದಿನ್ನ ಪಾಟೆ ಸಮರ್ಪಿಸು.

16 ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಪ್ರಭು ತಿನಾ ಬಚ್ಚಾವೊಮಾ ಯಕ್ಲಾನೆ ಭುದಾನ ಕರ‍್ಯೊಮ ತೆ ಬಾಪನು ಸ್ವಾಸ್ತ್ಯ ಥಯಲಕ್ಹು ಬಚ್ಚಾವೊನೆ ಹಕ್ಕ ಆವಸ, ತೆ ಬಾಧ್ಯ ಥೈನ ಮಳಲ ಸ್ವಾಸ್ತ್ಯಜ಼ ವ್ಹೈ. 17 ತೆನೈಸೊ ಮುಖಂಡ ತಿನಾ ಜಿಮಿನನು ಯಕ್ಕ ಭಾಗ ತಿನಾ ಸೆವಕೊಮಾ ಯಕ್ಲಾನೆ ದಾನ ಕರ‍್ಯೊಮ ಬಿಡುಗಡೆನಾ ವರಕ್ಹ ಲಕ್ಕಾ ತೆ ತಿನಾ ಅದಿನ ಥಾವಸ; ಪಾಚ಼ಲ್ತು ತೆ ಫರಿನ ಪ್ರಭುನಾ ವಶ ಥಾವಸ; ತೆನೈಸೊ ಪ್ರಭು ತಿನಾ ಬಚ್ಚಾವೊನೆ ದಿದಲ ಸ್ವಾಸ್ತ್ಯ ತ್ಯುನೊನೆ ಮಳಸ. 18 ಎನೈಸೊ ಪ್ರಭು ಮನಕ್ಹೊನಾ ಪಿತ್ರಾರ್ಜಿತ ಜಿಮಿನನೆ ಸ್ವಾದಿನ ಕರಿಲಿನ ತ್ಯುನಿ ಬಾಧ್ಯತೆನೆ ತಪ್ಪಿಸು ನೈ; ಸ್ವಂತ ಜಿಮಿನನೆಜ಼ ಭಾಗ ಕರಿನ ತಿನಾ ಬಚ್ಚಾವೊನೆ ಪಾಲ ದಿವಾದೆ; ನೈತೊ ಮಾರಾ ಮನಕ್ಹೊಮಾ ಹರಯಕ್ಲೊ ತ್ಯುನಾ ತ್ಯುನಾ ಭುಸ್ಥಿತಿನೆ ಜ಼ವೈಲಿನ ದೆಕ್ಕಾಪಾಲ ಥಯನ ಜಾ಼ಸ.

19 ಪಾಚ಼ಲ್ತೊ ತೆ ಮನಕ್ಹ ಮನೆ ಹೆಬ್ಬಾಗಿಲನಾ ಬಾಜು಼ನು ಪ್ರವೆಶನಾ ವಾಟತಾ ಉತ್ತರ ದಿಕ್ಕನೆ ಅಭಿಮುಖ ಥೈನ ಯಾಜಕೊನೆ ನೆಮಕ ಥಯನಬಿ ರ‍್ಹವಾನಾ ಪರಿಶುದ್ದ ರ‍್ಹಯಲ ಕ್ಹೊಲಿಯೊನೆ ಬಲೌಸ; ದೆಕ, ತ್ಯುನಾ ಪಾಚೊ಼ ಪಡುವಲಮಾ ಯಕ್ಕ ಜ಼ಗಾ ವ್ಹತ್ತಿ. 20 ತೆಳಾಮಾ ತೆ ಮನೆ ಯಾಜಕೊ ಹವಿಸ್ಸನೆ ಭಾರಲ್ಯಾ ಪ್ರಾಕಾರನೆ ಲಿನಗೈನ ಮನಕ್ಹೊನೆ ಶುದ್ದ ಕರೆ ನೈಸೊ ಪ್ರಾಯಶ್ಚಿತ್ತಯಜ್ಞಪಶುನಾ ವರಿ ದೊಷಪರಿಹಾರಕಯಜ್ಞಪಶುನು ಮಾಕ್ಹನೆ ಚ಼ಡಾವಾನೆ ಧಾನ್ಯನೈವೆದ್ಯನೆ ಪಕ್ವ ಕರಾನೆಬಿ ಎ ಜ಼ಗಾ ಥಯಲ ಛೆ ಕೈನ ಕದ್ಯೊ. 21 ಪಾಚ಼ಲ್ತೊ ತೆ ಮನೆ ಭಾರಲ್ಯಾ ಪ್ರಾಕಾರನೆ ಲಿನ ಐನ ತ್ಯಾನಾ ಚಾರ ಮುಲಾವೊನಿ ವಾಟತೊ ಬಲೈಲಿನ ಗಯೊ; ದೆಕ, ದ್ರಾಕಾರನಾ ಯಕ್ಕೆಕ್ಕ ಮುಲಾಮಾ ಯಕ್ಕೆಕ್ಕ ಮ್ಹೈನಿ ಅಂಗಳಾ ದಿಕ್ಹಿ. 22 ಹೊ, ಪ್ರಾಕಾರನಾ ಚಾರೆ ಮುಲಾವೊಮಾಬಿ ಇಕ್ಹ ಹತೊ ಲಾಂಬಾಮಾ ಪಂದ್ರಾ ಹತೊ ಅಗಲಮಾ ಪ್ರತ್ಯೆಕ ರ‍್ಹಯಲ ಅಂಗಳಾ ವ್ಹತ್ತಾ; ಮುಲಾವೊಮಾನಾ ತೆ ಚಾರೆ ಅಂಗಳಾ ಯಕ್ಕಜ಼ ಅಳತಿ ವ್ಹತ್ತಾ. 23 ತಿಮಾ ಸುತ್ತ, ಕದ್ಯಾಮ ತೆ ಚಾರ ಅಂಗಳಾನಾ ಸುತ್ತ ಮುತ್ತ ದಗ್ಡಾವೊನಾ ವರಸೆ ಚಾಚುತು; ತೆ ವರಸೆನಾ ಹೆಟಾ ಚು಼ಲ್ಲಾ ಸುತ್ತೆ ಭಾಂದಲ ವ್ಹತ್ತಾ. 24 ತೆಳಾಮಾ ತೆ ಮನೆ ಎ ದೆವಾಲಯನಾ ಸೆವಕೊ ಯಜ್ಞಪಶುವೊನೆ ಲಾಯಲ ಮನಕ್ಹೊನಾಹುತಿ ತ್ಯುನಾ ಮಾಕ್ಹನೆ ಛಡಾವಾನಿ ಪಾಕಶಾಲೆ ವ್ಹೈ ಕದ್ಯೊ.