1 ತುಮೆ ದೆಶನೆ ಸ್ವಾಸ್ತ್ಯ-ಸ್ವಾಸ್ತ್ಯ ಥೈನ ವಾಟತಾಮಾ ಯಕ್ಕ ಭಾಗ ಮಿಸಲ ಥೈನ ಪ್ರತ್ಯೆಕ ಕರಿನ ಯಹೊವಾನೆ ನಮರ್ಪಿಸು; ತೆ ಲಾಂಬಾಮಾ ಕ್ಹಡಾ ಬಾರಾ ಹಜಾ಼ರ ಹತೊ, ಅಗಲಮಾ ದಕ್ಹ ಹಜಾ಼ರ-ಹಜಾ಼ರ ಹತ ವ್ಹತ್ತು; ತೆ ಪುರಾ ಗಾಮ ಸುತ್ತ ಮುತ್ತ ಪರಿಶುದ್ದ ರ‍್ಹೌ. 2 ತಿಮಾ ಅಡಿಕ್ಹೊ ಹತೊ ವ್ಹತಾ. ಲಾಂಬಾಮಾ ಅಡಿಕ್ಹೊ ಹತೊ ಅಗಲನು ಚೌಕನಿ ಜ಼ಗಾ ಪವಿತ್ರಾಲಯನೆ ನಿವೆಶನ ಥೈನ ರ‍್ಹವಸ; ತಿನಾ ಸುತ್ತೆ ಅಡಿಕ್ಹೊ ಹತೊ ವ್ಹತಾ. ಅಗಲ ರ‍್ಹಯಲ ಭುಮಿ ರ‍್ಹವಸ. 3 ಪೈಲಾ ಅಳತಿ ಕರಲ ಜ಼ಗಾಮಾ ಕ್ಹಡಾ ಬಾರಾ ಹಜಾ಼ರ ಹತೊ ವ್ಹತಾ. ಲಾಂಬು ಪಾಂಚ಼಼ ಹಜಾ಼ರ ಹತೊ ಅಗಲನು ಯಕ್ಕ ಅಂಶನೆ ಅಳತಿ ಕರ; ತಿಮಾ ಅತಿಪರಿಶುದ್ದ ರ‍್ಹಯಲ ಪವಿತ್ರಾಲಯ ರ‍್ಹೌ. 4 ಎ ದೆಶಮಾ ಪರಿಶುದ್ದ ಭಾಗ; ಎ ಪವಿತ್ರಾಲಯನಾ ಅರ್ಚಕೊ ಯಹೊವಾನಾ ಸನ್ನಿದಿ ಸೆವಕೊ ಥಯಲ ಯಾಜಕೊನೆ ಸಲ್ಲಾನು ವ್ಹೈ; ಎ ಯಾಜಕೊನಾ ಘರೊನೆ ಅಗ್ರಹಾರ ಥೈನ ಪವಿತ್ರಾಲಯನೆ ಪವಿತ್ರಸ್ಥಾನ ಥೈನ ರ‍್ಹವಸ. 5 ದೆವಾಲಯನಾ ಸೆವಕೊ ಥಯಲ ಲೆವಿಯೊ ಗಾಮೊ ಭಾಂದಿಲಿನ ರ‍್ಹಹೆ ಲಿಂಗತ ಕ್ಹಡಾ ಬಾರಾ ಹಜಾ಼ರ ಹತೊ ಲಾಂಬು ಪಾಂಚ಼ ಹಜಾ಼ರ ಹತೊ ಅಗಲನಿ ಜ಼ಗಾ ತ್ಯುನೊನೆ ಸ್ವಾಸ್ತ್ಯ ಥಾವಸ. 6 ತುಮೆ ಮನೆ ಸಮರ್ಪಿಸಾನಾ ಪರಿಶುದ್ದ ಭಾಗನಾ ಬಾಜು಼ ಬಾಜು಼ಮಾ ಅಡಿ ಹಜಾ಼ರ ಹತೊ ಅಗಲನು ಕ್ಹಡಾ ಬಾರಾ ಹಜಾ಼ರ ಹತೊ ಲಾಂಬಾ ಜ಼ಗಾನೆ ರಾಜಧಾನಿನೆ ಮ್ಹೈ ಥಯಲ ಜಿಮಿನ ಐನ ನೆಮಿಸು; ತಿಮಾ ಇಸ್ರಾಯೆಲ ಕ್ಹಾರಾ ವಂಶವಾಲಾವೊನೆ ಹಕ್ಕ ರ‍್ಹವಸ.

