1 ಮೆದ್ಯ ಥಯಲ ದಾರ್ಯಾವೆಷ ಆಳ್ವಿಕೆನಾ ಪೈಲಾನಾ ವರಕ್ಹಮಾ ಮಿಜ಼ ಮಿಕಾಯೆಲನೆ ಸಾತ ದಿನ ಆಸ್ರೊ ಥೈನ ಹುಬ್ರಯೊ. 2 ಮಿ ಹಮ್ನಾ ಕ್ಹರಿ ರ‍್ಹಯಲ ಕ್ಹಾರುಜ಼ ತುನೆ ಕೌಸ

ದೆಕೊ ಪಾರಿಶಿ ದೆಶಮಾ ಹುಜ಼ುನ ತನ್ನ ರಾಜಾ಼ ಉಟಸ ಚಾರವಾವಾಲೊ ತ್ಯುನೊತಿಬಿ ಘನೊ ಸೌಕಾರ ರ‍್ಹಯಲ ರ್ಹವಸ. ತೆ ತಿನಿ ಸೌಕಾರ ತನಾನಿ ತಾಕತಕ್ಹು ಗ್ರಿಕ ರಾಜ್ಯಮಾ ವಿರುದ್ದ ಥೈನ ಕ್ಹಾರಾವೊನೆ ಉಟಾಡಸ. 3 ತೆಳಾಮಾ ತಾಕತವರ ಯಕ್ಲೊ ರಾಜೊ಼ ಉಟಿನ ಮ್ಹೊಟಿ ಅದಿಕಾರಕ್ಹು ರಾಜ ಕರಿನ ತಿನಾ ಚಿತ್ತ ಪ್ರಕಾರ ಚಾ಼ಲಸ. 4 ತೆ ಮಾತು ಉಚಾಯಲ್ಪರ ತಿನಿ ಯಕ್ಕ ರಾಜ್ಯ ಭಗೈ ಜಾ಼ವಸ. ಹಬಾಳನಾ ಚಾರೆ ಬಗಲ ಜು಼ದು ಥೈ ಜಾ಼ವಸ. ತಿನಾ ಪಿಳಗಿನೆ ಮಳತಿ ನೈ. ತಿನಿ ರಾಜ್ಯ ಕಿತ್ತಿನ ಬಿಜಾ಼ವೊನೆ ವಾಟಸ. 5 ದಕ್ಷಿಣ ಬಗಲನೊ ರಾಜೊ಼ ಘನೊ ತಾಕತವರ ರ‍್ಹವಸ ತಿನಿ ಆಸ್ತಾನಮಾ ರ‍್ಹಯಲ ಯಕ್ಲೊ ಘನೊ ತಾಕತವರ ರ‍್ಹವಸ. ತಿನಿ ಮ್ಹೊಟಿ ಆಳ್ವಿಕೆ ಥಾವಸ 6 ವರಕ್ಹೊನಾ ಲಾಸ್ಟಮಾ ತ್ಯುನೆ ಯಕ್ನಾ ಯಕ್ಕ ಥಾವಸ ಕಿಮ್ಮ ಕದ್ಯಾಮ ದಕ್ಷಿಣಮಾ ರ‍್ಹಯಲ ರ‍್ಜಾ಼ನಿ ದಿಕ್ರಿ ಉತ್ತರಮಾ ರ‍್ಹಯಲ ರಾಜಾ಼ಕನ ಐನ ವಪಂದ ಕರಿಲಿವಸ ವರಿಬಿ ತಾಕತ ವಚಾ಼ಡಿಲೆತಿ ನೈ ತೆ ತಿನಾ ಹತೊ ಹುಬ್ರೆತು ನೈ ತೆ ತಿನೆ ಬಲೈನ ಲಾಯಲವಾಲಾ ತಿನೆ ಪಡ್ದಿಲಿದಲವಾಲೊ ತೆ ಕಾಲಮಾ ತಿನೆ ತಾಕತವರ ಕರಲವಾಲೊ ವಾಚ್ತೊ಼ ನೈ. 