ಯೆಜಿಕೆಲ ತಿನಾ ಬಾಲೊ ಕತ್ರಿಲಿವಸ
1 ಮನಕ್ಹನಾ ದಿಕ್ರಾ, ಹದ ಥಯಲ ತಲ್ವಾರ ಕಡಿಲಿನ ಕ್ಷೌರಕನಿ ವಸ್ತರ ನಿಂಗತ ಉಪಯೊಗ ಕರ ತಾರು ಮಾತು ವರಿ ತಾರಿ ದಾಡಿಬಿ ಕಡೈಲಿನ ತಕ್ಡಿ ಲೈನ ತಿಕ್ಹ್ಯು ತೆ ಬಾಲೊನೆ ಕರೆಟ್ಟ ತನ್ನ ಭಾಗ ಕರ. 2 ಮುತ್ತಿನಾ ದಿನೊ ಥಯಲ್ಪರ ಬಾಲೊನು ಯಕ್ಕ ಭಾಗ ಗಾಮ್ನಾ ವಚ್ಮಾ ಆಗಮಾ ಬಾಳ; ಹಜಿಯಕ್ಕ ಭಾಗ ಲಿನ ಗಾಮ್ನಾ ಸುತ್ತೆಬಿ ತಲ್ವಾರಕ್ಹು ಕತರ; ವರಿಯಕ್ಕ ಭಾಗನೆ ಹವಾಮಾ ತುರ ತಿಮ್ಮಜ಼ ಮಿ ಮಾರಾ ಮನಕ್ಹೊನಾ ಪಾಚೊ ತಲ್ವಾರ ಭಿರಕೌಸ. 3 ತೆಳಾಮಾ ಲಾಸ್ಟನಾ ಭಾಗಮಾ ಉಗ್ರಾಳಿದಲ ದಕ್ಹಾ ಬಾಲೊನೆ ಉಪ್ಪರಲ್ಯಾ ಅಂಗ್ಡಾನಾ ತುದಿನೆ ಭಾಂದ; 4 ತೆ ಥಯಲ್ಪರ ಅಮಾ ದಕ್ಹಾ ಇನಿಲಿನ ಆಗಮಾ ಘಾಲಿನ ಬಾಳ; ತಿಕ್ಹು ಆಗಬಿ ಗೈನ ಇಸ್ರಾಯಲ ವಂಶವಾಲಾವೊನೆ ಫೈಲಾದೆ.
5 ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಆ ಯೆರುಸಲೆಮ; ತೆ ತೆ ದೆಶೊನಾ ವಚ್ಮಾ ಸ್ಥಾಪಿತ ಕರ‍್ಯೊಸ, ತಿನಾ ಸುತ್ತೆಬಿ ಬಿಜಾ಼ ಬಿಜಾ಼ ದೆಶೊ ಛೆ. 6 ತೆ ಮಾರಾ ನಿಯಮ ನಿಷ್ಟೆನೆ ಮ್ಹೈ ಆಯೆವಾಚಿ ಜನಾಂಗೊತಾಬಿ ಸುತ್ತೆ ರ‍್ಹಯಲ ದೆಶವಾಲಾತಿಬಿ ಹೆಚ್ಚ ಅಧರ್ಮನೆ ಚಾಲಾಯೊ; ತಿನಾ ಮನಕ್ಹೊ ಮಾರಾ ನಿಯಮೊನೆ ಅನುಭವ ನೈ ಕರೆವಾಚಿ ಮಾರಾ ವಿಧಿಯೊನೆ ಠುಕರಾಯಾಸ. 7 ಅಮ್ಮ ರ‍್ಹತಾಮಾ ಕರ್ತಾಥಯಲ ಯಹೊವಾ ಅಮ್ಮ ಕವಸ ತುಮೆ ಮಾರಾ ನಿಯಮೊ ನೈ ಅನು ಸರಶ್ಯಾಮ ಮಾರಾ ವಿಧಿಯೊನೆ ಪಾಲೆಸೆವಾಚಿ ತಾರಾ ಸುತ್ತ ರ‍್ಹಯಲಬಿ ಜನಾಂಗನಾ ಧರ್ಮ ವಿಧಯೊನೆ ಕರೆವಾಚಿ ತೆ ಜನಾಂಗತಿಬಿ ಹೆಚ್ಕಿ ದಂಗೊ ಕರಾಲಾ ಥಯಾಸ. 8 ಹಮ್ನಾ ಮಿಜ ತ್ಯುನೆ ವಿರುದ್ದ ಥಯೊಸ, ಜನಾಂಗನಾ ಡೊಳಾನಾ ಕ್ಹಾಮೊ ತಾರಾ ಮನಕ್ಹೊನೆ ದಂಡ ದ್ಯುಸ ಕರ್ತಾ ಥಯಲ ಯಹೊವಾ ಅಮ್ಮ ಕವಸ. 9 ತು ಘನ್ನು ಅಸಯಿ ಕಾಮೊ ಕರಲಕ್ಹು ಮಿ ಹಮ್ನಾ ಲಕ್ಕಾ ಹಜಿ ಕ್ಹಾಮುಬಿ ಅಗೊಬಿ ಕರೆವಾಚಿ ದಂಡ ಹಮ್ನಾ ತುನೆ ಕರಸ. 10 ಅಮ್ಮ ರೈತಬಿ ತಾರಾಮಾ ಬಾವೊನೆಬಿ ಪಟ್ಟಾವೊನೆಬಿ, ಬಾವೊನೆ ಕ್ಹಾವಸ; ಮಿ ತುನೆ ದಂಡ ದಿನ ತಾರಾಮಾ ಉಗ್ರಲಬಿ ಸಮಸ್ತೊನೆ ಕ್ಹಾರಿ ಬಗಲನಾ ವಾರಾನೆ ತುರುಸ.
11 ಕರ್ತಾ ಥಯಲ ಯಹೊವಾ ಅಮ್ಮ ಕವಸ ಮರಾ ಜಿವದಾಣಾ, ತು ತಾರಾ ಹೆರಳ ಥಯಲ ಹೆಯ ವಿಗ್ರಹಕ್ಹು ಅಸಯ್ಯ ಸಾಮಾನೊಕ್ಹು ಮಾರು ಪವಿತ್ರ ಆಲಯನೆ ಹೊಲಸ ಕರಲಕ್ಹು ಗಟ್ಟ ಥೈನ ಮಿ ಸಹಶ್ಯೊ ನೈ, ಮಾಫ ಕರ್ತೊ ನೈ. ಕ್ಹರಿಮಾಜ಼ ಮಾಫ ಕರ್ತೊ ನೈ. 12 ತಾರಾಮಾನು ತನವಾಮಾನು ಯಕ್ಕ ಭಾಗವಾಲಾ ಪಿಡಾಕ್ಹು ಮರಸ, ತಾರಾ ವಚ್ಮಾ ರೊಗಕ್ಹು ನಾಶ ಥಾವಸ; ಹಜಿಯಕ್ಕ ಭಾಗವಾಲಾ ತಾರಾ ಸುತ್ತೆಬಿ ತಲ್ವಾರಕ್ಹು ಹತ ಥಾವಸ; ವರಿಯಕ್ಕ ಭಾಗವಾಲಾವೊನೆ ಮಿ ಕ್ಹಾರಿಜ಼ಗಾ ವಾರಾಮಾ ತುರಿನ ತ್ಯುನಾ ಪಾಚು ತಲ್ವಾರ ಭಿರಕೌಸ. 13 ತಿಮ್ಮಜ಼ ಮಾರಿ ಸಿಟ್ಟಬಿ ಕಾಡಿಲ್ಯುಸ, ಮಾರು ಕ್ರೊಧ ತ್ಯುನಾಪರ ರಿಚೈನ ಶಾಂತ ಥಾವಸ; ಆಗ್ರಹಕ್ಹು ಬೊಲಲವಾಲೊ ಯಹೊವಾ ಥಯಲ ಮಿಜ ವ್ಹೈ ಕವಾನು ಮಾರಿ ಸಿಟ್ಟನೆ ತ್ಯುನಾ ಉಪ್ಪರ ಲೈನ ಛೊಡಲ ಪರ ತ್ಯುನೊನೆ ಗೊತ್ತ ಥಾವಸ. 14 ಹಾದಿನ ಜಾ಼ವಾಲಾಕ್ಹಾರಾ ಡೊಳಾನಾ ಕ್ಹಾಮಾ ಮಿ ತ್ಯುನೆ ಹಾಳ ಕರಿನ ಸುತ್ತ ರ‍್ಹಯಲಬಿ ಜನಾಂಗನಾ ನಿಂದೆನೆ ಗುರಿ ಕರುಸ. 15 ಮಿ ಸಿಟ್ಟಕ್ಹು ರೊಶಕ್ಹು ಕಠಿನ ಥಯಲ ಖಂಡಕ್ಹುಬಿ ತ್ಯುನೆ ಕರಾನಾ ದಂಡೊ ಸುತ್ತೆ ರ‍್ಹಯಲ ಜನಾಂಗನಾ ದೊಷ ಪರಿಹಾಸನೆ ಬುದ್ದಿ ಥಯಲ ಅಸ್ಪದ ಥಾವಸ ಆ ಯಹೊವಾ ಥಯಲ ಮಾರಿ ವಾತ ವ್ಹೈ. 16 ತೆಳಾಮ ಮಿ ತ್ಯುನೆ ಹಾಳಕರಾನೆ ಬರಗಾಲ ಕವಾನಾ ನಾಶ ಕರಾನಾ ಥಯಲ ತಿಕ್ಷ್ಣ ಬಾಣೊನೆ ತಾರಾ ಉಪ್ಪರ ಛೊಡುಸ; ತ್ಯುನೆ ಬರಾಕ್ಹು ಘನ್ನು ಭಾದಿಸಿನ ; ತಾರೊ ರೊಕ್ಲು ಭಾಗಿ ಪಾಡುಸ. 17 ಮಿ ವಳಾಯಲ ಕ್ಷಾಮಬಿ ದುಷ್ಟ ಮೃಗೊನಾ ಹತೆ ತ್ಯುನೆ ಬಚ್ಚಾ಼ವೊನೆ ಖಲಾಸ ಕರಸ; ವ್ಯಾದಿಬಿ ರಗತನು ಪ್ರವಾಹಬಿ ತಾರಾಮಾ ವಾಪಸ ದ್ಯುಸ; ತಾರಾ ತಲ್ವಾರನೆ ದ್ಯುಸ. ಎ ಕ್ಹುದಾನಿ ವಾತ ವ್ಹೈ