7 ಪ್ರಭುನು ಸ್ವಾಸ್ತ್ಯ ತುಮೆ ಮಿಸಲ ಕರಲ ಸಮರ್ಪಿಸಾನಿ ಜ಼ಗಾನೆ ರಾಜಧಾನಿನೆ ಮ್ಹೈ ಥಯಲ ಜಿಮಿನನೆ ಉಭಯಪಾರ್ಶ್ವ ರ‍್ಹವಸ; ತುಮೆ ಮಿಸಲ ಕರಲ ಸಮರ್ಪಿಸಾನಾ ಜ಼ಗಾನಾ ವರಿ ರಾಜಧಾನಿನೆ ಮ್ಹೈ ಥಯಲ ಜಿಮಿನನಾ ಪಡುವಲಮಾ ತೆ ಪಡುವಲನೆ ಹರಡಸ, ಪುರ್ವಮಾ ಪುರ್ವನೆ ಹರಡಸ, ತೆ ಲಾಂಬಾಮಾ ಪಡುವಲತು ಪರ್ವನೆ ಯಕಕ ಕುಲನು ಸ್ವಾಸ್ತ್ಯ ಲಾಂಬಾನೆ ಸರಿಸಮಾ ರ‍್ಹವಸ. 8 ತೆ ತಿನೆ ಇಸ್ರಾಯೆಲಮಾ ಜಿಮಿನ ಸ್ವಾಸ್ತ್ಯ ಥಾವಸ; ಇತ್ತಿ ಉಪ್ಪರ ಪ್ರಭುವೊ ಮಾರಾ ಮನಕ್ಹೊನೆ ಹಿಂಸೆ ನೈ ಕರ್ತಾ; ದೆಶನಿ ಜಿಮಿನನೆ ಇಸ್ರಾಯೆಲೊನೆ ಕುಲತಾ ಕುಲನೆ ವಾಟಸ.

9 ಕರ್ತಾ ಥಯಲ ಯಹೊವಾ ಅಮ್ಮ ಕವಸ- ಇಸ್ರಾಯೆಲನಾ ಪ್ರಭುವೊ, ಹಬ್ದಾ ಬಸ್ಸ, ಬಸ್ಸ; ಕೊಳ್ಳೆನೆ ಬಲಾತ್ಕಾರನೆ ತ್ಯಜಿಸಿನ ನಿತಿನ್ಯಾಯನೆ ಚ಼ಲಾವೊ; ಮಾರಾ ಮನಕ್ಹೊನಾ ಬಾಧ್ಯತೆನೆ ಚು಼ಕೈನ ಅನ್ಯಾಯನೆ ಛೊಡಿ ಪಡೊ; ಎ ಕರ್ತಾ ಥಯಲ ಯಹೊವಾನಿ ವಾತ ವ್ಹೈ, 10 ತುಮಾರಾ ತಕ್ಕಡಿಮಾ ಧಾನ್ಯನಿ ಅಳತಿ ರಸದ್ರವ್ಯನಿ ಅಳತಿ ನ್ಯಾಯ ಥೈನ ರ‍್ಹೌ. 11 ಎಫಾ (ಕವಾನಾ ಧಾನ್ಯನಿ ಅಳತಿ) ವರಿ ಬತ್ (ಕವಾನಾ ರಸದ್ರವ್ಯನಿ ಅಳತಿ) ಯಕ್ಕಜ಼ ಪ್ರಮಾಣ ರ‍್ಹಯಲ ವ್ಹೈ; ಬತ್ ಕವಾನು ಹೊಮೆರನಾ ದಕ್ಹಮಾ ಯಕ್ಕ ಪಾಲ; ಎಫಾ ಕವಾನು ಹೊಮೆರಿನ ದಕ್ಹಮಾ ಯಕ್ಕ ಪಾಲ ವ್ಹೈ; ಎ ಬೆ ಹೊಮೆರ ಅಳತಿನೆ ಸಂಬಂಧ ರ‍್ಹೌ. 