7 ತೆಳಾಮಾ ತಿನಿ ಬೆರನಿ ಚಿಗರಕ್ಹು ಉಟಿನ ತಿನಿ ಜಗಾಪರ ಹುಬ್ರೈನ ಸೈನ್ಯನಾಕ್ಹಾತೆ ಐನ ಉತ್ತರ ರಾಜಾ಼ನಾ ರಾಜವಾಡಮಾ ಐನ ತಾಕತವರ ಥಾವಸ 8 ತ್ಯುನಾ ಕ್ಹುದಾವೊನೆ ತ್ಯುನಾ ಮ್ಹೊಟಾ ಮನಕ್ಹೊನೆ ಕ್ಹೊನಾನು ರುಪ್ಪಾನು ಸಾಮ್ನೊ ಕಾಡಿಲಿನ ಐಗುಪ್ತ ದೆಶೆ ಐನ ಉತ್ತರನಾ ದೆಶನಾ ರಾಜಾ಼ನಾ ಉಸಾಬರಿನೆ ಜಾ಼ತಾ ನೈ. 9 ಇಮ್ಮ ದಕ್ಷಿಣನೊ ರಾಜೊ಼ ತಿನಾ ರಾಜ್ಯನೆ ಐನ ಸ್ವಂತ ದೆಶೆ ಫರಿನ ಜಾ಼ವಸ. 10 ತೆ ಥಯಲ್ಪರ ತಿನಾ ದಿಕ್ರಾ ತಯಾರ ಥೈನ ಮ್ಹೊಟು ಗುಂಪ ಕುಡ್ಸಸ. ತ್ಯುನೊಮಾ ಯಕ್ಲೊ ಐನ ತಿಮಾ ಪ್ರಳಯ ನಿಂಗತ ದಾಟಿನ ಜಾ಼ವಸ ವರಿ ತೆಜ಼ ತಯಾರ ಥೈನ ಕೊಟೆನೆ ಝಿತ್ತಸ. 11 ತೆಳಾಮಾ ದಕ್ಷಣನೊ ರಾಜೊ಼ ಸಿಟ್ಟಥೈನ ಗೈನ ತಿನಾಕ್ಹಾತೆ ಕದ್ಯಾಮ ಉತ್ತರನಾ ರಾಜಾ಼ನಾಕ್ಹಾತೆ ಯುದ್ದ ಕರಸ. ತೆ ಮ್ಹೊಟಿ ಸೆನಾ ಕರಿನ ಹುಬ್ರಾಡಸ ವರಿಬಿ ಮ್ಹೊಟು ಸಮೂಹ ಇನೆ ದಿವಸ. 12 ತೆ ಸಮೂಹ ತಿನೆ ಕಾಡಲ್ಪರ ತಿನು ಮನಸ ಸ್ವಕ್ಕಕ್ಹು ಭರಸ ಲಾಕೊಸಿ ಸೈನಿಕೊನೆ ಮಾರ್ಯಾತಬಿ ತೆ ತಾಕತವರ ಥಾತೊ ನೈ. 13 ಉತ್ತರನೊ ರಾಜೊ಼ ವರಿ ಫರಿನ ಪೈಲಾತಿಬಿ ಮ್ಹೊಟು ಮನಕ್ಹೊನು ಗುಂಪ ಹುಬ್ರಾಡಿನ ದಕ್ಹಾ ವರಕ್ಹ ಥಯಲ್ಪರ ಮ್ಹೊಟಾ ಸೈನ್ಯನಾ ಕ್ಹಾತೆ ಆಯುದೊನಾ ಕ್ಹಾತೆ ವರಿ ಕ್ಹರಿಜಾ಼ವಸ 14 ತೆಜ಼ ಕಾಲಮಾ ದಕ್ಷಿಣ ರಾಜಾ಼ನಾ ವಿರುದ್ದ ಥೈನ ಹುಬ್ರಿವಸ ನೈತೊ ತಾರಾ ಮನಕ್ಹೊಮಾ ಚೊಟ್ಟಾ ತೆ ದರ್ಶನ ಸ್ಥಾಪನೆ ಕರುಕೈನ ತ್ಯುನಾಕ್ಹು ತ್ಯುನೆಜ಼ ದಂಗೊ ಉಟಾಡಿಲಿವಸ ವರಿಬಿ ತ್ಯುನೆ ಪಡಿಜಾ಼ವಸ 15 ವರಿ ಉತ್ತರನೊ ರಾಜಪರ ಮುತ್ತಿಗೆ ಘಾಲಿನ ಕೊಟೆ ರ‍್ಹಯಲ ಗಾಮೊ ವಶಮಾ ಕರಿಲಿವಸ ದಕ್ಷಣನೊ ರಾಜೊ಼ ತಾಕತವರ ರ‍್ಹೈತಬಿ ತೆ ಇನಿಲಿನ ಮನಕ್ಹೊಬಿ ಹುಬ್ರಾವಾನೆಬಿ ತಾಕತ ರ‍್ಹತಿ ನೈ. 