16 ಮಿ ಬಾನೆ ಮಾಂಗಿಲಿವಸ. ತೆಳಾಮಾ ತೆ ಬಿಜಾ಼ ಯಕ್ಲಾ ಸಹಾಯಕನೆ ತುಮೊನೆ ದಿವಸ. ತೆ ಸಹಾಯಕ ಹಮೆಶಾಬಿ ತುಮಾರಾ ಕ್ಹಾತೆ ರ‍್ಹವಸ. 17 ಕ್ಹರಿನೊ ಆತ್ಮಾಜ಼಼ ತೆ ಸಹಾಯಕ ವ್ಹೈ. ಎ ದುನಿಯಾ ತಿನೆ ಸ್ವಿಕಾರ ನೈ ಕರತು. ಕಾಕದ್ಯಾಮ ದುನಿಯಾ ತಿನೆ ದೆಕ್ತಾ ನೈ, ತಿಳ್ದಿಲೆತಾಬಿ ನೈ. ತೆನೈಸೊ ತುಮೆ ತಿನೆ ತಿಳ್ದಿಲಿದ್ಯಾಸ. ತಿನಾಹುತಿ ತೆ ತುಮಾರಾ ಕ್ಹಾತೆ ಜಿವ್ನಾ ಕರಸ ವರಿ ತುಮಾರಾಮಾ ರ‍್ಹವಸ. 18 "ಮಿ ತುಮೊನೆ ಪರ್ದೆಶಿ ನಿಂಗತ ಛೊಡಿನ ನೈ ಜಾತೊ. ಮಿ ತುಮೊಕನ ಔಸ. 19 ಹಜು಼ನ ದಕ್ಹಿ ಯೆಳ ಥಯಲ್ಪರ ಎ ದುನಿಯಾ ಮನೆ ದೆಕ್ತಿ ನೈ. ತೆನೈಸೊ ತುನೆ ಮನೆ ದೆಕೊಶಿ. ಕಾಕದ್ಯಾಮ ಮಿ ಜಿವ್ತೊ ರ‍್ಹೌಸ ವರಿ ತುಮೆಬಿ ಜಿವ್ತಾ ರ‍್ಹವೊಶಿ. 20 ತೆ ದಿನ್ನೆ ತುಮೆ ಮಿ ಮಾರಾ ಬಾ ಮಾ ರ‍್ಹವಾನು, ತುಮೆ ಮಾರಾಮಾ ರ‍್ಹವಾನು ವರಿ ಮಿ ತುಮಾರಾಮಾ ರ‍್ಹವಾನು ತಿಳ್ದಿಲಿವೊಶಿ. 21 ಯಕ್ಲೊ ಮಾರಿ ಆಗನ್ಯಾವೊನೆ ಸ್ವಿಕಾರ ಕರಿನ ತಿನಾ ನಿಂಗತ ಚಾಲ್ಯೊಮ, ತೆ ಮನೆ ಮಯಾ ಕರಾಲೊ ಥಯೊಸ. ಕುನ್ನ ಮನೆ ಮಯಾ ಕರಸ ತಿನೆ ಮಾರೊ ಬಾ ಬಿ ಮಯಾ ಕರಸ ವರಿ ಮಿ ತಿನೆ ಮಯಾ ಕರುಸ. ವರಿ ಮಿ ತಿನೆ ಮನೆಜ ದೆಕಾಡಿನ ದಿವ್ಸ" ಕೈನ ಉತ್ತರ ದಿದ್ಯೊ. 22 ತೆಳಾಮಾ ಯುದ ಎ ಇಸ್ಕರಿಯುತ ಯುದ ನ್ಹವೈ. ತೆನೈಸೊ "ಪ್ರಭು, ತು ತುನೆ ಎ ದುನಿಯಾನೆ ನೈ ದೆಕಾಡ್ಯಾವಾಚಿ ಹಮೊನೆ ದೆಕಾಡುಸ ಕವಾನು ಶಾನೆ? ಕೈನ ಪುಚ್ಚೊ. 23 ಯೆಸು ಅಮ್ಮ ಜವಾಬ ದಿದ್ಯೊ; ಮನೆ ಮಯಾ ಕರಾಲೊ ಮಾರಾ ಉಪದೆಶನೆ ವಿಧೆಯ ಥಾವಸ. ಮಾರೊ ಬಾ ತಿನೆ ಮಯಾ ಕರಸ. ಹಮೆ ಭಂಬಿ ಜ಼ನಾ ತಿಕನ ಐನ ತಿನಾ ಕ್ಹಾತೆ ರ‍್ಹಯೆಸ. 24 ಕುನ್ನ ಮನೆ ನೈ ಮಯಾ ಕರ‍್ತೊ, ತೆ ಮಾರಿ ಉಪದೆಶನೆ ವಿಧೆಯ ನೈ ಥಾತೊ. ತುಮೆ ಐಕಾನಿ ಎ ಉಪದೆಶ ಮಾರಿ ನ್ಹವೈ, ಮನೆ ವಳಾಯಲ ಮಾರಾ ಬಾನು ವ್ಹೈ. 25 "ಹಜು಼ನ ಮಿ ತುಮಾರಾ ಕ್ಹಾತೆ ರ‍್ಹತಾಮಾಜ ಎ ಸಂಗತಿಯೊ ಕ್ಹಾರಾ ತುಮೊನೆ ಕದ್ಯೊಸ. 26 ತೆನೈಸೊ ಬಾ ಮಾರಾ ನಾಮ ಪರ ವಳೈನ ದಿವಾನು ಪವಿತ್ರ ಆತ್ಮಾ ತುಮೊನೆ ಹರಿ ಯಕ್ಕಬಿ ಉಪದೆಶ ಕರಸ. ವರಿ ಮಿ ತುಮೊನೆ ಕದಲ ಕ್ಹಾರಾ ಸಂಗತಿಯೊ ತುಮೊನೆ ಶೆ ದಿಲಾವಸ.