12 ತೊಲೆ ಇಕ್ಹ ತೊಲಾ ತುಕಾ ರ‍್ಹೌ; ತುಮೊಮಾ ದಿವಾನಾ ಮಾನೆ ಇಕ್ಹ, ಪಚ್ಚಕ್ಹ (ನೈತೊ) ಪಂದ್ರಾ ತೊಲಾ ತುಕಾನು ರ‍್ಹೌ. 13 ಕರ್ತಾ ಥಯಲ ಯಹೊವಾ ಅಮ್ಮ ಕವಸ, ತುಮೆ ತುಮಾರಾ ದೊಷಪರಿಹಾರನಾಹುತಿ ಧಾನ್ಯ ನೈವೆದ್ಯನೆ ಸರ್ವಾಂಗಹೊಮನೆ ಸಮಾಧಾನ ಯಜ್ಞನೆ ಕರಾವಾನಾಹುತಿ ಸಮರ್ಪಿಸಾನು ಸುವೈ ಕದ್ಯಾಮ ಯಕ್ಕ ಹೊಮರ್ ಅಳತಿನಿ ಘೌಂಮಾ ಎಫಾ ಅಳತಿನು ಛೆಮಾ ಯಕ್ಕ ಪಾಲ; ಯಕ್ಕ ಹೊಮರ್ ಅಳತಿನಿ ಜವೆಘೌಂಮಾ ಎಫಾ ಅಳತಿನು ಛೆಮಾ ಯಕ್ಕ ಪಾಲ ವ್ಹೈ; 14 ಯಕ್ಕ ಬತ್ ತೆಲಮಾ ಸಮರ್ಪಿಸಾನು ಭಾಗ ಕಕ್ಲು ವ್ಹೈ ಕದ್ಯಾಮ ಯಕ್ಕ ಕೊರ ಕದ್ಯಾಮ ದಕ್ಹ ಬತ್ ತೆನೈಸೊ ಯಕ್ಕ ಹೊಮೆರ ಅಳತಿನಿ ತೆಲಮಾ ಯಕ್ಕ ಬತ್ ಅಳತಿನು ದಕ್ಹಮಾ ಯಕ್ಕ ಪಾಲ ವ್ಹೈ; ದಕ್ಹ ಬತ್ ಕದ್ಯಾಮ ಯಕ್ಕ ಹೊಮೆರ ವ್ಹೈ; 15 ಬೆಕ್ಹೊ ಬಕ್ರಾವೊಮಾ ಇಸ್ರಾಯೆಲನಾ ನಿರಾವರಿನಾ ಹುಲ್ಗವಲನು ಯಕ್ಕ ಬಕ್ರು ವ್ಹೈ; 16 ಎ ಕ್ಹಾರಾನೆ ದೆಶನಾ ಕ್ಹಾರಾ ಮನಕ್ಹೊ ಇಸ್ರಾಯೆಲನಾ ಮುಖಂಡೊ ವಪ್ಪಿಸು. 17 ಸನ್ನೊಮಾ ಅಮಾವಾಸೊಮಾ ಸಬ್ಬತ್ತೊಮಾ ಇಸ್ರಾಯೆಲ ವಂಶವಾಲಾವೊನೆ ನೆಮಕ ಥಯಲ ಕ್ಹಾರಾ ಸನ್ನೊಮಾ ಸರ್ವಾಂಗಹೊಮಪಶು, ಧಾನ್ಯನೈವೆದ್ಯ, ಪಾನನೈವೆದ್ಯ, ಎಕ್ಹಾರು ಒದಗಿಸಾನು ಮುಖಂಡ ಕರ್ತವ್ಯ ವ್ಹೈ; ಇಸ್ರಾಯೆಲ ವಂಶನಾ ದೆಷನಿವಾರಣೆನಾಹುತಿ ತೆ ದೊಷಪರಿಹಾರಕ ಯಜ್ಞಪಶು,ಧಾನ್ಯನೈವೆದ್ಯ, ಸರ್ವಾಂಗಹೊಮಪಶು, ಸಮಾಧಾನಯಜ್ಞಪಶು, ಎಕ್ಹಾರು ವಪ್ಪಿಸು.

18 ಕರ್ತಾ ಥೈಲ ಯಹೊವಾ ಅಮ್ಮ ಕವಸ, ಯಕ್ವಾ ಮ್ಹೈನಾನಾ ಯಕ್ವಾ ದಿನ್ನಮಾ ತು ಪುರಾ ಅಂಗ ರ‍್ಹಯಲ ಹೊರಿನೆ ಇನಿಲಿನ ತಿಕ್ಹು ಪವಿತ್ರಾಲಯನೆ ಶುದ್ದಿ ಕರು. 19 ತೆಳಾಮಾ ಯಾಜಕ ತೆ ದೊಷಪರಿಹಾರಕಯಜ್ಞಪಶುನಾ ರಗತಮಾ ದಕ್ಹು ಲಿನ ದೆವಸ್ಥಾನನಾ ಬಾಕಲನಾ ಚೌಕಟ್ಟನೆ ಯಜ್ಞವೆದಿನಾ ಮ್ಹೊಟಾ ಅಂತಸ್ತನಾ ಚಾರೆ ಮುಲಾವೊನೆಬಿ ಮ್ಹೈನಾ ಪ್ರಾಕಾರನಾ ಹೆಬ್ಬಾಗಿನಾ ನಿಲವುಖಂಬಾವೊನೆಬಿ ಲಗಾಡು. 20 ತಿನಾ ನಿಂಗತಜ಼ ಕ್ಹಾತವಾ ಮ್ಹೈನಾನಾ ಯಕ್ವಾ ದಿನ್ನಮಾ ತು ಯಜ್ಞ ಕರಿನ ಕುನ್ನತಬಿ ಅಕಸ್ಮಾತ ಥೈನ ಕರಲ ತಪ್ಪಕ್ಹು ರ‍್ಹವಾದೆ ಗ್ಯಾನ ನೈರ‍್ಹಯಲವಾಲಾವೊನಾ ದೆವಾಲಯನೆ ಥಯಲ ಪುರಾ ದೊಷನೆ ಪರಿಹರಸು. 21 ಯಕ್ವಾ ಮ್ಹೈನಾನಾ ಚೌದಾವಾ ದಿನ್ನಮಾ ಕ್ಹಾತ ದಿನ್ನ ಲಕ್ಕಾ ಪಸ್ಕ ಸನ್ನ ಆಚರಣೆ ಕರ್ತಾ ರ‍್ಹೌ; ಕ್ಹಾಟು ನೈ ರ‍್ಹಯಲ ರೊಕ್ಲಾನೆಜ಼ ಕ್ಹೌ. 22 ತೆ ದಿನ್ನಮಾ ಮುಖಂಡ ತಿನಾಕ್ಹು ದೆಶನಾ ಕ್ಹಾರಾ ಮನಕ್ಹೊಕ್ಹು ದೊಷಪರಿಹಾರ ಯಜ್ಞನಾಹುತಿ ಯಕ್ಕ ಹೊರಿನೆ ಒಪ್ಪಿಸಾದೆ. 23 ಸನ್ನನಾ ಕ್ಹಾತ ದಿನ್ನಮಾಬಿ ಯಹೊವಾನೆ ಸಮರ್ಪಿಸಾನು ಸರ್ವಾಂಗಹೊಮನಾಹುತಿ ತೆ ಕ್ಹಾತ ದಿನ್ನ ಲಕ್ಕಾ ದಿನ್ನ ಯಕ್ಕ ಪುರಾ ಅಂಗ ರ‍್ಹಯಲ ಕ್ಹಾತ ಹೊರಿಯೊ ಕ್ಹಾತ ಟಗರೊ ದಿವಾದೆ, ವರಿ ದೊಷಪರಿಹಾರಕಯಜ್ಞನಾಹುತಿ ದಿನ್ನೆ ಯಕ್ಕ ಹೊತನೆ ದಿವಾದೆ. 24 ಎನೈಸೊ ಯಕ್ಕೆಕ ಹೊರಿ ವರಿ ಟಗರನಾ ಕ್ಹಾತೆ ಮುವತ್ತ-ಮುವತ್ತ ಸೆರ (ಘೌಂನೊ ಲೊಟನೆ) ಛೆ ಛೆ ಸೆರ ತೆಲನೆ ಧಾನ್ಯನೈವೆದ್ಯನಾಹುತಿ ವಪ್ಪಿಸೌ. 25 ಕ್ಹಾತವಾ ಮ್ಹೈನಾನಾ ಪಂದ್ರಾವಾ ದಿನ್ನಮಾ ಶುರು ಥಾವಾನಾ ಸನ್ನನಾ ಕ್ಹಾತವಾ ದಿನ್ನಮಾಬಿ ತೆ ದೊಷಪರಿಹಾರಕಯಜ್ಞಪಶು, ಸರ್ವಾಂಗಹೊಮಪಶು, ಧಾನ್ಯನೈವೆದ್ಯ, ತೆಲ, ಎಕ್ಹಾರು ತೆಜ಼ ಕ್ರಮ ನಿಂಗತ ದ್ಯು.