16 ತೆನೈಸೊ ತಿನಾ ಕ್ಹಾಮೊ ಆವಾಲೊ ತಿನಾ ಮನಸಮಾ ಆಯಲ ತಿಮ್ಮ ಕರಸ ಕುನ್ನಜ ತಿನಾ ಕ್ಹಾಮು ಹುಬ್ರೆತು ನೈ. ತೆ ಚೊ಼ಕಾ ದೆಶಮಾ ರ‍್ಹವಸ.ತೆ ಕ್ಹಾರು ತಿನಾ ಹತ್ತಕ್ಹು ನಾಶ ಥಾವಸ. 17 ತೆ ತಿನಿ ರಾಜ್ಯನಿ ಕ್ಹಾರಿ ತಾಕತನಾ ಕ್ಹಾತೆ ಗೈನ ತಿನಾ ಕ್ಹಾಮೊ ಆವಸ ಕ್ಹರಿಕ್ಹು ರ‍್ಹಯಲವಾಲಾ ತಿನಾಕ್ಹಾತೆ ರ‍್ಹವಸ ಇಮ್ಮ ತೆ ಕರಸ ವರಿ ಛೊಕ್ರಿನೆ ಕೆಡಸಾನಾಹುತಿ ತಿನೆ ದಿವಸ ತೆನೈಸೊ ತೆ ತಿನಾ ಕೆಟ್ಟ ಹುಬ್ರೆತು ನೈ. 18 ಎ ಥಯಲ್ಪರ ತೆ ತಿನು ಮ್ಹೊಡು ದಿವಾ ಬಗಲ ಫರೈನ ಘನಾ ಜನಾವೊನೆ ವಶಮಾ ಕರಿಲಿವಸ ತೆನೈಸೊ ಯಕ್ಲೊ ಅದಿಪತಿ ಕ್ಹುದ್ದನಾಹುತಿ ತಿನೆ ಕದ್ರಾವಸ ತೆ ನಿಂದಾಕ್ಹು ತಿನಾಪರ ಘಾಲಿದೆವಾಚಿ ತಿಪರಜ಼ ಘಾಲಿಪಡಸ. 19 ತೆಳಾಮಾ ತೆ ತಿನಾ ಕ್ಹುದ್ದನಾ ದೆಶನಾ ಕ್ಹಾಮೊ ಮ್ಹೊಡು ಫರೈನ ವರಿ ತೆ ಪಡಿನ ದಿಕ್ಹಿನ ಆತೊ ನೈ. 20 ತೆಳಾಮಾ ತಿನಾ ಬದಲ ಚೊ಼ಕು ರಾಜ್ಯಮಾ ಆಕ್ರಮಣ ಕರಿನ ತೆ ಜ಼ಗಾಪರ ಹುಬ್ರೆವಸ ವರಿ ತೆ ದಕ್ಹಾ ದಿನೊ ಥಯಲ್ಪರ ತೆ ನಾಶ ಥಾವಸ. 21 ತಿನಿ ಜ಼ಗಾಪರ ಯಕ್ಲೊ ಕೆಟ್ಟ ಮನಕ್ಹ ಹುಬ್ರೆವಸ ತಿನಿ ರಾಜ಼ವಾಡನೆ ಮರ್ಯಾದಿ ದೆತಾ ನೈ ತೆ ತಿನಿ ಮಯಾಕ್ಹು ತೆ ರಾಜ್ಯನೆ ಝಿತ್ತಿ ಲಿವಸ. 22 ಪ್ರವಾಹ ನಿಂಗತ ರ‍್ಹಯಲ ತೆ ಚಕ್ರಾ ಮ್ಹೊಟು ವಡಂಬಡಿಕೆನು ಮ್ಹೊಟೊ ತಿನಿ ಜ಼ೊರತನಾಮಾ ರಬಸ ಅಟ್ಕಿನ ಭಗೈಜಾ಼ವಸ 23 ತಿನಾಕ್ಹತೆ ಸಮಾಧಾನ ಕರಿಲಿದಲ್ಪರ ಕಪಟ್ಯೊ ಥೈನ ಚಾ಼ಲಸ ದಕ್ಹಾಮನಕ್ಹೊನಾ ಮದತಕ್ಹು ಉಪ್ಪರ ಉಟಸ. 24 ತಿನೆ ಸಮಾಧಾನಿ ಸಂಸ್ಥಾನಮಾ ಫಲ ದಿವಾನಾ ದೆಶ್ಯೊಮಾ ಹೊಕ್ಕಿನ ಬಾಪ ಬುಡಾ ನೈಸೊ ಕರಲ ಕಾಮ ಕರಸ. ಕಾಳ್ಳಿವಾನು ಮೊಸ ಕರಿನ ಕಾಳ್ಳಿದಲ ಲುಟಿ ಲಿದಲ ಕ್ಹಾರುಜ಼ ತ್ಯುನೊಮಾ ನಾಕಿ ಪಡಸ ಹೊ ಕೊಟೆಮಾ ಧರಾನು ಕುತಂತ್ರ ದಡಿ ರ‍್ಹಯೆ ಕಾಲಲಕ್ಕಾ ದೆಕಾಡಿನ ದಿವಸ. 25 ತೆ ದಕ್ಷಿಣನಾ ರಾಜಾ಼ನೆ ವಿರೊದ ಥೈನ ತಿನಿ ತಾಕತಕ್ಹು ಧೈರ್ಯಕ್ಹು ಮ್ಹೊಟಿ ಸೈನ್ಯನಾಕ್ಹಾತೆ ಉಟಿನ ಆವಸ. ವರಿಬಿ ತ್ಯುನೆ ಹುಬ್ರೆವಾಚಿ ಗೈಪಡಸ ಕಾಕದ್ಯಾಮ ಮ್ಹೈನಾ ಮ್ಹೈ ಫಸಲೊ ಕರಲ ರ‍್ಹವಸ. 26 ಹೊ, ತ್ಯುನೆ ರಾಜ಼ವಾಡಾಮಾ ಅನ್ನನು ಅರ್ದು ಭಾಗ ಕ್ಹಾದಲವಾಲಾಜ಼ ತ್ಯುನೊನೆ ನಾಶ ಕರಸ ತ್ಯುನಿ ಸೈನ್ಯ ಭರಲ ರ‍್ಹವಸ ವರಿ ದಕ್ಹಾಜ಼ನಾ ಕ್ಹಲಾಸ ಥಾವಸ. 27 ಎ ಭಂಬಿ ರಾಜಾ಼ವೊನಾ ಮನಸಮಾ ಕೆಟ್ಟ ಕರಾನುಜ಼ ರ‍್ಹಯಲ ರ‍್ಹವಸ ಯಕ್ಕಜ಼ ಟೆಬಲ್ಪರ ಬೈಟಿನ ಸುಳ್ಳ ಬೊಲಾಲಾ ರ‍್ಹವಸ ವರಿ ತ್ಯುನೊನೆ ಅನುಕುಲ ಥಾತು ನೈ, ತೆ ಕಿಮ್ಮೆಬಿ ಕದಲ ಟೈಮಾಜ಼ ಅಂತ್ಯ ಥಾವಸ. 28 ತೆ ತೆಳಾಮಾ ಮ್ಹೊಟಿ ಸೌಕಾರತನಾನಾ ಕ್ಹಾತೆ ಸ್ವಂತ ದೆಶೆ ಫರಿನ ಆವಸ. ತಿನು ಮನಸ ಚೊ಼ಕಾ ಕಾಮೊನೆ ಪವಿತ್ರ ವಡಂಬಡಿಕೆನಾ ವಿರುದ್ದ ಥಯಲ ರ‍್ಹವಸ ತೆ ಇಮ್ಮ ತಿನಾ ಕಾಮೊ ಕರಿನ ಸ್ವಂತ ದೆಶೆ ಫರಿನ ಆವಸ. 29 ತೆನೈಸೊ ಕರೆಟ್ಟ ಟೈಮಾ ತೆ ದಕ್ಷಿಣ ಬಗಲ ಫರಿನ ಆವಸ. 30 ತೆನೈಸೊ ಪೈಲಾ ಥಯಲ ಬೆವಾಸಲಾ ಥಾತು ನೈ ಕಿತ್ತಿಮಿನಿ ಹಡ್ಗಾ ತಿನಾ ವಿರುದ್ದ ಥೈನ ಆವಸ. ತಿನಾಹುತಿ ತೆ ಹಮೆಶ್ಯಾಬಿ ಪರಿಶುದ್ದ ವಡಂಬಡಿಕೆನೆ ವಿರುದ್ದ ಥೈನ ತೆ ಶಿಟ್ಟಮಾ ಇಮ್ಮ ಕರ್ತೊ ರ‍್ಹವಸ ವರಿ ವಡಂಬಡಿಕೆ ಛೊಡಲವಾಲಾನಾಕ್ಹಾತೆ ಚೊ಼ಕೊ ರ‍್ಹವಸ 31 ತಿನಿ ಜ಼ಮಾ ಕರಲ ಸೈನ್ಯ ಆಶ್ರಯನು ದುರ್ಗ ಥಯಲ ಪವಿತ್ರ ಆಲಯನೆ ಹೊಲಸ ಕರಿನ ಹಮೆಶ್ಯಾನು ಬಲಿ ಛೊಡಿನ ಹಾಳ ಕರಾನಾ ಕೆಟ್ಟ ಸಾಮ್ನೊ ಮ್ಹೆಲಸ. 32 ವಡಂಬಡಿಕೆನೆ ವಿರುದ್ದ ಥೈನ ಕೆಟ್ಟಥೈನ ಚಾ಼ಲಾವಾಲಾವೊನೆ ಕಾಮನಿ ನೈಸೊ ವಾತೊ ಬೊಲಿನ ಕೆಡ್ಸಸ. ತೆನೈಸೊ ತಿನಾ ಕ್ಹುದಾವೊನೆ ವಳಕಾಲಾ ಮನಕ್ಹೊ ಘಟ್ಟ ಥೈನ ರ‍್ಹವಸ. 33 ಮನಕ್ಹೊಮಾ ಗ್ಯಾನಿಯೊ ರ‍್ಹಯಲವಾಲಾ ಘನಾ ಜ಼ನಾವೊನೆ ಬೊದನೆ ಕರಸ. 34 ತ್ಯುನೆ ಪಡ್ತಾಮಾ ತ್ಯುನೊನೆ ದಕ್ಹಿ ಮದತ ಮಳಸ. ದಕ್ಹಾಜ಼ನಾ ಮೊಸನಿ ವಾತೊಕ್ಹು ತ್ಯುನಾಕ್ಹಾತೆ ರ‍್ಹವಸ. 35 ತೆನೈಸೊ ಅಂತ್ಯ ಕಾಲಲಕ್ಕಾ ತ್ಯುನೊನೆ ಪರಿಕ್ಷಾ ಕರಾನಾಹುತಿ ಶುದ್ದ ಕರಾನಾಹುತಿ ಹಸಾ ಕರಾನಾಹುತಿ ದಕ್ಹಾ ಗ್ಯಾನಿಯೊ ಪಡಿ ಜಾ಼ವಸ. ಎ ಅಂತ್ಯ ಥೈನ ರ‍್ಹವಸ. 36 ರಾಜೊ಼ ತಿನಾ ಮನಸಮಾ ಆಯಲ ತಿಮ್ಮ ಕರಸ. ತಿನಾಕ್ಹು ತೆ ಹೆಚ್ಕಿ ಕರೈಲಿನ ತಿನೆ ಕ್ಹಾರಾ ಕ್ಹುದಾವೊತಿ ಮ್ಹೊಟೊ ವ್ಹೈ ಕೈನ ಕರಲಿನ ಕ್ಹುದಾನಾ ವಿರುದ್ದ ಘಾಬ್ರಾ ಥಾವಾನಾ ಸಂಗತಿಯೊ ಬೊಲಿನ ಶಿಟ್ಟ ಫರೆಲಕ್ಕಾ 37 ತೆ ತಿನಾ ಪಿತೃವೊನಾ ಕ್ಹುದಾನೆ ರ‍್ಹವಾದೆ ಬಾಕ್ಡಿಯೊನು ಕ್ಹುದಾವೊನೆ ರ‍್ಹವಾದೆ ಧ್ಯಾನ ದೆತೊ ನೈ ಕಯಾಜ಼ ಕ್ಹುದಾನೆ ಧ್ಯಾನ ದೆತೊ ನೈ ತೆ ಕ್ಹಾರಾವೊತಿ ಮ್ಹೊಟೊ ವ್ಹೈ ಕೈನ ಕೈಲಿವಸ. 38 ತೆನೈಸೊ ತೆ ತಿನಿ ಜ಼ಗಾಪರ ಕ್ಹುದಾನಿ ತಾಕತ ತಿನಾ ಪಿತೃವೊ ನೈ ವಳಕಲ ಕ್ಹುದಾವೊನೆ ಮರ್ಯಾದಿ ದಿವಸ. ಕ್ಹೊನಾಕ್ಹು ರುಪ್ಪಾಕ್ಹು ಚೊ಼ಕಾ ದಗ್ಡಾವೊಕ್ಹು ಚೊ಼ಕು ರ‍್ಹಯಲನೆ ಯಕ್ಕಜ಼ ಮರ್ಯಾದಿ ದಿವಸ. 39 ಇಮ್ಮ ಬಿಜಾ಼ ಕ್ಹುದಾನಿ ಮದತಕ್ಹು ಘನ್ನಿ ತಾಕತ ರ‍್ಹಯಲ ಕೊಟೆನೆ ಆಕ್ರಮಣ ಕರಸ ತೆಕಿನೆ ಮರ್ಗಸ ತಿನೆ ಮರ್ಯಾದಿ ದಿವಸ ಘನ್ನಾ ಮನಕ್ಹೊನೆ ಆಳತಿನೆ ದಿವಸ. 40 ಅಂತ್ಯ ಕಾಲಮಾ ದಕ್ಷಿಣೊ ರಾಜೊ಼ ತಿಪರ ಪಡಸ. ಉತ್ತರನೊ ರಾಜೊ಼ ರಥೊನಾಕ್ಹಾತೆ ಸವಾರೊನಾಕ್ಹಾತೆ ಹಡ್ಗಾವೊನಾ ಕ್ಹಾತೆ ತುಫಾನನಾ ವಾರಾ ನಿಂಗತ ತಿನಾ ವಿರೊದ ಥೈನ ತ್ಯುನೊನೆ ನಾಶ ಕರಿ ಪಡಸ. 41 ತೆನೈಸೊ ಚೊ಼ಕಾ ರ‍್ಹಯಲ ದೆಶ್ಯೊಮಾ ಹೊಕ್ಕಿನ ತ್ಯುನೊನೆ ಹಾಳ ಕರಿ ಪಡಸ. ತೆನೈಸೊ ಎದೊಮು, ಮೊವಾಬು, ಅಮೊನನಾ ಬಚ್ಚಾವೊಮಾ ಮ್ಹೊಟಾ ತಿನಾ ಹತೆ ಚು಼ಕೈ ಲಿವಸ 42 ತೆ ದೆಶೊನಾ ಉಪ್ಪರ ತಿನಾ ಹತೊ ಅಗೊ ಕರಸ. ಐಗುಪ್ತ ದೆಶ ನೈ ಚು಼ಕೈಲೆತು. 43 ಕ್ಹೊನು ರುಪ್ಪು ಭೊಕ್ಕಸೊಪರ ವರಿ ಕ್ಹಾರಾ ಮೊಗಾನಾ ಸಾಮ್ನೊಪರ ತಿನೆ ಅದಿಕಾರ ರ‍್ಹವಸ.ಲುಬ್ಯರು ಐಥೊಪ್ಯೊ ತಿನಾ ಪಾಚಾ ಆವಸ. 44 ಮೂಡಣತಾ ಉತ್ತರತಾ ಆವಾನಿಯೊ ಸುದ್ದಿಯೊ ತಿನೆ ಬುಚ್ಕಾಡಸ ತಿನಾಹುತಿ ತೆ ಘನೊ ಶಿಟ್ಟ ಥೈನ ತ್ಯುನೊನೆ ಕ್ಹಲಾಸ ಕರಾನೆ ಜಾ಼ವಸ. 45 ತೆ ತಿನು ರಾಜ಼ವಾಡಾನು ಗುಡಾರೊ ಸಮಂದರ ವರಿ ಚೊ಼ಕಾ ಡೊಂಗರನಾ ವಚ್ಮಾ಼ ರಾಜ್ವಾ಼ಡಾ ನಿಂಗತ ರ‍್ಹಯಲ ಝುಪ್ಡು ಭಾಂದಸ ವರಿಬಿ ತಿನು ಅಂತ್ಯ ಥಾವಸ ಕುನ್ನಜ಼ ತಿನೆ ಮದತ ಕರ್ತು ನೈ.